கரத்தலும் ஆற்றேன்இந் நோயைநோய்

குறள் 1162

கரத்தலும் ஆற்றேன்இந் நோயைநோய் செய்தார்க்கு

உரைத்தலும் நாணுத் தரும்

[காமத்துப்பால், கற்பியல், படர்மெலிந்திரங்கல்]

பொருள்

படர் - செல்லுகை; ஒழுக்கம்; வருத்தம்; நோய்; நினைவு; பகை; மேடு; துகிற்கொடி; படைவீரர்; எமதூதர்; ஏவல்செய்வோர்; இழிமக்கள்; தேமல்; தூறு; வழி; தறுகண்மை

படர் - (வி)தொடர், படர்என்ஏவல்.படர்

மெலிந்து - மெலிதல் - வலிமைகுறைதல்; உடல்இளைத்தல்; வருந்துதல்; அழிதல்; எளியதாதல்; வல்லினம்தனக்கினமானமெல்லினமாகமாறுதல்; ஓசையில்தாழ்தல்.

இரங்கல் - அழுகை; நெய்தல் உரிப்பொருள் ஒலி யாழ்நரம்போசை.

கரத்தலும் - கரத்தல் - மறைத்தல்; கவர்தல்; கெடாதிருத்தல்; அழித்துமுதற்காரணத்தோடுஒடுக்குதல்; கெடுதல்.

ஆற்றுதல் - வலியடைதல்; கூடியதாதல்; போதியதாதல்; உய்தல் உவமையாதல்; செய்தல் தேடுதல் உதவுதல் நடத்துதல் கூட்டுதல் சுமத்தல் பசிமுதலியனதணித்தல்; துன்பம்முதலியனதணித்தல்; சூடுதணித்தல்; ஈரமுலர்த்துதல்; நூல்முறுக்காற்றுதல்; நீக்குதல்

ஆற்றேன் - செய்யமுடியுமோ

இந் - இந்த

நோயை - நோய்

நோய் - துன்பம்; வருத்தம்; பிணி; குற்றம்; அச்சம்; நோவு.

செய்தல் -  இயற்றுதல்; உண்டாக்கல்; சம்பாதித்தல்; ஒத்தல்.

செய்தார்க்கு - உண்டாக்கியவருக்கு

உரைத்தல் - ஒலித்தல்; சொல்லுதல் தேய்த்தல் மாற்றறியத்தேய்த்தல்; மெருகிடுதல் பூசுதல்

உரைத்தலும் - சொல்லுதல்

நாணுத் - நாணம் - வெட்கம்; அறிவு; பயபக்தி; மானம்; தணிகை; கூச்சம்; மகடூஉக்குணம்நான்கனுள்ஒன்று.

தரும் - ஈட்டும்; தரும்

முழுப்பொருள்

அவர் மேல் நான் காதல்கொண்டு உள்ளேன். இதனை நான் அறிவேன். ஊரார் அறியமாட்டார்கள். ஆனால் இந்த ஆசைநோயால் நான் படும் பாடு சொல்லி மாலாது. என் மனதிற்குள்ளே இருக்கும் இக்காதலை மற்றவர்களிடம் சொல்ல கூடாது என்று தான் நினைக்கிறேன். ஆனால் என்மேல் படர்ந்துள்ள (காதலினால் ஆன) பசலைநோயானது மறைக்ககூடிய ஒன்றோ? இல்லை. இது உலகிற்கு என்காதலை அறிவித்துவிடும். அதற்கு முன்னர் என் காதலருக்கு என் காதலை சொல்ல வேண்டும் என்று நினைக்கிறேன். ஏனோ பாழாய்போன என் நாணம் என்னும் வெட்கம் என்னை தடுகிறது.

ஒருபக்கம் என் பசலைநோய் என்காதலை வெளிப்படுத்த தள்ளுகிறது மறுபக்கம் என் வெட்கம் என்னை தடுகிறது. 

மேலும்: அஷோக் உரை

பரிமேலழகர் உரை

('ஈண்டையார் அறியாமல் மறைத்தல் ஆண்டையார் அறியத் தூது விடுதல் என்னும் இரண்டனுள் ஒன்று செயல் வேண்டும்' என்ற தோழிக்குச் சொல்லியது). இந்நோயைக் கரத்தலும் ஆற்றேன்-இந்நோயை ஈண்டை அறியாமல் மறைத்தலும் வல்லேனாகின்றிலேன்; நோய் செய்தார்ககு உரைத்தலும் நாணுத் தரும் - ஆகாக்கால், நோய் செய்தவர்க்கு உரைக்க எனின், அதுவும் எனக்கு நாணினைத் தாரா நின்றது, இனி என் செய்கோ? (ஒருகாலைக்கு ஒருகால் மிகுதலின், 'கரத்தலும் ஆற்றேன்' என்றும், சேயிடைச் சென்றவர்க்கு இது சொல்லித் தூதுவிட்டால் இன்னும் இருந்தேன் என்பது பயக்கும் என்னும் கருத்தால், 'நாணுத் தரும்' என்றும் கூறினாள்.)

மணக்குடவர் உரை

இந்நோயை மறைக்கவும் அறிகின்றிலேன். இந்நோயைச் செய்தார்க்குச் சொல்லவும் நாணமாகாநின்றது என்றவாறு.<br /> இது குறிப்பறிதற் பொருட்டுக் கூறிய தோழிக்குத் தலைமகள் கூறியது.

மு.வரதராசனார் உரை

இக் காமநோயைப் பிறர் அறியாமல் முற்றிலும் மறைக்கவும் முடியவில்லை, நோய் செய்த காதலர்க்குச் சொல்வதும் நாணம் தருகின்றது.

சாலமன் பாப்பையா உரை

இந்தத் துன்பத்தை என்னால் மறைக்கவும் முடியவில்லை. துன்பத்தைத் தந்த இவருக்கு (எழுத்தில் தொலைபேசியில்) இதைச் சொல்லவும் வெட்கமாக இருக்கிறது.

குறட் கருத்து  (நன்றி: திரு. தமிழ்க்கடல் நெல்லை கண்ணன்)

மறைத்து விட முடிகிறதா இந்தக் காதல்

மனத்திற்குள் கிடக்கிறதா அந்தோ அந்தோ

இறைத்து விட்ட நீர் போல ஊரார்க் கெல்லாம்

எப்படித் தான் தெரிந்ததுவோ புரியவில்லை

உரைத்திடலாம் அவருக்கென் துன்பம் என்றால்

உடன் பிறந்த நாணம் அதோ தடுக்கிறது

தரத் தந்தான் நோயிதனை அவனே யன்றோ

தானாகத் தழுவி இதைத் தீர்க்க வேண்டும்

அழிவி னவைநீக்கி ஆறுய்த்து

குறள் 787

அழிவி னவைநீக்கி ஆறுய்த்து அழிவின்கண்

அல்லல் உழப்பதாம் நட்பு

[பொருட்பால், நட்பியல், நட்பு]

பொருள்

அழிவினவை -அழிவு - கேடு; தீமை செலவு வறுமை வருத்தம் மனவுறுதியின்மை; தோல்வி கழிமுகம்

அழிவு - கேடு; தீமை; செலவு; வறுமை; வருத்தம்; மனவுறுதியின்மை; தோல்வி; கழிமுக

அழிவின் - அழிவில் இருந்து

அவை - மாந்தர்கூட்டம்; அறிஞர்கூட்டம்; சபாமண்டபம்; புலவர்; நாடகஅரங்கு; பன்மைச்சுட்டு [pronoun (அவ்) plural of அது, they, those things.]; அப்பொருள்கள்.

நீக்கி - ஒழித்தல்; விடுவித்தல்; கழித்தல்; ஒதுக்குதல்; அழித்தல்; அகற்றுதல்; பிரித்தல்; திறத்தல்; மாற்றுதல்; கைவிடுதல்.

ஆறு - நதி; வழி பக்கம் சமயம் அறம் சூழச்சி; விதம் இயல்பு ஓர்எண்ணிக்கை; தலைக்கடை

உய்த்து - உய்த்தல் - செலுத்துதல்; கொண்டுபோதல்; சேர்த்தல்; நடத்துதல்; அமிழ்த்தல்; நுகர்தல்; கொடுத்தல்; அனுப்புதல்; குறிப்பித்தல்; அறிவித்தல்; ஆணைசெலுத்துதல்; ஆயுதத்தைச்செலுத்துதல்; உய்யச்செய்தல்; நீக்குதல்.

ஆறு உய்த்து -  நல் அற வழியில் (நண்பனை) செலுத்துதல், உண்மை நிலை எடுத்து உரைத்தல், தீயவழியின் பின்விளைவுகளை எடுத்து உரைத்தல், அறவழியின் மாண்புகளையும் எடுத்து உரைத்தல்

அழிவு - கேடு; தீமை செலவு வறுமை வருத்தம் மனவுறுதியின்மை; தோல்வி கழிமுகம்

கண் - விழி; கண்ணோட்டம்; பீலிக்கண்; கணு; மரக்கணு; தொளை; மூங்கில்முரசடிக்குமிடம்; மூட்டுவாய்; பெருமை; இடம்; ஏழனுருபு; அறிவு; பற்றுக்கோடு; உடம்பு; அசை; உடலூக்கம்.

அழிவின் கண் - (நண்பன்) அழிவின் பாதையில் செல்கிறான என்ற கண்ணோட்டம் கொண்டு, அல்லது விதியால் வரும் துன்பங்கள்

அல்லல் - துன்பம்

உழப்பு - முயற்சி, ஊக்கம்; வருத்தம்; பழக்கம்; வலிமை.

உழப்பது - உழப்புதல் - மழுப்புதல்; குழப்பிப்பேசுதல்; போலிவாதஞ்செய்தல்; காலங்கடத்துதல்

ஆம் - அழகு

நட்பு - சிநேகம்; உறவு; சுற்றம்; நண்பன்; யாழின்நாலாம்நரம்பு; காதல்; அரசாங்கம்ஆறனுள்ஒன்றாகியநட்பரசர்; கையூட்டு; மாற்றரசரோடுநட்புச்செய்கை.

முழுப்பொருள்

தன்னுடைய நண்பர் தீய வழிகளில் சென்றால் அவரை அவ்வழிகளில் செல்லாது தடுக்க வேண்டும். அதற்கு ஆவனவற்றை செய்ய வேண்டும். தடுமாறி விழும்பொழுது அவருக்கு நல் அறம் புகட்டி அவரை நல்வழியில் மீட்க வேண்டும். (குறிக்கோளை அடைய தேவையான பாதை தெரிந்தால் பயணம் எளிதாகும் ஊக்கம் கிடைக்கும்). அது மட்டும் இன்றி, அந்த நண்பருக்கு ஊழினால் அல்லது எதிரிகளால் துன்பங்கள் வரலாம். அந்த நேரத்தில் அவரிடம் இருந்து விளகிக்கொள்ளாமல், அவருடையத் துன்பத்தைப் புரிந்துக்கொண்டு அவரின் மீதுக் கண்ணோட்டம் (தாட்சீனியம்) கொண்டு அவருக்குப் பக்க பலமாக இருக்க வேண்டும். இப்படி அவருடைய வருத்தத்தை பகிர்ந்துக்கொண்டு, துன்பத்தில் இருந்து மீண்டு வர வழி செய்து, நண்பருக்கு வலிமை சேர்க்க வேண்டும். இதுவே நட்பாகும். 

சடாயு உயிரீ நீத்த படலத்தில், அவனுடைய நட்பின் வலிமையைக் கூறுமிடத்து, “ஒரு பகல் பழகினார் உயிரை ஈவரால்” (கம்ப.சடாயு உயிர் 13) என்று கம்பர் கூறுவார். 

“சொல்லின் அரில் அகற்றும் கேள்வியார் நட்பும்” என்று சொற்களிலும் குற்றங்களை அகற்றும் நட்பை திரிகடுகம் சொல்லுகிறது. அறத்தைப் பற்றி கூறும் திரிகடும், “அன்பு ஓடி நாள் நாளும் நட்டார்ப் பெருக்கலும்”, அதாவது நட்பு செய்தவரைப் பெருகச் செய்தலும் முதன்மையான அறமென்கிறது.

“அறமன்னானுடன் எம்பி யன்பினோ

டுறவுன் நாவுயி ரொன்றை யோவினான்

பெறவொண்ணாததோர் பெற்றி பெற்றவற்

கிறலென் னும்இதின் இன்பம் யாவதோ” (கம்ப.சம்பாதி.45)

முழுப்பொருள் 2

நண்பன் என்பவருக்கும் ஒரு சில இலக்கணங்கள் உண்டு என்று சொல்கிறார் திருவள்ளுவர். 

முதலாவதாக நண்பரின் நடவடிக்கைகளை கண்காணிக்க வேண்டும். அதாவது நண்பர் ஒழுக்கம் அல்லாத அறம் அல்லாத நன்மை அல்லாத செயல்களில் செல்கிறார் என்று ஆய்வு செய்து கொண்டு இருத்தல் வேண்டும். ஒரு வேளை நண்பன் ஒழுக்கம் அல்லாத செயல்களில் சென்றால் அது தவறு எடுத்துரைக்க வேண்டும். இதனால் எனக்கென்ன என்று இருக்க கூடாது. நண்பனை நல்வழியில் மறுபடியும் கொண்டுவர முயற்சி செய்ய வேண்டும். நண்பன் நட்பையே முறித்தாலும் கவலை இல்லை என்று எண்ணி நண்பனை நல்வழியில் கொண்டு வர முயற்சி செய்ய வேண்டும்.

