இகலானாம் இன்னாத எல்லாம் நகலானாம்

 

குறள் 860

இகலானாம் இன்னாத எல்லாம் நகலானாம்

நன்னயம் என்னும் செருக்கு

[பொருட்பால், நட்பியல், இகல்]

பொருள்

இகல் - பகை; போர் வலிமை சிக்கு அளவு புலவி

இகலான் - வெறுபினால் வரும் பகை

ஆம் - நீர்; ஈரம் வீடு மாமரம் அழகு சம்மதங்காட்டும்சொல்; கேள்விப்பட்டதைக்குறிக்கும்சொல்; இகழ்ச்சிக்குறிப்பு; அனுமதி, தகுதி, ஊக்கம்குறிக்கும்சொல்; ஆவது ஆகிய சாரியை அசைநிலை தன்மைப்பன்மைவிகுதி; உளப்பாட்டுத்தன்மைப்பன்மைவிகுதி.

இன்னாது - தீது; துன்பு

இன்னாத - இன்னாதா-தல் - துன்புறுதல் 

எல்லாம் - முழுதும், அனைத்தும்

நகுதல் - சிரித்தல்; மகிழ்தல்; மலர்தல்; கட்டவிழ்தல்; ஒளிவிடுதல்; புள்ளிசைத்தல்; அவமதித்தல்; தாழ்த்துதல்.

நகல் - சிரிக்கை; மகிழச்சி; நட்பு; ஏளனம்; படி.

நகலான் - மகிழ்வும் இன்பமுமாம் (நகல் – மகிழ்வு) – (இவற்றைத் தருகின்ற நல்ல நட்பு)

ஆம் - நீர்; ஈரம் வீடு மாமரம் அழகு சம்மதங்காட்டும்சொல்; கேள்விப்பட்டதைக்குறிக்கும்சொல்; இகழ்ச்சிக்குறிப்பு; அனுமதி, தகுதி, ஊக்கம்குறிக்கும்சொல்; ஆவது ஆகிய சாரியை அசைநிலை தன்மைப்பன்மைவிகுதி; உளப்பாட்டுத்தன்மைப்பன்மைவிகுதி.

நல் - நல்ல; வறுமை

நயம் - இன்பம்; அருள்; மகிழ்ச்சி; விருப்பம்; தன்மை; மேன்மை; போற்றுகை; அன்பு; பக்தி; நற்பயன்; மலிவு; மிகுதி; பயன்; நுண்மை; இனிமை; நீதி; கொடையாளி; கனமும்தேசிகமும்கலந்துபாடும்வகை

என்னும் - யாவும், எல்லாம்; என்றுசொல்லப்படும்; யாதும்; சிறிதும்.

 

செருக்கு - cerukku   s. pride, vanity, haughtiness, arrogance, self-impartance, அகங்கா ரம்; 2. exultation, excessive joy, களிப்பு; 3. ostentation, இடம்பம்; 4. mettle, intrepidity, rashness, ஆண்மை; 5. infatuation, illusion, மருள், மயக்கம், 6. aspiration, high hope, மனோராச்சியம்.

முழுப்பொருள்

பகையுணர்வால் துன்பம் மட்டுமே கிட்டும். அழிவே உண்டாகும். நிம்மதியும் இல்லை மகிழ்ச்சியும் இல்லை. அதுவே பகையை வளர்க்காமல் சிரித்து மகிழ்ந்து நல்லிணக்கத்துடன் நட்பாக வாழ்ந்தால் நற்மதிப்பும் மேமையும் பெருமையாக கிட்டும். பகையை வளர்க்காமல் நட்பை வளர்ப்பதே ஆண்மை எனவும் கூறலாம்.  

அவ்வாண்மையைப் பெற்ற காந்தி அவர்களை இவ்வுலகில் உள்ள எல்லோரும் போற்றுகிறார்கள் என்றால் அதற்கு காரணம் ஒன்றே. காந்தி அவர்கள் பகையை வளர்க்காமல் நட்புகளை வளர்த்தார். எதிர் தரப்பையும் மதித்து அவர்களிடம் உரையாடினார். அமைதியின் வழி உரையாடல்களை வளர்தெடுத்து நட்புகளை வளர்த்து விடுதலையை பெற்றுத்தந்தார். 

மேலும்: அஷோக் உரை

பரிமேலழகர் உரை

இகலான் இன்னாத எல்லாம் ஆம் ஒருவனுக்கு - மாறுபாடு ஒன்றானே இன்னாதன எல்லாம் உளவாம்; நகலான் நன்னயம் என்னும் செருக்கு ஆம் - நட்பு ஒன்றானே நல்ல நீதி என்னும் பெருஞ்செல்வம் உளதாம். (இன்னாதன - வறுமை,பழி,பாவம் முதலாயின. நகல் - மகிழ்தல். 'நகல்' என்பதூஉம் 'செருக்கு' என்பதூஉம் தத்தம் காரணங்கட்கு ஆயின. 'நயம் என்னும் செருக்கு' எனக் காரியத்தைக் காரணமாக உபசரித்தார். இவை மூன்று பாட்டானும் அவ்விருமையும் கூறப்பட்டன.).

மணக்குடவர் உரை

மாறுபாட்டினாலே துன்பங்களெல்லாம் உளவாம்: உடன்பட்டு நகுதலாலே நல்ல நயமாகிய உள்ளக்களிப்பு உண்டாம்.

மு.வரதராசனார் உரை

ஒருவனுக்கு இகலால் துன்பமானவை எல்லாம் உண்டாகும்,அதற்கு மாறான நட்பால் நல்ல நீதியாகிய பெருமித நிலை உண்டாகும்.

சாலமன் பாப்பையா உரை

மன வேறுபாட்டால் துன்பம் எல்லாம் உண்டாகும். நல்லிணக்க நட்பால், நீதி என்னும் செல்வச் செருக்கு உண்டாகும்.

இகல்காணான் ஆக்கம் வருங்கால் அதனை

 

குறள் 859

இகல்காணான் ஆக்கம் வருங்கால் அதனை

மிகல்காணும் கேடு தரற்கு

[பொருட்பால், நட்பியல், இகல்]

பொருள்

இகல் - பகை; போர் வலிமை சிக்கு அளவு புலவி

காணுதல் - அறிதல்; காண்டல்; சந்தித்தல்; செய்தல்; வணங்குதல்.

காணான் - காணாதவன் , அறியாதவன் 

இகல்காணான் -  பகையை எண்ணமாட்டான் (ஒருவனும்)

ஆக்கம் - ஆக்கக்கிளவி; அமைத்துக்கொள்ளுகை; கைகூடுகை; உண்டுபண்ணுகை; படைப்பு செல்வம் பொன் பெருக்கம் இலாபம் ஈட்டம் கொடிப்படை திருமகள் மங்களகரம் வாழ்த்து; ஆக்கக்கிளவி : ஆக்கம்உணர்த்தும்சொல்; செயற்கையைஉணர்த்தும்ஆயினான்; ஆயினாள்முதலியனவாய்வழங்கும்சொல்.

காலம் - பொழுது; தக்கசமயம்; பருவம்; பருவப்பயிர்; விடியற்காலம்; முடிவுகாலம்; தொழில்நிகழ்ச்சியைக்குறிக்கும்முக்காலம்; இசைக்குரியமூன்றுகாலம்; தாளப்பிரமாணம்.

