உறாஅர்க்கு உறுநோய் உரைப்பாய் கடலைச்

 

குறள் 1200

உறாஅர்க்கு உறுநோய் உரைப்பாய் கடலைச்

செறாஅஅய் வாழிய நெஞ்சு

[காமத்துப்பால், கற்பியல், தனிப்படர்மிகுதி]

பொருள்

உறா - உறாவொற்றி - urā-v-oṟṟi   n. id. +. ஆneg. +. Irredeemable mortgage; மீளாவொற்றி. பணத்துக்கு உறாவொற்றியாக வேண்டினநிலம்

அர் - ar   part. 1. Pers. pl. suff.; பலர்பால்விகுதி . அரசர் வந்தனர். 2. Honorific pl. suff.;உயர்வுப்பன்மை விகுதி சம்பந்தர் பாடினர். 3. Anexpletive affixed to some words; பகுதிப்பொருள்விகுதி முன்னர் (குறள், 435).  

உறு - மிகுதி; மிக்க; பகை; போர்.

உறாஅர்க்கு - உறாஅர்  - உற்றார் அல்லாதவர்

உறு - மிகுதி; மிக்க; பகை; போர்.

நோய் - துன்பம்; வருத்தம்; பிணி; குற்றம்; அச்சம்; நோவு

உரைப்பாய் - உரைத்தல் - ஒலித்தல்; சொல்லுதல் தேய்த்தல் மாற்றறியத்தேய்த்தல்; மெருகிடுதல் பூசுதல்

கடலைச் - கடல் - சமுத்திரம்; ஒருபேரெண்; இராகசின்னத்துள்ஒன்று; சதயநாள்; மிகுதி.

செறுதல் - அடக்குதல்; தடுத்தல்; சினத்தல்; வெறுத்தல்; வருத்துதல்; வெல்லுதல்; அழித்தல்; வேறுபடுதல்.

கடலைச் செறாஅஅய்– (அதனினும்) கடலை தூரெடுத்து நிரப்பி

வாழிய - வாழி; முன்னிலையசைச்சொல், வாழ்க என்னும் பொருளில் வரும் வியங்கோள் சொல்; ஓர்அசைச்சொல்.

நெஞ்சு - மனம்; இதயம்; மார்பு; நடு; திண்ணக்கம்; தொண்டை; துணிவு.

முழுப்பொருள்
தலைவனின் பிரிவால் வாடும் தலைவி தன் நெஞ்சத்திடம் கூறுகிறாள் “ஏ நெஞ்சே!! நான் இங்கு பிரிவின் காதல்நோயால் / பசலைநோயால் துன்பப்பட்டு வாழ்கிறேன் என்று என்னை விரும்பாத தலைவனிடம் உறைக்க தூது அனுப்புகிறாயே! அட முட்டாளே அது மிக கடுமையானது. அதைவிட, கடலை தூர்வாரி நிரப்பி வாழ்வது மிக எளிமையானது. அதை நீ செய்து வாழலாம் நெஞ்சே. 

தலைவனின் நெஞ்சம் மிக கடுமையானது. அதனால் அவன் திரும்பிவராமல் இருக்கிறான். மேலும், கடலை தூர்வாரி நிரப்ப எவ்வளவு காலம் ஆகும்? கணக்கற்ற அளவில் நேரம் ஆகும். அவ்வாறு தலைவனை பிரிந்து தனித்து வாழ்வது கணக்கற்ற காலத்தில் பெறக்கூடிய துன்பத்தை தருகிறது என்று தலைவி தனது துன்பத்தை உருவகிக்கிறாள். 

மேலும்: அஷோக் உரை

பரிமேலழகர் உரை

(தலைமகன் தூது வரப்பெறாது தான் தூதுவிடக் கருதியாள் நெஞ்சோடு சொல்லியது.) உறார்க்கு உறுநோய் உரைப்பாய் நெஞ்சு - நின்னோடு உறாதார்க்கு நின் நோயை உரைக்கலுற்ற நெஞ்சே; கடலைச் செறாய் - நீ ஆற்றாயாயினும் அரிதாய அதனையொழிந்து, நினக்குத் துயரஞ் செய்கின்ற கடலைத் தூர்க்க முயல்வாயாக, அஃது எளிது. (உரைக்கலுற்றது அளவிறந்த நோயாகலானும், கேட்பார் உறவிலராகலானும், அது முடிவதொன்று அன்று; முடிந்தாலும் பயன் இல்லை என்பது கருதாது, முயலாநின்றாய் என்னும் குறிப்பான், 'வாழிய' என்றாள்.).

மணக்குடவர் உரை

நெஞ்சே! நம்மோடு அன்புற்றார்க்குத் தூது விட்டாலும் பயனில்லை யென்று உன்னோடு உறாதார்க்கு நீயுற்ற நோயைச் சொல்ல நினையா நின்றாய்: நம்மை உறங்காமல் வருத்துகின்ற கடலைத் தூர்ப்பாயாயின் அஃது அதனினும் நன்று. இது தூதுவிடக் கருதிய நெஞ்சுக்குத் தூதுவிட்டாலும் பயனில்லை யென்று தலைமகள் கூறியது.

மு.வரதராசனார் உரை

நெஞ்சமே! நீ வாழி! அன்பு இல்லாதவரிடம் உன் மிகுந்த துன்பத்தைச் சொல்கின்றாய்! அதை விட எளிதாகக் கடலைத் தூர்ப்பாயாக.

சாலமன் பாப்பையா உரை

நெஞ்சே நீ வாழ்க! பாவம், நீ ஏன் உன்னோடு உறவில்லாதவர்க்கு உன் அளவற்ற துன்பத்தைச் சொல்லிக் கொண்டிருக்கிறாய்? (அதற்குப் பதில்) உன்னைத் துன்புறுத்தும் கடலைத் தூர்க்க முயற்சி செய்; அது முடியும்.

நசைஇயார் நல்கார் எனினும் அவர்மாட்டு

 

குறள் 1199

நசைஇயார் நல்கார் எனினும் அவர்மாட்டு

இசையும் இனிய செவிக்கு

[காமத்துப்பால், கற்பியல், தனிப்படர்மிகுதி]

பொருள்

நசை - ஆசை; அன்பு; நம்பிக்கை; எள்ளல்; குற்றம்; ஈரம்.

இய-த்தல் - iya-   12 v. tr. இக-. To passbeyond, excel, transcend; கடத்தல் உணர்ந்துருவியந்தவிந் நிலைமை (திவ். திருவாய். 1, 3, 6.)  

நசைஇயார் – காதலியால் விரும்பபட்டவர் 

நல்குதல் - கொடுத்தல்; விரும்புதல்; தலையளிசெய்தல்; படைத்தல்; வளர்த்தல்; தாமதித்தல்; பயன்படுதல்; உவத்தல்; அருள்செய்தல்..

நல்கார் - விரும்பாதவர் 

எனினும் - என்றுசொல்லினும்; ஆனாலும்.

மாட்டு - - அகன்றுகிடப்பினும் அணுகியநிலையில் கிடப்பினும் பொருள் முடியுமாற்றாற்கொண்டு கூட்டியசொல் முடிவு கொள்ளும்முறை; அடி; சொல்.