இரண்டாவதாக என்னதான் கவனமாக இருந்தாலும் நண்பருக்கு துன்பம் நேர வாய்ப்பு உள்ளது. அப்படி துன்பம் நேர்ந்தால் அத்துன்பத்தை கண்காணித்து அதில் இருந்து வெளிவர கூட இருந்து ஒத்துழைத்து மீண்டு வர ஒரு தோள் கொடுத்து நண்பனுக்கு வலிமை (உழப்பது) சேர்ப்பதே சிறந்த நட்பு.

மேலும்: அஷோக் உரை

சடாயு உயிரீ நீத்த படலத்தில், அவனுடைய நட்பின் வலிமையைக் கூறுமிடத்து, “ஒரு பகல் பழகினார் உயிரை ஈவரால்” என்று கம்பர் கூறுவார். “சொல்லின் அரில் அகற்றும் கேள்வியார் நட்பும்” என்று சொற்களிலும் குற்றங்களை அகற்றும் நட்பை திரிகடுகம் சொல்லுகிறது. அறத்தைப் பற்றி கூறும் திரிகடும், “அன்பு ஓடி நாள் நாளும் நட்டார்ப் பெருக்கலும்”, அதாவது நட்பு செய்தவரைப் பெருகச் செய்தலும் முதன்மையான அறமென்கிறது.

சொந்த உதாரணம்

என் வாழ்வில் 2002-2005 ஆண்டுகளில் பல திரைப்பட பாடல் ஒலிப்பதிவு களஞ்சியத்தை கட்டுக்கொண்டு இருந்தேன். அவற்றில் பல பாடல்களை கேட்ககூட மாட்டேன். ஆனால் அந்த சமையத்தில் என் நண்பன் என்னை கண்டித்தான். இது என்ன வீண் வேலை. இதில் என்ன அர்த்தம் இருக்கிறது. ஒரு சினிமா பார்கிறாய் ரசிக்கிறாய். அத்துடன் முடிந்துவிட்டது. நல்பாடல் என்றால் சேகரித்து வைத்துக்கொள். ஆனால் வரும் படம் எல்லாவற்றை உடனுக்குடன் சேகரித்து விநியோகிப்பது உனக்கு வேண்டாத வேலை. 

வாழ்வில் நேரம் பொன் போன்றது ஆகும். வாழ்வில் முன்னேற வேலையில் முன்னேற மேற்ப்படிப்பு படிக்க என்ன செய்ய வேண்டும் என்று யோசி. அல்லது உன்னை மேம்படுத்தும் கலைகளில் அல்லது புத்தகங்களில் உன்னை ஆழ்த்திக்கொள். அதுவே சிறந்தது என்று அறிவுருத்தினான்.

அன்று அந்த எச்சரிக்கை என்னை மேம்படுத்தியது. அன்று முதல் நான் புத்தங்கள் படிப்பது மேற்ப்படிப்பிற்கு படிப்பது வயலின் கற்றுக்கொள்வது என என்னை ஆழ்த்திக்கொண்டேன். அவை எனக்கு மிகவும் பயனுள்ளதாகவே இருந்தது.

பரிமேலழகர் உரை

அழிவினவை நீக்கி ஆறு உய்த்து - கேட்டினைத்தரும் தீநெறிகளைச் செல்லுங்கால் விலக்கி, ஏனை நன்னெறிகளைச் செல்லாக்காற் செலுத்தி; அழிவின்கண் அல்லல் உழப்பது நட்பாம் - தெய்வத்தால் கேடு வந்துழி அது விலக்கப்படாமையின் அத்துன்பத்தை உடன் அனுபவிப்பதே ஒருவனுக்கு நட்பாவது. ('ஆறு' என வருகின்றமையின், 'அழிவினைத் தருமவை' என்றொழிந்தார். 'தெருண்ட அறிவினவர'(¢நாலடி.301) என்புழிப்போல இன்சாரியை நிற்க இரண்டனுருபு தொக்கது. இனி, 'நவை' என்று பாடம் ஓதி, அதற்குப் போர் அழிவினும் செல்வ அழிவினும் வந்த துன்பங்கள் என்றும், 'அழிவின்கண்' என்பதற்கு யாக்கை அழிவின்கண் என்றும் உரைப்பாரும் உளர்.).

மணக்குடவர் உரை

நட்டார்க்கு அழிவு வந்தவிடத்து அவர் துன்பத்தை நீக்கி நல்ல நெறியின்கண் செலுத்தித் தாங்கித் தன்னால் செயலற்ற விடத்து அவரொடு ஒக்கத் தானும் துன்பம் உழப்பது நட்பு.

மு.வரதராசனார் உரை

அழிவைத் தரும் தீமைகளிலிருந்து நீக்கி, நல்ல வழியில் நடக்கச் செய்து, அழிவுவந்த காலத்தில் உடனிருந்து துன்பப்படுவதே நட்பாகும்.

சாலமன் பாப்பையா உரை

அழிவு தரும் வழிகளில் நண்பன் சென்றால் தடுத்து, நல்ல வழியில் அவனைச் செலுத்தி அவனுக்குக் கேடு வரும் என்றால் அதை அவனுடன் பகிர்வது நட்பு.

ஞா. தேவநேயப் பாவாணர் உரை

அழிவினவை நீக்கி-நண்பன் கேடுதரும் தீயவழிகளில் ஒழுகுங்கால் அவற்றினின்று விலக்கி; ஆறு உய்த்து-நல்வழிகளில் ஒழுகாக்கால் அவற்றிற் செலுத்தி; அழிவின்கண் அல்லது உழப்பது-தெய்வத்தாற் கேடு வந்தவிடத்து அதை நீக்க முடியாமையின், அத்துன்பத்தைத் தானும் உடன் நுகர்ந்து வருந்துவதே; நட்பு-ஒருவனுக்கு நட்பாவது.

ஆறு என்னும் பொதுப்பெயர் நெறி, வழி என்பனபோல நல்லாற்றைக் குறித்தது. 'ஆறுய்த்து' என்றதனால், 'அழிவினவை நீக்கி' என்பதில் 'அழிவினவை' தீயநெறிகளைக் குறித்தமை அறியப்படும்.

"இனி, நவையென்று பாடமோதி, அதற்குப் போரழிவினுஞ் செல்வ வழிவினும் வந்த துன்பங்களென்றும், 'அழிவின்க'ணென்பதற்கு யாக்கையழிவின்கணென்றும் உரைப்பாருமுளர்." என்று பரிமேலழகர் கூறியுள்ளது நன்மறுப்பாகும்.

பதினெண் கீழ்க்கணக்கு - பழமொழி

உழந்ததூஉம் பேணா(து) ஒறுத்தமை கண்டும்

விழைந்தார்போல் தீயவை பின்னரும் செய்தல்

தழங்கண் முழவிரங்கும் தண்கடற் சேர்ப்ப!

முழங்குறைப்பச் சாணீளு மாறு.

(சொ-ள்.) தழங்(கு) கண் முழவு இரங்கும் தண் கடல் சேர்ப்ப - ஒலிக்கின்ற கண்ணை உடைய முழவுபோல் ஆரவாரிக்கும் குளிர்ந்த கடல் நாடனே!, உழந்ததும் பேணாது ஒறுத்தமை கண்டும் - தம்மொடு வருந்திப் போந்த நட்பினையும் பாராது தண்டித்தமையை அறிந்திருந்தும், விழைந்தார்போல் தீயவை பின்னரும் செய்தல் - அவரிடத்து விருப்பமுடையார் போன்று தீய செயல்களைப் பின்பும் செய்தொழுகுதல், சாண் குறைப்ப - சாண் நீளமுள்ள தொன்றனைக் குறைக்க, முழம் நீளு மாறு - அது முழம் நீளமாக நீளுவது போலும்.

(க-து.) தீயவர்களைத் தண்டித்தாலும் பின்னரும் தீமையேசெய்ய முற்படுவர்.

(வி-ம்.) 'முழல் நீளுமாறு' என்றது முன்னினும் மிக்க தீமையையே புரிவார் என்பதைக் கருதி. 'முழம் குறைப்பச் சாண் நீளுமாறு' என்பது 'சுரை ஆழ அம்மி மிதப்ப' என்பதைப் போன்று மொழி மாற்றிப் பொருள்கொள்ள வேண்டுதலின், மொழிமாற்றுப் பொருள்கோள். தழங்குகண், தழங்கண் என வந்தது விகாரம். 'உழந்ததும்'என்றது,

‘அழிவி னவைநீக்கி ஆறுய்த்துஅழிவின்கண் அல்லல் உழப்பதாம் நட்பு'என்றதைக் கருதி,'முழங் குறைப்பச் சாண் நீளுமாறு' என்பது பழமொழி.

குறட் கருத்து  (நன்றி: திரு. தமிழ்க்கடல் நெல்லை கண்ணன்)

  தவறான வழிகளிலே சென்றழிந்து

  தடுமாறி வீழ்வாரைத் தான் தடுத்து

  அவமான உண்மை நிலை எடுத் துரைத்து

  அறமான நல்வழியில் அழைத்துச் சென்று

  நலமாக வாழ்கையிலே துன்பம் வந்தால்

  நண்பருடன் அத்துன்பம் பகிர்ந்து கொள்ளல்

  குலமான நண்பர்களின் குணமேயாகும்

  கொண்ட அந்த நட்பேதான் உண்மையாகும்

உனக்கு உறுதுணையாக .....!!! (நன்றி: கவிப்புயல் இனியவன்)

உனக்கு உறுதுணையாக .....!!!

தீய 

வழியில் செல்லாதே ....!!!

நண்பா - நான் 

இருக்கிறேன் உனக்கு 

உறுதுணையாக .....!!!

உனக்கொரு துன்பம் ...

வந்தால் பொறுத்திடுவேனோ ....?

உன் துன்பத்தில் சரிபாதி ...

நானடா - நீ என் 

உயிர் நண்பணடா ....!!!

நன்றி:  Interesting Tamil Poems

நட்பின் கடமை 

நட்பு என்றால் என்ன ?

நண்பர்கள் என்றால் நாம் பொதுவாக என்ன நினைப்போம் ?

அவர்கள் வீட்டில் ஏதாவது நல்லது கெட்டது நடந்தால் அழைப்பார்கள். அதே போல் நாமும் அழைப்போம். பணம் காசு வேண்டும் என்றால் ஒருத்தருக்கு ஒருவர் உதவி செய்வது. முடிந்தால் அப்பப்ப மெயில் அனுப்புவது, அல்லது போன் பண்ணுவது.

இதுதானே நண்பர்களுக்கு அடையாளம் ?

வள்ளுவர் நட்பை ஒரு மிகப் பெரிய உயரத்திற்கு எடுத்துச் செல்கிறார்.

வள்ளுவருக்கு எல்லாமே அறம் தான். வாழ்கையை அற வழியில் செலுத்த நட்பு மிக மிக அவசியம்.

அழிவின் அவைநீக்கி ஆறுய்த்து அழிவின்கண்

அல்லல் உழப்பதாம் நட்பு.

வள்ளுவர் கூறுகிறார்

நண்பன் அறம் அல்லாத வழியில் செல்லும் போது அவனை (ளை ) தடுத்து நிறுத்தி, அவனை நல்ல வழியில் செலுத்தி அப்படி நல் வழியில் செல்லும் போதும் துன்பம் வந்தால் அவனோடு சேர்ந்து அந்த துன்பத்தை அனுபவிப்பது நட்பு.

அற வழியில் செல்லும் போது துன்பம் வருமா என்றால் பரிமேல் அழகர் சொல்லுகிறார் தெய்வத்தால் வரும் கேடு என்கிறார். முன் வினைப் பயனால் வரும் கேடு.

அழிவின் அவைநீக்கி = அழிவு வரும் போது அவற்றை நீக்கி. அழிவு பல விதங்களில் வரலாம். அறம் அல்லாத வழியில் செல்வதால் அழிவு வரும் என்கிறார் பரிமேல் அழகர். நீங்கள் அதை விரித்து பொருள் கொள்ளலாம். அழிவில் இருந்து நண்பர்களை காக்க வேண்டும்.

ஆறுய்த்து = ஆறு + உய்த்து = ஆறு என்றால் வழி. வழி என்றால் நல்ல வழி என்பது பெரியவர்களின்எண்ணம் . நெறி அல்லா நெறி தன்னை, நெறியாக கொள்வேனை என்பார் மாணிக்க வாசாகர். நெறி அல்லாத நெறி என்பது தீய நெறி. நெறி என்றால் நல்ல நெறிதான். நல்ல வழியில் நண்பர்களை செலுத்தி.

அழிவின்கண்  = இதையும் மீறி அழிவு வந்தால்

அல்லல் உழப்பதாம் நட்பு = அந்த துன்பத்தை, நண்பரோடு சேர்ந்து அனுபவிப்பது நட்பு

நமக்கு எத்தனை நண்பர்கள் அப்படி இருக்கிறார்கள் ?

நாம் எத்தனை பேருக்கு அப்படி நண்பர்களாய் இருக்கிறோம் ?