வருங்கால் - வரும் பொழுது

அதனை - அந்த செயலை (அந்த தவறை)

மிகல் -   மிகுதல்; பெருமை; வெற்றி; எழுத்துஇரட்டிக்கை.

காணும் - காணுதல் - அறிதல்; காண்டல்; சந்தித்தல்; செய்தல்; வணங்குதல்.

கேடு - தீயவை, அழிவு; இழப்பு; வறுமை; தீமை; கெடுதல்; வேறுபாடு; அழகின்மை

தரற்கு - அவர்க்கு

முழுப்பொருள்

பகையை காணாமல் பகையை வளர்க்காமல் இருப்பவனுக்கு செல்வம் வரும். அவனுக்கு ஆக்கம் கைக்கூடும். அதுவே ஒருவன் பகையை வளர்த்தால் அவனுக்கு கேடே வரும். ஆதலால் பகையை வளர்ப்பது அறிவற்ற ஒரு பேதைமையான செயலாகும். 

மஹாத்மா காந்தி அவர்கள் சுதந்திரத்தின் பொழுது இந்தியாவுக்கு ஆங்கிலேயர்களிடம் இருந்து விடுதலை பெறவேண்டும் என்றுதானே போராடினாரே ஒழிய, ஆங்கிலேயர்கள் அயோக்கியர்கள் என்றேலாம் அவர்களிடம் பகைவளர்க்கவில்லை இந்தியர்களின் எண்ணங்களிலும் பகையை வளர்க்கவில்லை. ஆங்கிலேயருடன் உரையாடவே முற்பட்டார். அவர்களின் மனங்களை மாற்றவே முற்பட்டார். அதனால் தான் இந்தியா என்னும் பெரும் நாடு எவ்வித போரும் இன்றி அழிவும் இன்றி விடுதலையை பெற முடிந்தது. பகையை வளர்க்காமல் மக்களின் ஆக்க சக்தியை வளர்த்தார் காந்தி, அதனால் சுதந்திரத்தின் பின் இந்தியாவை கட்டமைக்க மக்கள் சக்தியும் எண்ணமும் உத்வேகமும் போதுமான அளவு தெளிவும் இந்தியாவிடம் இருந்தது. 

மேலும்: அஷோக் உரை

பரிமேலழகர் உரை

ஆக்கம் வருங்கால் இகல் காணான் - ஒருவன் தன்கண் ஆக்கம் வரும்வழிக் காரணம் உண்டாயினும் இகலை நினையான்; கேடுதரற்கு அதனை மிகல் காணும் - தனக்குக் கேடு செய்து கோடற்கண் காரணம் இன்றியும் அதன்கண் மிகுதலை நினைக்கும். (இகலான் வருங்கேடு பிறரான் அன்றென்பது தோன்ற, 'தரற்கு' என்றார். நான்காவதும் இரண்டாவதும் ஏழாவதன்கண் வந்தன. ஆக்கக் கேடுகட்கு முன் நடப்பன, இகலினது இன்மை உண்மைகள் என்பதாம்.).

மணக்குடவர் உரை

மாறுபடுதற்குக் காரண முண்டாயினும் ஆக்கம் வருங்காலத்து மாறுபாடு காணான்: கேடு வருங்காலத்து அதனை மிகுதலைக் காணும். இம் மாறுபாடு நல்வினை யுடையார்க்குத் தோன்றாதென்றவாறு.

மு.வரதராசனார் உரை

ஒருவன் தனக்கு ஆக்கம் வரும்போது இகலைக் கருதமாட்டான், தனக்கு கேடு தருவிக்கொள்ளும் போது அதனை எதிர்த்து வெல்லக் கருதுவான்.

சாலமன் பாப்பையா உரை

ஒருவனுக்கு நன்மை வரும் போது காரணம் இருந்தாலும் மனவேறுபாடு கொள்ள மாட்டான்.தனக்குத் தானேகேட்டை விளைவிக்க எண்ணுபவன், காரணம் இல்லாவிட்டாலும் மனவேறுபாடு கொள்ள எண்ணுவான்.

இகலிற்கு எதிர்சாய்தல் ஆக்கம் அதனை

 

குறள் 858

இகலிற்கு எதிர்சாய்தல் ஆக்கம் அதனை

மிக்லூக்கின் ஊக்குமாம் கேடு

[பொருட்பால், நட்பியல், இகல்]

பொருள்

இகலிற்கு - இகல் - பகை; போர் வலிமை சிக்கு அளவு புலவி

எதிர் - வருங்காலம்; எதிரிடை; முன்; முன்னுள்ளது; முரண்; கைம்மாறு; இலக்கு; போர்.

எதிர் - (வி)எதிர்என்னும்ஏவல்.

சாய்தல் - மெலிதல்; கவிழ்தல்; வளைதல்; திரண்டுசெல்லுதல்; நடுநிலைமைமாறுதல்; சார்தல்; நடந்தேறுதல்; ஒதுங்குதல்; கோள்முதலியவைசாய்தல்; படுத்தல்; தோற்றோடுதல்.

ஆக்கம் - ஆக்கக்கிளவி; அமைத்துக்கொள்ளுகை; கைகூடுகை; உண்டுபண்ணுகை; படைப்பு செல்வம் பொன் பெருக்கம் இலாபம் ஈட்டம் கொடிப்படை திருமகள் மங்களகரம் வாழ்த்து; ஆக்கக்கிளவி : ஆக்கம்உணர்த்தும்சொல்; செயற்கையைஉணர்த்தும்ஆயினான்; ஆயினாள்முதலியனவாய்வழங்கும்சொல்.

அதனை - அந்த செயலை (அந்த தவறை)

மிகல் -   மிகுதல்; பெருமை; வெற்றி; எழுத்துஇரட்டிக்கை.

ஊக்கின் - ஊக்குதல் - ஆட்டுதல்; நெகிழ்த்துதல்; தப்புதல்; ஆர்வமூட்டுதல்; முயலுதல்; கற்பித்தல்; நினைத்தல்; ஏறுதல்; நோக்குதல்.

ஊக்குமாம் - - ஊக்குதல் - ஆட்டுதல்; நெகிழ்த்துதல்; தப்புதல்; ஆர்வமூட்டுதல்; முயலுதல்; கற்பித்தல்; நினைத்தல்; ஏறுதல்; நோக்குதல்.

கேடு - தீயவை, அழிவு; இழப்பு; வறுமை; தீமை; கெடுதல்; வேறுபாடு; அழகின்மை

முழுப்பொருள்

பகையுணர்வு ஒருவரை கொள்ளும். பகையுணர்வு ஒருவரின் உள்ளத்தில் மகிழ்ச்சியை முகத்தில் புன்னகையை அழிக்கும். பகை தீது. அத்தகைய பகையுணர்வை அழிப்பதே ஒருவரின் எண்ணமாக இருத்தல் வேண்டும். 