இசை - இசைவு; பொன் ஊதியம் ஓசை சொல் புகழ் இசைப்பாட்டு நரம்பிற்பிறக்கும்ஓசை; இனிமை ஏந்திசை தூங்கிசை, ஒழுகிசை சீர் சுரம் வண்மை திசை

இசையும் - இசைவு - பொருந்துகை; தகுதி உடன்பாடு ஏற்றது ஓட்டம்

அவர்மாட்டு இசையும் – அவர் வாய்மொழி என்பது ஏதாயினும்

இனிய - இனிது - இன்பந்தருவது; நன்மையானது; நன்றாக 

செவிக்கு - காது; கேட்கை/கேள்வி; பாத்திரத்தின்காதுவளையம்; வீணையின்முறுக்காணி; ஓரங்குலமழை

முழுப்பொருள்

தன்னை பிரிந்து சென்றதால் தன்னை விரும்பாதவர் தலைவன் என்று ஆயிற்று தலைவிக்கு. தான் விரும்பிய தன் காதலர் தன்னை விரும்பாத போதிலும் கூட தன் காதலரிடம் இருந்து வரும் வாய்மொழி சொற்கள் கூட தனது செவிக்கு இனிமையானது என்று தலைவி கூறுகிறாள். ஏனெனில் பிரிந்து சென்ற தலைவன் தன்னைப்பற்றி சிந்தித்து இருக்கிறாரே என்ற ஆறுதல் தலைவிக்கு. மேலும் அவள் பிரிவால் தனித்து வாழ்வதால் அவள் மிகுந்த துன்பத்தில் வாழ்கிறாள். தலைவனிடம் இருந்து வரும் இத்தகைய சொற்கள் அவளுக்கு இனிமையானது மட்டும் அல்ல மருந்தானதும் கூட. அவளை உயிருடன் வாழ வைத்திருக்கும். 

மேலும்: அஷோக் உரை

பரிமேலழகர் உரை

(இதுவும் அது.) நசைஇயார் நல்கார் எனினும் - என்னால் நச்சப்பட்ட காதலர் என்மாட்டு அன்பிலரேயாயினும்; அவர்மாட்டு இசையும் செவிக்கு இனிய - அவர் திறத்து யாதானும் ஓர் சொல்லும் என் செவிக்கு இனியவாம். (இழிவு சிறப்பு உம்மை, 'அவர் வாரார் என்னுஞ் சொல்லாயினும் அமையும்' என்பதுபட நின்றது. 'அதுவும் பெற்றிலேன்'என்பதாம்.).

மணக்குடவர் உரை

எம்மால் காதலிக்கப்பட்டார் எமக்கு அருளாராயினும் அவர் பக்கத்தனவாகிய சொற்களும் எங்கள் செவிக்கு இனியவாம்.

மு.வரதராசனார் உரை

யான் விரும்பிய காதலர் மீண்டு வந்து அன்பு செய்யமாட்டார் என்றாலும், அவரைப் பற்றிய புகழைக் ‌கேட்பதும் என் செவிக்கு இன்பமாக இருக்கின்றது.

சாலமன் பாப்பையா உரை

நான் காதலிக்கும் என் கணவர் என்மீது அன்பற்றவர்தாம் என்றாலும், அவரிடம் இருந்து வரும் எந்தச் சொல்லும் என் செவிக்கு இனிமையானதே.

வீழ்வாரின் இன்சொல் பெறாஅது உலகத்து

 

குறள் 1198

வீழ்வாரின் இன்சொல் பெறாஅது உலகத்து

வாழ்வாரின் வன்கணார் இல்

[காமத்துப்பால், கற்பியல், தனிப்படர்மிகுதி]

பொருள்

வீழ்தல் - ஆசை; ஆசைப்பெருக்கம்; மேவல்; வீழுதல்; காண்க:விழுதல்; நீங்குதல்.

வீழ் - வீழு (விழு), ஆசி,

வீழ்வாரின் - வீழ்வார் - வீழ்வார்  - ஆசைப்படுபவரின் (காதலரின்)

இன்சொல் - இனிமைபயக்கும்சொல்

பெறுதல் - அடைதல்; பிள்ளைபெறுதல்; பிறப்பித்தல்; அறிதல்; விலைத்தகுதியுடையதாதல்.

அது - அஃது; அஃறிணைஒருமைச்சுட்டுப்பெயர்; ஆறாம்வேற்றுமைஒறுமையுருபு

பெறாஅது - பெறாமல்

உலகு  -  உலகு, உலகப்பொது, பூமி நிலப்பகுதி; உலகுயிர்கள்; திக்கு மக்கள்தொகுதி; உலகிலுள்ளஉயர்ந்தோர்ஒழுக்கம்; உயர்ந்தோர் உயர்குணம்; வானம்

உலகத்து - உலகத்தினுடைய

வாழ்தல் - இருத்தல்; செழித்திருத்தல்; மகிழ்தல்; சுமங்கலியாகஇருத்தல்; விதிப்படிஒழுகுதல்.

வாழ்வாரின் - வாழ்வார் - வாழ்கிறார்

வன்கண் - மனக்கொடுமை; வீரத்தன்மை; பகைமை; பொறாமை; கொடும்பார்வை.

வன்கணார் - கொடுமையானவர்

இல் - இல்லை,

முழுப்பொருள்

தலைவி கூறுகிறாள், ”நான் விரும்பிய என்னுடைய தலைவனிடம் இருந்து இனிமையான சொற்களை நான் பெறவில்லை. இனிமையான சொற்கள் எனில் இங்கு உன்னை விட்டு நீங்கமாட்டேன் என்று பொருள் உணரவேண்டும். ஆதலால் பிரிவால் தனித்து மனவருத்ததுடன் பசலைநோயால் வாழ்ந்து வருவதால் என்னைபோல் இவ்வுலகில் மனகொடுமையை அனுபவிப்பவர் யாருமில்லை”  

முதலாவதாக தலைவனிடம் இருந்து வரும் “உன்னைவிட்டு பிரியமாட்டேன்” தலைவிக்கு இனிமையான சொல். இரண்டாவதாக தலைவனை பிரிந்து வாழ்வது மிகுந்த மனகொடுமையை தலைவிக்கு கொடுக்கும். 

மேலும்: அஷோக் உரை

பரிமேலழகர் உரை

(தலைமகன் தூது வரக்காணாது சொல்லியது.) வீழ்வாரின் இன்சொல் பெறாது வாழ்வாரின் - தம்மால் விரும்பப்படும் காதலர் திறத்துநின்றும்ஓர் இன்சொல்லளவும் பெறாதே பிரிவாற்றி உயிர் வாழ்கின்ற மகளிர் போல; வன்கணார் உலகத்து இல் - வன்கண்மையுடையார் இவ்வுலகத்து இல்லை. ('காதலர்திறத்துச் சொல் யாதானும் எனக்கு இனிது', என்னும் கருத்தால் 'இன்சொல்' என்றாள். இழிவு சிறப்பு உம்மை விகாரத்தால் தொக்கது. யான் வன்கண்ணேனாகலின் அதுவும் பெறாது உயிர் வாழாநின்றேன் என்பதாம்.).

மணக்குடவர் உரை

தம் காதலரிடத்துநின்று வரும் இனியசொற்களைக் கேளாது உயிர்வாழ்வாரைப்போல வன்கண்மையுடையார் இவ்வுலகத்து இல்லை.

மு.வரதராசனார் உரை

தான் விரும்பும் காதலரின் இனிய சொல்லைப் பெறாமல் உலகத்தில் ( பிரிவுத் துன்பத்தைப் பொறுத்து) வாழ்கின்றவரைப் போல் வன்கண்மை உடையவர் இல்லை.

சாலமன் பாப்பையா உரை

தம்மால் விரும்பப்படும் கணவனிடமிருந்து ஓர் இன்சொல் கூடப் பெறாமல் உயிர் வாழும் மனைவியைப் போன்ற கொடியவர் இவ்வுலகத்தில் வேறு இல்லை.

