இடுக்கண்கால் கொன்றிட வீழும் அடுத்தூன்றும்

குறள் 1030

இடுக்கண்கால் கொன்றிட வீழும் அடுத்தூன்றும்

நல்லாள் இலாத குடி.

[பொருட்பால், குடியியல், குடிசெயல்வகை]

பொருள்

இடுக்கண் -  மலர்ந்தநோக்கமின்றிமையல்நோக்கம்படவரும்இரக்கம்; துன்பம் வறுமை

கால் - நாலில்ஒன்று; தமிழில்நாலிலொன்றைக்குறிக்கும்'வ'என்னும்பின்னஎண்குறி; பாதம்; பூவின்தாள்; அடிப்பாகம்; எழுத்தின்கால்; தேருருள்; வண்டி; கோல்; குறுந்தறி; நெசவுத்தறியின்மிதி; கைப்பிடி; தூண்; பற்றுக்கோடு; முளை; மரக்கன்று; மகன்; இனமுறை; பிறப்பிடம்; வாய்க்கால்; பிரிவு; வழி; நடை; இடம்; வனம்; முனை; மரக்கால்; அளவு; கதிர்; மழைக்கால்; காற்று; வாதரோகம்; ஐம்பூதம்; பொழுது; செவ்வி; தடவை; காலன்; கருநிறம்; ஏழனுருபுள்ஒன்று; ஒருவினையெச்சவிகுதி; ஒருமுன்னொட்டு.

கொன்றிட - கொல்லுதல் - வதைத்தல்; அழித்தல்; வெட்டுதல்; கதிரறுத்தல்; துன்பப்படுத்துதல்; கெடுத்தல்.

வீழும் - வீழ்தல் - ஆசை; ஆசைப்பெருக்கம்; மேவல்; வீழுதல்; காண்க:விழுதல்; நீங்குதல்.

அடுத்து -  அடுத்தல் - கிட்டல்; சேர்தல் மேன்மேல்வருதல்; சார்தல் ஏற்றதாதல்; அடைதல் பொருத்தல்.

ஊன்றும் - ஊன்றுதல் - நிலைபெறுதல்; சென்றுதங்குதல்; நடுதல்; நிலைநிறுத்துதல்; பற்றுதல்; தீண்டுதல்; தாங்குதல்; முடிவுசெய்தல்; அமுக்குதல்; தள்ளுதல்; உறுத்துதல்; குத்துதல்;

நல் - நல்ல, மிகுந்த

ஆள் - ஆண்மகன்; திறமையுடையோன்; வீரன் காலாள் கணவன் தொண்டன் ஆட்செய்கை; வளர்ந்தஆள்; ஆள்மட்டம் அரசு தொட்டால்வாடி பெண்பாற்பெயர்விகுதி; பெண்பால்வினைமுற்றுவிகுதி.

இலாத - இல்லாத

குடி - பருகுகை; மதுபானம்; மதுவுண்டமயக்கம்; புருவம்; குடியானவன்; குடியிருப்போன்; ஆட்சிக்குட்பட்டகுடிகள்; குடும்பம்; குலம்; வீடு; ஊர்; வாழிடம்.

.

முழுப்பொருள்

துன்பங்கள் வரும் பொழுது அவற்றை முட்டுக்கொடுத்துத் தாங்கும் நல்ல குடும்பத்தலைவர்கள் நல்ல பிள்ளைகள் இல்லாத ஒரு குடும்பம் வீழும். அது எப்படிப் பட்டது தெரியுமா ?? எவ்வளவு பெரிய அல்லது சிறிய மரமானாலும் அதன் அடியில் கோடாரிக்கொண்டு வெட்டினால் சாய்ந்து வீழ்வதுப்போலாகும்.

ஆதலால் வாழ்வாதாரங்களானது முறிபடும்போது, ஊன்றுகோலெனத் தாங்கிப்பிடிக்க ஒருவர் வேண்டும். குடியைத்தாங்கி வழி நடத்த உயர்த்திப்பிடிக்க மனஉறுதியும் திறமையும் செயலின்கண் கவனமும் ஒருவருக்கு வேண்டும். 

மேலும் அஷோக்  உரை

ஒப்புமை

”இவனே

முழுமுதல் தொலைந்து கோளி யாலத்துக்

கொழிநிழல் நெடுஞ்சினை வீழ்பொறுத் தாங்குத்

தொல்லோர் மாயந்தெனத் துளங்கல் செல்லாது

நல்லிசை முதுகுடி நடுக்கறத் தழீஇ” (புறநா 58:5)

“சிதலை தினப்பட்ட ஆல மரத்தை

மதலையாய் மற்றதன் வீழூன்றி யாங்குக்

குதலைமை தந்தைக்கண் தோன்றில்தான் பெற்ற

புதல்வன் மறைப்பக் கெடும்” (நாலடி 197)

பரிமேலழகர் உரை

இடுக்கண்கால் கொன்றிட வீழும் - துன்பமாகிய நவியம் புகுந்து தன் முதலை வெட்டிச் சாய்க்க ஒரு பற்றின்றி வீழா நிற்கும்; அடுத்து ஊன்றும் நல்லாள் இலாத குடி - அக்காலத்துப் பற்றாவன கொடுத்துத் தாங்க வல்ல நல்ல ஆண்மகன் பிறவாத குடியாகிய மரம். (முதல் - அதன் வழிக்கு உரியர். வளர்ப்பாரைப் பெற்றுழி வளர்ந்து பயன்படுதலும் அல்லாவழிக் கெடுதலும் உடைமையின், மரமாக்கினார், 'தூங்குசிறை வாவலுறை தொல்மரங்கள் அன்ன ஓங்குகுலம் நைய அதனுட் பிறந்த வீரர் தாங்கல் கடன்' (சீவக.காந்தருவ-6) என்றார் பிறரும். இது குறிப்பு உருவகம். இதனான் அவர் இல்லாத குடிக்கு உளதாம் குற்றம் கூறப்பட்டது.).

மணக்குடவர் உரை

இடும்பையாகிய நவியம் அடுத்துத் தனது வேரை வெட்டுதலானே வீழும்: பக்கத்திலே அடுத்து ஊன்றுகின்ற முட்டுக்கோல்போலத் தாங்கவல்ல நல்ல ஆண்மக்கள் இல்லாத குடியாகிய மரம்.  (நவியம்-கோடரி). இது குடியோம்புவாரில்லாக்கால் அக்குடி கெடுமென்று கூறிற்று.

மு.வரதராசனார் உரை

துன்பம் வந்த போது உடனிருந்து தாங்க வல்ல நல்ல ஆள் இல்லாத குடி, துன்பமாகிய கோடாரி அடியில் வெட்டி வீழ்த்த விழுந்துவிடும்.

சாலமன் பாப்பையா உரை

துன்பம் வரும் போது முட்டுக் கொடுத்துத் தாங்கும் நல்ல பிள்ளைகள் இல்லாத வீடும், நாடும் துன்பமாகிய கோடாரி அடிப்பகுதியை வெட்டச் சாயும் மரம் போல் விழுந்து விடும்.

குடிசெய்வார்க் கில்லை பருவம் மடிசெய்து

 

குறள் 1028

குடிசெய்வார்க் கில்லை பருவம் மடிசெய்து

மானங் கருதக் கெடும்

[பொருட்பால், குடியியல், குடிசெயல்வகை]

(For meaning in English, scroll to the bottom of this post)

பொருள்

குடி - பருகுகை; மதுபானம்; மதுவுண்டமயக்கம்; புருவம்; குடியானவன்; குடியிருப்போன்; ஆட்சிக்குட்பட்டகுடிகள்; குடும்பம்; குலம்; வீடு; ஊர்; வாழிடம்.

செய்வார்க்கு - செய்பவர்க்கு 

செய்தல் - இயற்றுதல்; உண்டாக்கல்; சம்பாதித்தல்; ஒத்தல்.

இல்லை - உண்டுஎன்பதன்எதிர்மறை; இன்மைப்பொருளைஉணர்த்திஐம்பால்மூவிடத்திலும்வரும்ஒருகுறிப்புவினைமுற்று; சாதலைஉணர்த்திஐம்பால்மூவிடத்திலும்வரும்ஒருகுறிப்புவினைமுற்று.

பருவம் - காலம்; காலப்பிரிவு; இளமை; பக்குவம்; வயது; மறைநிலாஅல்லதுநிறைநிலா; கார், கூதிர், முன்பனி, பின்பனி, இளவேனில், முதுவேனில்என்னும்ஆறுபருவங்கள்; மாதம்; மழைக்காலம்; தக்ககாலம்; பயிரிடுதற்குறியகாலம்; ஆண்டு; பயனளிக்குங்காலம்; கணு; நூற்கூறுபாடு; நிலைமை; உயர்ச்சி; அளவு; சூரியன்ஒவ்வோர்இராசியிலும்புகும்காலம்; ஆடவர்பெண்டிர்க்குரியவெவ்வேறுஆயுட்காலநிலைகள்; முகம்மதியர்திருவிழாவகை.

மடி - மடங்குகை; வயிற்றுமடிப்பு; வயிறு; அரை; மடித்ததொடையின்மேற்பாகம்; ஆடை; தாள்முதலியவற்றின்மடிப்பு; பைபோன்றமுந்திச்சுருக்கு; வலைவகை; பசுமுதலியவற்றின்முலையிடம்; அடக்கம்; தனிமை; சோம்பல்; சோம்பலுடையவன்; நோய்; மீன்வலையோடுசேர்ந்தபெரும்பை; கேடு; பகை; பொய்; தீநாற்றம்; ஆடைவகை; தீட்டில்லாநிலை; இரட்டைக்கட்டுமரம்; சோறு; தாழை; தாழைவிழுது; மடங்கு.