நம் பிள்ளகைளுக்கு அப்படி நண்பர்களாய் இருக்க கற்றுத் தருவோம்

நன்றி: கூடா நட்பு வாழ்க்கையை சீரழிக்கும் (பணிப்புலம்)

நட்பு இல்லாத மனிதன் இவ்வுலகில் இல்லை என்றே கூறுமளவிற்கு நட்பு வாழ்கையில் முக்கிய பங்கெடுத்துக் கொள்கின்றது. எல்லோருக்கும் எல்லாப் பருவங்களிலும் நண்பர்கள் கிடைக்கின்றார்கள், சிலர் ஆரம்ப கால அரை காற்சட்டை வாழ்ககையோடு விடைபெறுகிறார்கள். சிலர் கல்லூரிக்கால வாழ்க்கையுடன் நின்று போய் விடுகிறார்கள். வேறு சிலர் அலுவலக வட்டத்துக்குள்ளேயே ஓடி ஓய்ந்து விடுகிறார்கள்.  இன்னும் சிலர் வாழ்க்கைத் துணையாகவும் மாறிவிடுகின்றார்கள்.

வெகு சில நண்பர்களே இந்த எல்லைகளை எல்லாம் தாண்டி எமது இதயத்தின் மேடையில் கூடாரமடித்துக் குடியிருக்கிறார்கள். நமது வாழ்க்கையின் பாதையில் நண்பர்களின் பங்களிப்பு மிக மிக முக்கியமானது. இளம் வயதில் நண்பர்களுடன் அதிக நேரம் செலவிடுவதால் நண்பர்களின் குணாதிசயங்கள் நம்மையும் தொற்றிக் கொண்டு விடுகிறன. 

வாச மலர்களை மாலையாக தொடுக்கும் வாழைநார் கூட பூவின் வாசனையைப் பெற்று நறுமணம் வீசுகின்றது. அதுபோல சாக்கடையில் விழ்ந்த நறுமண மலரும் சாக்கடையின் வாசத்தையே  பெற்று விடுகின்றது. ஒருவருடைய குணாதிசயங்களை அறிய அவருடன் நெருங்கிப் பழகும் நண்பர்களை வைத்து சுலபமாக கணித்துக் கொள்ள முடியும் என்பதும், ஒருவருடைய பொருளாதார நிலையைக் கணிப்பிட அவர் சந்தையில் வாங்கும் பொருட்களை வைத்து கணித்துக் கொள்ள முடியும் என்பதும் பழைய பழமொழிகளாகும். விளக்கமாக கூறுவதாயின் ஒருவரின் அகத்தின் அழகை முகம் காட்டுவதுபோல் அவரின் குணத்தின் அழகை நண்பர்களின் நடத்தையில் கண்டு கொள்ள முடியும் எனக்கூறலாம்.

ஒரு மனிதனுடைய வெற்றிக்கும், தோல்விக்கும் பெரும்பாலான நேரங்களில் நண்பர்களே காரணமாக இருக்கிறார்கள். அதனால்தான் நமக்கு அமையும் நண்பர்கள் நல்லவர்களாக இருக்க வேண்டியது அவசியமாகிறது. அதனால் போலும் வள்ளுவன் “அழிவி னவைநீக்கி ஆறுய்த்து அழிவின்கண் அல்லல் உழப்பதாம் நட்பு என அறிவுறுத்துகின்றார்.

நல்ல நண்பர்கள் எப்படி நம்மை உயரப் பறக்கவிடுவார்களோ, அதே போல தீய நண்பர்கள் நம்மை உயரத்திலிருந்து இழுத்து பள்ளத்தில் போட்டு விடுவார்கள். ஒரு நல்ல நண்பனிடம் இருந்து நல்ல பல விடயங்களை கற்றுக் கொள்ளலாம் அதேபோல் தீய நண்பர்களிடம் இருந்து தீய பழக்க வழக்கங்களையும் தீய குணங்களையுமே கற்றுக் கொள்ளலாம்.

உண்மையான நண்பன் உங்களுடைய ஆரோக்கியத்தில் கவனம் செலுத்துவான். உங்களுடைய முன்னேற்றத்தில் கவனம் செலுத்துவான். உங்களைத் தீய வழியில் இழுக்க மாட்டான் என்பதை மனதில் அழுத்தமாய் எழுதுங்கள்.

ஒருவேளை நீங்கள் புகை, மது போன்ற பழக்கங்களில் இருந்தால் உங்களை அதில் இருந்து வெளியே கொண்டு வருவதுதான் உண்மையான நண்பனின் பண்பு. அதை உற்சாகப்படுத்துவது அல்ல.

நல்ல நண்பன் உங்கள் தவறுகளைக் கடிந்து கொள்வான். உங்கள் மனம் கோணாமல் எப்போதும் நல்ல விடயங்களையே சொல்லிக் கொண்டிருப்பவன் ஆத்மார்த்த நண்பன் அல்ல, நல்ல நண்பன் நாளைய வாழ்வில் நீங்கள் நன்றாக, இருக்க வேண்டும் எனும் ஆர்வம் கொள்பவன், அப்படிப்பட்டவர்கள் உங்கள் குறைகளை உங்களிடம் சுட்டிக் காட்டத் தயங்க மாட்டார்கள், அதற்காக நட்பே போனால் கூட கவலைப்பட மாட்டார்கள்.

”நான் தண்ணியடிக்கிற விஷயத்தை அப்பாகிட்டே சொல்லாதே” என்பது போன்ற சத்தியங்களை நல்ல நண்பன் கண்டுகொள்வதில்லை. சில நேரங்களில் சத்தியம் கூட மீறப்படலாம் என்பது உண்மைத் தோழனுக்குத் தெரியும்.

உங்களுடைய இலட்சியங்களை உங்கள் நண்பன் ஆதரிக்கிறானா? அல்லது அவனுடைய செயல்பாடுகள் உங்களுடைய இலட்சியத்துக்குத் தடைக்கல்லாய் இருக்கின்றதா? என்பதைப் பாருங்கள். உங்களுடைய இலட்சியங்களைக் கிண்டலடிப்ப வனோ, அதை நோக்கிய உங்கள் பயணத்தின் போது உங்களுக்கு ஊக்கமளிக்காமல் இருப்பவனோ உங்களுடைய நண்பன் அல்ல. 

உண்மையான நண்பன் உங்களுடைய திறமைகளை முழுமையாய்ப் பயன்படுத்த ஊக்குவிப்பான். உதாரணமாக ஓர் இசைக்கலைஞன் ஆவது உங்கள் இலட்சியமெனில், அதற்கு என்னென்ன செய்ய வேண்டும் எனும் விஷயங்களில் உங்களுக்கு உதவி செய்வான். உங்களைப் படிப்படியாக அந்தப் பாதையில் நடத்துவான். வெறுமனே உங்களுடைய வெற்றிகளில் வந்து கை குலுக்கிவிட்டுப் போகும் மனிதனாக அவன் இருப்பதில்லை.

மற்ற நண்பர்களைப் பற்றி உங்களிடம் தரக்குறைவாக விமர்சிக்கும் நண்பர்களிடம் கொஞ்சம் கவனமாய் இருங்கள். உங்களைப் பற்றி அவர்கள் வேறு நண்பர்களிடமும் அதே போலப் பேசித் திரியும் வாய்ப்பு உண்டு. நீங்கள் எந்த நண்பனுடன் இருக்கும் போது அடுத்தவர்களைப் பற்றி ஏகப்பட்ட கிசுகிசுக்களை அவிழ்க்கிறார்கள் என யோசியுங்கள். அந்த நண்பன் நல்ல நண்பன் அல்ல என்பதைப் புரிந்து கொள்ளுங்கள்,

அன்னை திரேசாவின் வாழ்வில்....

அன்னை திரேசா சிறுமியாக இருந்தபோது அவருடைய தோழியரில் ஒரு தீய தோழி இருப்பதை அவருடைய தாய் கவனித்தார். ஒரு தீய நட்பு நல்லவர்களையும் கெடுத்துவிடும் எனவே அந்த நட்பைத் துண்டிக்க வேண்டும் என திரேசாவின் தாய் முடிவெடுத்தார்.

ஒருநாள் அவர் திரேசாவை அழைத்தார். அவருடைய கையில் ஒரு பெரிய பெட்டியில் நிறைய அப்பிள் பழங்கள் இருந்தன. அழகான ஆப்பிள் பழங்களைக் கண்ட திரேசாவின் கண்கள் ஆனந்தத்தில் விரிந்தன. ஆர்வத்துடன் ஒரு பழத்தை எடுக்கப்போன திரேசாவை தாய் நிறுத்தினார். அவற்றுள் நல்ல பழங்களாகத் தெரிந்து இரண்டு கூடைகளில் வைக்கும்படி தாய் கூறினாள். அதன்படியே திரேசாவும் நல்ல பழங்களாகத் தெரிந்து  இரண்டு கூடைகளில் நிரப்பினாள். தாய் தனியே வைத்திருந்த ஓர் அழுகிய பழத்தை எடுத்தார், திரேசா புரியாமல் பார்த்தாள். தாய் அந்த அழுகிய பழத்தை நல்ல பழங்கள் இருக்கும் ஒரு கூடையின் நடுவே வைத்தார்.

“ஏம்மா நல்ல பழங்களோடு கெட்ட பழத்தையும் வைக்கிறீர்கள்?” என திரேசா கேட்டார்.

“எல்லாம் ஒரு காரணம்தான், இந்த இரண்டு கூடைகளையும் அப்படியே கொண்டு போய் ஒரு இடத்தில் வை. நான் சொல்லும் போது எடுத்து வா” என்றார் தாய். திரேசா அப்படியே செய்தார்.

சில நாட்களுக்குப் பின் தாய் திரேசாவை மறுபடியும் அழைத்தார். அந்த பழக் கூடைகளை எடுத்து வரச்சொன்னர். பழக் கூடைகளை திரேசா எடுத்து வந்து தாயின் முன்னால் வைத்தார்.

அழுகிய பழம் வைத்த கூடையில் இருந்த பழங்கள் எல்லாமே அழுகிப்போய் இருந்தன. மற்றக் கூடையில் இருந்த பழங்கள் பழுதடையாது அப்படியே இருந்தது. இதனைப் பார்த்த திரேசா வருந்தினார். நன்றாக இருந்த பழங்கள் கெட்டுப் போய்விட்டனவே என்று அவருக்கு அழுகையே வந்து விட்டது.

தாய் திரேசாவை அருகில் அமரவைத்து மெதுவாய்ச் சொன்னார்... பார்த்தாயா? ஒரு அழுகிய அப்பிள் பழம் ஒரு கூடை நல்ல பழங்களை அழுக வைத்துவிட்டது. தீய நட்பும் இப்படித்தான். ஒரு தீய நட்பு ஒரு நல்ல குழுவையே நாசமாக்கி விடும். ஒரு மனிதனைக் கொல்வதற்கு ஒரு துளி விஷம் போதும்.

எனவே நட்பைத் தேர்ந்தெடுப்பதில் கவனம் தேவை. உண்மை நண்பர்கள் உங்களுடைய சந்தோஷத்தின் போது காணாமல் போனாலும் உங்களுடைய துயர வேளையில் நிச்சயம் உங்களோடு இருப்பார்கள்.  உடுக்கை இழந்தவன் கைபோல நண்பனுக்கு வரும் துன்பத்தைப் போக்கத் துடித்து செல்வதே நல்ல நப்புக்கு இலக்கணமாகும். 

மனதிற்கு கஷ்டமாய் இருக்கிறது. பணக் கஷ்டமாயிருக்கு உதவி தேவையாய் இருக்கிறது, என கஷ்டம் என்றால் மட்டுமே உங்களிடம் வரும் நண்பர்கள் சிலர் இருப்பார்கள். நட்பின் முக்கிய தேவையே உதவுவதில்தான் இருக்கிறது. ஆனால் அத்தகைய சூழல்களில் “மட்டுமே” உங்களைத் தேடி வரும் நண்பர்கள் சுயநலத்தின் சின்னங்கள் என்பதை மனதில் கொள்ளுங்கள்.

சில நண்பர்கள் அவர்கள் சொல்வதற்கெல்லாம் தஞ்சாவூர் பொம்மை போலத் தலையாட்டும் நண்பர்களே வேண்டுமென்றார்கள். அவர்கள் உண்மையான நண்பர்கள் அல்ல, அவர்களுடைய நட்பில் வீசுவதும் சுயநல வாசமே. “தப்பான”  ஒரு செயலைச்செய்ய உங்களை ஊக்கப்படுத்துபவன் உங்கள் நண்பனல்ல. அப்படிப்பட்டவர்களை நீங்கள் முளையிலேயே கிள்ளி எறியலாம். 

போதை, திருட்டு, பாலியல், சமூக, விரோதச் செயல் போன்ற பல தவறுகளுக்கு இளைஞர்களை இட்டுச்செல்வதில் பெரும்பாலான பங்கு நண்பர்களையே சாரும், அத்தகைய ஒழுக்கத்தை மீறிய செயல்களுக்குள் உங்களை இழுப்பவர்கள் உங்கள் எதிரிகளே, நண்பர்கள் அல்ல. நீங்கள் எப்படி இருக்கிறீர்களோ அதே நிலையில் எந்த எதிர்பார்ப்பும் இல்லாமல் பழகுபவனே உண்மை நண்பன். “எனக்குப் பிடித்த மாதிரி மாறினால் தான் உன்னோடு நட்பாய் இருப்பேன்” என நிபந்தனைகள் விதிப்பவர்களின் நட்பை விலக்கி விடுங்கள்.