பருவரலும் பைதலும் காணான்கொல் காமன்

குறள் 1197

பருவரலும் பைதலும் காணான்கொல் காமன்

ஒருவர்கண் நின்றொழுகு வான்

[காமத்துப்பால், கற்பியல், தனிப்படர்மிகுதி]

பொருள்

பருவரலும்  - பருவரல் -  துன்பம்; பொழுது.

பருவருதல் - வருந்துதல்; துன்புறுத்தல்; அருவருத்தல்.

பைதலும் - பைதல் - இளையது; சிறுவன்; குளிர்; துன்பம்

பைதல் - paital   v. n. of பை, sorrow, affliction, துன்பம்; 2. change of colour from love-sickness; 3. (பையல்) a boy.

காணுதல் - அறிதல்; காண்டல்; சந்தித்தல்; செய்தல்; வணங்குதல்.

காணான் - காணாதவன் , அறியாதவன் 

கொல் - இரும்பு; உலோகம்; கொலைத்தொழில்; வருத்தம்; கொல்லன்; கொல்லன்தொழில்; கதவில்தைக்கும்இரும்பு; குறுக்குத்தாழ்; ஐயப்பொருள்தரும்ஓர்இடைச்சொல்; ஓர்அசைநிலை.

காமன் - மன்மதன்; பௌத்தமதத்திற்கூறப்படும்தீமைவிளைக்குந்தெய்வம்; ஒருவகைவரிக்கூத்து; இந்திரன்; வண்டு; திப்பிலி.

ஒருவர் - ஓராள்; ஒருவன்; அல்லதுஒருத்தியைச்சிறப்புப்பற்றிப்பன்மையில்வழங்கும்பெயர், மரியாதைப்பன்மை.

கண் - விழி; கண்ணோட்டம்; பீலிக்கண்; கணு; மரக்கணு; தொளை; மூங்கில்முரசடிக்குமிடம்; மூட்டுவாய்; பெருமை; இடம்; ஏழனுருபு; அறிவு; பற்றுக்கோடு; உடம்பு; அசை; உடலூக்கம்.

நின்று - எப்பொழுதும்; ஐந்தாம் வேற்றுமைப் பொருள்பட வரும் ஒர் இடைச்சொல்.

நில்-தல் - [நிற்றல்]   3 v. intr. [K.nil.] 1. To stand; கால்கள் ஊன்ற உடல் நிமிர்ந்திருத்தல். நின்றா னிருந்தான் கிடந்தான்றன் கேளலறச் சென்றான் (நாலடி, 29). 2. To stop, halt,tarry; மேற்செல்லாதிருத்தல். நில்லடா சிறிது நில்லடா (கம்பரா. நாகபாச. 73). 3. To be steadfast;to persevere, persist in a course of conduct;உறுதியாயிருத்தல். வீடு பெறநில் (ஆத்திசூ.). 4. Tostay, abide, continue; தங்குதல் குற்றியலிகர நிற்றல் வேண்டும் (தொல். எழுத். 34). 5. To cease; tobe discontinued, stopped or suspended; ஒழிதல் வேலை நின்றுவிட்டது. 6. To be subdued;அடங்குதல். சாயவென் கிளவிபோற் செவ்வழியாழிசைநிற்ப (கலித். 143, 38). 7. To remain; tobe left, as matter in a boil, as disease in thesystem; to be due, as a debt; எஞ்சுதல் நின்றதிற் பதினையாண்டு (திவ். திருமாலை 3). 8.To wait, delay; தாமதித்தல் தெய்வம் நின்றுகேட்கும்.  -

ஒழுகுவான் - ஒழுகுதல் - நீர்பாய்தல்; நீர்ப்பொருள்சொட்டுதல்; ஓடுதல்; பரத்தல்; ஒழுங்குபடுதல்; நடத்தல்; நீளுதல்; வளர்தல்; போதல்; பெருகியோடுதல்.

முழுப்பொருள்

தலைவி கூறுகிறாள் இருவருக்கும் காதலை தந்த இந்த காமனுக்கு தெரியுமா நான் மட்டும் மனவருத்தத்திலும் மேனியில் படர்ந்த பசலை நோயினாலும் வாடுகிறேன் என்று ? ஆதலால் இவன் இருவருக்கும் காதலை தந்தானா? இல்லை எனக்கும் மட்டும் தான் காதலை தந்தானா? பிரிந்து சென்ற தலைவனிடம் சண்டையிடமால் பழியை காமன் மீது போடுகிறாள் தலைவி. 

ஏனெனில் தலைவன் அருகில் இல்லை. ஒருவேளை கண்ணுக்கு தெரியாத காமன், அருகில் இருந்து இதை கேட்டு, அது தன் தவறு என்று உணர்ந்து, தலைவனுக்கு பிரிவின் துன்பத்தை கொடுத்து, அதன் மூலம் தலைவனுக்கு நான் படும் வேதனையை உணர்த்தி, தலைவனை என்னிடம் சேர்த்துவைப்பானோ என்று நப்பாசையில் இப்படியெல்லாம் சொல்கிறாளோ தலைவி என்று நினைக்க தோன்றுகிறது. 

மேலும்: அஷோக் உரை

பரிமேலழகர் உரை

(இதுவும் அது.) ஒருவர்கண் நின்று ஒழுகுவான் காமன் - காமம் நுகர்தற்கு உரிய இருவரிடத்தும் ஒப்பநிற்றல் ஒழிந்து ஒருவரிடத்தே நின்று பொருகின்ற காமக் கடவுள்; பருவரலும் பைதலும் காணான்கொல் - அவ்விடத்துப் பசப்பானாய பருவரலும் படர் மிகுதியும் அறியான் கொல்லோ. ('விழைவும் வெறுப்பும் இன்றி எல்லார்கண்ணும் நிகழ்ந்தன அறிதற்குரிய கடவுளும் என்கண் வேறுபட்டான், இனி யான் உய்யுமாறு என்னை'? என்பதாம்.).

மணக்குடவர் உரை

தான் ஒருவர் பக்கமாகநின்று ஒழுகித் துன்பஞ்செய்கின்ற காமதேவன் நமது தடுமாற்றமும் நாம் உறுகின்ற துன்பமும் காணானோ? காண்பானாயின் நம்மை வருத்தானே, தெய்வமாகலான்.

மு.வரதராசனார் உரை

(காதலர் இருவரிடத்திலும் ஒத்திருக்காமல்) ஒருவரிடத்தில் மட்டும் காமன் நின்று இயங்குவதால், என்னுடைய துன்பத்தையும் வருத்தத்தையும் அறியானோ?.

சாலமன் பாப்பையா உரை

ஆண், பெண் இருவரிடமும் இருந்து செயல் ஆற்றாமல் ஒருவரிடம் மட்டுமே போரிடும் காமன், இன்னொருவரின் மேனி நிற வேறுபாட்டால் வரும் துன்பத்தையும் வருத்தத்தையும் அறிய மாட்டானோ?.

நாம்காதல் கொண்டார் நமக்கெவன் செய்பவோ

குறள் 1195
நாம்காதல் கொண்டார் நமக்கெவன் செய்பவோ
தாம்காதல் கொள்ளாக் கடை

[காமத்துப்பால், கற்பியல், தனிப்படர்மிகுதி]

பொருள்
நாம் - அச்சம்; தன்மைப்பன்மைப்பெயர்; தாங்கள்

காதல் - அன்பு; காமவிச்சை; பத்தி; வேட்கை; ஆவல்; மகன்; சிற்றிலக்கியவகையுள்ஒன்று; கொல்லுதல்; தறித்தல்; ஆந்தைக்குரல்.