செய்து - செய்தல் - இயற்றுதல்; உண்டாக்கல்; சம்பாதித்தல்; ஒத்தல்.

மானம் - மதிப்புடைமை; கற்பு; பெருமை; புலவி; வலிமை; வஞ்சினம்; கணிப்பு; அளவுகருவி; ஒப்புமை; அளவை; அன்பு; பற்று; இகழ்ச்சி; வெட்கம்; குற்றம்; வானூர்தி; கோயில்விமானம்; மண்டபம்; கத்தூரி; சவ்வாது; வானம்; ஒருதொழிற்பெயர்விகுதி; ஓர்இடைச்சொல்.

கருத - கருதுதல் - எண்ணுதல்; மறந்ததைநினைத்தல்; நிதானித்தறிதல்; உத்தேசித்தல்; மதித்தல்; விரும்புதல்; அனுமானித்தல்; நன்குஆலோசித்தல்; ஒத்தல்.

கெடுதல் - அழிதல்; பழுதாதல்; வறுமையடைதல்; ஒழுக்கங்கெடுதல்; உருவழித்தல்; தோற்றோடுதல்; விபத்து; தீங்கு; விகாரத்தால்எழுத்துக்கெடுதல்; வழிதவறிப்போதல்.

கெடும் - கெடும்; கேடும் விளைவிக்கும்

கேடு - தீயவை, அழிவு; இழப்பு; வறுமை; தீமை; கெடுதல்; வேறுபாடு; அழகின்மை

.

முழுப்பொருள்

குடும்ப பாரத்தை தாங்கி குடும்பத்தை உயர்த்தும் குடும்பதலைவர்களுக்கு காலம் வயது என ஏதுமில்லை. அதாவது இக்குடும்பதலைவன் இளைஞன் என்பதனால் பொறுப்பு துறப்போ தாமதமோ இல்லை. அல்லது இவன் சற்று பெரிதானவுடன் பக்குவமும் அனுபவமும் வந்த உடன் குடும்ப பொறுப்பை எடுத்துக்கொள்ளலாம் என்றில்லை. அவன் முன் அப்பொறுப்பு இருந்தால் அவன் எடுத்து அதனை செய்யவேண்டும். 

ஆதலால் தம் குடியை மேன்மையுறச் செய்யும் செயல்களில் முனைப்புடன் ஈடுபடுவோர்க்கு, இதுதான் உற்ற காலமென்று ஒன்றுமில்லை. நாளும் கோளும் நலிந்தோர்க்கில்லை என்ற சொலவடை நலிவுற்றவர்களை உயர்த்துபவர்களுக்கும் பொருந்தும். அவ்வாறு குடும்ப பொறுப்புகளை செய்யாமல்  வயதையும் அனுபவத்தையும் காரணம்காட்டி சோம்பித்திரிந்தாலோ அல்லது தனது வீண்பெருமைகளையும் புகழையும் தகுதியையும் காரணம் காட்டி தட்டிக்கழித்தாலோ அவனுக்கும் அக்குடும்பத்திற்கும் கேடு உண்டாகும். வழிதவறிப்போவான் குடும்பமும் வழிதவறிப்போகும். 

ஆதலால் தன்முன் ஒரு குடும்ப பொறுப்போ செயலோ இருந்தால் வயதுக்கு மீறிய செயல் அல்லது அனுபவம் வந்தப்பின்பு செய்கிறேன் அல்லது என் தகுதிக்கு ஏற்ற செயல் என்றெல்லாம் சாக்கு சொல்லாமல் அச்செயலை செய்து முடித்தால் குடும்பம் முன்னேறும் இல்லையேல் குடும்பம் வீணாய் போகும். அது அவனுக்கும் தீங்கு விளைவிக்கும். புகழும் கெடும்.

மேலும், ஒரு குடியை செய்வார் வீட்டில் மூத்தவராக த்தான் இருக்கவேண்டும் என்றில்லை. இளையவர்களும் பொறுப்பு எடுத்து செய்யலாம். வயதோ வரிசையோ ஒரு பொருட்டல்ல. அதேப்போல் ஒரு அலுவகத்தில் மேலாளரோ அல்லது குழுத் தலைவர் தான் ஒரு செயலை செய்யவேண்டும் என்றில்லை. குழுவில் உள்ள யார் வேண்டுமானாலும் பொறுப்பு எடுத்துச் செய்யலாம்.  இது எனது வேலை இல்லை என்று தலைமைப்பண்பு உள்ளவர் கூறமாட்டார். பதவி இருந்தால் தான் வேலை செய்வேன் என்றில்லை. ஒரு தலைவன் என்பவன் பொறுப்புகளை துறக்க மாட்டான். 

Ownership: Leaders are owners. They think long term and don’t sacrifice long-term value for short-term results. They act on behalf of the entire company, beyond just their own team. They never say “that’s not my job." என்பது Amazon நிர்வாகத்தில்  கடைநிலை ஊழியர் முதற்கொண்டு எல்லா ஊழியர்களும் கடைப்பிடிக்க வேண்டிய ஒரு தலைமைப் பண்பு.

மேலும் அஷோக்  உரை

பரிமேலழகர் உரை

மடி செய்து மானம் கருதக் கெடும் - தம் குடியினை உயரச்செய்வார் அச்செயலையே நோக்காது காலத்தை நோக்கி மடியினைச் செய்துகொண்டு மானத்தையும் கருதுவராயின் குடி கெடும்; குடி செய்வார்க்குப் பருவம் இல்லை - ஆகலான் அவர்க்குக் கால நியதி இல்லை. (காலத்தை நோக்கி மடி செய்தல் - வெயில் மழை பனி என்பன உடைமை நோக்கிப் 'பின்னர்ச் செய்தும்' என்று ஒழிந்திருத்தல். மானம் கருதுதல் - இக்குடியிலுள்ளார் யாவரும் இன்பமுற இக்காலத்துத் துன்பமுறுவேன் யானோ? என்று உட்கோடல். மேல் 'இகல் வெல்லும் வேந்தர்க்கு வேண்டும் பொழுது' (குறள்-481) என்றது உட்கொண்டு, 'இவர்க்கும் வேண்டுமோ?' என்று கருதினும் 'அது கருதற்க' என்று மறுத்தவாறு.).

மணக்குடவர் உரை

குடியோம்புவார்க்குப் பருவம் இல்லை; தம் குடும்பத்தின் குறையை நினைத்து மடிசெய்து அதனை உயர்த்துவதனாலுள தாகும் குற்றத்தை நினைக்கக் குடிகெடும் ஆதலான். இது குடிசெய்வார் இன்பநுகர்ச்சியை விரும்பாரென்றது.

மு.வரதராசனார் உரை

குடி உயர்வதற்கான செயல் செய்கின்றவர்க்கு உரிய காலம் என்று ஒன்று இல்லை, சோம்பல் கொண்டு தம் மானத்தைக் கருதுவாரானால் குடிப்பெருமைக் கெடும்.

சாலமன் பாப்பையா உரை

தன் வீட்டையும் நாட்டையும் மேன்மை அடையச் செய்ய ஆசைப்படுவர் சோம்பி, தம் பெருமையை எண்ணி இருந்தால் எல்லாம் கெட்டுப் போகும். அதனால் அவர்க்குக் கால நேரம் என்று இல்லை.

English Meaning - As I taught a kid - Rajesh

A person who wants to lift his family, community, nation does not have a best time. i.e., he doesn't have something like a best time or opportune time to start his work or do his work. He doesn't have time to mature, age, learn and do his work. He has to take the responsibility working right from day 1 . A person with ownership or responsibility to raise a family, community, nation cannot be lethargic or live his laurels. If one is lethargic or living in laurels then everything will deteriorate and destroy. When a responsible goes the wrong way even his family would go in the wrong way and get lost.

Hence, when one's family or community responsibility is bestowed upon him, one should not excuse that it is beyond his age or his experience. 

Questions that I ask to the kid

Do family head, community leader, national leader have best time to start or to do work? Why?

அமரகத்து வன்கண்ணர் போலத் தமரகத்தும்

 

குறள் 1027

அமரகத்து வன்கண்ணர் போலத் தமரகத்தும்

ஆற்றுவார் மேற்றே பொறை

[பொருட்பால், குடியியல், குடிசெயல்வகை]

பொருள்

அமர் - விருப்பம்; கோட்டை போர் போர்க்களம் மூர்க்கம்

அகத்து -  அகம்  - உள்ளம், இருப்பிடம்; பூமி மனை வீடு உள் மனம் அகப்பொருள் 'நான்'என்னும்அகங்காரம்; பாவம் அகம்பாவம் மார்பு ஏழாம்வேற்றுமையுருபு.

வன்கண்ணர் -  வன்கண் - கொடும்பார்வை, பொறாமை, கொடுமை, வீரத்தன்மை

போல - ஓர்உவமவுருபு

தமர் - உற்றார்; தமக்குவேண்டியவர்; சிறந்தோர்; வேலையாள்கள்; கருவியால்அமைத்ததுளை; துளையிடும்கருவி.

அகத்து -  அகம்  - உள்ளம், இருப்பிடம்; பூமி மனை வீடு உள் மனம் அகப்பொருள் 'நான்'என்னும்அகங்காரம்; பாவம் அகம்பாவம் மார்பு ஏழாம்வேற்றுமையுருபு.