உங்கள் நண்பர்களுடன் பேசும்போது உங்களுடைய மனம் நேர் சிந்தனைகளில் நிறைகிறதா? எதிர் சிந்தனைகளில் நிரம்புகிறதா? என்று பாருங்கள். எதிர் சிந்தனைகளே வளர்கிறதெனில் அந்த நட்பு தப்பானது என்பதைக் கண்டு கொள்ளுங்கள்.

சில நண்பர்களோடு பழகும்போது உங்களுடைய நல்ல குணாதிசயங்கள் எல்லாம் வளர்ந்து கொண்டே இருக்கும் அத்தகைய நண்பர்களை எப்போதுமே அருகில் வைத்திருங்கள்.

உங்களுடைய நெருங்கிய நண்பர்களில் நான்குபேரை நினையுங்கள், அவர்கள் நல்லவர்களா, மோசமானவர்களா என இப்போது அளவிடுங்கள், தீய நண்பர்களெனில் ஒதுக்குங்கள். தீய நண்பனோடு பழகு வதை விட நண்பனே இல்லாமல் வாழ்வது சாலச் சிறந்தது.

கடைசியாக ஒன்று நல்ல நட்பை நீங்கள் எதிர்பார்ப்பது போலவே அடுத்தவர்களும் எதிர்பார்ப்பார்கள். எனவே நீங்களும் பிறருக்கு எப்போதும் ஒரு நல்ல நண்பனாகவே இருங்கள்! நமது பெற்றோரையும், உடன்பிறந்தோரையும் நம்மால் தீர்மானிக்க முடியாது. ஆனால் நமது நண்பன் யாராக இருக்க வேண்டும் என்பதை நம்மால் தீர்மானிக்க முடியும். நட்பு என்பது ஒருவரின் வாழ்வையே திசைமாற்றும் வல்லமைக் கொண்டதால், அது விஷயத்தில் ஒவ்வொரு மனிதனுக்கும் தீவிர எச்சரிக்கையும், கவனமும் தேவை.

கூடா நட்பு தூக்கு மேடைக்கு வழிகாட்டும். ஆனால் நல்ல நட்பு வாழ்க்கையின் சிகரத்திற்கே வழிகாட்டும்.

ஊடி இருந்தேமாத் தும்மினார்

குறள் 1312

ஊடி இருந்தேமாத் தும்மினார் யாம்தம்மை 

நீடுவாழ் கென்பாக் கறிந்து.

[காமத்துப்பால், கற்பியல், புலவி நுணுக்கம்]

பொருள்
ஊடல் - ஊடுதல், தலைவன்தலைவியருள்உண்டாகும்பிணக்கு, பொய்ச்சினம்; பகைத்தல்; வெறுத்தல். பொய்க்கோபம் கொள்ளுதல், சிணுங்குதல், கருத்து வேறுபாட்டால் வரும் (சிறிய) பிணக்கு

ஊடி - பொய் சினம் கொண்டு பேசிக்கொள்ளாமல்

இருந்தேமா - இருக்கும் பொழுது

தும்முதல் - தும்மல்; மூச்சுத்தடைப்பட்டு ஒலியுடன் மூக்கு வாய் வழியாய் வெளிவருதல்; விடுதல்; மூச்சுவிடுதல்.

தும்மு -கிறேன், தும்மினேன், வேன், தும்ம, v. n. To sneeze. 2. To arise, revive, உயிர்க்க. 3. v. a. To emit, let go, leave, விட. (c.)
தும்முவது என்பது ஒருகணம் மூச்சு நின்று வருவது; இறப்புக்குச் சமம். அதனால் தும்மும்போது இப்போதும்கூட “நீண்ட ஆயுள் உண்டாவதாக” என்று பொருள் வரும்படி,”தீர்காயுசு” என்பர் பெரியோர். இந்த பழக்கம் இந்தியப்பழக்கமாக மட்டும் இல்லாமல், மேற்கத்திய நாடுகளிலும், “கடவுள் உன்னை ஆசீர்வதிக்கட்டும்” (God bless) என்று கூறுகிறார்கள். இது கலாச்சாரங்களைத் தாண்டி வரும் பழக்கம்தான்

தும்மினார் - தும்மல் செய்தார். அதாவது பொதுவாக தும்மினால் நம்மை யாரோ நினைக்கிறார்கள் என்றும் பொருள் கொள்வார்கள். ஆதலால் பொய்சினம் கொண்டாலும் அவரும் தன்னை உண்மையாக நினைத்துக்கொண்டு இருக்கிறார்.

யாம் தம்மை - நான் அவரை நினைத்து

நீடு - நெடுங்காலம்; நிலைத்திருக்கை.

‘நீடு வாழ்க!’  - நீங்கள் நெடுங்காலம் வாழ்க 

என்பாக்கு - என்னுடைய மனம்

அறிந்து - அறிந்ததனால்

முழுப்பொருள்

காதலர்களும் கணவன் மனைவி மார்களும் தங்கள் வாழ்வில் குறிப்பாக இல்லற வாழ்வின் துவக்க காலத்தில் சிறு சிறு (சில நேரம் பெரிய) சண்டைப் போட்டுக்கொள்வர். ஆனால் உண்மையில் இவை பொய்க் கோபம் மட்டுமே. இந்த சண்டை தீர்ந்த பின்பு இவர்கள் காதல் இன்னும் அதிகரிக்கும். அப்படிப்பட்ட பொய்சினத்தினை ஊடல் என்பார்கள்.

இப்படி ஒரு தடவை ஊடிக்கொண்டு இருக்கையில் இருவரும் பேசாமல் இருந்தனர். கணவரோ இவளை எப்படி பேச வைப்பது என்று எண்ணினார். இவள் கொண்டு இருப்பது பொய்க்கோபம் என்று எப்படி உடைப்பது என்று சிந்தித்தார். அவருக்கு ஒரு வழி தோன்றியது.

தும்முவது என்பது ஒருகணம் மூச்சு நின்று வருவது; இறப்புக்குச் சமம். அதனால் தும்மும்போது இப்போதும்கூட “நீண்ட ஆயுள் உண்டாவதாக” என்று பொருள் வரும்படி,”தீர்காயுசு” என்பர் பெரியோர்.

ஆதலால் தும்மினால் தீர்காயுசு (நீடு வாழ்க) என்று அவள் வாழ்த்தினால் அவள் தன் மீது காதல் கொண்டு இருக்கிறாள். இது வெறும் பொய்க்கோபம் என்பதை நிறுபித்து விடலாம். அவளுடம் மறுபடியும் பேசலாம்.

ஆகவே தலைவன்/ கணவன் தும்மினார்.

ஆனால் தலைவியோ/ மனைவியோ தும்மினால் இவரை நான் வாழ்த்துவேன் என்று அறிவார். ஆதலால் கோபம் இல்லை என்று நிறுபித்து விடலாம். அதனால் தான் தும்முகிறார் என்று மீண்டும் தலைவன் மீது பொய்க்கோபம் கொள்கிறாள் தலைவி!

மேலும்: அஷோக் உரை

பரிமேலழகர் உரை

(தலைமகன் நீக்கத்துச் சென்ற தோழிக்குத் தலைமகள் பள்ளியிடத்து நிகழ்ந்தது கூறியது.) ஊடி இருந்தேமாத் தும்மினார் - யாம் தம்மோடு ஊடி உரையாடாதிருந்தேமாகக் காதலர் தும்மினார்; யாம் தம்மை நீடுவாழ்கென்பாக்கு அறிந்து - அது நீங்கித் தம்மை நீடுவாழ்கென்று உரையாடுவேமாகக் கருதி. (தும்மியக் கால் வாழ்த்துதல் மரபாகலான், உரையாடல் வேண்டிற்று என்பதாம். இயல்பான் நிகழ்ந்த தும்மலைக் குறிப்பான் நிகழ்ந்ததாகக் கோடலின், நுணுக்கமாயிற்று.).

மணக்குடவர் உரை

தம்மோடு புலந்து உரையாடாது இருந்தேமாக: அவ்விடத்து யாம் தம்மை நெடிதுவாழுவீரென்று சொல்லுவே மென்பதனை யறிந்து தும்மினார். இது தலைமகள் தோழிக்குக் கூறியது.

ஞா. தேவநேயப் பாவாணர் உரை
(தலைமகன் சென்றபின் வந்த தோழிக்குத் தலைமகள் பள்ளியிடத்து நிகழ்ந்த கூறியது.)

ஊடி இருந்தேமாத் தும்மினார் - யாம் தம்மோடு உரையாடா திருந்தேமாகக் காதலர் தும்மினார்; யாம் தம்மை நீடுவாழ்க என்பாக்கு அறிந்து - அது எதற்கெனின், யாம் ஊடல் நீங்கித் தம்மை நீடுவாழ்க என்று வாழ்த்தி உரையாடுதற்கு.

இயல்பாக நிகழ்ந்த தும்மலை வேண்டுமென்று செய்ததாகக் கொண்டதால் (புலவி) நுணுக்கமாயிற்று. தும்மியபோது வாழ்த்துதல் மரபாகலால், உரையாடல் வேண்டியதாயிற்று என்பதாம். ' யாம் ' என்றது அரசப் பன்மை (Royal 'we' ) , அகரந் தொக்கது.

மு.வ உரை

காதலரோடு ஊடல் கொண்டிருந்தோமாக, யாம் தம்மை நெடுங்காலம் வாழ்க என்று வாய் திறந்து சொல்லுவோம் என நினைத்து அவர் தும்மினார்.

சாலமன் பாப்பையா உரை

நான் அவரோடு ஊடிப் பேசாமல் இருந்தேன்; நீடு வாழ்க, என்று சொல்லி அவரோடு பேசுவேன். என்று எண்ணி, வேண்டும் என்றே தும்மினார்! நானா பேசுவேன்? (ஆனாலும் வாழ்த்தினாள்).

குறட் கருத்து  (நன்றி: திரு. தமிழ்க்கடல் நெல்லை கண்ணன்)

சொன்ன நேரம்  வருவதில்லை வந்த  பின்போ

          சுகம் உடனே வேண்டும் என்று  அலைகின்றார் பார்

சின்னவளா நான் அறிவேன் இவரை நன்கு

          சிரிப்பின்றி  முகம் மாற்றித் துன்பப் பட்டேன்

என்னவரோ மிகப் பெரிய  கெட்டிக்காரர்

          என் ஊடல் தீர்ப்பதற்காய் தும்மல் ஒன்றை

தன்னறிவால் உண்டாக்கித் தும்மித் தீர்த்தார்

          தனை மறந்து நான் அவரை வாழ்த்தவென்று

யார் நினைக்கிறார்களோ...? (நன்றி கவிப்புயல் இனியவன்)

என்னவனோடு .....

ஊடல் செய்தேன் .....

தும்மினான் ....

நான் நூறு என்று ....

வாழ்த்துவேன் ....

என்று நினைத்தார் ....!!!

நன்றாக நான் ....

வாழ்த்துவேன் ...

யார் நினைகிறார்களோ...?

என்றாலும் மனம் ...

தன்னை அறியாமல் ...

வாழ்த்தியது ....!!!

நன்றி: ராதாகிருஷ்ணன்

சாதாரணமாக நம் விட்டில் பெரியவர்கள், வயதில் சிறியோர் தும்மினால், "நீடூழு வாழ்க" என ஆசிர்வதிப்பர்.அந்தப் பழக்கம் வள்ளுவன் காலத்திலேயே இருந்திருக்கிறது என்பது இக்குறளால் தெரிகிறது. காதலி, காதலனிடன் ஊடல் கொள்கிறாள். ஊடலை மறக்க அவன் தும்மினானாம். அப்போதாவது எப்போதும் சொல்வதுபோல "நீ வாழ்க" என்று கூறி ஊடலை முடித்துவைப்பாள் என்ற எண்ணத்தில்.

காதலரோடு ஊடல் கொண்டிருந்த போது, நான் அவரை நெடுங்காலம் வாழ்க என்று வாய் திறந்து சொல்லுவோம் என நினைத்து அவர் தும்மினார்.

தும்மல் விளைவித்த ஊடல்! (நன்றி: தினமணி)

தும்மல்' என்ற செயல் உடற்கூற்றியல் சார்ந்த நிகழ்வு. அளவுக்கு மீறிய நெடியைத் தாங்கமுடியாமல், அதை முகர்வதால் மூச்சு விடுவதில் உருவாகும் தடையழர்ச்சியின் வெளிப்பாடாக, திணறல் ஏற்பட்டு அதை, விடுவிக்க மூக்கும் வாயும் முழு ஆற்றலுடன் மூச்சை வெளியேற்றுவதால் உண்டாவது. தும்மல், "நீர்க்கோவை'யாலும் (ஜலதோஷம்) ஏற்படும். இஃதன்றி, காற்று மாசு, சுற்றுச்சூழல், உணவு, உடை, அணிகலன் இவற்றின் ஒவ்வாமையாலும் தும்மல் வரும். இவைதவிர மனவியல் காரணங்களாலும் தும்மல் உருவாகும் என்று கூறப்படுகிறது.