கொண்டார் - உடையவர்

நமக்கு - நம்முடைய, நமக்கு, நம்மை, etc. see நாம்.

எவன் - யாவன்; எவ்வண்ணம்; எப்படி; யாது; யாவை; என்ன; ஏன்; வியப்புஇரக்கச்சொல்.

செய்பவோ - செய்தல் - இயற்றுதல்; உண்டாக்கல்; சம்பாதித்தல்; ஒத்தல்.

தாம் - அவர்கள்; மரியாதைகுறிக்கும்முன்னிலைச்சொல்; ஓரசைச்சொல்; ஒருசாரியை; தாகம்; விலை.

காதல் - அன்பு; காமவிச்சை; பத்தி; வேட்கை; ஆவல்; மகன்; சிற்றிலக்கியவகையுள்ஒன்று; கொல்லுதல்; தறித்தல்; ஆந்தைக்குரல்.

கொள்ளாக் - கொள்ளார் - koḷḷār   n. id. + id. 1.Envious persons; மனம் பொறாதவர். பொறாதாரைக்கொள்ளாரென்பவாகலின் (தொல். பொ 147, உரை).2. Enemies, foes; பகைவர். கொள்ளார் தேஎங்குறித்த கொற்றமும் (தொல். பொ 67).

கடை - முடிவு; இடம்; எல்லை; அங்காடி; கீழ்மை; தாழ்ந்தோன்; வாயில்; புறவாயில்; பக்கம்; பணிப்பூட்டு; காம்பு; ஒருவினையெச்சவிகுதி; ஏழனுருபு; பின்; கீழ்; சோர்வு; வழி; பெண்குறி.

முழுப்பொருள்
தலைவி தலைவனை பிரிந்து இருக்கும் சூழலாக இருக்க வேண்டும். தலைவன் தன்னை பிரிந்துள்ளதால் தன்மேல் காதல் இல்லை என்று நினைக்கிறாள் தலைவி.

ஆதலால் அவள் இப்படி நினைக்கிறாள் "நான் யார் மேல் காதல் கொண்டேனோ அவர் என்னை விரும்பவில்லை ஆதலால் அவர் எனக்கு என்ன செய்து விட போகிறார்? அல்லது என்ன மகிழ்ச்சியை தந்துவிட போகிறார்? அப்படி இருந்திருந்தால் அவர் என்னை விட்டு பிரிந்திருக்க மாட்டார். துன்பம் என்மேல் படர்ந்திருக்காது. நான் மட்டும் அவரை காதலிப்பதால், அவர் நினைப்பாங்க இருப்பதால், ஒரு பயனும் இல்லை. இருவரும் மகிழ்ச்சியாக இருக்க அவருக்கும்(தலைவனுக்கும்) இருக்க வேண்டும் அவ்வெண்ணம் என்று கூறாமல் கூறுகிறாள் தலைவி?"

மேலும்: அஷோக் உரை

பரிமேலழகர் உரை
('அவர்மேற் காதலுடைமையின் அவர் கருத்தறிந்து ஆற்றினாய்', என்ற தோழிக்குச் சொல்லியது.) நாம் காதல் கொண்டார் நமக்கு எவன் செய்ப - நம்மால் காதல் செய்யப்பட்டவர் நமக்கு என்ன இன்பத்தைச் செய்வர்; தாம் காதல் கொள்ளாக்கடை - அவ்வாறே தாமும் நம்கண் காதல் செய்யாவழி. (எச்ச உம்மை விகாரத்தால் தொக்கது. 'அக்காதல் உடைமையால் நாம் பெற்றது துன்பமே' என்பதாம்.).

மணக்குடவர் உரை
நாம் காதலித்தார் நமக்கு யாதினைச் செய்வர்: தாம் காதலியாதவிடத்து

மு.வரதராசனார் உரை
நாம் காதல் கொண்ட காதலர் தாமும் அவ்வாறே நம்மிடம் காதல் கொள்ளாதபோது, நமக்கு அவர் என்ன நன்மை செய்வார்?.

சாலமன் பாப்பையா உரை
நாம் காதலித்தவர் நம்மைக் காதலிக்கவில்லை என்றால் நமக்கு எத்தகைய மகிழ்ச்சியைத் தருவார்?.

வீழப் படுவார் கெழீஇயிலர் தாம்வீழ்வார்

குறள் 1194
வீழப் படுவார் கெழீஇயிலர் தாம்வீழ்வார்
வீழப் படாஅர் எனின்

[காமத்துப்பால், கற்பியல், தனிப்படர்மிகுதி]

பொருள்
வீழ்தல் -  ஆசை; ஆசைப்பெருக்கம்; மேவல்; வீழுதல்; காண்க:விழுதல்; நீங்குதல்.

வீழப்படுவார் - ஆசையினால் விழுவார்

கெழீ - கெழுவு -. பொருந்த, நிறைய
keẕuvu   கிறது, கெழுவினது, ம், கெழுவ, v. n. To belong to, to be combined or connected with, பொருந்த. 2. To be full, நிறைய. Compare கெழுமு, and கழுமு--Note. The gerund of the verb is கெழீஇ, in poet ry. என்னைகெழீஇயினர்கொல்லோ. How are they made social and free! (நாலடி.

கெழுவு - நட்பு, keẕuvu   III. v. i. belong to, be full, கெழுமு.

கெழீஇயிலர்  - நண்பர் அல்லர் ;  நம்மவர் அல்லர்.

தாம் - அவர்கள்; மரியாதைகுறிக்கும்முன்னிலைச்சொல்; ஓரசைச்சொல்; ஒருசாரியை; தாகம்; விலை.

வீழ்வார் - ஆசைப்படுபவர் (காதலர்)

வீழப்படாஅர் - ஆசைப்படாதவர்

எனின் - என்றால்

முழுப்பொருள்
தான் ஆசையாக காதலித்த தலைவன் இப்பொழுது பிரிந்துள்ளான். பல நாட்களாக பிரிந்துள்ளான். பிரிவால் வாடுகிறாள். அப்படி இருக்கையில் தலைவி நினைக்கிறாள், இவ்வளவு நாள் அவன் என்னை வந்து பார்க்கவில்லை. அப்படி என்றால் என்னை அவனுக்குப் பிடிக்கவில்லை. அவனுக்கு என் மீது ஆசையில்லை. அதனால் தான் என்னைத் தேடி வரவில்லை.

இப்படி தான் ஆசைப்பட்டவர் என்னை விரும்பாதபொழுது என்னை பலர் விரும்பினால் என்ன விரும்பாவிட்டால் என்ன? ஒரு பயனும் இல்லை. இது காதல் வயப்பட்டவுடன் ஏற்படும் மாற்றம். தலைவன் தலைவியின் வாழ்வில் வந்தப்பிறகு தாய் தந்தை உறவினர்கள் நண்பர்கள் சுற்றத்தார்கள் எல்லாம் இரண்டாம் பட்சமே. ஆதலால் காதலித்தப்பின்புத் தலைவனின் அன்பு மட்டுமே முக்கியத்துவம் வாய்ந்தது என்ற நுட்பமான உளவியலை நாம் இங்கு காணலாம்.

மேலும்: அஷோக் உரை

பரிமேலழகர் உரை
('காதலரை இயற்பழித்தலை அஞ்சி அவரருளின்மை மறைத்த நீ கடவுட் கற்பினையாகலின், கற்புடை மகளிரால் நன்கு மதிக்கப்படுதி', என்ற தோழிக்குச் சொல்லியது.) வீழப்படுவார் - கற்புடை மகளிரால் நன்கு மதிக்கப்படுவாரும்; தாம் வீழ்வார் வீழப்படார் எனின் கெழீஇயிலர் - தாம் விரும்பும் கணவரான் விரும்பப் படாராயின் தீவினையாட்டியர்.(சிறப்பு உம்மை, விகாரத்தால் தொக்கது. கெழீஇயின்மை: நல்வினையின்மை; அஃது அருத்தாபத்தியால் தீவினையுடைமையாயிற்று. 'தீவினையுடையோற்கு அந்நன்கு மதிப்பால் பயனில்லை', என்பதாம்.).