ஆதலால் பகையுணர்வை அறுத்து (கிள்ளி எறிவது) நடுநிலையாக இருத்தலே ஆக்கத்தை தரும். பகையுணர்வை வளர்க்காது அதன் பக்கம் சாயாது இருத்தலே ஒருவருக்கு ஆக்கத்தை/செல்வத்தை தரும். பகையை அளவுக்கு மீறி வளர்த்தால் அல்லது பகையை வரவேற்றால் அதனால் வருவது கேடாகும் (அழிவு, தீது, துன்பம்).

இதற்கு இன்னொரு பொருளும் கொள்ளலாம். பகையுணர்வு வளரமால் இருக்க ஆக்கப்பூர்வமான செயல்களில் கவனத்தை செலுத்தலாம். பயனுள்ள செயலில் கவனத்தை செலுத்தினால் பயனற்ற அழிவற்ற பகையுணர்வுக்கு நேரம் இருக்காது. ஆதனால் அழிவும் இருக்காது. 

மேலும்: அஷோக் உரை

பரிமேலழகர் உரை

இகலிற்கு எதிர் சாய்தல் ஆக்கம் - தன் உள்ளத்து மாறுபாடு தோன்றியவழி அதனை எதிர்தலையொழிதல் ஒருவனுக்கு ஆக்கம் ஆம்; அதனை மிகல் ஊக்கின் கேடு ஊக்குமாம் - அது செய்யாது அதன்கண் மிகுதலை மேற்கொள்வானாயின் கேடும் தன்கண் வருதலை மேற்கொள்ளும். (எதிர்தல் - ஏற்றுக்கோடல், சாய்ந்த பொழுதே வருதலின், சாய்தல் ஆக்கம் என்றார். 'இகலிற்கு' எனவும், 'அதனை' எனவும் வந்தன வேற்றுமை மயக்கம்.).

மணக்குடவர் உரை

மாறுபாட்டிற்குச் சாய்தொழுகுதல் ஆக்கமாம்: அதனை மிகுதலை நினைக்கின் கேடு மிகும். இது மாறுபாட்டிற்குச் சாய்ந்தொழுகல் வேண்டுமென்றது.

மு.வரதராசனார் உரை

இகலுக்கு எதிரே சாய்ந்து நடத்தல் ஒருவனுக்கு ஆக்கமாகும், அதனை எதிர்த்து வெல்லக்கருதினால் கேடு அவனிடம் வரக் கருதும்.

சாலமன் பாப்பையா உரை

மனவேறுபாடு தோன்றும்போது அதை வரவேற்காமல் இருப்பது ஒருவனுக்குச் செல்வமாகும்; வரவேற்பது கேட்டையே வரவேற்ப‌தாகும்.

மிகல்மேவல் மெய்ப்பொருள் காணார் இகல்மேவல்

குறள் 857

மிகல்மேவல் மெய்ப்பொருள் காணார் இகல்மேவல்

இன்னா அறிவி னவர்

[பொருட்பால், நட்பியல், இகல்]

பொருள்

மிகல் - மிகுதல்; பெருமை; வெற்றி; எழுத்துஇரட்டிக்கை

மேவல் - சார்தல்; ஆசை; கலக்கை

மெய்ப்பொருள்  - உண்மை, உண்மையான நிலையான மெய்ப்பொருள் என்னவென்று; உண்மையானசெல்வம்; உண்மை; கடவுள்; நாயனார்அறுபத்துமூவருள்ஒருவர்.

காணார் - குருடர்; பகைவர்.

இகல் - பகை; போர் வலிமை சிக்கு அளவு புலவி

மேவல் - சார்தல்; ஆசை; கலக்கை

இன்னா - துன்பம்; தீங்குதருபவை; கீழ்மையான; இகழ்ச்சி வெறுப்பு

அறிவினவர் - அறிய மாட்டார்கள் 

முழுப்பொருள்

எத்தகைய மகிழ்ச்சியையும் நிம்மதியையும் ஆக்கத்தையும் செல்வத்தையும் தராத அழிவையும் மனநோயினையும் இழப்பையும் தரக்கூடிய பகை துன்பம் இகழ்ச்சி வெறுப்பு ஆகியவற்றை விரும்புபவர்கள் அறிவில்லாதவர்கள். அத்தகையவர்கள் பெருமையும் வெற்றியும் தரக்கூடிய மெய்ப்பொருளை உண்மையை ஒருபொழுதும் காண மாட்டார்கள். கண்முன்னே எத்தனை நீதி நூல்கள் எத்தனை மெய்ப்பொருளை உரைத்தாலும் அதை காண மறுக்கின்ற குருடர்கள் இந்த அறிவில்லாதவர்கள்.

கல்வி அதிகாரத்தின் கண் கற்ற, “கண்ணுடையர் என்பவர் கற்றோர் முகத்திரண்டு புண்ணுடையர் கல்லாதவர்” என்ற குறளை நினைவு கூறலாம். கண்முன் இருக்கும் அறிவைக் கல்லாதவனை கண்கள் இருக்குமிடத்தில் இரண்டு புண்களே கொண்டவன் என்று இழித்துரைத்தது இங்கும் பொருந்தும்

மேலும்: அஷோக் உரை

பரிமேலழகர் உரை

இகல் மேவல் இன்னா அறிவினவர் - இகலோடு மேவுதலையுடைய இன்னாத அறிவினையுடையார்; மிகல் மேவல் மெய்ப்பொருள் காணார் - வெற்றி பொருந்துதலையுடைய நீதி நூற்பொருளை அறியமாட்டார். (இன்னா அறிவு -தமக்கும் பிறர்க்கும் தீங்கு பயக்கும் அறிவு. வெற்றி - வழிநின்றார்க்கு உளதாவது. காணப்படும் பயத்¢ததாகலின், 'மெய்ந்நூல'¢ எனப்பட்டது. இகலால் அறிவு கலங்குதலின், காணார் என்றார். இவை இரண்டு பாட்டானும்இகலினார்க்கு வரும் தீங்கு கூறப்பட்டது.).

மணக்குடவர் உரை

மிகுதலைப் பொருந்துகின்ற உண்மைப் பொருளைக் காணமாட்டார், மாறுபாட்டினைப் பொருந்தின இன்னாத அறிவுடையார். இது மாறுபடுவார்க்கு மெய்ப்பொருள் தோன்றாதென்றது.

மு.வரதராசனார் உரை

இகலை விரும்புகின்ற தீய அறிவை உடையவர் வெற்றி பொருந்துதலுக்குக் காரணமான உண்மைப் பொருளை அறியமாட்டார்.

சாலமன் பாப்பையா உரை

மனவேறுபாட்டோடு கேடான அறிவையும் உடையவர், வெற்றி தரும் நீதிநூற் பொருளை அறியமாட்டார்.

இகலின் மிகலினிது என்பவன் வாழ்க்கை

குறள் 856
இகலின் மிகலினிது என்பவன் வாழ்க்கை
தவலும் கெடலும் நணித்து

[பொருட்பால், நட்பியல், இகல்]

பொருள்
இகலின் - இகல் - பகை; போர்; வலிமை; சிக்கு; அளவு; புலவி.

மிகல் -  மிகுதல்; பெருமை; வெற்றி; எழுத்துஇரட்டிக்கை.

இனிது -  இன்பந்தருவது; நன்மையானது; நன்றாக

என்பவன் - என்கின்றவன்

வாழ்க்கை - வாழ்தல்; வாழ்நாள்; இல்வாழ்க்கை; மனைவி; நல்வாழ்வுநிலை; செல்வநிலை; ஊர்; மருதநிலத்தூர்.