÷மங்களகரமான செயல்களைப் பற்றிப் பேசும்போது தும்மல் போடுபவர்கள் கடிந்துகொள்ளப்படுவதும் நடைமுறையில் உள்ளது. தும்முபவர் ஒற்றைத் தும்மலுடன் நிறுத்திவிடாமல், மேலும் ஓர் தும்மலைப் போட்டால் அதை நற்சகுனமாக ஏற்றுக்கொள்ளலாம் என்றும் கூறப்படுகிறது. குழந்தைகள் தும்மினால் அக்குழந்தைகளை ""நூறாண்டு வாழ்க!'' என்று குடும்பத்தினர் வாழ்த்தும் வழக்கம் இன்றும் உள்ளது. ஆனால், தும்மல் குறித்து திருவள்ளுவர் என்ன கூறியுள்ளார் என்பதைக் காண்போம்.

÷தலைவனும் தலைவியும் ஊடல்கொண்டு ஒருவருடன் ஒருவர் பேசுவதைத் தவிர்த்து இருக்கின்றனர். வழக்கம்போல தலைவன்தான் தன் பிடிவாதத்தை விட்டுக்கொடுத்து, தான் சமாதானத்துக்குத் தயார் என்பதை உணர்த்த ஓர் உபாயம் கண்டுபிடிக்கிறான். தும்மல் போட்டால் அவரை வாழ்த்தும் பொருட்டு ""வாழ்க பல்லாண்டு!'' என்று கூறுதல் வழக்கத்தில் உள்ளதால், தலைவன் செயற்கையாக ஓர் தும்மலை வரவழைத்து தலைவியின் காதுகளில் ஒலிக்கும்படியாகப் பேரிரைச்சலுடன் தும்முகிறான்.

÷தலைவிக்கு, தலைவனின் நோக்கம் புரிந்துவிட்டது. அவரோடு நான் பேசாதிருக்கிறேன் ஆகையால், தம்மை ""நெடுங்காலம் வாழ்க'' என்று நான் வாய்திறந்து சொல்லவாவது அவரோடு நான் பேசுவேன் என நினைத்து அவர் தும்மினார் போலும்' என எண்ணினாள்.

""ஊடி இருந்தேமாத் தும்மினார் யாம்தம்மை

நீடுவாழ்க என்பாக்கு அறிந்து'' (1312)

இவ்வாறு அவர்கள் ஊடலுக்கு விடைகொடுத்துவிட்டுக் கூடிக்களித்து வாழும் நிலையில், ஒருநாள் தலைவன் எதேச்சையாக ஓர் தும்மலை வெளிப்படுத்தினான். தலைவியும் அனிச்சைச் செயலாக தலைவனுக்குத் தன் வாழ்த்தைத் தெரிவித்தாள். ஆனால், உடனே அவளுள் ஓர் ஐயம் தோன்றியது. நாம் அருகிலேயே இருக்கிறோம். இந்நிலையில் இவர் தும்முகிறார் என்றால், இவரை வேறு யாரோ ஒரு மையல்கொண்ட தையல் நினைக்கிறாள் என்றுதானே பொருள் என முடிவு செய்கிறாள். உடனே தாம் கொடுத்த வாழ்த்தை அழித்துவிடுகிறாள். தலைவனை நோக்கி, ""உங்கள்பால் காதல்கொண்ட வேறு மங்கை எவளோ ஒருத்தி உங்களை நினைத்த காரணத்தால்தானே தும்மினீர்?'' என்று அழுது புலம்புகிறாள். தும்மலால் நேர்ந்த இந்தத் துன்ப நிகழ்வைக் கீழ்க்கண்டவாறு பதிவு செய்துள்ளார் வள்ளுவர்.

""வழுத்தினாள் தும்மினேனாக அழித்து அழுதாள்

யார்உள்ளித் தும்மினீர் என்று'' (1317)

இதுகேட்டுப் பதறிப்போன தலைவன், தனது தும்மல் இயற்கையாக ஏற்பட்டதுதான் என்றும், தனக்கு வேறு எந்தப் பெண்ணுடனும் தொடர்பு இல்லை என்றும் தெளிவுபடுத்தி, தலைவியை சமாதானப்படுத்தினான். இந்தத் தும்மலை இயற்கைதான் என்பதை தலைவி புரிந்துகொண்டாள் என்று மகிழ்ந்தவனுக்கு அடுத்தும் ஓர் தும்மல் வரப்பார்த்தது. ஐயகோ.. இப்போதுதான் முந்தைய தும்மலால் ஏற்பட்ட சிக்கல் தீர்ந்திருக்கிறது; மீண்டும் ஓர் தும்மலா? மீண்டும் சிக்கல் உருவாகுமே என்று எண்ணி, வந்த தும்மலை அடக்க முயன்றான். ÷இதைப் பார்த்துக்கொண்டிருந்த தலைவி, ""உங்களை யாரோ காதலுடன் நினைக்கிறார்கள்; அதனால்தான் தும்மல் வருகிறது. ஆனால் நான் கேட்டுவிடுவேனோ என்பதற்காக அதை மறைக்கப் பார்க்கிறீர்'' என்று கோபத்தை வெளிப்படுத்தும் முகத்தான் அழுது மீண்டும் ஊடல் கொள்கிறாள்.

""தும்மச் செறுப்ப அழுதாள் நுமர்உள்ளல்

எம்மை மறைத்திரோ என்று'' (1318)

தும்மல் போடுவதில் இத்தனை நுட்பமான செய்திகளா? தும்மல் வந்தால் இனி காலம், நேரம் பார்த்துத்தான் தும்ம வேண்டும் போலிருக்கிறது!

"அடி'களின் பெருமை!

சிலப்பதிகாரத்தை இயற்றியவர் - இளங்கோவடிகள்

சிலப்பதிகாரத்தில் வரும் பெண் துறவி - கவுந்தியடிகள்

திருநாவுக்கரசு சுவாமியைப் போற்றி, பக்தி செய்தவர் - அப்பூதியடிகள்

முதன் முதலில் தனித்தமிழ் இயக்கத்தைத் தோற்றுவித்தவர் - மறைமலையடிகள்

இந்திய சுதந்திரப் போராட்டத்தைத் தலைமையேற்று நடத்தியவர் - காந்தியடிகள்

இசைத் தமிழ் நூலான "யாழ்' நூலை எழுதியவர் - விபுலானந்த அடிகள்.

வடலூரில் சமரச சன்மார்க சத்திய ஞான சபையை நிறுவியவர் - இராமலிங்க அடிகள்.

மதுரையில் நான்காம் தமிழ்ச் சங்கம் அமையத் தூண்டுகோலாக இருந்தவர் - ஞானியாரடிகள்

ஓஒ இனிதே எமக்கிந்நோய்

குறள் 1176

ஓஒ இனிதே எமக்கிந்நோய் செய்தகண் 

தாஅம் இதற்பட் டது

[காமத்துப்பால், கற்பியல், கண்விதுப்பழிதல்]

பொருள்

ஓ - பதினோராம்உயிரெழுத்து; வினாவெழுத்து; விளரிஎன்னும்இசையின்எழுத்து; நீக்கம்; ஒழிவு; சென்றுதங்குகை; மதகுநீர்தாங்கும்பலகை; உயர்வுஇழிவுசிறப்புக்குறிப்பு; மகிழ்ச்சிக்குறிப்பு; வியப்புக்குறிப்பு; தெரிதல்குறிப்பு; நினைவுக்குறிப்பு; கொன்றை; பிரமன்; ஒழியிசை, வினா, சிறப்பு, எதிர்மறை, தெரிநிலை; பிரிநிலை, ஐயம், அசைநிலைஇவற்றைக்காட்டும்ஓர்இடைச்சொல்.

ஒ - பத்தாம்உயிரெழுத்து; ஒவ்வுஎன்பதன்பகுதி; ஐம்பறவைகளுள்மயிலைக்குறிக்கும்எழுத்து

ஓஒ! -  அதிசயக்குறிப்பு, வியப்புக்குறிப்பு

இனிதே!- மகிழ்ச்சியானதே, இனிமையானதே, விருப்பத்திற்கானதே, நன்றானதே

எமக்கு - 

இந் நோய் - இந்த நோய்

செய்த - செய்து கொடுத்த

கண் - இந்த கண்களும்

தாம் இதற்பட்டது -  உறங்காமல் அழுதுக் கொண்ட இருக்கும் 

முழுப்பொருள்

தலைவி கூறுகிறாள் தலைவனின் பிரிவால் நான் வாடுகிறேன். துன்ப படுகிறேன். இல்லை இல்லை. அவரை காண முடியாமல் நான் துன்ப படுகிறேன். என்னால் நிம்மதியாக உறங்க முடியவில்லை

அடடே!! இந்த கண்களும் உறங்கவில்லை. நன்றாய் வேண்டும் இதற்கு. நான் காதல் வயப்பட முதற்காரணம் என் கண்களே. எனக்கு என் தலைவனை காட்டியவை கண்களே. தலைவனின் முகத்தை என் மனதில் ஆழ பதித்தவை என் கண்கள். ஆழ பதித்ததனால் கண்கள் மூடினாலும் அவரே கண் முன் வருகிறார். உறக்கம் இல்லை. இப்படி எனக்கு துன்பமே கடைசியில்.... ஆனால் இதிலும் ஒரு ஆறுதலும் மகிழ்ச்சியும்.  என்னை இந்நிலைக்கு ஆழ்த்திய இந்த கண்களும் உறக்கம் கொள்ளாமல் என்னை போன்றே தவிக்கிறதே. மகிழ்ச்சி மகிழ்ச்சி!!

மேலும்: அஷோக் உரை

பரிமேலழகர் உரை

(இதுவும் அது.) எமக்கு இந்நோய் செய்த கண் தாம் இதன் பட்டது- எமக்கு அக் காமநோயினைச் செய்த கண்கள் தாமும் இத்துயிலாது அழுதற் கண்ணே பட்டது; ஓஒ இனிதே - மிகவும் இனிதாயிற்று. ('ஓ' என்பது மிகுதிப் பொருட்கண் வந்த குறிப்புச்சொல். 'தம்மால் வருத்தமுற்ற எமக்கு அது தீர்ந்தாற்போன்றது' என்பதாம்)

மணக்குடவர் உரை

எமக்கு இந்நோயைச் செய்த கண்கள் தாமும் இந்நோயகத்துப்பட்டது மிகவும் இனிது.

இது நின்கண் கலங்கிற்று; அஃதெனக்கு இன்னாதாயிற்று என்ற தோழிக்கு அது மிகவும் இனிதென்று தலைமகள் கூறியது.

ஞா. தேவநேயப் பாவாணர் உரை

(இதுவுமது)

எமக்கு இந்நோய் செய்தகண் தாம் இதற்பட்டது-எமக்கு இக்காமநோயை வருவித்த கண்கள் தாமும் இத்துன்பத்துள் அகப்பட்டுக் கொண்டது; ஒ ஒ இனிதே-மிகவும் இனிதாவதே.

துன்பமென்றது தூங்கா தழுதலை.எம்மைத் துன்புறுத்தினார் துன்புறுவது. எம் துன்பந் தீர்ந்தாற் போல்வதென்பதாம். 'ஓ' மிகுதிப்பொருட் குறிப்புச்சொல். 'ஓ ஒ' 'தா அம்' இசைநிறையளபெடைகள். ஏகாரம்தேற்றம்

மு.வ உரை

எமக்கு இந்தக் காமநோயைஉண்டாக்கிய கண்கள், தாமும் இத்தகைய துன்பத்தைப்பட்டு வருந்துவது மிகவும் நல்லதே!

சாலமன் பாப்பையா உரை

எனக்கு இந்தக் காதல் துன்பத்தைத் தந்த கண்கள் தாமும் தூங்காமல் அழுவது நன்றாகத்தான் இருக்கிறது.

குறட் கருத்து  (நன்றி: திரு. தமிழ்க்கடல் நெல்லை கண்ணன்)

காதலனைப் பிரிந்து வெந்தாள் மங்கை நல்லாள்

கண்ணுறக்கம் கொள்ளவில்லை கண்ணீர் வேறு

சாதலுக்கு வழி உண்டா என்றால் அவன்

சரியாக மனத்துக்குள் அமர்ந்துளானே

பேதலித்துப் போன பெண்ணாள் பேசுகின்றாள்

பிரிவில் அழும் கண்களினைப் பார்த்து பார்த்து

நீர் தந்த நோய் தானே அவரைப் பார்த்து

நீர் வழிய அழுங்கள் எனக்கு இனிமை ஈது

காரணமான கண்களே ......!!! (நன்றி கவிப்புயல் இனியவன்)

பூக்கள்

வாடுவதுபோல் ...

என் கண்களும் வாடுகின்றன ...

என் காதல் நோய்க்கு

காரணமான கண்களே ......!!!

நான்

வாடுவதுபோல் ..

என் கண்களும் வாடுகின்றன ...

ஒருவகையில் எனக்கு

இன்பம் தான் - என்னை வாட

வைத்த கண்கள் வாடுவதால் ...!!!

பசந்தாள் இவள்என்பது அல்லால்

குறள் 1188

பசந்தாள் இவள்என்பது அல்லால் இவளைத்

துறந்தார் அவர்என்பார் இல்

[காமத்துப்பால், கற்பியல்,  பசப்புறுபருவரல்]

பொருள்

பசந்து - நேர்த்தி, Elegance; beauty; attractiveness; fineness

பசந்தாயிருத்தல், v. noun. Being pleasing, attractive, engaging to the sight.