மணக்குடவர் உரை
நற்குணங்கள் பலவுடையரென்று உலகத்தாரால் விரும்பப்பட்டாரும் தம்மால் காதலிக்கப்பட்டவரால் தாம் காதலிக்கப்படாராயின், விருப்பமில்லாராவர். இது வாழ்க்கையை முனிந்து கூறிய தலைமகளுக்கு நீ இவ்வாறு கூறுவையாயின் நின்னைப் புகழ்கின்ற உலகத்தாருள் மிக வாழ்வார் யாரென்ற தோழிக்கு அவள் கூறியது. கொண்டான் காயிற் கண்டான் காயுமென்பது பழமொழி.

மு.வரதராசனார் உரை
தாம் விரும்பும் காதலரால் விரும்பப்படாவிட்டால் உலகத்தாரால் விரும்பப்படும் நிலையில் உள்ளவரும் நல்வினை பொருந்தியவர் அல்லர்.

சாலமன் பாப்பையா உரை
தாம் விரும்பும் கணவனால் விரும்பப்படாதவளாக மனைவி இருந்துவிடுவாளானால், அவள் தீவினை வசப்பட்டவளே.

வீழுநர் வீழப் படுவார்க்கு

குறள் 1193
வீழுநர் வீழப் படுவார்க்கு அமையுமே
வாழுநம் என்னும் செருக்கு

[காமத்துப்பால், கற்பியல், தனிப்படர்மிகுதி]

பொருள்
தனிப்படர்மிகுதி - தனிமையில் நினைத்துப் புலம்புந் தலைவியின் நிலை

வீழு - vīẕu  -வீழ், கிறேன், வீழ்ந்தேன், வேன், வீழ, v. n. To fall, [poetic form of விழு.] 2. v. a. To desire, ஆசைவைக்க. 3. To long for, to desire earnestly, மேவ. (p.)

வீழுநர் - ஆசை வைக்க பட்டவரால்

வீழப்படுவார்க்கு - ஆசையில் விழுந்தோர்க்கு

அமையுமே - அமையும் - அமைதல் - உண்டாதல்; தகுதியாதல்; பொருந்தல் அடங்குதல் நிறைதல் உடன்படுதல் முடிதல்

வாழு - vāẕu  வாழ், கிறேன், வாழ்ந்தேன், வேன், வாழ, v. n. To live, to sustain life, சீவிக்க. 2. To flourish, to enjoy happiness, to prosper, செழிக்க. (Ell. 15.) 3. To be, or exist, to reside, as living creatures in their ap propriate place; to roam, சஞ்சரிக்க. வாழாநின்றகாலம். The time of prosperity. (p.) வாழுகிறபெண். A married girl, living with her husband. நீர்வாழுஞ்செந்துக்கள். Aquatic creatures.

நம் -எல்லாம் என்னும் சொல் உயர்திணை யாயின் அஃது உருபேற்கும் போது கொள்ளுஞ்சாரியை; வணக்கம்.

வாழுநம் - ஜீவிக்கும் ; உயிர் வாழும் இருவருக்கும்

என்னும் - யாவும், எல்லாம்; என்றுசொல்லப்படும்; யாதும்; சிறிதும்.

செருக்கு - அகந்தை; மகிழ்ச்சி; ஆண்மை; மயக்கம்; செல்வம்; செல்லம்; aspiration, high hope, மனோராச்சியம்.

முழுப்பொருள்
தலைவி தலைவனை பிரிந்து இருக்கும் பொழுது : நான் ஆசைவயப்பட்ட  என் காதலர் (ஆசை வயப்படுத்தப்பட்ட) என்னிடம் மறுபடியும் வந்து சேர்ந்து நாங்கள் இருவரும் ஒன்றாக இனிமையாக மகிழ்ச்சியாக வாழ்வோம் என்ற மயக்கம் தலைவிக்கு அமையும். அந்த மயக்கம் (நம்பிக்கை) அமைந்தால் மட்டுமே அவளால் தனியாய் தனிமையில் உயிர்வாழ முடியும். இல்லையென்றால் அவள் ஜீவிப்பது கடினமே. பிரிவு (என்னும் நோய்) அவ்வளவு கொடியது. அவர்களுக்கு இடையே உள்ள காதலே பிரிவெனும் நோய்க்கு மருந்தாய் இந்த (மறுபடியும் சேர்ந்து வாழ்வோம் என்ற) மயக்கத்தை தந்துள்ளது.

மேலும்: அஷோக் உரை

பரிமேலழகர் உரை
(இதுவும் அது.) வீழுநர் வீழப்படுவார்க்கு அமையுமே - தாம் விழையும் கணவரான் விழையப்படும் மகளிர்க்கு ஏற்புடைத்து ; வாழுநம் என்னும் செருக்கு - காதலர் பிரிந்தாராயினும் நம்மை நினைந்து கடிதின் வருவர்; வந்தால் நாம் இன்புற்று வாழ்தும் என்றிருக்கும் தருக்கு. ('நாம் அவரான் வீழப்படாமையின், நமக்கு அமைவது இறந்துபாடு' என்பதாம்.).

மணக்குடவர் உரை
தாம் காதலித்தாரால் காதலிக்கப்படுவார்க்கு உலகின்கண் இருந்து உயிர்வாழ்வேமென்னுங் களிப்பு அமையும். இது, தலைமகள், இருந்தாலும் பயனில்லை: அதிற்சாதல் அமையுமென்று வாழ்க்கையை முனிந்து தோழிக்குக் கூறியது

மு.வரதராசனார் உரை
காதலரால் விரும்பப்படுகின்றவர்க்கும் ( பிரிவுத் துன்பம் இருந்தாலும்) மீண்டும் வந்தபின் வாழ்வோம் என்று இருக்கும் செருக்குத் தகும்.

சாலமன் பாப்பையா உரை
தாம் விரும்பும் கணவனால் விரும்பப்பட்ட பெண்ணுக்கே (எப்படியும் விரைவில் அவர் வருவார் என்ற உறுதியினால்) வாழ்வோம் என்னும் செருக்கு, பொருத்தமாக இருக்கும்.

ஒருதலையான் இன்னாது காமம்காப்

குறள் 1196

ஒருதலையான் இன்னாது காமம்காப் போல

இருதலை யானும் இனிது

[காமத்துப்பால், கற்பியல், தனிப்படர்மிகுதி]

பொருள்

ஒருதலை - இன்றியமையாமை; கட்டாயம்; நிச்சயம்; ஓரிடம்; ஒருசார்பு; ஒருபக்கம்.

யான்  - நான்

இன்னாது - தீது; துன்பு

காமம் - ஆசை, அன்பு, விருப்பம்; இன்பம்; புணர்ச்சியின்பம்; காமநீர்; ஊர்; குடி; இறை.

கா - கா - ஓர்உயிர்மெய்யெழுத்து(க்+ஆ); சோலை; கற்பகமரம்; பாதுகாப்பு; காவடித்தண்டு; துலாக்கோல்; ஒருநிறையளவு; தோட்சுமை; பூமுதலியனஇடும்பெட்டி; அசைச்சொல்; கலைமகள்

போல - போன்று

இருதலை - iru-talai   n. இரண்டு +. Bothends; இருமுனை. நடுவண தெய்த விருதலையு மெய்தும்(நாலடி. 114).  