தமரகம் - மூச்சுக்குழல்; உடுக்கை.

தமரகத்தும் -  – தமது குடியையும்

ஆற்றுவார் - தவம் ஆற்றுபவர்கள் / நோன்பு இருப்பவர்கள்

ஆற்றுவார் - எடுத்த செயலை தன் அறிவார், மிகுந்த முயற்சியால் வெற்றிகரமாக முடிப்பவர்

ஆற்றல் -  சக்தி; முயற்சி மிகுதி கடைப்பிடி பொறை ஆண்மை வெற்றி வாய்மை அறிவு இன்னசொல்இன்னபொருள்உணர்த்தும்என்னும்நியதி; சாகசம்

மேல் - மேலிடம்; அதிகப்படி; வானம்; மேற்கு; தலை; தலைமை; மேன்மை; உயர்ந்தோர்; உடம்பு; இடம்; மேலெழுந்தவாரியானது; முன்புள்ளது; பின்புள்ளது; அதிகமாக; முன்; பற்றி; அப்பால்; இனி; ஒருமுன்னொட்டு; ஏழனுருபு.

அற்று - அத்தன்மையது; அதுபோன்றது; ஓர்உவமஉருபு; ஒருசாரியை

அற்றேல் - அப்படியானால்.

அற்றே - அப்படியானால்

பொறை - பாரம், சுமை; கனம்; மலை; சிறுகுன்று; கல்; பூமி; பொறுமை; அடக்கம்; கருப்பம்; வலிமை.

முழுப்பொருள்

தன்னுடைய நாட்டை காக்கவேண்டும் என்ற எண்ணம் கொண்டு போர்க்களத்தில் சண்டையிடும் வீரத்தன்மை உயிருக்கு அஞ்சாத வீரரிடம் மட்டுமே உண்டு. அதுப்போல தன்னுடைய குடும்பத்தை தன்னுடைய உறவினர்களை உயர்த்தவேண்டும் என்ற எண்ணம் கொண்டு அதற்கான செயல்களை ஆற்றுபவரிடமே குடும்ப பாரம் வந்து சேரும் என்று கூறுகிறார் திருவள்ளுவர். 

குடும்பத்தை உயர்த்துவது என்பது ஒரு தலைமைப்பண்பே. அது தமிழ் (மற்றும் இந்திய) கலாச்சாரங்களில் வேரூண்றி உள்ளது. ஏன் குருவி தலைமீது பனங்காயை சுமத்துகிறார்கள் என்று சலித்துக்கொள்ள வேண்டாம். எண்ணமும் செயலும் வலிமையும் இருப்பதால் தான் உறவினர்கள் குடும்பத்தலைவரிடம் வருகிறார்கள். 

மேலும் அஷோக்  உரை

பரிமேலழகர் உரை

அமரகத்து வன்கண்ணர் போல - களத்தின்கண் சென்றார் பலராயினும் போர்தாங்குதல் வன்கண்ணர் மேலதானாற் போல; தமரகத்தும் பொறை ஆற்றுவார் மேற்றே - குடியின் கண் பிறந்தார் பலராயினும் அதன் பாரம் பொறுத்தல் அது வல்லார் மேலதாம். (பொருட்கு ஏற்க வேண்டும் சொற்கள் உவமைக்கண் வருவிக்கப்பட்டன. நன்கு மதிப்பிடுவார் அவரே என்பதாம். இவை மூன்று பாட்டானும் அது செய்வார் எய்துஞ் சிறப்புக் கூறப்பட்டது.).

மணக்குடவர் உரை

போர்க்களத்துச் செல்வார் பலருளராயினும் போர்தாங்கல் வன்கண்ணர்மாட்டே உளதானாற்போல, ஒருகுடியிற் பிறந்தார் பலருளராயினும் குடியோம்பல் வல்லவர்கண்ணதே குடியாகிய பாரத்தைப் பொறுத்தல்.

மு.வரதராசனார் உரை

போர்க்களத்தில் பலரிடையே பொறுப்பை ஏற்றுக் கொள்ளும் அஞ்சாத வீரரைப் போல் குடியில் பிறந்தவரிடையிலும் தாங்க வல்லவர் மேல் தான் பொறுப்பு உள்ளது.

சாலமன் பாப்பையா உரை

போர்க்களத்திலே எதிர்த்து நின்று சண்டை செய்வது அஞ்சாத வீரர்க்கே ஆவது போல, ஒரு குடும்பத்திலும் நாட்டிலும் அவற்றை உயரச் செய்பவரே, அவற்றின் சுமையைத் தாங்கவும் முடியும்.

நல்லாண்மை என்பது ஒருவற்குத் தான்பிறந்த

குறள் 1026

நல்லாண்மை என்பது ஒருவற்குத் தான்பிறந்த

இல்லாண்மை ஆக்கிக் கொளல்

[பொருட்பால், குடியியல், குடிசெயல்வகை]

பொருள்

நல் - நல்ல; வறுமை.

ஆண்மை - ஆளும்தன்மை; ஆண்தன்மை; வெற்றி வலிமை அகங்காரம் உடைமை வாய்மை

என்பது - என்று அறியப்படுவதெல்லாம்; என்று என்பது; eṉpatu   n. என்-. 1. An expletive word used to express either approval ordisapproval of a statement; நன்றுரைத்தற்கண்ணும்இழித்தற்கண்ணும் வரும் அசைநிலை (தொல். சொல் 280, சேனா ) 2. An expletive word used as anadjunct and having mere attributive force; சார்ந்துநின்ற சொல்லின்பொருளை யுணர்த்தும் பிரிவில்அசைநிலை. (தொல். சொல் 282, உரை )

ஒருவற்குத் - ஒரு மனிதனுக்கு

தான் - படர்க்கைஒருமைப்பெயர்; தேற்றச்சொல்; அசைச்சொல்; முழுப்புடைவை; குழம்பில்போடப்படும்காய்கறித்துண்டம்; 'அதுவின்றிஇஃதுஒன்று'என்றுபொருள்படுவதோர்இடைச்சொல்

பிறந்த -  பிறவி; பிறப்பு; பாவம்; துன்பம்; பிறந்தகம்; இயல்பு.

இல் - இடம்; வீடு இல்லறம் மனைவி மருதமுல்லைநிலங்களின்தலைவியர்; குடி இராசி தேற்றாங்கொட்டை இன்மை சாவு எதிர்மறைஇடைநிலை; ஐந்தாம்வேற்றுமைஉருபு; ஏழாம்வேற்றுமைஉருபு.

ஆண்மை - ஆளும்தன்மை; ஆண்தன்மை; வெற்றி வலிமை அகங்காரம் உடைமை வாய்மை 

ஆக்கிக் - ஆக்குதல் - செய்தல்; படைத்தல் சமைத்தல் அமைத்துக்கொள்ளுதல்; மாற்றுதல் உயர்த்துதல்

கொளல் - அதனை கொள்ள வேண்டும்

முழுப்பொருள்

ஒரு நல்ல ஆளும் தன்மை என்பது எது தெரியுமா? தான் பிறந்த குடியை ஆளும் தன்மையை வலிமையை தான் முதலில் வளர்த்துக்கொண்டு அக்குடியை வழிநடத்தி அக்குடியில் உள்ளோரையும் அக்குடியையும் உயர்த்துவது நல்லாண்மை ஆகும். 

இங்கே குடி என்பது தான், தன்னுடைய குடும்பம், நண்பர்கள், குழு, நிர்வாகம், நாடு என்னும் அளவில் எடுத்துக்கொள்ளவேண்டும். 

முதலில் தன்னை ஆள தெரிந்தவனே பிறரை ஆள முடியும். அடுத்து தன் குழு, குடியை ஆள தெரிந்தவனே பிற குழுவை குடும்பங்களை ஆள முடியும். 

தம்மைச் சார்ந்தவரையே தம் ஆளுமைக்கு உட்படுத்த முடியாதவரை ஆளுமை உடையவராகக் கொள்வது எங்கனம்? குடியினரை உயர்த்துவதாலேயே அது நல்லாண்மை என்றும் கூறப்படுகிறது.

மேலும் அஷோக்  உரை

பரிமேலழகர் உரை

ஒருவற்கு நல்லாண்மை என்பது - ஒருவனுக்கு நல்லாண்மை என்று உயர்த்துச் சொல்லப்படுவது; தான் பிறந்த இல்லாண்மை ஆக்கிக்கொளல் - தான் பிறந்த குடியினையாளுந் தன்மையைத் தனக்குளதாக்கிக் கோடல். (போர்த்தொழிலின் நீக்குதற்கு 'நல்லாண்மை' என விசேடித்தார். குடியினையாளுந் தன்மை - குடியிலுள்ளாரை உயரச்செய்து தன் வழிப்படுத்தல். அதனைச் செய்துகோடல் நல்லாண்மையாமாறு வருகின்ற பாட்டால் பெறப்படும்.).

மணக்குடவர் உரை

ஒருவனுக்கு மிக்க ஆண்மையென்று சொல்லப்படுவது, தான் பிறந்த குடியை ஆளுதலுடைமையை மனத்தின்கண் போக்கிக் கோடல். ஆளுதலுடைமை- குடியோம்புதலை எப்பொழுதுஞ் சிந்தித்தல். எனவே இது குடியோம்புதல் வேண்டுமென்றது.