பசலை -  அழகுதேமல்; பொன்னிறம்; காமநிறவேறுபாடு; தலைவன் பிரிவால் வேறுபட்ட நிறம்; வருத்தம்; மனவருத்தம்; இளமை; கவலையின்மை; கீரைவகை.

'பசந்தாள் இவள்' - தலைவனின் பிரிவால் தலைவி வருத்தம் கொண்டு உடல் வேறு நிறம் பூண்டது

என்பது - என்று கூறுவாட்

அல்லால் - மற்றபட்டி

‘இவளைத் - இந்த அழகு தலைவியை 

துறந்தார் அவர்’  - விட்டு விட்டு பிரிந்து இந்த வருத்த நிலைக்கு கொண்டு வந்த அந்த தலைவனை

என்பார் இல் - என்று பழிப்போர் யாரும் இல்லையே

முழுப்பொருள்

இவள் அழகினால் தலைவன் மேல் காமம் கொண்டாள். இப்பொழுது பிரிவைக்கூட தாள முடியாமல் மற்றவர்கள் அறிந்துக்கொள்ளும் அளவிற்கு வாடியுள்ளாள் (தேக நிறம் மாறியுள்ளதாம்). அதாவது பிரிவால் வாடி இருக்கிறாளாம். என்று ஏசூவார்களாம் சுற்றத்தில் உள்ளவர்கள்.

ஆனால் இந்த அழகிய பெண்ணை பிரிந்து துறந்து விட்டு சென்று விட்டானே இந்த நோய் நிலைமைக்கு காரணமான இந்த (பாவி :) ) தலைவன் என்று யாரும் தலைவனை குறை சொல்ல மாட்டார்களாம். ஐயோ என்ன அவலம் இது. ஒருத்தரை மட்டும் குறை சொல்கிறது இவ்வுலகு.

மேலும்: அஷோக் உரை

பரிமேலழகர் உரை

('நீ இங்ஙனம் பசக்கற்பாலையல்லை' என்ற தோழியோடு புலந்து சொல்லியது.) இவள் பசந்தாள் என்பது அல்லால் - இவள் ஆற்றியிராது பசந்தாள் என்று என்னைப் பழி கூறுவதல்லது; இவளை அவர் துறந்தார் என்பார் இல் - இவளை அவர் துறந்து போயினார் என்று அவரைக் கூறுவார் ஒருவருமில்லை. ('என்பார்' என வேறுபடுத்துக் கூறினாள், தன்னையே நெருங்குதல் பற்றிப் புலக்கின்றமையின்.).

மணக்குடவர் உரை

இவள் பசந்தாளென்று எனக்குக் குற்றம் நாடுமதல்லது, இவளைத் துறந்தார் அவரென்று அவரது கொடுமையைச் சொல்லுவார் இல்லை. இஃது இப்பசப்பு வரலாகாதென்ற தோழிக்குத் தலைமகள் கூறியது.

ஞா. தேவநேயப் பாவாணர் உரை

(நீயிங்ஙனம் பசத்தல் கூடாதென்ற தோழியொடு புலந்து சொல்லியது.)

இவள் பசந்தாள் என்பது அல்லால்- இவள் காதலர் வரும்வரை ஆற்றியிராது பசலை கொண்டாள் என்று என்னைப் பழிப்பதல்லது; இவளை அவர் துறந்தார் என்பார் இல்- இவளை அவர் கைவிட்டுப் போய்விட்டாரென்று அவரைக் குறை கூறுவார் இவ்வுலகத்துஒருவருமில்லை.

தன்னையே கடிதல் பற்றிப் புலக்கின்றாளாதலின்,'என்பார்' என அயன்மைபடுத்திக் கூறினாள்.

குறட் கருத்து  (நன்றி: திரு. தமிழ்க்கடல் நெல்லை கண்ணன்)

கலந்திருந்தான் கனிந்திருந்தேன் கைகள் தமக்கிடையில்

பிணைந்திருந்தேன் விட்டுப் பிரியாமை வேண்டி நின்றேன்

அலந்திருந்த காரணத்தால் அணைப்பதிலே சிறப்பளித்தேன்

அப்படியே மயங்கியதால் கூடலிலோ வென்றிருந்தேன்

பிரிந்து விட்டான் பேதையெனை உடல் நிறமும் மாறியது

பேசுகின்றார் ஊரார் என் மாற்றமதைப் பெரிதாக

துறந்து சென்ற அவனன்றோ துன்பமதை இழைத்தவன் காண்

தூற்றுகின்றார் அவனை விட்டு எனை என்ன நியாயமிது

இழிவு படுத்துகிறார்கள் ... (நன்றி கவிப்புயல் இனியவன்)

உன்னால் தானடா ....

எல்லாம் நடந்தது .....

என் உடல் முழுவதும் ...

காதல் நோய் படர்ந்து.....

விட்டது ...!!!

என்

உடலில் காதல் நோய் ...

பரவியிருப்பதை ஊரார் ...

இழிவு படுத்துகிறார்கள் ...

நீ பிரிந்து சென்றது தான் ...

காரணம் என்று கூற ...

மாட்டார்களாமே .....!!!

மு.வ உரை

இவள் பிரிவால் வருத்திப் பசலை நிறம் அடைந்தாள் என்ற பழி சொல்வதே அல்லாமல், இவளைக் காதலர் விட்டுப் பிரிந்தார் என்று சொல்பவர் இல்லையே!.

சாலமன் பாப்பையா உரை

இங்கோ இவள் பசலை உற்றாள் என்று சொல்கிறார்களே தவிர, இந்தப் பெண்ணை விட்டுவிட்டு அவர் போய்விட்டாரே என்று சொல்பவர் ஒருவரும் இல்லை.

காமம் விடுஒன்றோ நாண்விடு

குறள் 1247

காமம் விடுஒன்றோ நாண்விடு நன்னெஞ்சே

யானோ பொறேன்இவ் விரண்டு

[காமத்துப்பால், கற்பியல், நெஞ்சொடுகிளத்தல்]

பொருள்

காமம் -  ஆசை, அன்பு, விருப்பம்; இன்பம்; புணர்ச்சியின்பம்; காமநீர்; ஊர்; குடி; இறை

விடு -  பகல் இரவுகள் நாழிகையளவில் ஒத்த நாள்,  v. t. set at liberty, release, அனுப்பு; 2. let, permit, விடைகொடு; 3. leave, quit, abandon, relinquish, துற; 4. split, பிள.

ஒன்றோ -  part. id. + ஒ&sup5;. 1. Not only,but also; connective between nouns and some-times verbs; எண்ணிடைச்சொல். பொய்படு மொன்றோ புனைபூணும் (குறள், 836). 2. Either-or; விகற்பப் பொருள்தரும் இடைச்சொல். ஏவலா னரச னொன்றோ விருபிறப்பாளன் (சீவக. 1682).

நாண் -  வெட்கம்; மகளிர்க்குரியகூச்சம்; வில்நாண்; கயிறு; மாங்கலியங்கோத்தசரடு; காண்க:அரைஞா(நா)ண்.

விடு -  பகல் இரவுகள் நாழிகையளவில் ஒத்த நாள்,  v. t. set at liberty, release, அனுப்பு; 2. let, permit, விடைகொடு; 3. leave, quit, abandon, relinquish, துற; 4. split, பிள.

நல் -  நல்ல, மிகுந்த

நெஞ்சம் - மனம்; இதயம்; மார்பு; நடு; திண்ணக்கம்; தொண்டை; துணிவு.

நெஞ்சே - மனமே

யானோ -  நானோ

பொறேன் - பொறுக்க முடியவில்லை

இவ் இரண்டு - இவ்விரண்டிற்கும் நடுவில் அகபட்டுக்கொண்டு

முழுப்பொருள் [மேலும்: அஷோக் உரை]

இப்பாடலில், காதலில் ஆழ்பட்ட காதற்தலைவி, தன்னெஞ்சை இறைஞ்சுகிறாள், ஒன்று தன்னுடைய காமத்தையாவது அல்லது காமத்துக்குத் தடையாயிருக்கிற நாணத்தையாவது கைவிடவேண்டுமென்று. 

நாணமும் காமமும் நீரும் நெருப்பும் போன்றன. காமம் நெருப்பாய் காயும்; நாணமோ அதை அவித்துவிடும். நாண நீர் குறைவாக இருப்பின் காம நெருப்பில் வற்றிவிடும். 

நெஞ்சமோ இரண்டையும் சரியான அளவில் வைத்து என் பெண்மையைக் காக்கிறது. இதை என்னால் பொறுக்க முடியவில்லை. ஏதாவது ஒன்றைமட்டும் எனக்குக் கொடு என்கிறாள்.

அவள் வேண்டுவதைப் பார்த்தால் காமமே மிக்கிருக்கவேண்டும். ஆயின் நாணமோ அதைத் தடுக்கக் கூடிய அளவில் இருக்கவேண்டும். அத்தடையை நீக்கச் சொல்லியே வேண்டுவதாகத் தோன்றுகிறது. 

குறுந்தொகைப் பாலைத்திணைப் பாடலொன்றில் காதற்தலைவி நாணம் தம்மை நெடுங்காலம் உடனிருந்து வருத்தியதையும், இனிமேல் காமம் மேலும் நெருங்க அது இல்லாது போய்விடும் என்பது வருந்தத்தக்கது என்கிறாள். அப்பாடல் இங்கே:

”காமம் எய்க்கும் எள்ளற விடினே உள்ளது நாணே” (குறுந் 112:1-2)

”அளிதோ தானே நாணே நம்மொடு 

நனிநீ டுழந்தன்று மன்னே யினியே 

வான்பூங் கரும்பி னோங்குமணற் சிறுசிறை 

தீம்புன னெரிதர வீய்ந்துக் காஅங்குத் 

தாங்கு மளவைத் தாங்கிக் 

காம நெரிதரக் கைந்நில் லாதே.”  (குறுந் 149)

குறள் 1163

காமமும் நாணும் உயிர்காவாத் தூங்கும்என்

நோனா உடம்பின் அகத்து

குறள் 1247

காமம் விடுஒன்றோ நாண்விடு நன்னெஞ்சே

யானோ பொறேன்இவ் விரண்டு

”கௌவை யஞ்சிற் காமம் எய்க்கும்

எள்ளற விடினே உள்ளது நாணே” (குறுந் 112:1-2)

“காணாக் கழிப மன்னே நாணட்டு

நல்லறி விழந்த காமம்” (குறுந் 231:4-5)

குறள் 1196

ஒருதலையான் இன்னாது காமம்காப் போல

இருதலை யானும் இனிது

கலித்தொகைப் பாடலும் இவ்வாறே கூறுவதாகக் கொள்ளவேண்டும். அப்பாடலானது. இப்பாடலில் இது இன்னுமே தெளிவாகிறது.

“மெலியப் பொறுத்தேன் களைந்தீமின் சான்றீர்

நலிதரும் காமமும் கௌவையும் என்றிவ்

வலிதின் உயிர்காவாத் தூங்கி ஆங்கென்னை

நலியும் விழுமம் இரண்டு” (கலி 142:55-8)

பரிமேலழகர் உரை

(நாண் தடுத்தலின், அச்செலவு ஒழிவாள் சொல்லியது.) நல் நெஞ்சே - நல்ல நெஞ்சே; ஒன்று காமம் விடு - ஒன்றின் நாண் விடமாட்டாயாயின் காம வேட்கையை விடு; (ஒன்று) நாண் விடு - ஒன்றின் அது விடமாட்டாயாயின் நாணினை விடு; இவ்விரண்டு யானோ பொறேன் - அன்றியே இரண்டும் விடாமை நின் கருத்தாயின், ஒன்றற்கொன்று மறுதலையாய இவ்விரண்டனையும் உடன் தாங்கும் மதுகை யான் இலன். ('யானோ' என்னும் பிரிநிலை, 'நீ பொறுப்பினும்' என்பதுபட நின்றது. 'நல்நெஞ்சே' என்றது, இரண்டையும் விடாது பெண்மையை நிலைபெறுத்தலின், 'நல்லை' என்னும் குறிப்பிற்று. 'அது நன்றே எனினும் என் உயிருண்டாதல் சாலாமையின், அதற்கு ஆகின்றிலேன்', என்பதாம். முற்று உம்மை விகாரத்தால் தொக்கது.).

மணக்குடவர் உரை

எனக்கு நல்லநெஞ்சே! ஒன்றிற் காமத்தை விடுதல் வேண்டும்: ஒன்றில் நாணத்தை விடுதல் வேண்டும்: யான் இவ்விரண்டினையுங்கூடப் பொறுத்தலரிது. இது பிரிவிடையாற்றாளாய்த் தலைமகனிருந்துழிச் செல்லக் கருதிய தலைமகள் நாணம் தடுத்தமை கண்டு கூறியது.

ஞா. தேவநேயப் பாவாணர் உரை

(நாண் தடுத்தலின் காதலரிடம் செலவொழிவாள் சொல்லியது.)

நல் நெஞ்சே- என் நன்மனமே!? ஒன்று காமம் விடு -காமம் நாண் என்னும் இரண்டனுள் ஒன்று காமத்தை விட்டுவிடு, நாண் விடு - அல்லாவிட்டால் நாணைவிட்டுவிடு, இவ்விரண்டு யானோ பொறேன்- இவ்விரண்டையும் தாங்கும் ஆற்றலோ எனக்கில்லை.