இனிது - இன்பந்தருவது; நன்மையானது; நன்றாக

முழுப்பொருள்

ஒருதலையான காதல் (ஒருவர் மட்டுமே கொண்ட காதல்) என்பது மிகுந்த துன்பமானது. அது துன்பத்தை மட்டுமே தரும். ஆனால் காதலர் காதலி இருவரும் ஒருங்கே இருவர்மீது கொள்ளும் காதல் ஆனது காவடியில் இருமுனைகளும் நிறைந்திருப்பதைப்போல, இருவர் உள்ளமும் காதலில் நிறைந்திருக்கும். இருவரும் நெஞ்சில் காதலை சுமப்பதால் அது அவர்களுக்கு இன்பத்தை தரும்.

இரு உள்ளமும் இங்கே காவடியில் உள்ளதைப்போல பிரிந்துள்ளது. ஆதலால் பிரிவில் இருக்கும் பொழுது இருவருக்கும் ஒருவர் மீது ஒருவர் காதல் இருந்தால் தான் அந்த பிரிவு அர்த்தம் வாய்ந்ததாக இருக்கும். உதாரணமாக இருவரும் ஊடலில் சிறிது நேரம் பிரிந்து இருந்தால் கூட, ஒருவருக்கு காதல் இல்லை என்றாலும் இறுதியில் ஊடல் தரும் சுவையை யாரும் பருக முடியாது.

மேலும்: அஷோக் உரை

பரிமேலழகர் உரை

(இதுவும் அது.) காமம் ஒரு தலையான் இன்னாது - மகளிர் ஆடவர் என்னும் இரு தலையினும் வேட்கை ஒருதலைக்கண்ணேயாயின், அஃது இன்னாது; காப்போல இருதலையானும் இனிது - காவினது பாரம்போல இருதலைக்கண்ணும் ஒப்பின் அஃது இனிது. (மூன்றன் உருபுகள் ஏழன் பொருண்மைக் கண் வந்தன. கா -ஆகுபெயர். 'என்மாட்டு உண்டாய வேட்கை அவர் மாட்டும்உண்டாயின், யான் இவ்வாறு துன்பமுழத்தல் கூடுமோ'?என்பதாம்.).

மணக்குடவர் உரை

ஒருதலை அன்பினாலுண்டாகிய காமம் இன்னாது: காவினது பாரம்போல இரண்டு தலையும் ஒத்த அன்பினா லுண்டாகிய காமமே இனிதாவது. இது மேற்கூறிய சொற்கேட்ட தலைவர் அருள் செய்வாரென்றும் தெய்வக் குறிப்பினாற் கூறிய சொற்கேட்டுக் கூடினாலும் பயனில்லை யென்றும் தலைமகள் கூறியது.

மு.வரதராசனார் உரை

காதல் ஒரு பக்கமாக இருத்தல் துன்பமானது; காவடியின் பாரம் போல் இருபக்கமாகவும் ஒத்திருப்பது இன்பமானதாகும்.

சாலமன் பாப்பையா உரை

ஆண், பெண் என்னும் இரு பக்கத்தில் ஒரு பக்கம் மட்டுமே காதல் இருந்தால் அது கொடுமை காவடியின் பாரத்தைப் போல இருபக்கமும் இருந்தால்தான் இனிது.

நாஞ்சில் நாடன் உரை

இருதலை: இருமுனைகள், இரு பக்கங்கள், மறுதலை என்றால் மறுபக்கம்,  Inverse, ஒருதலை எனில் ஒருபக்கம் மட்டுமே சார்ந்திருப்பது. One sided.

‘ஒரு தலையான் இன்னாது காமம் காப்போல

இரு தலையானும் இனிது’

என்பது திருக்குறள். ஒருதலைப் பட்சமான காமம் துன்பமானது. காவடி போல இரண்டு உள்ளங்களும் காமம் நிறைந்திருப்பதே இனிது என்பது பொருள். இங்கு காமம் என்பது காதலுக்கு ஆதிச் சொல். 

வாழ்வார்க்கு வானம் பயந்தற்றால்

குறள் 1192
வாழ்வார்க்கு வானம் பயந்தற்றால் வீழ்வார்க்கு
வீழ்வார் அளிக்கும் அளி.
[காமத்துப்பால், கற்பியல், தனிப்படர்மிகுதி]

பொருள்
தனிப்படர்மிகுதி - தனிமையில் நினைத்துப் புலம்புந் தலைவியின் நிலை

வாழ்தல் - இருத்தல், சீவித்தல் (ஜீவித்தல்), செழித்திருத்தல், மகிழ்தல்,
வாழ்வார்க்கு  - உலகில் வாழ்பவர்க்கு
வானம்  - விண்; தேவருலகு; அக்கினி; மேகம்; மழை; உலர்ந்தமரம்; மரக்கனி; உலர்ந்தகாய்; உலர்ச்சி; உயிரோடுஇருக்கை; போகை; மணம்; நீர்த்திரை; புற்பாய்; கோபுரத்தின்ஓருறுப்பு.

பயந்து - பயம், அச்சம்; அச்சச்சுவை; வாவி; அமுதம்; பால்; நீர்; பலன்; வினைப்பயன்; பழம்; இன்பம்; அரசிறை; தன்மை.
அற்று - அத்தன்மையது; அதுபோன்றது; ஓர்உவமஉருபு; ஒருசாரியை.
பயந்தற்றால்-

வீழ் - வீழு (விழு), ஆசி,
வீழ்வார்க்கு - ஆசைப்படுபவருக்கு (காதலிக்கு)
வீழ்வார்  - ஆசைப்படுபவர் (காதலர்)
அளிக்கும் - அளித்தல் - காத்தல் ; கொடுத்தல்; செறித்தல் ;  சொல்லுதல் ;சிருட்டித்தல். ; அருள்செய்தல். ; விருப்பமுண்டாக்குதல். ; சோர்வை நீக்குதல்
அளி - அன்பு; அருள் ஆசை வரவேற்பு எளிமை குளிர்ச்சி கொடை காய் வண்டு தேன் வண்டுகொல்லி கருந்தேனீ; மாட்டுக்காடி; தேள் கிராதி மரவுரிமரம்.

முழுப்பொருள்

இவ்வுலகில் மனிதருக்கு, விலங்குகளுக்கு, செடிகளுக்கு, கொடிகளுக்கு மற்றும் மண்ணில் வாழ்கின்ற எல்லா தாவரங்களுக்கும் இன்றியமையாத தேவை எனப்படுவது தண்ணீராகும். தண்ணீருக்கு மூலம் ஆறுகளும், ஏரிகளும், குளங்களும். இவற்றுக்கு மூலம் மழையாகும். ஆகவே தான் உயிர்வாழ்வோருக்கு வானம் அளிக்கும் மழை அமூதம் ஆனது. "வான்நின்று உலகம் வழங்கி வருதலால் தான்அமிழ்தம் என்றுணரற் பாற்று" (குறள் 11) என்று முன்னமே வான்சிறப்பு அதிகாரத்தில் மழையின் சிறப்பை திருவள்ளுவர் கூறியிருக்கிறார்.

