குடிசெய்வார்க் கில்லை பருவம் மடிசெய்து
காந்தியின் வாழ்வும் குறளும் (நன்றி பா ல சு ந் த ரி)
பலவேறு இன்னல்களுக்கு இடையே பாரிஸ்டர் பட்டம் பெற இங்கிலாந்து செல்ல விரும்புகிறார் காந்தி. உறவுகள் எதிர்க்க ஊரார் “சாதி பிரஷ்ட்” எச்சரிக்கை விடுக்க அன்னை செய்வது அறியாது திகைக்க, இந்தப் பயணம். அத்தனைப் பேருடைய ஒட்டு மொத்த எதிர்ப்புக்குக் காரணம் மேலை நாட்டில் மது, மாமிசம், இன்றி வாழ முடியாது. இது நமது கலாச்சாரத்திற்குப் புறம்பானது என்பதே முக்கியச் குற்றச்சாட்டு. இதை அன்னையிடமும் ஊதி ஊதிப் பற்ற வைக்கிறார்கள். இருதலைக் கொள்ளி எறுமாய் ஆகிறார் தாய்.
மது-மங்கை-மாமிசம் இவற்றைத் தீண்டாமலே நான் வாழ்ந்து காட்டுவேன் என்று அன்னைக்கு சத்தியம் செய்து புறப்படுகிறார் காந்தி. அப்போது அவருக்கு வயது பதினெட்டு. பதினாறு வயதினிலே பிறந்த முதல் குழந்தை இறக்க, பதினெட்டு வயதில் இரண்டாவது குழந்தை பிறக்க.... மனைவியையும் மகனையும் விட்டுப் பிரிந்து அயல் நாடு புறப்படுகிறார்.
காரணம்: இங்கேயே பட்டப் படிப்பு படித்தாலோ அல்லது வக்கீலுக்குப் படித்தாலோ அதிக சம்பளம் கிடைக்காது. பாரிஸ்டர் பட்டம் பெற்றால் ஏதாவது ஒரு சமஸ்தானத்தில் திவானாக வேலை பார்க்கலாம் அதிக வருமானம் வரும். நொடித்துப் போன குடும்பத்தை சீக்கிரமே நிமிர்த்தலாம். தந்தை படிக்காத மேதையாக திவானாகப் பணிபுரிந்தது அந்தக் காலம். இந்தக் காலத்திற்கு அது பொருந்தாது. எனவே பாரிஸ்டர் பட்டமே சிறந்தது என்று குடும்ப நண்பர்கள் எடுத்துரைக்க அரைகுறையாய் சம்மதித்தார் தாய்.
குடிசெய்வார்க் கில்லை பருவம் மடிசெய்து
அண்ணன் அங்கே இங்கே கடன்பட்டு வீட்டுப் பெண்களின் நகைகளை விற்றுப் பணம் புரட்ட பம்பாய் பயணித்தார் காந்தி. பருவநிலை சரியில்லாததால் கப்பல் புறப்படத் தாமதம். ஏற்கனவே ஒரு கப்பல் மூழ்கி விட்டதாகத் தகவல். அது காரணமாகத் தன் பயணம் தடைப்படுமோ என்ற பயம். இவருடைய பயணத்திற்கு யாரும் உதவினாலோ, அல்லது அவருடன் தொடர்பு வைத்துக் கொண்டாலோ 1 ரூபாய் நான்கு அணா அபராதம் என சாதிச் சங்கம் அறிவிப்பு செய்ய ஏகப்பட்ட நெருக்கடி.
அத்தனையும் கடந்து இங்கிலாந்தில் காலடி பதிக்கிறார் காந்தி. பிற்காலத்தில் தனது காலனி ஆதிக்கமே அவரால் ஆட்டம் காணப் போகிறது என்று அறியாத இங்கிலாந்து அவரை எதிர்கொண்டது. அங்கு சட்டம் பயின்ற அவர் பின்னாளில் சட்ட மறுப்பு இயக்கம் கண்டது தனிக்கதை!
அடுத்து, உணவு பெரிய பிரச்சனையாக அமைந்தது. திக்கு தெரியாத நாட்டினிலே சைவ உணவகத்தை தேடித் தேடி அலைகிறார் . எப்படியோ கண்டுபிடித்துவிட்டார் ஒரு சைவ உணவகத்தை. அதுவரை தான் கொண்டுவந்த பலகாரங்களையும் தானே தயாரித்த ஓட்ஸ் கஞ்சி மற்றும் கோக்கோ தயவால் வயிற்றை நிரப்புகிறார். உணவகம் சென்றால் இது சைவமா? அசைவமா? என்று கேட்டு கேட்டு அலுத்துவிட்டார். இவரது அரைகுறை ஆங்கிலம் அவர்களுக்கும் புரியவில்லை. அவர்களின் நுனிநாக்கு ஆங்கிலம் இவருக்கு சட்டென புரிபடுவதில்லை. அடுத்து வேறு ஒரு பிரச்சினை பூதாகாரமாக உருவெடுத்தது!