மு.வரதராசனார் உரை

ஒருவனுக்கு நல்ல ஆண்மை என்று சொல்லப்படுவது தான் பிறந்த குடியை ஆளும் சிறப்பைத் தனக்கு உண்டாக்கி கொள்வதாகும்.

சாலமன் பாப்பையா உரை

ஒருவனுக்கு நல்ல ஆண்மை என்பது அவன் பிறந்த வீட்டையும் நாட்டையும் ஆளும் தன்மையைத் தனக்கு உரியதாக ஆக்கிக் கொள்வதோ.

குற்றம் இலனாய்க் குடிசெய்து வாழ்வானைச்

குறள் 1025

குற்றம் இலனாய்க் குடிசெய்து வாழ்வானைச்

சுற்றமாச் சுற்றும் உலகு

[பொருட்பால், குடியியல், குடிசெயல்வகை]

(For meaning in English, scroll to the bottom of this post)

பொருள்
குற்றம் - பிழை; பழி; துன்பம்; உடற்குறை; தீங்கு; அபராதம்; தீட்டு

இலன் - இல்லை என்று

இலனாய்க் - இல்லாதவனாய்

குடி - பருகுகை; மதுபானம்; மதுவுண்டமயக்கம்; புருவம்; குடியானவன்; குடியிருப்போன்; ஆட்சிக்குட்பட்டகுடிகள்; குடும்பம்; குலம்; வீடு; ஊர்; வாழிடம்.

செய்து - செய்தல் - இயற்றுதல்; உண்டாக்கல்; சம்பாதித்தல்; ஒத்தல்.

வாழ்தல் - இருத்தல்; செழித்திருத்தல்; மகிழ்தல்; சுமங்கலியாகஇருத்தல்; விதிப்படிஒழுகுதல்.

வாழ்வானை - வாழ்வான் -  வாழ்கின்றவன்

சுற்றமாச் - சுற்றம் - உறவினரர்; பரிவாரம்; அரசர்க்குரியதுணையில்ஒன்று; கூட்டம்; ஆயத்தார்.

சுற்றும் - சூழ
சுற்றுதல் - சுற்றிவரல்; சுழன்றுசெல்லுதல்; வளைந்தமைதல்; கிறுகிறுத்தல்; மனங்கலங்குதல்; தழுவுதல்; விடாதுபற்றுதல்; சூழ்ந்திருத்தல்; வளையச்சூடுதல்; வளையக்கட்டுதல்; சுருட்டுதல்; சிந்தித்தல்; அலைதல்; உடுத்துதல்; சுழற்றுதல்; கம்பிகட்டுதல்; வஞ்சித்தல்:கைப்பற்றல்

சூழ்தல் - சுற்றியிருத்தல்; சுற்றிவருதல்; ஆராய்தல்; கருதுதல்; சதியாலோசனைசெய்தல்; தேர்ந்தெடுத்தல்; அறிதல்; பண்ணுதல்; எழுதுதல்; தாக்குதல்.

உலகு - உலகம், பூமி நாடு உலகத்தார்(இடவாகுபெயர்), உயர்ந்தோர், சான்றோர் திசை மங்கலச்சொற்களுள்ஒன்று

முழுப்பொருள்
பிழைகள் செய்யாது பிறர்க்கு துன்பங்கள் தராது குற்றங்கள் புரியாது தன்னுடைய குடியினை (குடும்பம், நாடு) மேம்படுத்தி வாழ்பவனை இவ்வுலக மக்கள் தனது உறவாக நட்பாக சுற்றமாக விரும்பி அவனை சூழ்ந்து இருப்பர். 

குற்றங்கள் செய்யாது தன்னையும் தன் குடும்பத்தையும் மேம்படுத்துபவன் உண்மையாகவே வாழ்பவன் என்பதில் வாழ்தல் என்பதன் அர்த்தம் பொதிந்துள்ளதை நாம் இங்கு கவனிக்கவேண்டும். 

மேலும் அஷோக்  உரை

பரிமேலழகர் உரை
குற்றம் இலனாய்க் குடி செய்து வாழ்வானை - குற்றமாயின செய்யாது தன் குடியை உயரச் செய்தொழுகுவானை; சுற்றமாச் சுற்றும் உலகு - அவனுக்குச் சுற்றமாக வேண்டித் தாமே சென்று சூழ்வர் உலகத்தார். (குற்றமாயின, அறநீதிகட்கு மறுதலையாய செயல்கள். தாமும் பயன் எய்தல் நோக்கி யாவரும் சென்று சார்வர் என்பதாம்.).

மணக்குடவர் உரை
குற்றப்பட ஒழுகுத லினாய்த் தன்குடியை யோம்பி வாழுமவனை உலகத்தாரெல்லாரும் தமக்குற்ற சுற்றமாக நினைத்துச் சூழ்ந்துவரும்.

மு.வரதராசனார் உரை
குற்றம் இல்லாதவனாய்க் குடி உயர்வதற்கான செயல் செய்து வாழ்கின்றவனை உலகத்தார் சுற்றமாக விரும்பிச் சூழ்ந்து கொள்வர்.

சாலமன் பாப்பையா உரை
தவறானவற்றைச் செய்யாமல் தன் வீட்டையும் நாட்டையும் மேன்மை அடையச் செய்து வாழ்பவனை உயர்ந்தோர் தம் சுற்றமாக ஏற்பர்.

English Meaning - As I taught a kid - Rajesh

When a person does his/her responsibilities without doing any mistakes / crime / injustice and improves his/her family's well being and stature, then the world would embrace him/her as their relation and surround him/her. 

Also note and understand, a person is considered living(வாழ்தல்) only when he doesn't do mistakes, does his responsibilities and improves his family.

Questions that I ask to the kid

Who will the world embrace as their relation? Why?

சூழாமல் தானே முடிவெய்தும் தம்குடியைத்

குறள் 1024
சூழாமல் தானே முடிவெய்தும் தம்குடியைத்
தாழாது உஞற்று பவர்க்கு

[பொருட்பால், குடியியல், குடிசெயல்வகை]

(For meaning in English, scroll to the bottom of this post)

பொருள்
சூழ் - ஆலோசனை; ஆராய்ச்சி; சுற்று; தலைமாலை; கடலைப்பருப்பு.

சூழ்தல் - சுற்றியிருத்தல்; சுற்றிவருதல்; ஆராய்தல்; கருதுதல்; சதியாலோசனைசெய்தல்; தேர்ந்தெடுத்தல்; அறிதல்; பண்ணுதல்; எழுதுதல்; தாக்குதல்.

சூழாமல் - சூழாதிருத்தல்

தானே - தானே

முடிவு -  இறுதி; எல்லை; தீர்மானம்; முடிவானஉட்கோள்; நிறைவு; பயன்; இசைப்பாகுபாடு; சாவு.

எய்தும் - எய்தல் - அடைதல், சேர்தல்; அம்பைச்செலுத்தல்; நிகழ்தல்; சம்பவித்தல்; பெறுதல்.

தம் -  ஒருசாரியைஇடைச்சொல்; மூச்சடக்குகை; மூச்சு.

குடியைத் - குடி - பருகுகை; மதுபானம்; மதுவுண்டமயக்கம்; புருவம்; குடியானவன்; குடியிருப்போன்; ஆட்சிக்குட்பட்டகுடிகள்; குடும்பம்; குலம்; வீடு; ஊர்; வாழிட

தாழ்தல் - அமிழ்ந்துதல்; சாய்தல்; குறைதல்; சரிதல்; நிலைகெடுதல்; தாமதித்தல்; தங்குதல்; தொங்குதல்; ஈடுபடுதல்; விரும்புதல்; ஆசைப்பெருக்கம்; வணங்குதல்.

தாழாது -  குறையாது ; சாயாது - சரியாது ; தாமதிக்காது ; விரும்பாது; ஒரு குறைவுமின்றீ, மனம்தளராமல், தாளாது, தாமதிக்காமல், மந்தமாக இல்லாமல்

உஞற்று - ஊக்கம்; முயற்சி; இழுக்கு; வழக்கு.
உஞற்று பவர் - ஊக்கத்துடன் முயற்சிசெய்பவர்

முழுப்பொருள்
தன்னுடைய குடும்பத்திற்கு (அல்லது தனது நாட்டிற்கு) தேவையானவற்றை காலம் தாழ்த்தாமல் விரைந்து ஊக்கத்தோடு செயலாற்றிக்கொண்டு இருப்பவருக்கு அச்செயலை செய்து முடிக்கும் திறனும் அதற்கு தேவையான ஆட்களும் அவருக்கு தானாக கிடைக்கும்.

ஆதலால் ஒருவர் ஒரு செயலை செய்து முடிக்க அடிப்படையான தேவை எண்ணம், முயற்சி, ஊக்கம், சோம்பலின்மை, செயலாற்றுதல் மற்றவையெல்லாம் தானாக அமையும் என்பதை நாம் இங்கு அறிந்துக்கொள்ளலாம்.

When you want something all the universe conspires in helping you to achieve it - Paulo Coelho (The Alchemist) என்கிற வரிகள் நினைவுக்கு வருகின்றன.

மேலும் அஷோக் உரை

பரிமேலழகர் உரை
தம் குடியைத் தாழாது உஞற்றுபவர்க்கு - தம் குடிக்காம் வினையை விரைந்து முயல்வார்க்கு; சூழாமல் தானே முடிவெய்தும் - அவ்வினை முடிக்கும் திறம் அவர் சூழவேண்டாமல் தானே முடிவெய்தும். (குடி ஆகுபெயர். தெய்வம் முந்துறுதலான் பயன் கூறியவாறு. இவை இரண்டு பாட்டானும் அதற்குத் தெய்வம் துணையாதல் கூறப்பட்டது.).