மழையின் சிறப்பு எனில் -> உரிய காலத்தில் இடைவிடாது மழை பெய்வதால்தான் உலகம் நிலைபெற்று வருகிறது.  நல்ல உணவுகளைச் சமைக்கவும், சமைக்கப்பட்ட உணவுகளை உண்பவர்க்கு இன்னுமோர் உணவாகவும் பயன்படுவது மழையே. உரிய காலத்தே மழை பெய்யாது பொய்க்குமானால், கடல் சூழ்ந்த இப்பேருலகத்தில் வாழும் உயிர்களைப் பசி வருத்தும். மழை என்னும் வருவாய் தன் வளத்தில் குறைந்தால், உழவர் ஏரால் உழவு செய்யமாட்டார். பெய்யாமல் மக்களைக் கெடுப்பதும்; பெய்து கெட்டவரைத் திருத்துவதும் எல்லாமே மழைதான்.  மேகத்திலிருந்து மழைத்துளி விழாது போனால், பசும்புல்லின் நுனியைக்கூட இங்கே காண்பது அரிதாகிவிடும். பெய்யும் இயல்பிலிருந்து மாறி மேகம் பெய்யாது போனால், நீண்ட கடல் கூட வற்றிப் போகும். எத்தனை பெரியவரானாலும் நீர் இல்லாமல் வாழமுடியாது; அந்த நீரோ மழை இல்லாமல் கிடைக்காது. அதனால் மழையே அமிழ்தம் எனலாம்.

உலகில் வாழ்வோர்க்கு வானம் அளிக்கும் மழையை போல, தலைவன் மீது (தலைவி மீது) ஆசைப்படும் தலைவிக்கு தன் காதலர் செலுத்தும் அன்பே ஆகும். அந்த காதலும், அன்பும், ஆசையும், நேசமும், ஊடலும், கூடலும் நேரம் தவராது இடைவிடாது மழைப்போல செலுத்திக்கொண்டே இருக்க வேண்டும். இல்லை என்றால் மழை பொய்த்தால் ஏற்படும் துன்பம் போல காதலரின் அன்பில்லாமல் தலைவியின் வாழ்வு (மழைத்துளி விழாது போனால் பசும்புல்லின் நுனியைக்கூட இங்கே காணமுடியாததுப் போல) அரிதாகிவிடும். நிலத்தில் ஈரம் இல்லை என்றால் உழவனால் ஏரோட்ட முடியாது. அதுப்போல காதலரின் அன்பு இல்லையென்றால் அவளால் நாட்களை ஓட்ட முடியாது.

ஒப்புமை

“..................நாடன்

வந்தனன் வாழி தோழி உலகம்

கயம்கண் அற்ற பைதறு காலைப்

பீளொடு திரங்கிய நெல்லிற்கு

நள்ளென் யாமத்து மழைபொழிந் தாங்கே” (நற் 22:7-11)

மேலும் அஷோக்  உரை

பரிமேலழகர் உரை

(இதுவும் அது.) வீழ்வார்க்கு வீழ்வார் அளிக்கும் அளி - அறமும் பொருளும் நோக்கிப் பிரிந்தால், தம்மை இன்றியமையா மகளிர்க்கு அவரை இன்றியமையாக் கணவர் அளவறிந்து வந்து செய்யும் தலையளி; வாழ்வார்க்கு வானம் பயந்தற்று - தன்னையே நோக்கி உயிர் வாழ்வார்க்கு வானம் அளவறிந்து பெய்தாற் போலும். ('நம் காதலர் நம்மை விழையாமையின், அத்தலையளி இல்லையாகலான், மழை வறந்துழி அதனான் வாழ்வார் போல இறந்து படுதலே நமக்கு உள்ளது' என்பதாம்.).

ஞா. தேவநேயப் பாவாணர் உரை

(இதுவுமது)

(இ-ரை,) வீழ்வார்க்கு வீழ்வார் அளிக்கும் அளி-அறமும் பொருளும் நோக்கிப் பிரிந்துபோன கணவர் தம்மையின்றியமையாத மகளிர்க்கு, காலமறிந்து வந்து இன்புறுத்தும் பேரன்புக் கூட்டம்;வாழ்வார்க்கு வானம் பயந்த அற்று-தன்னையே நோக்கி வாழும் மாந்தருக்கு முகில் காலம் அறிந்து பெருமழை பொழிந்தாற் போலும்.

நம் காதலர் நம்மீது அன்புகொள்ளாமையால் அவர் வந்து கூடப்பெறாது, மழையின்றி வாடும் மாந்தர் போல வாடுகின்றோம் என்பதாம். ’ஆல்’ அசைநிலை.

மணக்குடவர் உரை

காதலித்தார்க்குக் காதலிக்கப்பட்டார் அருளும் அருள், உயிர் வாழ்வார்க்கு, மழை பெய்தாற்போலும்; அஃதில்லார்க்கு வாடுதலே யுள்ளது. இது நின்மேனி பொலிவழிந்த தென்னும் தோழிக்குத் தலைமகள் கூறியது.

மு.வரதராசனார் உரை
தம்மை விரும்புகின்றவர்க்குக் காதலர் அளிக்கும் அன்பு, உயிர் வாழ்கினறவர்க்கு மேகம் மழை பெய்து காப்பாற்றுதலைப் போன்றது.

சாலமன் பாப்பையா உரை

அவர் இன்றி வாழ முடியாத மனைவிக்கு, அவள் இன்றி அமையாத கணவர் காட்டும் அன்பு, தன்னை நோக்கி உயிர்வாழும் உலகத்தவர்க்கு வானம் உரிய நேரம் மழை தந்தது போலாம்.

தாம்வீழ்வார் தம்வீழப் பெற்றவர் பெற்றாரே

குறள் 1191

தாம்வீழ்வார் தம்வீழப் பெற்றவர் பெற்றாரே

காமத்துக் காழில் கனி.

[காமத்துப்பால், கற்பியல், தனிப்படர்மிகுதி]

பொருள்

தாம் - அவர்கள்; மரியாதை குறிக்கும் முன்னிலைச்சொல்; ஓரசைச்சொல்; ஒருசாரியை; தாகம்; விலை

வீழ்தல் - ஆசை; ஆசைப்பெருக்கம்; மேவல்; வீழுதல்; காண்க:விழுதல்; நீங்குதல்.

தாம்வீழ்வார் -> தாமாக காதலுக்கு வீழ்வர் (தானும் அவளை/அவரை காதலிப்பர்).

தம் - ஒருசாரியை இடைச்சொல்; மூச்சடக்குகை; மூச்சு.

தம்வீழப் -> தமக்காக அவரும்/அவளும் வீழ்வர் (அவரும்/அவளும் காதலிப்பர்).

பெறுதல் -  அடைதல்; பிள்ளைபெறுதல்; பிறப்பித்தல்; அறிதல்; விலைத்தகுதியுடையதாதல்.

பெற்றவர் -> அப்படி பட்ட மனைவியையோ / கணவனையோ பெற்றவர்.

பெற்றாரே -> பெறுவர்.

காமம் - ஆசை, அன்பு, விருப்பம்; இன்பம்; புணர்ச்சியின்பம்; காமநீர்; ஊர்; குடி; இறை

காமத்துக் -> காமம் + அத்து -> இன்பத்து எல்லைகளில் ((உள்ள / மெய்) புணர்ச்சியை  குறிக்கும்).

அத்து - attu   s. (Tel.) boundary, limit, எல்லை. அத்துமீறிச்செல்ல, to transgress the boundary.

அத்து -> எல்லை.

அத்து - இசைப்பு; சிவப்பு செவ்வை துவர் அரைஞாண் அரைப்பட்டிகை தைப்பு; அசைச்சொல், ஒருசாரியை.

காழ் - மரவயிரம், மனவுறுதி; கட்டுத்தறி; தூண்; ஓடத்தண்டு; இருப்புக்கம்பி; யானைப்பரிக்கோல்; கதவின்தாழ்; விறகு; காம்பு; கழி; இரத்தினம்; முத்து; பளிங்கு; பூமாலை; மணிவடம்; நூற்சரடு; விதை; கொட்டை; கருமை; குற்றம்.