'நன்னெஞ்சே' என்றது, இன்பத்தையும் பெண்மையையும் ஒருங்கே நிலைபெறுத்தலால் நீ நல்லையென்று பாராட்டியவாறாம். இது நன்றே யெனினும், இவ்விரண்டையும் ஒருங்கே தாங்குதல் உயிருக்கு இயலாமையின், உயிரைக் காக்க வேண்டின் இவ்விரண்டுள் ஒன்றை விட்டுவிடுதல் வேண்டும். இவற்றுள் நாணே சிறந்ததாதலின், காதலர் வரும்வரை ஆற்றியிருத்தலே தக்கதென்பதாம். 'ஒன்றோ'- ஓகாரம் அசைநிலை. யானோ- ஓகாரம் பிரிநிலை. முற்றும்மை தொக்கது.

குறட் கருத்து  (நன்றி: திரு. தமிழ்க்கடல் நெல்லை கண்ணன்)

ஏதேனும் ஒன்றைக்  கொள் எந்தன் நெஞ்சே

         எப்படி நான் இரண்டையுமே  தாங்கிக் கொள்வேன்

சூதின்றி வாதின்றி இன்பம்  தன்னைச்

         சுகமதனைக் கொடுப்பதுவும் பெறுவதுவும்

பேதை நான் மணத்தோடு பெறுவதற்கு

         பெரும் உதவி நாணத்தை விட்டு விடு

வாதையின்றி  நான் வாழக் காமம் தன்னை

         வகையாக விட்டு  விடு  தாங்க மாட்டேன்

இரண்டிலொன்றே என்னாலே தாங்க ஏலும்

         இதை உணர மாட்டாயா எந்தன் நெஞ்சே

புரண்டு புரண்டழுதாலும் எந்தன் துன்பம்

         புரிந்து கொள்ள  மாட்டாயா   போதும் போதும்

துறந்திடத்தான் நினைக்கின்றாள் நாணம் தன்னைத்

         தோள்களிலே சேர்ந்திடத்தான் துடிக்கும் பெண்ணாள

இரந்து நிற்பாள் நாணத்தின் முன்னே     அதை

         எடுத்துரைத்துப் பெருமை சேர்த்தார்  வள்ளுவரும்

துடிப்பதை நிறுத்து ...!!! (நன்றி கவிப்புயல் இனியவன்)

ஓ மனமே ....

என்னவனை நினைத்து ...

துடிப்பதை நிறுத்து ...!!!

என்னவனோடு நான் ..

இணைவதை தடுக்கும்

நாணத்தை நிறுத்து ...

இரண்டையும் - நீ

என்னுள் இருந்து நீ

செய்தால் என் நிலை ...?

மு.வ உரை

நல்ல நெஞ்சே! ஒன்று காமத்தை விட்டு விடு; அல்லது நாணத்தை விட்டு விடு; இந்த இரண்டையும் பொறுத்துக் கொண்டிருக்க என்னால் முடியாது

சாலமன் பாப்பையா உரை

நல்ல நெஞ்சே! ஒன்று காதல் விருப்பத்தை விடு; அல்லது நாணத்தை விடு; இரண்டையுமே விடமுடியாது என்பது உன் எண்ணம் என்றால், ஒன்றிற்கொன்று வேறுபட்ட இந்த இரண்டையும் சேர்த்துத் தாங்கும் ஆற்றல் எனக்கு இல்லை.

ஒண்ணுதற் கோஒ உடைந்ததே

குறள் 1088

ஒண்ணுதற் கோஒ உடைந்ததே ஞாட்பினுள் 

நண்ணாரும் உட்குமென் பீடு

[காமத்துப்பால்,  களவியல்,  தகையணங்குறுத்தல் ]

பொருள்

ஒள் -  adj. Good, excellent, நல்ல. 2. Beautiful, அழகுள்ள. 3. Bright, glitter ing, luminous, பிரகாசமான. 4. Knowing, அறிவுள்ள. 5. Abundant, மிகுதியான. The ள் of this word is changed into ட் and ண் before appropriate letters, whence the nouns ஒட்பம், and ஒண்மை. ஒள்ளழல்கண்ணிற்கால. His eyes emitting bright sparks of fire through rage

நுதல் - சொல்; நெற்றி; புருவம்; தலை; மேலிடம்.

நுதற்கு - நெற்றி

நுதற்குறி - n. நுதல்³ +.Sacred marks on the forehead; புண்டரம் திலகம்முதலிய நெற்றிக்குறிகள். (திவா.)

ஓ - பதினோராம்உயிரெழுத்து; வினாவெழுத்து; விளரிஎன்னும்இசையின்எழுத்து; நீக்கம்; ஒழிவு; சென்றுதங்குகை; மதகுநீர்தாங்கும்பலகை; உயர்வுஇழிவுசிறப்புக்குறிப்பு; மகிழ்ச்சிக்குறிப்பு; வியப்புக்குறிப்பு; தெரிதல்குறிப்பு; நினைவுக்குறிப்பு; கொன்றை; பிரமன்; ஒழியிசை, வினா, சிறப்பு, எதிர்மறை, தெரிநிலை; பிரிநிலை, ஐயம், அசைநிலைஇவற்றைக்காட்டும்ஓர்இடைச்சொல்.

ஒ - பத்தாம்உயிரெழுத்து; ஒவ்வுஎன்பதன்பகுதி; ஐம்பறவைகளுள்மயிலைக்குறிக்கும்எழுத்து

ஓஒ! -  அதிசயக்குறிப்பு, வியப்புக்குறிப்பு

உடைந்ததே -> உடைதல் - பிளத்தல், தகர்தல், முறுக்கு அவிழ்தல், மலர்தல், வெளிப்படுதல், சாதல்

ஞாட்பு - போர்; போர்க்களம்; படை; கூட்டம்; கனம்; வலிமை.

ஞாட்பினுள் - போர்க்களத்தில் படைகள் மத்தியில் வலிமையாக

நண்ணார் - பகைவர்

நண்ணாரும் - பகைவரும்

உட்கு - அச்சம்; நாணம்; மிடுக்கு; மதிப்பு.

உட்கும் - மதிக்கும், அச்சம் கொள்ளும்

என் -  என்னுடைய

பீடு - பெருமை; வலிமை; தரிசுநிலம்; தாழ்வு; துன்பம்; குறைவு; ஒப்பு; குழைவு.

முழுப்பொருள்

இவ்வளவு அழகான ஒளிமிக்க நெற்றியை கொண்ட இப்பெண்ணின் முகத்தை கண்டால் நான் நாணுகிறேன். தலைகுனிகிறேன். ஆச்சர்யமாக உள்ளது!!

ஏன் ஆச்சர்யமாக உள்ளது என்றால்? நான் பெரு வலிமை வாய்ந்த அரசன். போர்க்களத்தில் என்னுடைய வலிமை பற்றி என்னுடன் போர் புரியாத பகைவர்க்கூட கேட்டுத் தெரிந்து என் மீது அச்சம் கொள்வர். 

இவ்வளவு வலிமை கொண்ட என்னை சிறுமையாக்கிவிட்டல் இந்த பேரழகி! ஆ ஆ! [நானும் மானுடன் ஆனேனே! (சொந்த வரி)]. காதல் காதல்!

மேலும்: அஷோக் உரை

ஒப்புமை

”கதுப்பயல் விளங்கும் சிறுநுதல்

புதுக்கோள் யானையின் பிணித்தற்றால் எம்மே” (குறுந் 129.5-6)

“பிறையென, மதிமயக் குறூஉம் நுதலும்” (குறுந் 226:2-3)

“நீரோ ரன்ன சாயல்

தீயோ ரன்னவென் னுரனவித் தன்றே” (குறுந் 95:4-5)

“போருள், அடல்மாமேல் ஆற்றுவேன் என்னை மடல்மாமேல்

மன்றம் படர்வித் தவள்” (கலி 141:8-10)

“ஈசனே முதலா மற்றை மானிடர் இறுதியாகக்

கூசமூன் றுலகுங் காக்கும் கொற்றத்தேன் வீரக் கோட்டி

பேசுவார் ஒருவற் காவி தோற்றலென் பெண்பால் வைத்த

ஆசைநோய் கொன்ற தென்றா லாண்மைதான் மாசுண் ணாதோ” (கம்ப.மாயாசனகப்.13)

பரிமேலழகர் உரை

(நுதலினாய வருத்தம் கூறியது.) ஞாட்பினுள் நண்ணாரும் உட்கும் என் பீடு - போர்க்களத்து வந்து நேராத பகைவரும் நேர்ந்தார்வாய்க் கேட்டு அஞ்சுதற்கு ஏதுவாய என் வலி; ஒள் நுதற்குஓ உடைந்தது - இம்மாதரது ஒள்ளிய நுதலொன்றற்குமே அழிந்து விட்டது. ('மாதர்' என்பது அதிகாரத்தான் வந்தது. 'ஞாட்பினுள்' என்றதானல், பகைவராதல் பெற்றாம்.. 'பீடு' என்ற பொதுமையான் மனவலியும் காய வலியும் கொள்க. 'ஓ' என்னும் வியப்பின்கண் குறிப்பு அவ் வலிகளது பெருமையும் நுதலது சிறுமையும் தோன்ற நின்றது. கழிந்ததற்கு இரங்கலின், தற்புகழ்தல் அன்றாயிற்று.).

மணக்குடவர் உரை 

இவ்வொள்ளிய நுதற்கு மிகவுங் கெட்டது, போரின்கண் கிட்டாதாரும் உட்கும் எனது வலி. இது மேற்கூறிய தலைமகன் மிகவுங் கவிழ்ந்து நிலம்நோக்கிப் புருவத்தின் மேற்றோன்றிய தலைமகள் நுதல் கண்டு கூறியது.

ஞா. தேவநேயப் பாவாணர் உரை

(அவள் நெற்றியினாலான வருத்தங் கூறியது)

ஞாட்பினுள் நண்ணாரும் உட்கும் என் பீடு-போர்க்களத்திற்கு வந்து என் வலிமையை அறியாத பகைவரும் வந்தறிந்தார் வாய்க்கேட்டு அஞ்சுதற்கேதுவான என் பெருவலிமை; ஒள்நுதற்கு ஓ உடைந்ததே-இப்பெண்ணின் ஒளிபொருந்திய சிறு நெற்றியொன்றிற்கே ஐயோ! அழிந்துவிட்டதே!

பெண் என்பது அதிகாரத்தால் வந்தது. பீடு என்பது பெருமை பேர் முதலியவற்றையுந் தழுவும். 'ஓ' கழிவிரக்கம் பற்றிவந்தது. 'ஓஒ' இசைநிறையளபெடை, உம்மை எச்சம், ஏகாரம் தேற்றம், "பெருமையும் உரனும் ஆடூஉமேன" (தொல். கள. 7) என்று கூறிக்கொள்ளும் பெருமையெல்லாம் பெண்ணிடத்துச் செல்லா தென்று, காமத்தின் இயல்பு கூறியவாறு.

"கோம்பிக் கொதுங்கிமே யாமஞ்ஞை குஞ்சரங் கோளிழைக்கும் 

பாம்பைப் பிடித்துப் படங்கிழித் தாங்கப் பணைமுலைக்கே 

தேம்பற் றுடியிடை மான்மட நோக்கிதில் லைச்சிவன்றா 

ளாம்பொற் றடமலர் சூடுமென் னாற்ற லகற்றியதே"

என்னுந் திருக்கோவைச்செய்யுள் (21) ஈங்குக் கவனிக்கத்தக்கதாம்.

குறட் கருத்து  (நன்றி: திரு. தமிழ்க்கடல் நெல்லை கண்ணன்)

போர்க்களத்தில் பகைக் குலத்தார் கண்டாலே அஞ்ச வைக்கும்

பொரு தடக்கை தடந்தோள்கள் பொலி மார்பு கொண்டு நின்று

ஆர்க்கின்ற பெரு வீரன் அணையில்லா வெற்றி கொண்டான்

நீர்த்துப் போய் நிற்கின்றான் நெஞ்சிழந்து வேர்க்கின்றான்

பார்த்தானாம் பாவையவள் பால் பிறையின் நெற்றியினை

படீரென்று உடைந்ததுவாம் பாவியவன் பீடெல்லாம்

வார்க்கின்றார் வள்ளுவராம் வாழ வைக்கும் பேராசான்

வகையாகக் காமத்துப் பாலதனில் சுவையாக

ஏங்க வைத்து விட்டதடி ....!!! (நன்றி கவிப்புயல் இனியவன்)

ஏங்க வைத்து விட்டதடி ....!!!

என்னை கண்டு அஞ்சாத 

ஆண்களும் இல்லை ..

அழகை கண்டு மயங்காத 

மங்கையும் இல்லை .....!!!

அத்தனையும் ஒரு நொடியில் 

தூசியாய் பறக்க வைத்துவிட்டாய் 

என் மானிட அழகியே ....!!!

பிறை கொண்ட ஒளி நெற்றியிடம் 

அத்தனையும் நான் இழந்து ...

உன்னிடம் பிச்சை பாத்திரம் 

ஏங்க வைத்து விட்டதடி ....!!!

மு.வ உரை

போர்க்களத்தில் பகைவரும் அஞ்சுதற்க்கு காரணமான என் வலிமை, இவளுடைய ஒளி பொருந்திய நெற்றிக்குத் தோற்று அழிந்ததே!.