மணக்குடவர் உரை
தங்குடியைத் தாழச் செய்யாதே உயரச்செய்யக் கருதுவார்க்கு அவ்வுயர்ச்சி எண்ணாமல் தானே முடிவுபெறும்.

மு.வரதராசனார் உரை
தம் குடி உயர்வதற்கான செயலை விரைந்து முயன்று செய்வோர்க்கு அவர் ஆராயமலே அச் செயல் தானே நிறைவேறும்.

சாலமன் பாப்பையா உரை
தன் வீட்டிற்கும் நாட்டிற்கும் ஆக வேண்டிய செயலை விரைந்து செய்பவருக்கு அச்செயலைச் செய்து முடிக்கும் திறம் அவர் நினைக்காமலே கிடைக்கும்.

English Meaning - As I taught a kid - Rajesh

When a person tirelessly works without wasting anytime, without delaying any task, and leaving no stone unturned in order to lift his/her family would be automatically receive help from various resources and people. Hence, for a person to attain a thing all that is needed are 1) thoughts/goals 2) efforts 3) perseverance 4) bias for action 5) no lethargy. Also remember "When you want something all the universe conspires in helping you to achieve it - Paulo Coelho (The Alchemist)" 

Questions that I ask to the kid

When will the society help you?

Whom does a society help?

When you tirelessly work to lift your family, will you receive help from others?

குடிசெய்வல் என்னும் ஒருவற்குத் தெய்வம்

குறள் 1023

குடிசெய்வல் என்னும் ஒருவற்குத் தெய்வம்

மடிதற்றுத் தான்முந் துறும்

[பொருட்பால், குடியியல், குடிசெயல்வகை]

(For meaning in English, scroll to the bottom of this post)

பொருள்

குடி -பருகுகை; மதுபானம்; மதுவுண்டமயக்கம்; புருவம்; குடியானவன்; குடியிருப்போன்; ஆட்சிக்குட்பட்டகுடிகள்; குடும்பம்; குலம்; வீடு; ஊர்; வாழிடம்

செய் - வயல்; ஒன்றேமுக்கால்ஏக்கர்கொண்டநன்செய்நிலவளவு; 100சிறுகுழிகொண்டநிலவளவு

செயல் - தொழில்; பொருள்தேடுகை; இழைப்புவேலை; வேலைப்பாடு; காவல்; ஒழுக்கம்; வலிமை; செல்வாக்கு; செய்யல்நிலைமை; சேறு

வல் - வலிமை; திறமை; மேடு; சூதாடுகருவி; முலைக்கச்சு; விரைவு

என்னும் - யாவும், எல்லாம்; என்றுசொல்லப்படும்; யாதும்; சிறிதும்

ஒருவற்கு - ஒரு மனிதனுக்கு

தெய்வம் - கடவுள்; ஊழ்வினை; தெய்வத்தன்மை; எண்வகைமணத்துள்ஒன்றாகியதெய்வமணம்; தெய்வச்செயல்; ஆண்டு; புதுமை; தெய்வத்தன்மைஉள்ளது; மணம்.

மடி - மடங்குகை; வயிற்றுமடிப்பு; வயிறு; அரை; மடித்ததொடையின்மேற்பாகம்; ஆடை; தாள்முதலியவற்றின்மடிப்பு; பைபோன்றமுந்திச்சுருக்கு; வலைவகை; பசுமுதலியவற்றின்முலையிடம்; அடக்கம்; தனிமை; சோம்பல்; சோம்பலுடையவன்; நோய்; மீன்வலையோடுசேர்ந்தபெரும்பை; கேடு; பகை; பொய்; தீநாற்றம்; ஆடைவகை; தீட்டில்லாநிலை; இரட்டைக்கட்டுமரம்; சோறு; தாழை; தாழைவிழுது; மடங்கு.

மடிதற்றுத் - தன் இடையுடையை இறுகக் கட்டிக்கொண்டு

தான் - படர்க்கைஒருமைப்பெயர்; தேற்றச்சொல்; அசைச்சொல்; முழுப்புடைவை; குழம்பில்போடப்படும்காய்கறித்துண்டம்; 'அதுவின்றிஇஃதுஒன்று'என்றுபொருள்படுவதோர்இடைச்சொல்.

முந்து  - muntu   III. v. i. be or go before the rest, precede, come in front, முன்போ; முந்த, v. a. To take precedence, precede, to pass before, take the lead, go to the head, முற் பட

உறும் - உறுதல் - உண்டாதல்; மிகுதல்; சேர்தல்; இருத்தல்; பொருந்தல்; கூடல்; நேர்தல்; பயனுறல்; கிடைத்தல்; வருந்தல்; தங்கல்; அடைதல்; நன்மையாதல்; உறுதியாதல்; நிகழ்தல்.

முந்துறும் - முன்வந்து உய்யும் வகை செய்யும்

முழுப்பொருள்

தன்னுடைய குடும்பம் (தாய், தந்தை, மனைவி, மக்கள், சகோதரர்கள், மற்ற உற்றார் உறவினர்கள்), குடியை/குலத்தை சேர்ந்த மக்கள், ஊரை சேர்ந்த மக்கள் ஆகியோரின் வாழ்வு மேம்பட / வலிமையானதாக ஆக்கவேண்டும் அது நம் கடமை என்றெண்ணி அதற்கான செயலில் ஈடுபடுவார் என்றால் அவருக்கு தெய்வங்கள் இடையாடையை கட்டிக்கொண்டுத், தானே செய்வோர் முன் வந்து உதவும். தெய்வங்களை அழைக்கவேண்டியதில்லை. 

களத்தில் இறங்கி வேலை செய்ய தன்னுடைய இடை உடையை இறுகக் கட்டிக்கொண்டு செல்கிறோம் அல்லவா. அதுபோல தெய்வங்களும் செயலுக்கு ஆயுத்தமாகின்றன என்பதை விளக்கவே "மடிதற்றுத் தான்முந் துறும்" என்கிறார் திருவள்ளுவர். 

தி அல்கெமிஸ்ட் (The Alchemist) என்கிற ஒரு குறுநாவலின் சாராம்சம் என்னவெனில் உனக்கு ஒன்று வேண்டும் என்று நீ அதற்கு உழைத்தால் அதனை நீ அடைய இந்த உலகமே உனக்கு முன்வந்து உதவும்.  When you want something all the universe conspires in helping you to achieve it - Paulo Coelho. அதுப்போல உன் குடி உயர நீ செயலாற்றினால் உனக்கு தெய்வங்கள் வந்து உதவும் என்கிறது இக்குறள். 

தன் குடியை, குடும்பத்தை (பெற்றோர்கள், கணவன்/ மனைவி, குழந்தைகள் மற்றும் குடும்பத்தில் உள்ள மற்றவர்கள்) அடுத்த உயரிய நிலைக்கு கொண்டு செல்ல வேண்டும் என்ற மன ஊக்கத்தோடு, எழுச்சியோடு அதற்கு தேவையான செயல்களை செய்யும் ஒருவருக்கு தெய்வமே (தெய்வ மனம் படைத்தவர்கள், சான்றோர்கள்) தானாக முன் வந்து உதவி செய்யும். ஆனால் அதற்கு எல்லாம் உயரிய எண்ணமும், அயராய உழைப்பும் தேவை. இங்கே உயரிய நிலை என்பது வறுமையில் இருந்து முன்னேற்றம் மட்டும் அல்ல, அறம், ஈகை, பொருள், கல்வி என்று பல தளத்திலும் பொருள் கொள்ளலாம்.

தனது குடியினை உயர்த்துவதற்காகப் பாடுபடுகின்றவனுக்குத் தெய்வம் தானாகச் சென்று  செய்யும். செய்ய வேண்டும் என்று குறிப்பிடுகிறார். தெய்வத்தை வேண்ட வேண்டியது இல்லை. தானாகச் சென்று உதவும். உதவ வேண்டும். அவ்வாறு உதவுவதுதான் தெய்வம் என்ற கருத்தும் இக்குறளில் அடங்கியுள்ளது. குடிசெய்வதற்கு மட்டுமன்று, பிற நல்ல சமுதாய நலச் செயல்களுக்கும் தெய்வம் விரைந்து உதவ வேண்டும் என்பது பொருள். நல்ல செயல்கள் முயற்சியால் நடைபெற வேண்டும் எனது இங்கு முதன்மை. தெய்வம் உதவி செய்தல் நல்லது. இல்லையென்றால் வருந்தியழைக்க வேண்டியது இல்லை. உண்மையான அறப்பற்றாளர்கள் சமூகப்  தீவிரமான சிந்தனைகள் தேவை. இவையில்லாவிட்டால், அவர் அறங்கூறுபவராக இருக்க வேண்டியதும் இல்லை. 

தெய்வத்தை வள்ளுவர் நேரடியாக மறுக்கவில்லை. ஆனால் சமூதாயத்தின் தேவையை ஒட்டி மறுக்கவும் துணிந்துவிடக்  கூடியவர்.

சித்ரா பாலசுப்ரமணியன் அவர்களின் முகநூல் பக்கத்தில் இருந்து (12-SEP -2023)

தோழர் கபிலன், ஸ்ருதி இலக்கியம் , வேண்டிய உதவி கிடைத்துவிட்டது, நன்றி எனப் பதிவிட்டிருந்தார். மனதுக்கு மிக நெகிழ்வாக இருந்தது.

