Search This Blog

Disclaimar

This blog is totally for learning purposes. Non-commercial. In many of the posts, many snippets have been taken from various thirukkural blogs, books available online freely only for learning purpose without any intention of plagiarism or to make money. I have given due credit, link wherever possible. If you want your content to be removed, or you want more credit to be provided, please do let me know in the comment section of any of the posts. ஊருணி நீர்நிறைந் தற்றே உலகவாம் பேரறி வாளன் திரு (குறள் 215)

செல்வத்துட் செல்வஞ் செவிச்செல்வம்

குறள் 411
செல்வத்துட் செல்வஞ் செவிச்செல்வம் அச்செல்வம்
செல்வத்து ளெல்லாந் தலை
[பொருட்பால், அரசியல், கேள்வி]
(For meaning in English, scroll to the bottom of this post)

பொருள்

செல்வம்  - கல்வி; அழகு; செழிப்பு; நுகர்ச்சி; துறக்கம்(சுவர்க்கம்), ஐசுவரியம்; மகளிரின்கொஞ்சற்பேச்சு.

செல்வத்துள் - எல்லா செல்வங்களிலும்

செல்வம் - செல்வம் எனப்படும்

செவிச்செல்வம் - கேள்வியறிவாகிய ஐசுவரியம்

அச்செல்வம் - அந்த செல்வம்

செல்வத்துள் - செல்வங்களிலும்

எல்லாம் - எல்லாவற்றிலும்

தலை - சிரம்; முதல்; சிறந்தது; வானம்; இடம்; உயர்ந்தோன்; தலைவன்; உச்சி; நுனி; முடிவு; ஒப்பு; ஆள்; தலைமயிர்; ஏழாம்வேற்றுமைஉருபு; ஓர்இடைச்சொல்; மேலே; தபால்கடிதத்தில்ஒட்டும்முத்திரைத்தலை; தலையோடு

முழுப்பொருள்
முந்திய அதிகாரத்தில் கல்வியின் சிறப்பை திருவள்ளுவர் கூறியிருப்பார். ஆனால் முறையான கல்வியானது அவ்வளவு எளிதாக எல்லோருக்கும் கிடைத்தும் விடாது ஏனெனில் நன்கு கற்று உணர்ந்து தெளிந்து பிறர்க்கு கற்பிக்கும் ஆற்றல் கொண்ட குருமார்களும் மிக குறைவே. அது மட்டும் அல்லாமல் ஒருவருக்கு கற்கும் வாய்ப்புகள் இடம், சூழல், பொருளாதார நெருக்கடிகளால் வாய்க்காமல் போகும். 

ஆனால் நமது சமுதாயத்தில் கல்வியினை பல வடிவங்களாக செதுக்கியுள்ளனர். அவற்றில் சில - கதை சொல்லி வடிவங்கள் - கதாகாட்சேபம், நாட்டாற்கலைகள் (உதாரணம்: கூத்து, வில்லுப்பாட்டு), நாட்டியம், வாய்ப்பாட்டு இசை. நவின காலத்தில் சொற்பொழிவுகள், பட்டிமன்றங்கள், விவாதங்கள். இவை மிக எளிதாக அல்லது முயன்றால் எளிதாக அடையகூடியவையே. சொல்லப்போனால் நமது பாட்டியும் தாத்தாவும் நல்ல கதைசொல்லிகளாக இருப்பார்கள். அவர்கள் கூறும் பழமொழிகளுக்கு அவ்வளவு அர்த்தம் உண்டு.

படிக்காமல் செவி வழியே பெறப்படும் இந்த கல்வியானது கேள்விச்செல்வம் ஆகும். ஏடுகள் கூட (இயற்கை சீற்றங்கள், தீ, வெள்ளம், புயல் போன்ற) ஒரு பயங்கரத்தால் அழியக்கூடும். ஆனால் பல சந்ததினியரை கடந்து வந்த கதைகளானது அவ்வளவு எளிதாக அழியாது. (அழிவு நிலையில் இருந்த ஒரு மொழி வெகு சிலரின் உயிருடன் இருந்ததனால் சில ஆண்டுகளில் மீட்டெடுக்கப்பட்ட உண்மை வரலாறும் உண்டு). அத்தகைய கதைகள் மிகவும் செறிவான முக்கியமான கதைகளாகும். உதாரணமாக ஓவ்வொரு ஆண்டும் கோடிக்கணக்கான புத்தகங்கள் வெளியாகின்றன. ஆனால் ஒரு சிலநூல்கள் மட்டுமே அடுத்த பத்து ஆண்டுகள் கழித்து நிலைத்து நிற்கும். நூறு ஆண்டுகள் கழித்து நூறு சிறந்த நூல்களில் ஒன்று இரண்டே எஞ்சும் என்று சொல்லலாம். இதிகாச தன்மை அளவின்றிபெற்ற மகாபாரதமும் இராமாயணம் போன்ற காப்பியங்கள் இன்றளவும் மக்கள் மனதிலும் புழக்கத்திலும் இருப்பதற்கு காரணம் அவை செவி வழியே பல தலைமுறைகளுக்கு கடத்தப்பட்டு உள்ளன. எழுத்தினூடாக வெகு சிலருக்கு மட்டுமே கடத்தப்பட்டு உள்ளன. பல இடங்கில் இவ்வெழுத்து செவ்செல்வத்திற்கு மூலமாக இருக்கும். அதலால் எழுத்தும் முக்கியம்.