சாலமன் பாப்பையா உரை

களத்தில் முன்பு என்னை அறியாதவரும் அறிந்தவர் சொல்லக் கேட்டு வியக்கும் என் திறம், அவள் ஒளி பொருந்திய நெற்றியைக் கண்ட அளவில் அழிந்துவிட்டதே

போர்க்களத்துக்கு வராதவர்கள் கூட, பிறருக்கு நேர்ந்ததைக் கேட்டு அஞ்சுவதற்கு ஏதுவாகிய என் வலிமையெல்லாம், இவளின் ஒளிவீசும் நெற்றிக்கே உடைந்துபோயிற்றே!

நன்றி அன்புடன் புகாரி

அடடா 

போர்க்களத்தில்

பகைவர்களைப்

பயந்தோடச் செய்யும் 

என் வீரம்

இவளின்

பேரொளி வீசும் 

நெற்றியினைக் 

கண்டதும்

ஒன்றுமற்றதாகிப்

போனதே

நன்றி ராதாகிருஷ்ணன்

எப்பேர்பட்ட வீரனானாலும் கட்டழகிகளைக் கண்டால், வீரத்தை இழக்கக்கூடும்.ராமாயணம் கூட கைகேயி, சீதை,சூர்ப்பணகை என பெண்களை மையமாக்கியே அமைந்தது.மகாபாரதம், திரௌபதிக்கு இழைக்கப்பட்ட அநீதியியால் உருவானது.

ஆகவேதான் பெரியோர்கள் "ஆவதும் பெண்ணாலே..அழிவதும் பெண்ணாலே' என்றனர்.பெண் நினைத்தால் எதையும் சாதிப்பாள்.ஆமாம்..அதற்கும் குறளுக்கும் என்ன சம்மந்தம்? என்கிறீர்களா..இருக்கிறது..

இக்குறளைப் பாருங்கள்..

ஒண்ணுதற் கோஒ உடைந்ததே ஞாட்பினுள்

நண்ணாரும் உட்குமென் பீடு.

போர்க்களத்தில் (என் வீரத்தால்) என்னை அறியாதவரும் அறிந்தவர் சொல்லக் கேட்டு வியக்கும் என் திறம், ஒளி பொருந்திய (அவள்) நெற்றியைக் கண்ட அளவில் அழிந்துவிட்டதே! (என்கிறானாம் ஒருவீரன்)

(அதாவது..அவன் வீரத்தையே அழிக்கும் அளவு அவளது நெற்றி அழகே இருக்கிறதாம்)

நன்றி மணிவண்ணன்

எதிரியின்

படைகளை பொடியாக்கிய

என்

வெற்றியும் வீரமும்

ஒளிவீசும்

உன் 

நெற்றியின் முன்னால்

தோற்றுப்போனது.

நிலா 

தனக்கான ஒளியை

எதனிடம் கடன்வாங்குகிறது

சூரியநிடமா?

இல்லை

உன் சுந்தரவதனத்திடமா?

மன்னுயிர் எல்லாம் துயிற்றி அளித்திரா

குறள் 1168

மன்னுயிர் எல்லாம் துயிற்றி அளித்திரா 

என்னல்லது இல்லை துணை

[காமத்துப்பால், கற்பியல், படர்மெலிந்திரங்கல்]

பொருள்

மன்னுயிர் - நிலைபெற்றஉயிர்; விலங்குச்சாதி; மானிடச்சாதி; ஆன்மா.

மன்னுயிர் - மானிடச்சாதி; மிருகசாதி / விலங்குச்சாதி, ஆத்துமா / ஆன்மா, நிலைபெற்றஉயிர்;  மன்னில் உள்ள அனைத்து மானுட மற்றும் மிருக உயிரினங்கள்

எல்லாம்  - எல்லாம், முழுதும்

துயிற்றுதல் - உறங்கச்செய்தல்; தங்கப்பண்ணுதல்.

துயிற்றி - துயில், நித்திரை செய்வித்தல்

அளித்தல் - காத்தல்; கொடுத்தல் படைத்தல் ஈனுதல் அருள்செய்தல்; விருப்பம்உண்டாக்குதல்; சோர்வைநீக்குதல்; செறித்தல் சொல்லுதல்

அளித்து - அளிசெய்யத்தக்கது

இரா - இரவு

என் - என்னை

அல்லது  - தவிர

இல்லை - வேறு யாரும் இல்லை

இல்லை - உண்டு என்பதன் எதிர்மறை; இன்மைப் பொருளை உணர்த்தி ஐம்பால் மூவிடத்திலும் வரும் ஒருகுறிப்பு வினைமுற்று; சாதலை உணர்த்தி ஐம்பால் மூவிடத்திலும் வரும் ஒருகுறிப்பு வினைமுற்று.

துணை - அளவு; இணை, ஒப்பு; ஆதரவு, உதவி; உதவுவோன்; காப்பு; கூட்டு; இரண்டு; இரட்டை; கணவன்; மனைவி; உடன்பிறப்பு; புணர்ச்சி; வரை; ஆயுதமுனை; அம்பு; நட்பினன்(ள்).

முழுப்பொருள்

இரவு என்பது அனைத்து உயிரினங்களையும் உறக்கத்தில் ஆழ்த்தி விடும். அப்படி ஆழ்த்தியதால் இரவு தனிமை பட்டு இருக்கும். [ஒரு நாள் தனிமை ஒன்றும் பெரிய செய்தி அல்ல. ஆனால் பல நாள் தனிமை துன்பம் தரும்]. வேறு துணை கிடையாது.

அதேப்போல் தலைவியும் தலைவன் இல்லாமல் துன்பம் பட்டு இருக்கிறாள். [பல நாட்களாக]. ஆதலால் அந்த தனிமைபடுத்தபட்டு துன்பம்பட்டுகொண்டு இருக்கும் இரவுக்கு இவளே தோழி இவளே துணை என்கிறாள். இவளால் அந்த துன்பத்தை புரிந்துக்கொள்ள முடியும் என்கிறாள். அவள் துன்பத்தை சொல்கிறாள். 

இந்த துன்பம் கொடியது. துணையில்லாமல் நான் வாழ்கிறேன். எனக்கு உறக்கம் வரவில்லையே.எனக்கு இரவே துணை என்கிறாள்.

இக்குறளில் நான் கண்டது என்னவென்றால் சொந்த வீட்டில் அத்தை மாமா அல்லது அம்மா அப்பா அல்லது பக்கத்து வீட்டில் நண்பர்கள் இருப்பினும் அவள் எப்படி தனிமை படுகிறாள்? அவளுடைய தனிமை என்ன என்பதை உணர்த்தவே (கோடான கோடி மனிதர்களும் விலங்குகளும் உயிருடன் உறங்கினாலும் தனிமையாக உள்ளது இரவு) இரவை உவமையாக காட்டுகிறார் திருவள்ளுவர்.  

மேலும்: அஷோக் உரை

ஒப்புமை

“நள்ளென் றன்றே யாமம் சொல்லவிந்

தினிதடங் கினரே மாக்கள்முனிவின்று

நனந்தலை யுலகமும் துஞ்சும்

ஓர்யான் மன்ற துஞ்சா தேனே” (குறுந் 6)

“யாமத்து

ஞாலத்து உயிரெல்லாம் கண் துஞ்சும் நள்ளிருள்கூர்

காலத்தும் துஞ்சாதுன் கண்” (கைலைபாதி 64)

இரவு

பரிமேலழகர் உரை

(இரவின் கொடுமை சொல்லி இரங்கியது.) இரா அளித்து - இரா அளித்தாயிருந்தது; மன் உயிர் எல்லாம் துயிற்றி என்னல்லது துணை இல்லை - உலகத்து நிலை பெறுகின்ற உயிர்களையெல்லாம் தானே துயிலப் பண்ணுதலான், என்னையல்லாது வேறு துணை உடைத்தாயிற்றில்லை. ('துயிற்றி' எனத் திரிந்து நின்ற வினையெச்சம், அவாய் நிலையான் வந்த உடைத்தாதலோடு முடிந்தது. 'துணையோடு ஒன்றுகின்ற உயிர்களெல்லாம், விட்டு இறந்துபடும் எல்லையேனாய என்னையே துணையாகக் கோடலின், அறிவின்று' என்பது பற்றி, 'அளித்து' என்றாள். இகழ்ச்சிக் குறிப்பு.)

மணக்குடவர் உரை

இவ்விரா அளித்தா யிருந்தது; உலகத்து வாழ்கின்ற உயிர்களெல்லாவற்றையும் துயிலப்பண்ணி என்னையல்லது வேறுதுணை யில்லையாக இருந்தது.

இது பிற்றை ஞான்று வினாவிய தோழிக்குத் தலைமகள் கண் உறங்குகின்றதில்லை யென்று சொல்லியது.

ஞா. தேவநேயப் பாவாணர் உரை

(இரவின் கொடுமை கூறி வருந்தியது.)

இரா அளித்து - இவ்விரவு இரங்கத்தக்கதாயிருந்தது; மன் உயிர் எல்லாம் துயிற்றி என் அல்லது துணை இல்லை - இவ்வுலகத்து மற்றெல்லா வுயிர்களையுந் தூங்க வைத்து விட்டதனால், இராமுழுதுந் தூங்காத என்னைத்தவிர வேறொரு துணையும் இல்லாதிருந்தது.

நிலைபெற்ற வுயிர் ஒன்றும் இவ்வுலகத்தின்மையாலும், மாந்தரேயன்றி மற்றவுயிர்களும் இரவில் தூங்குவதாலும், மன் என்னுஞ்சொற்கு மற்றுப் பொருள் இங்குக் கொள்ளப்பட்டது. ஆயினும், சில மாந்தர் இரவிலேயே வழங்குவதனாலும், சில மாந்தர் இரவிலேயே அல்லது இரவிலுந் தொழில் செய்வதனாலும், எல்லாம் என்னுஞ் சொல் பெரும்பான்மை பற்றியதென்று கொள்ளப்படும். பொதுவாக இராக்காலமே தூங்கும் வேளையாதலாலும், பகலுழைப்பாளிகட்கு இரவில் தானாகத் தூக்கம் வந்துவிடுவதனாலும், இரவே தூங்கவைப்பதாகச் சொல்லப்பட்டது. துணையொடு கூடி இன்புறும் உயிர்களையெல்லாந் தூங்கவைத்துவிட்டு, துணையின்றி வருந்தும் என்னைமட்டும் தூங்கவையாது தனக்குத் துணையாக் கொண்டது, இக்கொடிய இரா என்னுங் கருத்தினளாதலால், ' அளித்து ' எதிர்மறைக் குறிப்பாம்.

எழுத்தாளர் நாஞ்சில் நாடன் உரை (நன்றி)
‘மன்னுயிர் எல்லாம் துயிற்றி அளித்து, இராஎன்அல்லது இல்லாத் துணை’‘ - இந்த உலகத்து உயிர்களை எல்லாம் உறங்கச் செய்து காக்கும் இரவுக்கு என்னை அல்லாது வேறு யார்  துணை?’ இந்தப் பாடல் நுட்பமாக ஒரு உணர்வைச் சொல்கிறது… ‘எல்லோரும் உறங்குகிறார்கள், இரவு தனித்து இருக்கிறது. இரவுக்குத் துணையாக நான் மட்டுமே  விழித்திருக்கிறேன்’ என்பது. மிக நுணுக்கமாக தனிமைத் துயரும் பிரிவின் வேதனையும் உணர்த்தும் பாடல்.

குறட் கருத்து  (நன்றி: திரு. தமிழ்க்கடல் நெல்லை கண்ணன்)

எல்லோரும் உறங்குகின்றார் இவ்விரவால்

யான்மட்டும் உறங்கவில்லை அவர் பிரிவால்

பொல்லாத இரவு இது அன்பு கொண்டார்

போய் விட்டார் என்பதனால் துணையேயின்றி

நல்லாள் நான் தவிக்கின்றேன் எனக் கருதி

நாடி எந்தன் துணை மட்டும் கொண்டு நன்கு

உள்ளார்கள் அனைவரையுமுறங்கச் செய்து

ஒரு துணையாய் உறக்கமின்றி வைத்ததென்னை

நீ -என்னோடு இருகிறாய் ...!!! (நன்றி: கவிப்புயல் இனியவன்)

நீ -என்னோடு இருகிறாய் ...!!!
ஓ இரவே நீயும்
என்னைபோல் அநாதை
எல்லோரையும்
தூங்க வைத்திவிட்டு
நீ -என்னோடு இருகிறாய் ...!!!

காதல்
வலி கொண்டவருக்கு
பகல் என்ன ..?
இரவென்ன ..?
இரவே கவலை படாதே
உன்னோடு நானும்
இருக்கிறேன் ....!!!

மு.வ உரை

இந்த இராக்காலம் இரங்கத்தக்கது; எல்லா உயிரையும் தூங்கச் செய்துவிட்டு என்னை அல்லாமல் வேறு துணை இல்லாமல் இருக்கின்றது

சாலமன் பாப்பையா உரை

பாவம் இந்த இரவு! இது எல்லா உயிர்களையும் தூங்கச் செய்துவிட்டுத் தனியாகவே இருக்கிறது. இதற்கு என்னைத் தவிர வேறு துணை இல்லை