தவலும் - தவலுதல் - நீங்குதல்

கெடலும் - கெடல் - கெடு - கேடு; வறுமை; தவணை; எல்லை.

நணி - naṇi   n. நண்ணு-. Nearness, proximity; அணிமையான இடம் திரைபொரு முந்நீர்க்கரைநணிச் செலினும் (புறநா. 154)

நணித்து - நணித்தல் - அண்மையில் / விரைவில்

முழுப்பொருள்
மனதில் பகையிருந்தால் அகத்தில் மகிழ்ச்சியும் முகத்தில் சிரிப்பும் இல்லாமல் போய்விடும். ஆனால் அப்பகை மிக இனிது என்று பகையை கொண்டாடி பகையை வளர்ப்பவன் வாழ்க்கை மிக குறுகிய காலமே இருக்கும். விரைவில் இறந்துவிடுவான். அதுமட்டும் இன்றி அவனுடைய அழிவும் விரைவாகவே நடக்கும். 

மேலும்: அஷோக் உரை

ஒப்புமை

“பகைநேர் வார்உள ரான பண்பினால்

உகநேர் சிந்தி உலந்த ழிந்ததால்

மகனே கண்டிலை யோநம் வாழ்வெலாம்” (கம்ப.அரசியல்.16)

பரிமேலழகர் உரை
இகலின் மிகல் இனிது என்பவன் வாழ்க்கை - பிறரொடு மாறுபடுதற்கண் மிகுதல் எனக்கு இனிது என்று அதனைச் செய்வானது உயிர் வாழ்க்கை; தவலும் கெடலும் நணித்து - பிழைத்தலும் முற்றக் கெடுதலும் சிறிது பொழுதுள் உளவாம். (மிகுதல் - மேன்மேல் ஊக்குதல். 'இனிது' என்பது தான் வேறல் குறித்தல். பிழைத்தல் - வறுமையான் இன்னாதாதல். முற்றக் கெடுதல் - இறத்தல். இவற்றால் 'நணித்து' என்பதனைத் தனித்தனி கூட்டி, உம்மைகளை எதிரதும் இறந்ததும் தழீஇய எச்சவும்மைகளாக உரைக்க. பொருட்கேடும் உயிர்க்கேடும் அப்பொழுதே உளவாம் என்பதாம்.).

மணக்குடவர் உரை
பிறருடன் மாறுபாட்டின்கண் மிகுதல் இனிதென்று கருதுமவனும், அவன் வாழ்க்கையும் சாதலும் கெடுதலும் நணித்து. நிரனிறை. இது சாயானாயின் உயிர்க்கேடும் பொருட்கேடு முண்டாமென்றது.

மு.வரதராசனார் உரை
இகல் கொள்வதால் வெல்லுதல் இனியது என்று கருதுகின்றவனுடைய வாழ்க்கை தவறிபோதலும் அழிதலும் விரைவவில் உள்ளனவாம்.

சாலமன் பாப்பையா உரை
பிறருடன் மனவேறுபாடு கொண்டு வளர்வது நல்லதே என்பவன் வாழ்க்கை, அழியாமல் இருப்பதும் சிறிது காலமே; அழிந்து போவதும் சிறிது காலத்திற்குள்ளேயாம்.

இகலெதிர் சாய்ந்தொழுக வல்லாரை

குறள் 855
இகலெதிர் சாய்ந்தொழுக வல்லாரை யாரே
மிக்லூக்கும் தன்மை யவர்

[பொருட்பால், நட்பியல், இகல்]

பொருள்
இகல் - பகை; போர் வலிமை சிக்கு அளவு புலவி

எதிர் - வருங்காலம்; எதிரிடை; முன்; முன்னுள்ளது; முரண்; கைம்மாறு; இலக்கு; போர்.

சாய்ந்து - சாய்தல் - மெலிதல்; கவிழ்தல்; வளைதல்; திரண்டுசெல்லுதல்; நடுநிலைமைமாறுதல்; சார்தல்; நடந்தேறுதல்; ஒதுங்குதல்; கோள்முதலியவைசாய்தல்; படுத்தல்; தோற்றோடுதல்.

ஒழுக - ஒழுக - மெதுவாக; சிறிதுசிறிதாக; சொரிய; வடிய; ஓட.
ஒழுகுதல் - நீர்பாய்தல்; நீர்ப்பொருள்சொட்டுதல்; ஓடுதல்; பரத்தல்; ஒழுங்குபடுதல்; நடத்தல்; நீளுதல்; வளர்தல்; போதல்; பெருகியோடுதல்.

வல்லாரை - வல்லார் - வலிமையுடையவர்; திறமையுள்ளவர்; வலுக்குறைந்தோர்; திறமையில்லாதவர்

யாரே - எவரும்

மிகல் - மிகுதல்; பெருமை; வெற்றி; எழுத்துஇரட்டிக்கை.

ஊக்கும் - ஊக்குதல் - ஆட்டுதல்; நெகிழ்த்துதல்; தப்புதல்; ஆர்வமூட்டுதல்; முயலுதல்; கற்பித்தல்; நினைத்தல்; ஏறுதல்; நோக்குதல்.

தன்மை - குணம்; இயல்பு; நிலைமை; முறை; பெருமை; ஆற்றல்; நன்மை; மெய்ம்மை; தன்னைக்குறிக்குமிடம்; ஒரணி

யவர் - அவர் - அவன், அவள்என்பதன்பன்மைச்சொல்; ஒருவரைக்குறிக்கும்பன்மைச்சொல்.

முழுப்பொருள்
மனவேறுபாடு துளிர்க்கும் பொழுதே அதனை வளரவிடாமல் அல்லது பகை இருப்பினும் அதனை மறந்து எதிர் பக்கத்தில் உள்ளவரிடம் சென்று அவருடன் இணங்கும் மனமும் குணமும் உள்ளவர் வலிமையானவர் திறமையுள்ளவர். அத்தகையவரை வெல்ல முடியாது. ஆனால் அவரை வெல்ல முயற்சி செய்யும் ஆற்றல் படைத்தவர் யார்?  

ஊக்கும் என்றால் முயலுதல் என்ற பொருளை நாம் எடுத்துக்கொள்ள வேண்டும். பகையை வளர்க்காமல் நட்பை வளர்க்கும் மனமும் திறனும் உள்ளவரை வெல்ல யாரும் முயற்சிக்கக்கூட  மாட்டார்கள். 

ஆதலால் மனவேறுபாடுகளை துளிரிலேயே அழிப்பது நமக்கு நெடுங்காலத்திற்கு வெற்றியையும் நண்பர்களையும் தரும். 

மேலும்: அஷோக் உரை

பரிமேலழகர் உரை
இகல் எதிர் சாய்ந்து ஒழுக வல்லாரை - தம் உள்ளத்து மாறுபாடு தோன்றியவழி அதனை ஏற்றுக்கொள்ளாது சாய்ந்தொழுக வல்லாரை; மிகல் ஊக்கும் தன்மையவர் யார் - வெல்லக்கருதும் தன்மையுடையார் யாவர்? (இகலை ஒழிந்தொழுகல் வேந்தர்க்கு எவ்வாற்றானும் அரிதாகலின், 'வல்லாரை' என்றும், யாவர்க்கும் நண்பாகலின் அவரை வெல்லக் கருதுவார் யாவரும் இல்லை என்றும் கூறினார். இவை நான்கு பாட்டானும் இகலாதார்க்கு வரும் நன்மை கூறப்பட்டது.).