இவரை வலை வீசிப் பிடிக்க இவர் தங்கி இருந்த வீட்டினர் முயற்சித்தனர். தனக்கு திருமணமாகிவிட்டது என்பதை யாரிடமும் காந்தி கூறவில்லை. அத்தனை இந்தியர்களும் இதையே கடைபிடித்தனர். திருமணமானது தெரிந்தால் தங்களது ‘இமேஜ்’ குறைந்துவிடும் என்ற தவறான நம்பிக்கை.
அந்த தவறான நம்பிக்கையே பல தவறுகளுக்கு ஊற்றாக அமைவது பின்னர் வாடிக்கை. இதையே காந்தியும் பின்பற்றினார். பின்னர் தன் தவறு உணர்ந்து தனக்கு மணமாகிவிட்டதையும், மேலும் ஒரு குழந்தை இருக்கிறது என்றும் அவர் தெரிவிக்க அவர்களுக்கு ஆச்சரியம். இவருடைய மணம் பற்றியும், குழந்தை பற்றியும் அவர்கள் ஆர்வத்துடன் வினவ ஒருவாறு தப்பித்தார். வேறு இடத்திற்கு இடம் பெயர்ந்தார். இருப்பினும் விதி விடவில்லை.
சைவ உணவு சம்பந்தமான ஆர்வத்தால் சைவ உணவு சங்கத்தில் இணைந்தார். அதன் கருத்தரங்கு ஒன்று 1890ல் ‘போர்ஸ்மத்’ என்னும் நகரில் நடந்தது. அது ஒரு துறைமுக நகரம். அங்குள்ளவர்கள் கற்பு நெறி பற்றி பெரிதாக அலட்டிக் கொள்வதில்லை. அப்படிப்பட்ட மனநிலை கொண்ட மகளிர் வசிக்கும் வீட்டில் தங்கவேண்டியது ஏற்பட்டது. கூடவே நண்பரும் தங்கினார்.
அன்று இரவு உணவுக்குப்பின் ‘நம்பர்பிரிட்ஜ்’ என்னும் ஒரு வகை சீட்டு ஆட்டம் ஆட ஆரம்பித்தனர். விருந்தினருடன் சீட்டு ஆடுவதென்பது அந்த நாட்டின் கலாச்சாரம். கேலியும் கிண்டலுமாக ஆட்டம் நடைபெற்றது. நண்பர் அந்த வீட்டுப் பெண்மணியுடன் ஆபாசமாகப் பேச அந்தப் பெண்மணியும் அதைத் தொடர, காந்தியும் அதை வழிமொழிய ஆரம்பித்தார். சீட்டாட்டம் எல்லை மீறி களியாட்டமாக உருவெடுக்கும் நிலை.
தவமறைந்து அல்லவை செய்தல் புதல்மறைந்து
அந்த நல்ல நண்பர் காந்தியை கண்டித்து எச்சரித்தார். உனக்குள் இந்த பிசாசு எப்படி புகுந்தது? எழுந்து போய்விடு. உனக்கு தகாது இந்த நிலை என்று எடுத்துரைக்க.. தன்னிலை உணர்கிறார் காந்தி. வேடன் துரத்திய மானாக விரைந்து ஓடி தன்னறைக்கு அடைகிறார். தன் தவறு உணர்கிறார். தன் தாய்க்கு செய்து கொடுத்த சத்தியத்தை மீறாத வண்ணம் தன்னை எச்சரித்த அந்த நண்பருக்கு நன்றி கூறி, அவரை தன் நண்பனாக அருளிய இறைவனுக்கும் நன்றி கூறிகிறார்.
திருமணத்திற்கு முன் தான் படித்த ஒரு புத்தகம் நினைவுக்கு வருகிறது. கணவன், மனைவி இருவருமே ஒருவருக்கு ஒருவர் விசுவாசமாக நடக்க வேண்டும். நம்பிக்கை துரோகம் கூடாது என்ற வாசகம் நினைகுக்கு வர தனது செயலுக்கு மிகவும் வருந்துகிறார்.
நாம் மனம் ஒன்றி செய்யும் பிரார்த்தனையை இறைவன் செவி மடுப்பான். நம்மை இக்கட்டிலிருந்து காக்க எதையோ, அல்லது யாரையோ அனுப்பி வைப்பார் என்று உணர்கிறார். நாம் கேட்பது அனைத்தையும் தர பிரபஞ்சம் காத்திருக்கிறது. எதை கேட்க வேண்டுமோ அதை தேர்வு செய்து கேட்பது நமது பொறுப்பு என்று தெளிகிறார். இப்படி ஒரு நண்பர் தந்த இறைவனுக்கு மீண்டும் மீண்டும் நன்றி கூறிகிறார்.