சமூகம் எனும் மாபெரும் சமுத்திரத்தில் நாமெல்லாம் நீர்த்துமி. ஆனால் அந்தத் துமி சமுத்திரத்தில் இருந்தால் தான் அதற்கு வலிமை. ஒரு சமூகமாக நம்மை உணர்தல் என்பதும் காந்தியின் கோட்பாடு தான்.

காந்தி, இந்தியா திரும்பிய பின் தேர்ந்தெடுத்துக் கொண்டது ஆசிரம வாழ்வு. அதனோடு சேர்த்து மேற்கொண்ட ஏராளமான அமைப்புகள்.

அத்தனைக்கும் பொது நிதி தான் ஆதாரம். சல்லிக் காசு என்றாலும் அது மக்களிடம் இருந்து வரவேண்டும் என்பது தான் அவர் கொள்கை.

அதோடு, நல்ல மனங்களை இணைப்பது தான் நாம் செய்ய வேண்டியது. அதைச் செய்து விட்டால் நல்ல காரியங்கள் தானாகவே வெகு சிறப்பாகவே நடந்துவிடும் என்பதைக் காந்தி முழுமையாக நம்பினார்.

கையில் தம்பிடி இல்லாமல் அவர் தொடங்கிய செயல்கள் அனைத்திற்கும் மக்கள் வாரி வாரி வழங்கினார்கள். தெய்வம் உடன் நிற்கும் என்றும் அவர் நம்பினார். உடன் நிற்பதோடு மட்டுமல்ல, ஆடையை வரிந்து கட்டிக் கொண்டு கூடவே பணி செய்யவும் அது விரைந்தோடி வருமாம்.

"குடி செய்வல் என்னும் ஒருவற்கு தெய்வம்

மடி தட்டி தான் முந்துறும்" என்கிறது வள்ளுவம்.

நல்ல செயல்களை நினைப்போம். மற்றவை தாமாகவே நடக்கும்.

❤️

மேலும் அஷோக்  உரை

பரிமேலழகர் உரை

குடி செய்வல் என்னும் ஒருவற்கு - என் குடியினை உயரச் செய்யக் கடவேன் என்று கொண்டு, அதற்கு ஏற்ற கருமங்களின் முயலும் ஒருவனுக்கு; தெய்வம் மடி தற்றுத் தான் முந்துறும் - தெய்வம் ஆடையைத் தற்றுக் கொண்டு தான் முந்துற்று நிற்கும். (முயற்சியை அதன் காரணத்தால் கூறினார். தற்றுதல் - இறுக உடுத்தல். முன் நடப்பார் செயல் நியதிமேல் ஏற்றப்பட்டது.).

மணக்குடவர் உரை

குடியை யோம்புவனென்று கருதி முயலுமவனுக்குத் தெய்வம் மடிதற்றுக் கொண்டு தான் முற்பட்டு முயலும். மடிதற்றல் - தொழில்செய்வார் ஆடையை இறுக உடுத்தல்

மு.வரதராசனார் உரை

என் குடியை உயரச் செய்வேன் என்று முயலும் ஒருவனுக்கு ஊழ், ஆடையைக் கட்டிக் கொண்டு தானே முன் வந்து துணை செய்யும்.

சாலமன் பாப்பையா உரை

என் குடியையும் நாட்டையும் மேனமை அடையச் செய்வேன் என்று செயல் செய்யும் ஒருவனுக்கு தெய்வம் தன் ஆடையை இறுக உடுத்திக்கொண்டு உதவ முன்வந்து நிற்கும்.

Thirukkural - Management - Perseverance

Persevere and put in your best efforts to make your family prosperous. If a person has concern for the welfare of his family, commitment to make his family prosperous, and fighting spirit in him, all the forces in the universe, that includes the Supreme Power, unconditionally extend a supporting and helping hand, confirms Kural 1023.

Fate itself girds up its loins and rashes 

To help one bent on social service.

A person who perseveres will have all the support at the right juncture. It is everyone's responsibility to develop one's family. Once families develop, the society develops. Once societies develop, a nation develops. So, in the interest and welfare of the development of the nation, let us develop our families.

English Meaning - As I taught a kid - Rajesh

For those who work tirelessly with the purpose of improving or strenghtening their family, all the Gods (the whole world) will come together (while gird up his robes) and help him as if it is their duty without even inviting those Gods. When we work on the field, we wear dresses in the hip as the first step of getting ready to get into the field.

The same thought is said in "The Alchemist" novel by Paulo Coelho - When you want something all the universe conspires in helping you to achieve it.

Questions that I ask to the kid

Who will God help? Why? How?

ஆள்வினையும் ஆன்ற அறிவும்

குறள் 1022
ஆள்வினையும் ஆன்ற அறிவும் எனஇரண்டின்
நீள்வினையால் நீளும் குடி

[பொருட்பால், குடியியல், குடிசெயல்வகை]

பொருள்
ஆள்வினையும் - முயற்சி; மகிழ்ச்சி

ஆன்ற - மாட்சிமைப்பட்ட; பரந்த; அடங்கிய; இல்லாமற்போன.

அறிவும் - ஞானம்; புத்தி பொறியுணர்வு; அறியவேண்டியவை; கல்வி ஆன்மா

என - என்னுடைய; என்ன; என்று; ஓர்உவமவுருபு.

இரண்டின் - இவை இரண்டின்

நீள் - நீளம்; நெடுங்காலம்; உயரம்; ஆழம்; ஒளி; ஒழுங்கு.

வினையான் - தொழில்; நல்வினைதீவினைஎனஇருவகைப்பட்டமுன்னைவினை; வினைச்சொல்; செய்தற்குரியது; பரிகாரச்செயல்; முயற்சி; போர்; வஞ்சகம்; தந்திரம்; கருத்து; தொந்தரவு; சீழ்; இரண்டைக்குறிக்கும்குழூஉக்குறி.

நீளும் - நீளுதல் - நீடுதல்; பெருமையாதல்; ஓடுதல்; நீள் -நீளம்; நெடுங்காலம்; உயரம்; ஆழம்; ஒளி; ஒழுங்கு.

குடி - பருகுகை; மதுபானம்; மதுவுண்டமயக்கம்; புருவம்; குடியானவன்; குடியிருப்போன்; ஆட்சிக்குட்பட்டகுடிகள்; குடும்பம்; குலம்; வீடு; ஊர்; வாழிடம்.

முழுப்பொருள்
ஒருவருடைய முயற்சியும் ஆழ்ந்த அகன்ற அறிவும் ஒரு செயலின் வெற்றிக்கு மிக அவசியம். அவ்வாறு முயற்சியும் அறிவும் கொண்டு ஒருவர் நெடுங்காலம் தன் செயலில் ஈடுபட்டுக்கொண்டு இருந்தால் அவருடைய குடும்பம் நீண்ட நாட்கள் புகழுடன் விளங்கும். இது நாட்டிற்கும் பொருந்தும். எந்த நாடு இடைவிடாத முயற்சியும் அறிவும் உடையதோ அந்த நாடு பல நூற்றாண்டுகள் முன்னேறும் அதன் நல்ல பயன்களையும் அனுபவிக்கும்.

இங்கே பார்க்க வேண்டியது சில
1. முயற்சி என்பதை முதலில் சொல்கிறார் திருவள்ளுவர். அறிவென்பதை அதற்கு அடுத்து தான் சொல்கிறார்.
2. வினை என்று சொல்லமால் நீள்வினை  என்று சொல்கிறார் . முயற்சியும் அறிவும் செயலில் நெடுங்காலம் இருக்க வேண்டும். அப்படி இருந்தால் தான் குடியின் வளர்ச்சியும் பயனும் பல காலம் இருக்கும். சில காலம் மட்டும் ஒரு செயலை நன்கு செய்தால் அதன் பயன் உண்டு எனினும் குடியின் புகழ் பல காலம் நிலைக்க வேண்டும் என்றால் நாம் ஆற்றும் செயலும் நெடுங்காலம் இருக்க வேண்டும்.

மேலும் அஷோக்  உரை


பரிமேலழகர் உரை
ஆள்வினையும் ஆன்ற அறிவும் என இரண்டின் நீள்வினையான் - முயற்சியும் நிறைந்த அறிவும் என்று சொல்லப்பட்ட இரண்டினையுமுடைய இடையறாத கருமச்செயாலல்; குடி நீளும் - ஒருவன் குடி உயரும். (நிறைதல் - இயற்கையறிவு செயற்கையறிவோடு கூடி நிரம்புதல். ஆள்வினை, மடிபுகுதாமற் பொருட்டு. ஆன்ற அறிவு, உயர்தற்கு ஏற்ற செயல்களும் அவை முடிக்குந் திறமும் பிழையாமல் எண்ணுதற்பொருட்டு. இவை இரண்டு பாட்டானும் அச்செயற்குக் காரணம் கூறப்பட்டது.).

மணக்குடவர் உரை
முயற்சியும் நிரம்பின அறிவும் என்று சொல்லப்பட்ட இரண்டினாலும் வளருகின்ற வினையினாலே குடி உயரும்.

மு.வரதராசனார் உரை
முயற்சி நிறைந்த அறிவு என்று சொல்லப்படும் இரண்டினையும் உடைய இடைவிடாத செயலால் ஒருவனுடைய குடி உயர்ந்து விளங்கும்.

சாலமன் பாப்பையா உரை
முயற்சி, நிறைந்த அறிவு என்னும் இரண்டுடன் இடைவிடாத செயல் செய்யக் குடும்பமும் நாடும் உயரும்.