மணக்குடவர் உரை
இகலின் எதிர் சாய்ந்தொழுக வல்லாரை வெல்ல நினைக்கும் தன்மையவர் யார்தான். சாய்ந்தொழுக வேண்டுமென்றார் அது தோல்வி யாகாதோ வென்றார்க்கு அவரை வெல்வாரில்லை யென்றார்.

மு.வரதராசனார் உரை
இகலை எதிர்த்து நிற்காமல் அதன் எதிரே சாய்ந்து நடக்க வல்லவரை வெல்லக் கருதுகின்ற ஆற்றல் உடையவர் யார்.

சாலமன் பாப்பையா உரை
தன் மனத்துள் வேறுபாடு தோன்றும்போது அதை வளர்க்காமல் அதற்கு எதிராக நடக்கும் வலிமை மிக்கவரை வெல்ல எண்ணுபவர் யார்?

இகலென்னும் எவ்வநோய் நீக்கின்

குறள் 853

இகலென்னும் எவ்வநோய் நீக்கின் தவலில்லாத்

தாவில் விளக்கம் தரும்

[பொருட்பால், நட்பியல், இகல்]

பொருள்

இகல் - பகை; போர் வலிமை சிக்கு அளவு புலவி

என்னும் - யாவும், எல்லாம்; என்றுசொல்லப்படும்; யாதும்; சிறிதும்.

எவ்வ - எவ்விடம் - evviṭm   inter. Where? எந்தவி டம்.  

எவ்வ  - எவ்வை - எம்தங்கை; கவலை.

நோய் - துன்பம்; வருத்தம்; பிணி; குற்றம்; அச்சம்; நோவு.

நீக்கின் - நீக்குதல் - ஒழித்தல்; விடுவித்தல்; கழித்தல்; ஒதுக்குதல்; அழித்தல்; அகற்றுதல்; பிரித்தல்; திறத்தல்; மாற்றுதல்; கைவிடுதல்.

தவல் - குறைவு; கேடு; குற்றம்; இறப்பு; வறுமையால்வருந்துகை.

தவலுதல் - நீங்குதல்

இல்லாத் - இல்லாத்தனம் - வறுமை.

தா - ஒர்உயிர்மெய்யெழுத்து(த்+ஆ)வலிமை; வருத்தம்; கேடு; குற்றம்; பகை; பாய்கை; குறை.

தாவு - பாய்கை; செலவு; குதிரைநடை; எதிர்ப்பு; கேடு; வலிமை; பற்றுக்கோடு; துறைமுகம்; உறைவிடம்; பள்ளம்.

tāvu   n. தாவு²-. Ruin; கேடு தாவில்விளக்கந் தரும் (குறள், 853).  

இல் - இடம்; வீடு இல்லறம் மனைவி மருதமுல்லைநிலங்களின்தலைவியர்; குடி இராசி தேற்றாங்கொட்டை இன்மை சாவு எதிர்மறைஇடைநிலை; ஐந்தாம்வேற்றுமைஉருபு; ஏழாம்வேற்றுமைஉருபு.

விளக்கம் - தெளிவானபொருள்; தெளிவு; ஒளி; சந்திரகலை; மோதிரம்; புகழ்; விசாரணை; நீதிமன்றம்; அதிகம்; விளக்கு.

தரும் - கொடுக்கும் 

முழுப்பொருள்

ஒருவருக்கு ஒருவர் பகையாக இருந்தால் அது நமக்கு கேட்டினை தரும். ஏனெனில் பகையினால் வெறுப்பு உண்டாகும் கோபம் வரும். மன அமைதி கெடும். உடல் நலம் கெடும் (இரு நாட்டிற்கு இடையே என்றால் போர்) உண்டாகும். ஆதலால் விளைவது கேடே. பகை என்பது கவலையை தரும். கவலை என்பது நோய் ஆகும். 

ஆதலால் இந்த நோயை நாம் நீக்க வேண்டும் என்றால் நாம் பகையை நீக்க வேண்டும். அப்படி பகையை நீங்கினால் என்றும் நீங்காத கேடில்லாத வலிமையான அமைதியான தெளிவான குடியையும் (நாட்டினையும்) புகழையும் இருவருக்கும் (இரு நாட்டிற்கும்) தரும். முக்கியமாக மனதளவில் பகை இருக்க கூடாது. பகை இருந்தால் நிம்மதி போச்சு. பகையை மனதில் நீங்கி அமைதியாக வாழ்க. புகழ் பெறுக. 

இதை தான் மகாத்மா காந்தி அடிகள் அஹிம்சை முறையில் செயல்படுத்தினார். இரு தரப்பிற்கும் சமரசம் செய்ய எப்போதும் முற்பட்டார். பிரிட்டிஷார்களை அவர் எதிரிகளாக பார்க்கவில்லை. அவர்களுடன் உரையாடி சமரசம் செய்து முன்னேறினார். அஹிம்சை பாதையை உலகிற்கு காட்டினார். அதன் விளைவு இந்தியா மட்டும் இன்றி தென்னாபிரிக்கா போன்ற நாடுகளும் அஹிம்சை முறையில் சுதந்திரம் பெற்றது. 

வெறுப்பு, கோபமாகி, முடிவில் மாறாத பகையாகும் என்பதாலேயே, “தீராக் கோபம் போராய் முடியும்” என்பது கொன்றை வேந்தனில் ஔவையின் வாக்கு. அத்தகைய நோயை நீக்கினால், ஒருவருக்கு அது மாறாத புகழைத் தரும்.

“நோய்நாடி நோய்முதல் நாடி அதுதணிக்கும் வாய்நாடி வாய்ப்பச் செயல்” என்ற முதுமொழிக்கேற்ப, பகைதருவது வெறுப்பென்னும் நோயென்று அறிந்து, அதன் தொடக்கக் காரணத்தை அறிந்து, அதைத் தணிவிக்கும் வழியை நாடி, அதைத் தணிப்பதற்கு ஆவன செய்தாலே, எவ்வித எவ்வ நோயும் தீருமல்லவா? அம்முயற்சியால் நீங்காத, கேடு இல்லாத புகழும் வருவது உறுதியே.

மேலும்: அஷோக் உரை

பரிமேலழகர் உரை

இகல் என்னும் எவ்வ நோய் நீக்கின் - மாறுபாடு என்று சொல்லப்படுகின்ற துன்பத்தைச் செய்யும் நோயை ஒருவன் தன் மனத்தினின்று நீக்குமாயின்; தவல் இல்லாத் தாவில் விளக்கம் தரும் - அவனுக்கு அந்நீக்குதல் எஞ்ஞான்றும் உளனாதற்கும் ஏதுவாய புகழைக் கொடுக்கும். (தவல் இல்லாமை, அருத்தாபத்தியான் அப்பொருட்டாயிற்று. தாஇல் விளக்கம் - வெளிப்படை. யாவரும் நண்பராவர், ஆகவே, எல்லாச் செல்வமும் எய்திக் கொடை முதலிய காரணங்களால் புகழ் பெறும் என்பதாம்.).