இல் - இல்லை

காழில் -> விதை இல்லாத -> இடையுறு இல்லாத (ஒரு பழம் உண்ணும் பொழுது விதை இடையுறாக இருக்கும்) / தடையின்றி.

கனி -> பழம்; கனிவு; சாரம்; இனிமை; கனிச்சீர், மூவகைச்சீரில்இறுதியிலுள்ளநிரையசை; பொன்முதலியனஎடுக்கும்சுரங்கம்..

முழுப்பொருள்

தலைமகளும் காதலித்து தலைமகனும் ஒருவரை ஒருவர் ஒருங்கே காதலிக்கப் பெற்ற இருவரும் இன்பதை (இன்பத்தின் எல்லைகளுக்குள்) நுகரும் போது எந்த இடையுறுமின்றி நுகர்வர். சுவைக்கும் பழத்தில் விதை இல்லாமல் இருந்தால் எந்த இடையுறும் இன்றிப் பழத்தை சுவைக்கலாம். அதாவது ஒருவருக்கொருவர் (மன)வேறுபாடு இன்றி இருப்பது. ஆதலால் தான் காமத்துக் காழில் கனியை அவர்கள் பெறுவார்கள் என்று திருவள்ளுவர் கூறுகிறார். 

இருவரில் ஒருவர் ஒருங்கே இல்லாவிடாலும் விதை வந்து இடையுறு செய்யும். அதனை களைய நேரம் எடுக்குமாம்.

ஒப்புமை

“யாழ்கொன்ற கிளவி யாள் தன் அமிழ்து றழ் புலவி நீக்கிக்

காழின்றிக் கனிந்த காமக் கொழுங்கனி நுகர்ந்து” (சீவக.2089)

மற்றுமொருப் பொருள் (மூலம் : தினமணி)

இவர்கள் இருவருக்கும் ஒருங்கே காதல் வந்தால் இவர்களுக்கு இடையில் ஊடல் இருக்காது. கூடலுக்கு முன்பு ஊடல் இல்லை என்றால் அதில் அவ்வளவு இன்பம் இருக்காது. ஆதலால் சற்று ஊடலும் தேவை. 

பரிமேலழகர் உரை

[அது , தனியாகிய படர் மிகுதி என விரியும் .அஃதாவது , படர் மிகுதி தலைவன்கண் இன்றித் தன்கண்ணதேயாதல் கூறுதல் .அறமும் பொருளும் நோக்கிப் பிரிதலின் , அவன்கண் இல்லையாயிற்று . இது , பசப்புற்று வருந்தியாட்கு உரியதாகலின் , பசப்புறு பருவரலின் பின் வைக்கப்பட்டது.]

காதலரும் நின்னினும் ஆற்றாராய்க் கடிதின் வருவர்; நீ அவரோடு பேரின்பம் நுகர்தி,' என்ற தோழிக்குச் சொல்லியது. தாம் வீழப் பெற்றவர் - தம்மாற் காதலிக்கப்படும் கணவர் தம்மைக் காதலிக்கப் பெற்ற மகளிர்; பெற்றோரே காமத்துக் காழ்இல் கனி - பெற்றாரன்றே காமநுகர்ச்சி என்னும் பரல் இல்லாத கனியை.

விளக்கம் (காமம்: ஆகுபெயர். 'அத்து' அல்வழிக்கண் வந்தது, முன்னை நல்வினை இல்வழிப் பெறப்படாமையின் 'பெற்றார்' என்றும், அவரால் தடையின்றி நுகரப்படுதலின் 'காழில் கனி' என்றும் கூறினாள். 'நம் காதலர் பிரிதலேயன்றிப் பின் வாராமையும் உடைமையின் அக்கனியாம் பெற்றிலேன்,' என்பதாயிற்று.) 

காமம் என்பதை மரத்தின் பெயராகக் கொள்ளின், அத்துச்சாரியை வேற்றுமை வழியில் வந்ததேயாம். ஏகாரம் தேற்றம்.

மணக்குடவர் உரை

தாம் காதலித்தாரால் தம்மைக் காதலிக்கப்பெற்ற மகளிர் காம நுகர்ச்சியின்கண் பரலில்லாததோர் பழத்தைப் பெற்றவராவர். இது தடையின்றி நுகரலாமென்றது.

சாலமன் பாப்பையா உரை

தாம் விரும்புபவராலேயே விரும்பப்பட்ட பெண்கள்தாம் காதல் இன்பம் என்னும் விதை இல்லாத கனியைப் பெற்றவர் ஆவர்.

http://jcet.blogspot.in/2007/11/kaamathuppal-karpiyal-thanippadar.html

தான் காதலில் வீழ்ந்துவிட்ட கணவன் தம்மைக் காதலிக்கப்பெற்ற மகளிர் காமநுகர்ச்சி என்னும் வித்தால்லாத(அதாவது இடறில்லாத,குறைவில்லாத) பழத்தை கொண்டது போலன்றோ

மூலம்: http://www.tamilmantram.com/vb/archive/index.php/t-25057.html

"காய்கறி வாங்கிட்டு வரும்போது அப்படியே ஒரு தர்பூசணி பழம் வாங்கிட்டு வாங்க! வெயிலுக்கு இதமா இருக்கும்." என்றால் என் மனைவி.

"வெயிலுக்கு இதமாத்தான் இருக்கும்; ஆனா அதுல இருக்குற கறுப்பு விதைகளை எடுத்துட்டு சாப்பிடணும்! அதுதான் கொஞ்சம் கஷ்டம்! முன்னாடியெல்லாம் திராட்சையில விதை இருக்கும்.அத சாப்பிடும்போது விதைய துப்பிட்டு சாப்பிடணும்.பிறகு (Seedless Grapes). கண்டுபிடிச்சாங்க இப்ப நிம்மதியா சாப்பிட முடியுது. சீதாப்பழம் சாப்பிடறது ரொம்ப நியூசன்ஸ்! அதுல இருக்குற விதைய எடுத்துட்டு சாப்பிடறதுக்குல்ல பிராணனே போயிடும்! பழம்னா, உரிச்சோமா, சாப்பிட்டோமான்னு இருக்கணும். வாழைப்பழம் மாதிரி."

"அது கூட உரிச்சு சாப்பிடறது கொஞ்சம் கஷ்டம்தானே! யாராவது உரிச்சு கொடுத்தா வசதியா இருக்கும்! இல்லீங்களா?"

" என்ன*? கிண்டலா? என்னை வாழைப்பழ சோம்பேறின்னு சொல்றியா?"

"ஐயையோ! அப்படி நான் சொல்லலையே! எதையும் கஷ்டப்படாமெ அனுபவிக்கனும்னு நினைக்கிறீங்களே! அதைத்தான் சொன்னேன்!"

தாம்வீழ்வார் தம்வீழப் பெற்றவர் பெற்றாரே

காமத்துக் காழில் கனி.(1191)

பழத்தை சுவைக்கும்போது, இடையில் விதைகள் வருவது இடையூறாக இருக்கும்.கணவன் மனைவி இருவரும் உடல், உள்ளம், உயிர் என்னும் மூன்றாலும் ஒன்றுபட வேண்டும். அப்படி ஒன்றுபடாத நிலையில் அவர்களை இணைத்து வைத்திருக்கும் கவர்ச்சி குறையும். அதனால் மனவேறுபாடு தோன்றும். அந்த வேறுபாடு புணர்ச்சி என்னும் கனியைச் சுவைக்கும்போது விதைகள் போல வந்து இடையூறு செய்யும்.