கருமம் செயஒருவன் கைதூவேன்

குறள் 1021

கருமம் செயஒருவன் கைதூவேன் என்னும் 

பெருமையின் பீடுடையது இல்

[பொருட்பால், குடியியல், குடிசெயல்வகை]

(For meaning in English, scroll to the bottom of this post)

பொருள்

கருமம் - செயல்; வினைப்பயன்; தொழில்வேதசம்பந்தமானசடங்கு; இறுதிக்கடன்; செயப்படுபொருள்; வெம்மை; மும்மலங்களுள்ஒன்றாகியகன்மவிதி.

செய - செய்தல்

ஒருவன் - ஓர்ஆண்மகன்; ஒப்பற்றவன்; கடவுள்.ஒருத்தன்

கை - ஓர்உயிர்மெய்யெழுத்து(க்+ஐ); கரம்; யானைத்துதிக்கை; கதிர்; செங்கல்முதலியவற்றைஎண்ணும்ஒரளவு; அபிநயக்கை; பக்கம்; கட்சி; கைமரம்; இரயில்கைகாட்டி; சட்டையின்கை; கைப்பிடி; விசிறிக்காம்பு; சிறகு; படையுறுப்பு; சேனை; இடம்; கைப்பொருள்; செய்யத்தக்கது; ஒப்பனை; ஆற்றல்; கையளவு; ஆள்; சிறுமை; உலகவொழுக்கம்; ஒழுங்கு; தங்கை; தொழிற்பெயர்விகுதி; ஒருதமிழ்முன்னொட்டு; குற்றம்.
கை - kai   part. 1. Suffix at the end ofverbal nouns as செய்கை தொழிற்பெயர் விகுதி 2. Auxiliary prefix to verbs, as in கையிகந்து. ஓர்தமிழுபசருக்கம்.

தூ - tū   VII. v. t. send away, cause to go, செலுத்து.
துரப்பு, துரத்தல், v. n. driving, causing to go; 2. emission, discharging, விடுகை; 3. scaring away, dispelling, அகற்றுதல்.

கைதூவேன் - செய்கையில் அகலமாட்டேன்; ஓயாமல் செய்வேன்

என்னும் - யாவும், எல்லாம்; என்றுசொல்லப்படும்; யாதும்; சிறிதும்.

பெருமை - மாட்சிமை; மிகுதி; பருமை; புகழ்; வல்லமை; அகந்தை; அருமை.

பெருமையின் - பெருமை எல்லாவற்றிலும்

பீடு - பெருமை; வலிமை; தரிசுநிலம்; தாழ்வு; துன்பம்; குறைவு; ஒப்பு; குழைவு.

உடையது -  கொண்டது

இல் - வேறு இல்லை; மற்றொன்று இல்லை

முழுப்பொருள்
தன் குடியின் (குடும்பம், நாடு, சமூகம்) பெருமை (புகழ்) ஓங்குவதற்கான ஒரு செயலை பெருமை அடையும் வரை அச்செய்கையில் இருந்து ஓயமாட்டேன் என்று சங்கல்பம் ஏற்றுக்கொண்டு அதற்காக உழைத்து இறுதியில் அடையும் பெருமை என்பது அவன் அடைந்த எல்லா பெருமைகளிலும் பெரிய பெருமையாகும். அதைப்போன்ற பெருமை வேறேதுமில்லை.

ஒருவன் தன்னுடைய பெருமைக்காக உழைக்கலாம். அதுவும் புகழ். ஆனால் தான் செய்யும் செயல் தன் குடியிற்கே பெருமையை தரும் என்றால் அதுவே அவன் அடைந்த பெருமையான எல்லாவற்றிலும் பெருமையாகும்.

உதாரணமாக கூகுல் நிறுவனத்தின் தற்போதைய தலைவர் சுந்தர் பிச்சை அவர்கள் தன்னுடைய நாட்டிற்கே புகழை சேர்த்துள்ளார்.

சுந்தர் பிச்சை

மகாத்மா காந்தி அவர்களும் இந்தியநாட்டிற்கு சுதந்திரம் கிடைக்க அரும்பாடுபட்டார். பிறதேசத்து தலைவர்கள் வன்முறையில் ஆட்சியை கைப்பற்றிய நிலையில், முப்பது கோடி மக்களை ஒருங்கினைத்து அறவழியில் நடத்தி அஹிம்சை முறையில் சுதந்திரம் வாங்கிக்கொடுத்து அஹிம்சையின் வலிமையை உலகிற்கு எடுத்துக்காட்டாக காண்பித்தவர் மகாத்மா காந்தி. அவரால் இந்திய நாட்டிற்கே பெருமை.

மகாத்மா காந்தி

ஒப்புமை:

”கருமம் மறுத்த கைதூ அமையத்து” (பெருங் 1.36:42)

மேலும் அஷோக்  உரை

பரிமேலழகர் உரை

[அஃதாவது , ஒருவன் தான் பிறந்த குடியை உயரச் செய்தலின் திறம் .இது தாழ்வின்கண் நாணுதலுடையார்க்கு உளதாவது ஆகலின் , நாணுடைமையின் பின் வைக்கப்பட்டது .]

கருமம் செயக் கைதூவேன் என்னும் பெருமையின் - தன் குடிசெய்தற்பொருட்டுத் தொடங்கிய கருமம் முடியாமையின் எண்ணிய கருமம் செய்தற்கு யான் கையொழியேன் என்னும் ஆள்வினைப்பெருமை போல; ஒருவன் பீடு உடையது இல் - ஒருவனுக்கு மேம்பாடுடைய பெருமை பிறிது இல்லை. ('குடி செயற்கு' என்பது அதிகாரத்தான் வந்தது. பலவகைத்தாய கருமச்செயலாற் செல்வமும் புகழும் எய்திக் குடி உயரும் ஆகலின், 'பீடுடையது இல்' என்றார். குடிசெய்தற் கருமமே நடத்தலால் 'தன் கருமஞ் செய்ய' என்றும், 'பிறர் கருமஞ் செய்ய' என்றும் உரைப்பாரும் உளர். தன் கருமமும் அதுவேயாகலானும், பிறர் ஏவல் செய்தல் தலைமை யன்மையானும் அவை உரையன்மை அறிக.).

மணக்குடவர் உரை 

ஒருவன் கருமஞ்செய்தற்கு நான் ஒழியே னென்று சொல்லுகின்ற பெருமைபோலப் பெருமையுடையது பிறிது இல்லை.

மு.வரதராசனார் உரை

குடிப் பெருமைக்கு உரிய கடமையைச் செய்வதற்குச் சோர்வடைய மாட்டேன் என்று ஒருவன் முயலும் பெருமையைப் போல மேம்பாடானது வேறொன்றும் இல்லை.

சாலமன் பாப்பையா உரை

வீட்டையும் நாட்டையும் மேன்மை அடையச் செயல் செய்யாமல் விடமாட்டேன் என மன உறுதிகொள்ளும் பெருமையைக் காட்டிலும் மேலான பெருமை வேறு இல்லை.

English Meaning - As I taught a kid - Rajesh

When a person 1) vows (to himself/herself or to his/her family or his/her nation) that he/she will work to fulfill his/her responsibilities (bestowed upon him/her) and lift his/her family or nation, and 2) works towards the goals and accomplishes those goals and lifts the family/nation, then it is nothing but greatness. There is nothing more greater than that. Because it is normal for a person to work selfishly for himself/herself alone. But, if he/she selflessly works to uplift others then it is real great thing. People like Mahakavi Bharathiyar, Mahatma Gandhi rose above themselves and worked to lift the spirits of entire nation. 

Questions that I ask to the kid

Is there any greatness like that of doing your duties and lifting your family?

இடும்பைக்கே கொள்கலம்

குறள் 1029

இடும்பைக்கே கொள்கலம் கொல்லோ குடும்பத்தைக்

குற்ற மறைப்பான் உடம்பு

[பொருட்பால், குடியியல், குடிசெயல்வகை]

பொருள்

இடும்பை - துன்பம்; தீமை நோய் வறுமை அச்சம்

இடும்பை - துன்பம். ஏமஞ்சாலா விடும்பை (தொல். பொ. 50).

- தீமை. பூதம் . . . இடும்பை செய்திடும் (மணி.1, 22). 

- நோய். கரப்பிடும்பை யில்லாரைக் காணின் (குறள், 1056)

- தரித்திரம்.இடும்பையா லடர்ப்புண்டு (திவ். பெரியதி. 1, 6, 5).

- அச்சம். (திவா.)

கொள்கலம்  - பண்டம் இடுங்கலம், பனையோலைமூங்கில் இவற்றால் ஆகிய பிழா. (சது.), அணி; ஆடை; சாந்து, சந்துமாலை முதலியனபெய்கலம்; பனையோலை, மூங்கில்இவற்றால்ஆகியகூடை

கொள்கலம் - பண்டமிடுங்கலம்; அணி; ஆடை; சாந்து, சந்துமாலைமுதலியனபெய்கலம்; பனையோலை, மூங்கில்இவற்றால்ஆகியகூடை..

கலம் - உண்கலம்; பாண்டம்; குப்பி; கப்பல்; இரேவதி; அணிகலன்; யாழ்; கலப்பை; ஆயுதம்; ஓலைப்பாத்திரம்; ஒருமுகத்தலளவை; பந்தி; வில்லங்கம்.