மணக்குடவர் உரை

மாறுபடுதலாகிய இன்னாத நோயை நீக்குவானாயின், அந்நீக்குதல் கேடில்லாத குற்றமற்ற ஒளியினைத் தரும். இது தோற்றமுண்டா மென்றது.

மு.வரதராசனார் உரை

ஒருவன் இகல் என்று சொல்லப்படும் துன்ப நோயை நீக்கி விட்டால் அஃது அவனுக்கு அழிவில்லாத நிலையான புகழைக் கொடுக்கும்.

சாலமன் பாப்பையா உரை

மனவேறுபாடு என்னும் துன்பம் தரும் நோயை மனத்திலிருந்து நீக்கினால், அது ஒருவனுக்குக் கெடாத, அழியாத புகழைக் கொடுக்கும்.

பகல்கருதிப் பற்றா செயினும்

குறள் 852

பகல்கருதிப் பற்றா செயினும் இகல்கருதி 

இன்னாசெய் யாமை தலை

[பொருட்பால், நட்பியல், இகல்]

பொருள்
இகல் - பகை; போர் வலிமை சிக்கு அளவு புலவி

பகல் - பகுக்கை; நடு; நடுவுநிலை; நுகத்தாணி; முகூர்த்தம்; அரையாமம்; மத்தியானம்; பகற்போது; பிறரோடுகூடாமை; கட்சி; இளவெயில; அறுபதுநாழிகைகொண்டநாள்; ஊழிக்காலம்; சூரியன்; ஒளி; வெளி; கமுக்கட்டு.

கருதிப் - கருத்து - நோக்கம், தாற்பரியம், கொள்கை, எண்ணம், விருப்பம், சொற்பொருள், கவனம், இச்சை, விவேகம், சம்மதம், மனம், பயன், சங்கற்பம், தன்மதிப்பு.

பற்றா - பற்று அல்லாமல்

செயினும் -செய்தாலும்

இகல் -  பகை; போர் வலிமை சிக்கு அளவு புலவி

கருதி - கருத்து - நோக்கம், தாற்பரியம், கொள்கை, எண்ணம், விருப்பம், சொற்பொருள், கவனம், இச்சை, விவேகம், சம்மதம், மனம், பயன், சங்கற்பம், தன்மதிப்பு.

இன்னா - துன்பம்; தீங்குதருபவை; கீழ்மையான; இகழ்ச்சி வெறுப்பு

செய்யாமை - செய்யாதிருத்தல்

தலை - சிரம்; முதல்; சிறந்தது; வானம்; இடம்; உயர்ந்தோன்; தலைவன்; உச்சி; நுனி; முடிவு; ஒப்பு; ஆள்; தலைமயிர்; ஏழாம்வேற்றுமைஉருபு; ஓர்இடைச்சொல்; மேலே; தபால்கடிதத்தில்ஒட்டும்முத்திரைத்தலை; தலையோடு.

முழுப்பொருள்
ஒருவர் நம்முடன் கூடக்கூடாது என்று எண்ணி வெறுக்கத்தக்கச் செயல்களை நமக்கு செய்தாலும் அதனை பொருட்படுத்தாது இருத்தல் வேண்டும். ஏட்டிக்குப் போட்டியாக அவருக்கு தீங்கு விளைவிக்கும் செயல்களை, கீழ்மையான செயல்களை, வெறுக்கத்தக்க செயல்களை செய்யாது இருத்தலே சிறந்தது ஆகும்.

இக்குறளில் பார்க்க வேண்டிய ஒன்று என்னவென்றால் எது மாட்சிமை என்றால் பிறருக்கு (எதிரிக்கும், பகைவருக்கும்) இன்னா செய்யாதிருத்தல். அதுமட்டும் இன்றி நம்முடைய ஆற்றலையும் எண்ணங்களையும் ஆக்கப்பூர்வமான செயல்களில் செலவிட வேண்டும். பயன்தராத செயல்களில் ஈடுபடக்கூடாது.

ஒரு கண்ணுக்கு மறுகண் என்று பழி தீர்க்கும் படலத்திலேயே வாழ்ந்தால் உலகம் குருடாகித்தானே போகும்? இதையே இக்குறள் வாயிலாக உணர்த்துகிறார். இகலை இகல வேண்டும்

மேலும்: அஷோக் உரை

பரிமேலழகர் உரை

பகல் கருதிப் பற்றா செயினும் - தம்மொடு கூடாமையைக் கருதி ஒருவன் வெறுப்பன செய்தானாயினும்; இகல் கருதி இன்னாசெய்யாமை தலை - அவனொடு மாறுபடுதலைக் குறித்துத் தாம் அவனுக்கு இன்னாதவற்றைச் செய்யாமை உயர்ந்தது. (செய்யின் பகைமை வளரத் தாம் தாழ்ந்து வரலானும், ஒழியின் அப்பற்றாதன தாமே ஓய்ந்து போகத் தாம் ஓங்கி வரலானும், 'செய்யாமை தலை' என்றார். 'பற்றாத' என்பது விகாரமாயிற்று.).

மணக்குடவர் உரை

தம்மோடு பற்றில்லாதார் வேறுபடுதலைக் கருதி இன்னாதவற்றைச் செய்தாராயினும் அவரோடு மாறுபடுதலைக் கருதித் தாமும் அவர்க்கு அவற்றைச் செய்யாமை நன்று. இது மேற்கூறிய குற்றமும் குணமும் பயக்குமாதலின் மாறுபடுதற்குக் காரணமுள வழியும் அதனைத் தவிர்தல் வேண்டும் என்றது.

மு.வரதராசனார் உரை

ஒருவன் தன்னோடு பொருந்தாமல் வேறுபடுதலைக் கருதி அன்பில்லாதவற்றைச் செய்தாலும் தான் இகழ் கொண்டு அவர்க்கு துன்பம் செய்யாதிருத்தல் சிறந்ததாகும்.

சாலமன் பாப்பையா உரை

நம்மோடு இணங்கிப் போக முடியாமல் ஒருவன் நமக்கு வெறுப்புத் தருவனவற்றைச் செய்தாலும், அவனைப் பகையாக எண்ணித் தீமை செய்யாதிருப்பது சிறந்த குணம்.

இன்பத்துள் இன்பம் பயக்கும்

குறள் 854
இன்பத்துள் இன்பம் பயக்கும் இகலென்னும்
துன்பத்துள் துன்பங் கெடின்.