எனவே தான் வள்ளுவர் கூறிகிறார், நட்புக்கான இலக்கணத்தை
நகுதற் பொருட்டன்று நட்டல் மிகுதிக்கண்
காந்தியின் வாழ்வும் குறளும் - மற்றுமொன்று (நன்றி: பா ல சு ந் த ரி)
தாதா அப்துல்லா என்பவரின் கம்பெனி தென்னாப்பிரிக்காவில் செயல்பட்டு வந்தது. மிகப் பெரிய கம்பெனி. அந்தக் கம்பெனியின் வழக்கு ஒன்று நீண்ட நாட்களாக தென்னாப்பிரிக்காவில் நடைபெற்று வந்தது. 40,000 பவுன் பற்றிய வழக்கு. அந்த வழக்கை நடத்த ஏற்கனவே பிரபல வக்கீல்கள் நியமிக்கபட்டு இருந்தார்கள். அவர்களுக்கு வழக்கு பற்றிய விவரங்களை எடுத்துக் கூற இவர்கள் தரப்பில் ஒரு பிரதிநிதி தேவைப்பட்டார். ஏனெனில் ஆங்கிலப் புலமை அவர்களுக்கு இல்லை. எனவே காந்தியை ஓர் ஆண்டு ஒப்பந்தத்தில் அனுப்ப முடியுமா? என்று அவருடைய அண்ணனிடம் கேட்டார்.
வாதாடும் வேலை இல்லை. குமாஸ்தா வேலைதான் என்றதும் காந்தி ஒப்புக்கொண்டார். ஏற்கெனவே பம்பாய் அனுபவம் அவரை பயம்கொள்ள வைத்தது. உள்நாடிலேயே வாதாட முடியாத தன்னால் அயல்நாட்டில் வாதாட முடியாது என்பது அவரது எண்ணம். அவருக்கான டிக்கெட் செலவு அனைத்தும் கம்பெனியே செய்து கொடுக்கும். அது போக 105 பவுன் சம்பளம் என்று முடிவாயிற்று.
புறப்பட ஆயுத்தமானார் காந்தி.
இந்த புலம் பெயர்வுக்குக் காரணம், கமிஷன் தந்து மனு எழுதித் தந்து ஜீவிப்பது அவருக்கு ஏற்பில்லை. தனியே வாதாடும் திறனும் இல்லை. குடும்பம் நடக்க வேண்டும். எல்லாவற்றுக்கும் மேலாக சாதிக் கட்டுப்பாடு. அவருடைய மைத்தினர் - மைத்துணிகளே இவரை ஏற்கக் கூடாது. உணவு வழங்கக் கூடாது என்ற பயங்கர கட்டுப்பாடு. ரகசியமாக அவர்கள் கட்டுப்பாட்டை மீறத் தயார். ஆனால் அதை காந்தி ஏற்கவில்லை.
கட்டுப்பாடு விதித்தவர்கள் மீது கோபம் கொள்ளவில்லை. அவர்களை எதிர்க்கவும் இல்லை. இதுவே, அவரது அகிம்சை கோட்பாட்டுக்கு அஸ்திவாரம் ஆனது என்று கூட சொல்லலாம்! எனவே இந்த இறுக்கமான சூழ்நிலையில் இருந்து விலகி வாழ்வதே நலம் என்று கருதினார். எனவே தென்னாப்பிரிக்கப் பயணம் மேற்கொண்டார். ஏற்கனவே, லண்டன் பயணத்திற்கு சாதிக் கட்டுப்பாடு. தற்போது தென்னாப்பிரிக்கப் பயணம். துணிந்து புறப்படுகிறார்.
காரணம், குடும்பத்தைப் பராமரிக்க வேறு வழி தெரியவில்லை. எனவே மீண்டும் மகனையும், மனைவியையும் விட்டுப் பிரிந்து அயல்நாடு செல்கிறார். அவருடைய புலம் பெயர்ந்த பயணம், தென்னாப்பிரிக்காவில் வாழும் புலம் பெயர்ந்த இந்தியர்களுக்கு வரப்பிரசாதமாக அமைந்தது. பின்னாளில் இந்திய விடுதலைப் போராட்ட வேள்விக்கு கால்கோல் விழாவாக அமைந்தது. எனினும் அந்த இளம் வயதில் இரண்டாவது கடல் கடந்த பயணம் ஆழ்மனதை கனக்கச் செய்தது என்பதே நிஜம்.
இதைத்தான் வள்ளுவர் கூறுகிறார்.
குறள் 1021
கருமம் செயஒருவன் கைதூவேன் என்னும்
பெருமையின் பீடுடையது இல்
குறள் 1028
குடிசெய்வார்க் கில்லை பருவம் மடிசெய்து
மானங் கருதக் கெடும்
Join the conversation