கொல் - உயிர்க்கொலை

கொல் - கொல்லுதல் - வதைத்தல்; அழித்தல்; வெட்டுதல்; கதிரறுத்தல்; துன்பப்படுத்துதல்; கெடுத்தல்.

குடும்பம் - சமுசாரம்; உறவினர்; குலம்; மனைவி; ஒருகுடிசையிலுள் ளோர், இனத்தார், உறவின்முறையார், குடி

குற்றம் - பிழை; பழி; துன்பம்; உடற்குறை; தீங்கு; அபராதம்; தீட்டு

மறைத்தல் - மறையச்செய்தல்; மூடுதல்; தீதுவாராமற்காத்தல்.

குற்ற மறைப்பான் - குற்றங்களை, துன்பங்களை ஒளித்து வைப்பவன்

உடம்பு -  சரீரம், உடல், உயிர்நிலை மெய்யெழுத்து ஆண்அல்லதுபெண்ணின்குறி

முழுப்பொருள்

முன் குறிப்பு: இக்குறளை புரிந்துக்கொள்ளும் பொழுது மற்ற உரைகளை வாசித்தேன் (பொதுவாக அதுவே வழக்கம்). பெரும்பாலான உரைகள் கூறும் பொருள்: ஒருவனுடைய ஒரு குடும்பத்தின் துன்பங்களின் நீக்கும் உடம்பு துன்பங்களை தாங்கிக்கொள்ளும் ஒரு கூடையா / அதற்கு இன்பமே இல்லையா ? என்று பொருள் கூறுகிறது. ஆனால் நான் இக்கருத்தில் இருந்து வேறுப் படுகிறேன். 

ஒவ்வொரு குடும்பத்திற்கு பல துன்பங்கள் வரும். அத்துன்பங்கள் பிழை, பழி, உடற்குறை, தீங்கு என்று பல வடிவங்களில் வரும். அத்தகைய துன்பங்களை மறைக்க, அதாவது ஒளித்து வைக்க ஒருவன் முற்பட்டால் என்னவாகும் ? அவனுடைய உடம்பு துன்பங்களை மட்டும் தாங்கும் பெற்றுக்கொள்ளும் ஒரு பாத்திரமாக (கூடை) அமையும். 

அதாவது குடும்பத்திற்கு வரும் துன்பங்கள் நல்லதிற்கு, அதில் இருந்து விடுபட / நீக்க பாடுப்பட வேண்டும். அப்படிச் செய்தால் அத்துன்பம் நம்மை ஒன்றும் செய்யாது. இல்லையெனில் அத்துன்பங்களை மறைக்க முயற்சித்தால் நமக்கு துன்பம் தான் வந்துக்கொண்டே இருக்கும். ஒரு துன்பத்தை நீக்கினால் நாம் அதை மறுபடியும் வராதுவண்ணம் பார்த்துக்கொள்வோம். ஆனால் அதுவே மறைத்தால் பின்பு மறுபடியும் அதை வேறு ஒரு நாள் செய்வோம். 

பின் குறிப்பு: திருவள்ளுவரின் சொல்லாட்சி இங்கு நாம் கவனிக்க வேண்டும். திருவள்ளுவர் "குற்றம் நீக்குவான் உடம்பு" என்று சொல்லி இருந்தால், குறளின் அர்த்தத்தை குடும்ப துன்பங்களை நீக்கும் உடம்பு துன்பங்களை தாங்கும் ஒரு கூடையா என்று கொள்ளலாம் ? ஆனால் மறைப்பான் என்று கூறுக்கிறார். மறை என்றால் ஒளித்துவைப்பது என்று பொருள். நீக்குவது என்று பொருளாகாது. 

உதாரணம்: நமது குடும்பத்தில் ஒருவர் சூது ஆடி ஒரு பெரிய தொகையை இழந்துவிடுகிறார். அவரை நாம் அதில் இருந்து மீட்டு எடுக்க வில்லை என்றால் குடும்ப மானம் போய்விடும் என்று பலர் எண்ணுவர். ஆனால் சூது ஆடி இழந்தது தவறு. அதை மறைக்க முனைய கூடாது. இல்லை, அவரை நான் காப்பாற்றுகிறேன் என்று அந்த தொகையை வரிந்துக்கட்டி செலுத்தினால் செய்த தவறு தற்காலிகமாக மறையும். ஆனால் அந்த நபர் இதில் இருந்து பாடம் கற்காமல் பின்பு அதே சூதை மறுபடியும் சில பல நாட்கள், மாதங்கள், ஆண்டுங்கள் கழித்து செய்வார். நாம் தான் மறுபடியும் வருந்த வேண்டும். 

ஏன் அப்படி சொல்கிறார் திருவள்ளுவர் ?

விடை : 

இன்மை இடும்பை இரந்துதீர் வாமென்னும் 

வன்மையின் வன்பாட்ட தில்

ஒப்புமை

”நெடும்பல் மால்வரை தூர்த்து நெருக்கவும்

துடும்பல் வேலை துளங்கிய தில்லையால்

இடும்பை யெத்தனை யும்படுத் தெய்தினும்

குடும்பந் தாங்கும்ம் குடிப்பிறந் தாரினே” (கம்ப.சேதுபந்தன.53)

குறட் கருத்து  (நன்றி: திரு. தமிழ்க்கடல் நெல்லை கண்ணன்)

நல்லவரின் வீட்டுக்குள் துன்பம் வந்தால்

நடக்கின்ற கதையதனை கொஞ்சம் கேட்போம்

வல்லதுவாய்த் துன்பமது கருதிச் சென்றால்

வதை படுமாம் துன்பம் அவர் வீட்டிற்குள்ளே

நல்லதுவாய் வருவதெல்லாம் கருதுகின்ற

நாயகரைத் துன்பம் அது என்ன செய்யும்

அல்லல் பட்டு அது அழுமாம் அய்யோ என்று

அழகாகச் சொல்லுகின்றார் வள்ளுவனார்

ஆத்திச்சூடி
கௌவை அகற்று.
துன்பத்திற்கு இடம் கொடேல்.
தீவினை அகற்று.

பரிமேலழகர் உரை

குடும்பத்தைக் குற்றம் மறைப்பான் உடம்பு - மூவகைத் துன்பமும் உறற்பாலதாய தன் குடியை அவை உறாமற்காக்க முயல்வானது உடம்பு; இடும்பைக்கே கொள்கலங் கொல் - அம்முயற்சித் துன்பத்திற்கே கொள்கலமாம் அத்துணையோ? அஃது ஒழிந்து இன்பத்திற்கு ஆதல் இல்லையோ?

விளக்கம் 

(''உறைப்பெயல் ஒலைபோல, மறைக்குவன் பெரும நிற் குறித்து வருவேலே'' (புறநா. 290) என்புழியும் மறைத்தல் இப்பொருட்டாயிற்று. 'என் குடிமுழுதும் இன்புற்றுயரவே நான் இருமையும் எய்துதலான் இம்மெய் வருத்த மாத்திரம் எனக்கு நன்று' என்று முயலும் அறிவுடையான், அஃதொரு ஞான்றும் ஒழியாமைநோக்கி, 'இடும்பைக்கே கொள்கலங் கொல்லோ' என்றார். இது குறிப்பு மொழி. இவை இரண்டு பாட்டானும் அவர் அது செய்யும் இயல்பு கூறப்பட்டது.) 

ஞா. தேவநேயப் பாவாணர் உரை

குடும்பத்தைக் குற்றம் மறைப்பான் உடம்பு-அடிமைத்தனம், அறியாமை, வறுமை என்னும் மூவகை நிலைமையாலும் தன்குடிக்கு வருந்துன்பங்களை நீக்கப் பாடுபடும் குடிசெயல் தலைவனது உடம்பு ; இடும்பைக்கே கொள்கலங் கொல்-துன்பத்தையே இட்டு நிறைத்துவைத்தற்கு ஏற்பட்டதொரு ஏனமோ!

மூவகைத் துன்பநிலைமையாலும் முட்டுண்டு வருந்துங் குடியை முன்னேற்ற முயலுந் தலைவன், வாழ்நாள் முழுதும் அல்லும் பகலும் ஓயாது படும் மெய்வருத்தத்திற்கு அளவின்மையால், அவன் உடம்பு இடும்பையே இடும் பையோ என்று ஓர் அறிஞன் இரங்கிக் கூறியவாறு. ஏகாரம் பிரிநிலை. ’கொல்’ வினாவிடைச்சொல். ஓகாரம் இரங்கலிடைச் சொல். மறைத்தல் தடுத்தலும் நீக்குதலும். ’குற்றம்’ வகுப்பொருமை. இவ்விரு குறளாலும் குடிசெய்யும் வகை கூறப்பட்டது.

மணக்குடவர் உரை 

சுற்றத்தார்மாட்டு உளதாகிய குறையை மறைக்கக் கருதுவான் உடம்பு துன்பத்திற்குக் கொள்கலமாம். 

மு.வரதராசனார் உரை

தன் குடிக்கு வரக்குடிய குற்றத்தை வராமல் நீக்க முயல்கின்ற ஒருவனுடைய உடம்பு துன்பத்திற்கே இருப்பிடமானதோ.

சாலமன் பாப்பையா உரை

தன்னால், விலங்குளால், பருவ மாற்றங்களால் துன்பப்படும் வீட்டையும், நாட்டையும் அத்துன்பங்களில் இருந்து காக்க முயல்பவனின் உடம்பு, துன்பத்திற்கு மட்டுமே கொள்கலமோ? இன்பத்திற்கும் இல்லையோ?.