[பொருட்பால், நட்பியல், இகல் ]

பொருள்
இன்பத்துள் - இன்பம் எனப்படுவதில் எது இன்பம் என்றால்
இன்பம் - மனமகிழ்ச்சி; இனிமை ஒன்பான்சுவைகளுள்ஒன்று; சிற்றின்பம், காமம் திருமணம் நூற்பயன்களுள்ஒன்று.
பயக்கும்- உருவாகும்
இகல் - பகை; போர் வலிமை சிக்கு அளவு புலவி
என்னும் - என்கிற
துன்பத்துள் - துன்பங்களில் மிகுந்த துன்பம்
துன்பம் - மனவருத்தம்; மெய்வருத்தம்; நோய்; கெடுதி; வறுமை.
கெடின் - கேடு

முழுப்பொருள்

ஒரு மனிதனுக்கு துன்பங்கள் பல வரும். ஒவ்வொரு துன்பமும் ஒரே அளவு துன்பத்தை தராது. ஆனால் மனவேறுபாட்டால், பகையால் வரும் துன்பமே மிக அதிகம் (உதாரணமாக இந்திய பாகிஸ்தானுக்கு இடையே யான பகை இரு நாட்டிற்கு 1947 ஆண்டு முதல் இன்று வரை 70 ஆண்டுகளாக மிகுந்த துன்பத்தை தருகிறது) . அத்தகைய (மன) பகை என்னும் துன்பத்தை அழித்தால் (குழித் தோண்டி புதைத்தால்) இன்பங்களில் எல்லாவற்றிலும் இன்பத்தை அது உருவாக்கும்.

ஆகவே நாம் மன வேறுபாடு, பகை என்னும் உணர்வுகளை மனதில் வளர்த்துக்கொள்ளாமல் இருக்க வேண்டும். இத்தகைய எண்ணங்கள் நம் மனதில் காழ்ப்பை உருவாக்கும், நமது ஆற்றலை குறைக்கும். இவ்வாற்றலை வைத்து நாம் ஆக்கப்பூர்வமான செயல்கள் பலவற்றை செய்யலாம். அதுவே இன்பம் பயக்கும்.

மேலும் அஷோக் உரை

பரிமேலழகர் உரை

இகல் என்னும் துன்பத்துள் துன்பம் கெடின் - மாறுபாடு என்று சொல்லப்படுகின்ற துன்பங்கள் எல்லாவற்றினும் மிக்க துன்பம் ஒருவனுக்கு இல்லையாயின்; இன்பத்துள் இன்பம் பயக்கும் - அவ்வின்மை அவனுக்கு இன்பங்கள் எல்லாவற்றினும் மிக்க இன்பத்தினைக் கொடுக்கும். (துன்பத்துள் துன்பம் - பலரொடு பொருது வலி தொலைதலான் யாவர்க்கும் எளியனாயுறுவது. அதனை இடையின்றியே பயத்தலின். 'இகல் என்னும்' என்றார். இன்பத்துள்இன்பம் - யாவரும் நட்பாகலின் எல்லாப் பயனும் எய்தியுறுவது.).

ஞா. தேவநேயப் பாவாணர் உரை

இகல் என்னும் துன்பத்துள் துன்பம் கெடின்- மாறுபாடு என்று சொல்லப்படும் தலையாய துன்பம் ஒருவனுக்கு இல்லையாயின்; இன்பத்துள் இன்பம் பயக்கும்- அவ்வில்லாமை அவனுக்குத் தலையாய இன்பத்தை விளைக்கும்.

'துன்பத்துள் துன்பம்' எல்லார்க்கும் பொல்லாதவனாய் எங்கும் எப்போதும் துன்புறுதல். 'இன்பத்துள் இன்பம்' எல்லார்க்கும் நல்லவனாய் எங்கும் எப்போதும் இன்புறுதல்.

மணக்குடவர் உரை

இன்பத்தின் மிக்க இன்பம் எய்தும்: மாறுபாடாகிய துன்பத்தின் மிக்க துன்பம் கெடுமாயின். எல்லா இன்பத்தின்மிக்க வீடுபேற்றின்பம் எய்தும் என்றவாறு.

மு.வரதராசனார் உரை
இகல் என்று சொல்லப்படும் துன்பங்களில் கொடிய துன்பம் கெட்டுவிட்டால், அஃது அவனுக்கு இன்பங்களில் சிறந்த இன்பத்தை கொடுக்கும்.

சாலமன் பாப்பையா உரை

துன்பங்கள் எல்லாவற்றிலும் மிகக் கொடிதான மனவேறுபாடு எனும் துன்பம், ஒருவனது உள்ளத்துள் இல்லை என்றால், அது அவனுக்கு இன்பங்கள் எல்லாவற்றிலும் சிறந்த இன்பத்தைத் தரும்.

இகலென்ப எல்லா உயிர்க்கும்

குறள் 851

இகலென்ப எல்லா உயிர்க்கும் பகலென்னும் 

பண்பின்மை பாரிக்கும் நோய்.

[பொருட்பால்,  நட்பியல், இகல்]

(For meaning in English, scroll to the bottom of this post)

பொருள்

இகல் - பகை; போர்; வலிமை; சிக்கு; அளவு; புலவி.
இகலாட்டம், s. Diversity of opi nions, controversy, disputation, alter cation, போராட்டம். 2. Competition, con tention, vieing, rivalry, shifting a duty on another, முரணுகை. எந்நேரமுமிகலாட்டமாயிருக்கிறவன். He who is always disputing.

என்ப - என்பது

இகல் என்ப - மனவேறு பாடு என்பது யாது என்று நூலோர் சொல்வார்கள் என்றால்

எல்லா - எல்லாம் ; முழுதும்; யாவும் 

உயிர் - காற்று; உயிர்வளி; சீவன் ஆதன் ஓரறிவுயிர்முதலியஉயிரினம்; உயிரெழுத்து ஓசை ஒருநாழிகையில்4320-ல்ஒருகூறு; சன்மலக்கினம்

எல்லா உயிர்க்கும்  - எல்லா உயிர்கள் இடத்திலும்

பகல் - பகுக்கை; நடு; நடுவுநிலை; நுகத்தாணி; முகூர்த்தம்; அரையாமம்; மத்தியானம்; பகற்போது; பிறரோடுகூடாமை; கட்சி; இளவெயில; அறுபதுநாழிகைகொண்டநாள்; ஊழிக்காலம்; சூரியன்; ஒளி; வெளி; கமுக்கட்டு.

பகல் - பகு - பிறரோடு கூடாமை

என்னும் - யாவும், எல்லாம்; என்றுசொல்லப்படும்; யாதும்; சிறிதும்

பகலென்னும் - பிறரோடு கூடாது இருத்தல்

பண்பு -  வண்ணம், வடிவு, அளவு, சுவைஎன்னும்நாற்குணம்; இயல்பு; மனத்தன்மை; பிறர்இயல்பைஅறிந்துநடக்கும்நற்குணம்; விதம்; பண்புப்பெயர்; அழகு; முறை; செய்கை.

இன்மை - இல்லாமை; வறுமை உடைமைக்குமறுதலை; அறுவகைவழக்கினுள்ஒன்று.

பண்பின்மை - பண்பு இல்லாது

பார் - பரப்பு; தேரின்பரப்பு; வண்டியின்நெடுஞ்சட்டம்; பூமி; நிலம்என்னும்பூதம்; நாடு; வன்னிலம்; பாறை; தடை; உரோகிணிநாள்; பருமை; வரம்பு; முத்துவிளையும்திட்டு; மறையோன்; புத்தன்; பாத்திபலகொண்டபகுதி; அடுக்கு; தடவை.

பார் - பூமி, நிலம்

பாரி-த்தல் -   pāri-   11 v. cf. sphāri. intr.1. To spread, expand; to abound; பரவுதல்.இவணலம் பாரித்திட்ட விந்நகர் (சீவக. 706). 2. Tobe bulky, huge; பருத்தல். Colloq. 3. To increase; மிகுதியாதல். தாரிப்பின்றிப் பசிதலைக் கொள்வது பாரித்து (பெரியபு. இளையான். 9). 4. Toarise, appear, come into being; தோன்றுதல்.பகல்செய் மண்டிலம் பாரித்தாங்கு (பெரும்பாண். 442).5. To prepare; ஆயத்தப்படுதல். பாயிய வெழுந்தவேங்கை பாரிக்குமளவில் (சூளா. துற. 19).--tr. 1.To foster; வளர்த்தல். பண்பின்மை பாரிக்கு நோய்(குறள், 851). 2. To cause to appear; தோன்றச்செய்தல். 3. To cause to be obtained;அமைத்துக்கொடுத்தல். பரமபதம் பாகவத ரனைவருக்கும் பாரித்தானால் (அரிசமய. பத்திசா. 98). 4. Tomake, form, construct, create, constitute; உண்டாக்குதல். (W.) 5. To fill up, complete;நிறைத்தல். பாரித்துள்ள இப்பண்டமும் (திருவிளை.குண்டோ. 16). 6. To wear, as ornaments; அணிதல். கைவளை பாரித்தார் (இராமநா. பால. 21). 7.To worship with flowers; அருச்சித்தல். தடமலரெட

நோய் - துன்பம்; வருத்தம்; பிணி; குற்றம்; அச்சம்; நோவு.

பாரிக்கும் நோய் - உலகத்தில் நிலவும் நோய்

முழுப்பொருள்
இகல் என்றால் பகைமை, போர், முரணுகை, மனவேறுபாடு. அத்தகைய இகல் என்பது யாது என்றால் எல்லா உயிர்களையும் பகுத்து அதனுடன் இணங்கிச் செல்லாமல் அதனுடன் கூடாது இருப்பது. இத்தகைய பண்பின்மையை (பண்பு இன்மை) வளர்க்கும் தீய குணமே/நோயே மனவேறுபாடு/இகல் என்று நூலோர்/சான்றோர் சொல்லுவர்.

குடும்பம் உறவுகள் என்றால் ஏற்ற தாழ்வுகள் வேறுபாடுகள் இருப்பது எல்லா மனிதர்களுக்கும் இருப்பது போன்று இயல்பான ஒன்று தான். ஊர்க் கூடித்தான் தேர் இழுக்க வேண்டும். விட்டுக்கொடுத்தான் குடும்பத்தில் உறவுகளை பேண வேண்டும். வாழ்நாள் முழுதும் செய்ய தேவையாக இருந்தாலும் செய்ய வேண்டும். ஏனெனில் பகைவளர்த்து தனித்து வாழ்ந்து நாம் சாதிப்பது ஒன்றுமில்லை. அதற்காக சுயமரியாதையை குறைத்துக்கொண்டு உறவு வளர்க்கவேண்டியதில்லை. சுயமரியாதை பாதிக்கப்படும் இடங்களில் அமைதியாக இருக்க வேண்டியதில்லை. ஆனால் நன்றல்லவற்றை அன்றே மறப்பதே நன்று. அது பகையை வளர்க்காது நம் நிம்மதியை காப்பாற்றும். ஏனெனில் நகையும் உவகையும் கொல்லும் சினத்தின் பகையும் உளவோ பிற?. பாதிப்பிரச்சனைகள் போனவற்றை பற்றிப் பேசி பேசி ஊதிப் பெருக்கி வளர்ப்பவை யாகும். அது சில உறவுகள் பிரச்சனைகளை தூபம் போட்டு வளர்த்துவிடுவதில் கெட்டிகாரர்கள். ஆதலால் நினைவில் கொள்ளுகள் ”பகல் என்னும் பண்பு இன்மை இந்த பார் உலகில் ஒரு நோயாகும்”. நோயினை விலகி இருங்கள்.

பரிமேலழகர் உரை

எல்லா உயிர்க்கும் பகல் என்னும் பண்பு இன்மை, பாரிக்கும் நோய் - எல்லா உயிர்கட்கும் பிற உயிர்களோடு கூடாமை என்னும் தீக்குணத்தை வளர்க்கும் குற்றம்; இகல் என்ப - இகல் என்று சொல்லுவர் நூலோர்.

விளக்கம் (மக்களையும் விலங்குகளோடு ஒப்பிப்பது என்பது தோன்ற 'எல்லா உயிர்க்கும்' என்றும், பகுதிக்குணத்தை இடைநின்று விளைத்தலின் 'பகல் என்னும் பண்பு இன்மை' என்றும் கூறினார். நற்குணம் இன்மை அருத்தாபத்தியால் தீக்குணமாயிற்று. இதனான் இகலது குற்றம் கூறப்பட்டது.)

ஞா. தேவநேயப் பாவாணர் உரை

இகல்-மாறுபாடு; எல்லா உயிர்க்கும் பகல் என்னும் பண்பு இன்மை பாரிக்கும் நோய்- இயங்குதிணைப்பட்ட எல்லாவுயிர்கட்கும் இனத்தொடு கூடி வாழாமைக்கு ஏதுவான, பிரிவினை யென்னும் தீய குணத்தை வளர்க்கும் மனநோய்; என்ப- என்று கூறுவர் அறநூலார்.

சேக்கையும் உணவும் இணைவிழைச்சும் பற்றி அஃறிணையுயிரினங்கட்குள்ளும் இகல் விளைதலின், 'எல்லாவுயிர்க்கும்' என்றும், ஒன்றுபட்டிருக்க வேண்டிய இனத்தைப் பல்வேறு பிரிவாகப் பகுத்தலால் 'பகல்' என்றும், கூறினார். சேக்கை தங்குமிடம். இகலென்னுந் தீக்குணமுடைய மாந்தர் உயர்திணையாகாது அஃறிணைப்பாற்படுவர் என்பது தோன்றப் 'பண்பின்மை பாரிக்கு நோய்' என்றார்.

மணக்குடவர் உரை

எல்லா வுயிர்க்கும் வேறுபடுதலாகிய குணமின்மையைப் பரப்பும் துன்பத்தை, இகலென்று சொல்லுவார் அறிவோர். இஃது இகலாவது இதுவென்று கூறிற்று. 

மு.வரதராசனார் உரை

எல்லா உயிர்களுக்கும் மற்ற உயிர்களோடு பொருந்தாமல் வேறுபடுதலாகிய தீயப் பண்பை வளர்க்கும் நோய் இகழ் (மாறுபாடு) என்று சொல்வர் அறிஞர்.

சாலமன் பாப்பையா உரை

எல்லா உயிர்களிடத்திலும் இணங்கிச் சேராமல் இருக்கும் தீய குணத்தை வளர்க்கும் நோயே, மனவேறுபாடு என்று கூறுவர்.

English Meaning - As I taught a kid - Rajesh

இகல் means enmity/war/conflict/Rivalry. What is rivalry? Rivalry breeds differences/discrimination among humans (and all organisms) thereby separating them just like day and night doesn't gel together. Rivalry is a dangerous trait; a disease that kills us, friendship, relationships, families, societies. So, one should not support rivalry or discrimination

Questions that I ask to the kid

What is rivalry? Why rivalry is considered a disease?