அது மட்டும் இன்றி எழுத்து வடிவம் இலக்கணங்களுக்கு கட்டுப்பட்டவை. நவினுத்துவம் பின்நவினுத்துவம் என்று பல வடிவங்கள் வந்தாலும் அவை காலத்திற்கு ஏற்ப மாறுவதற்கு நேரம் ஆகும். விளங்கிக்கொள்ளவும் நேரமாகும். ஆதலால் தான் என்னவோ குறுந்தொகை, புறநானூறு போன்ற சங்கயிலக்கியங்களை கற்க ஆற்றலும் அறிவும் தேவை. ஆனால் வாய்வழியே கூறப்படும் கதைகள் இன்றைய காலத்திற்கேற்ப சில ஆண்டுகளில் தன் மொழியினை உருமாற்றிக்கொள்ளும். அதலால் அது மக்களால் எளிதாக உள்வாங்கிக்கொள்ள முடிகிறது.

ஆதலால் இத்தகைய செவிச்செல்வம் மிகவும் சிறந்த செல்வமாகும். அது மட்டும் இன்றி செவிச்செல்வத்திற்கு அடிப்படையான கட்டமைப்புகளை (பாட்டி தாத்தா கதை சொல்லுதல், நாட்டாற்கலைகள், பழமொழிகள்) போற்றி பாதுகாக்க வேண்டிய மிகவும் முக்கியத்துவமானது அவசியமானது.

இடைச்செருகல்:
செவிக்கு நாம் கொடுப்பது செல்வம் என்று நினைத்து நாம் செவிக்கு செல்வத்தை கொடுத்தால் நாம் எவ்வளவு மேன்மை அடைய முடியும் என்பதை உணரமுடியும். ஆதலால் நாம் கேட்கும் நிகழ்ச்சிகள், காணொளிகள், youtube காணொளிகள் ஆகியவற்றை தேர்ந்தெடுத்து கேட்போம். 

கேட்போர்க்கு ‘செல்வத்துள் செல்வம் செவிச்செல்வம்’ என்று கூறியதால் தான் பேசுவோர்/சொல்வோர்க்கு ‘குறள் 198 அரும்பயன் ஆயும் அறிவினார் சொல்லார் பெரும்பயன் இல்லாத சொல் ’ என்று கூறியுள்ளார் திருவள்ளுவர். 

மேலும், மேடை என்பது ஏதோ ஒருவகையில் அறிவை (செல்வத்தை) கொடுக்கும் இடம் ஏனெனில் மற்றவர் செவிகளை நம்மிடம் ஒரு 30-60 நிமிடங்கள் கொடுக்கின்றனர். அதனை உணர்ந்து மேடையில் இருப்போர் பேசவேண்டும். மேடைகளை நகைச்சுவை மன்றம்போல், whatsapp பல்கலைகழக ஒலிபெருக்கிகள் போல் ஆக்கிவிட கூடாது. 

மேலும்: அஷோக் உரை
கற்றலின் கேட்டலே நன்று என்ற வழக்குமொழியொன்று உண்டு, மற்றெந்த கலாச்சாரத்திலும் இல்லாத கதைச்சொல்லிப் பாரம்பரியம் நமது நாட்டிலே உண்டு. பாரத நாடு முழுவதும், ஹரிகதை, இலக்கியச் சொற்பொழிவுகள் என்று வாழ்க்கை உண்மைகள் புராண, இதிகாச, சரித்திரக்கதைகள் வாயிலாக மக்களுக்குச் சொல்லிவந்திருப்பதாலே, அடிப்படை ஒழுக்க உணர்வினை நம் நாட்டுமக்களுக்குப் புகுத்திவந்திருக்கிறார்கள்.


அதனாலேயே கேட்டல் என்பது அறிவு சார்ந்த செய்திகளை, படித்து, புரிந்துகொள்வதைவிட மிகவும் எளிதாகச் சாதிக்கிறது. கண்கள் பதிவு செய்வதைவிட காதில் விழும் ஒலிவடிவங்கள் மூளையை மிகவும் எளிதாக அடைகின்றன. கலைகளிலே மிகவும் கடினமான, சொற்களில் எழுதி, சொல்லி விளக்கமுடியாத இசைக்கலைக்கூட ஒலிவடிவமாகவே அறியப்படுகிறது, கற்கப்படுகிறது, சுருதி என்று அழைக்கப்படும் வேதமானது, எழுதாக்கிளவி எனப்படும். ஆயிரக்கணக்கான வருடங்களாகச் செவிவழியான கேள்வி மரபிலேயே பல சந்ததியினர்களைத்தாண்டி, இன்னும் பாதுக்காக்கப்பட்டுவருவதும் கூட இதனால்தான்

இந்திய மரபினைப் பொறுத்தவரை கற்றலுக்கான இடத்தினை விடக் கேட்டலுக்கான இடம் முக்கியமானது.கற்றலைக் கொண்டு கேட்டலை நிலைநிறுத்தும் பணியையே மரபு முன்னர் பெரும்பாலும் செய்தது.கேட்டல் என்பது தன் தரப்பினைப் பற்றிய அனைத்தும் அறிந்த தகுதியுடைய சீடனிடம் கற்றறிந்த குரு உரைப்பது.கேட்பவனின் தகுதியும் சொல்பவரின் தகுதியும் சரியான பாதையினைத் திறந்து விடும். மாறாகக் கற்றல் என்பதோ அதைச் செய்ய முயலும் அனைவருக்குமான பொதுத்தளத்தினை உருவாக்கிக் கொடுப்பது.அதற்கான நெறிமுறைகளை மட்டுமே கொண்டது.கற்றலுக்குத் தேவையான தகுதிகள் கேட்டலுக்குத் தேவையான தகுதிகளுக்கு முற்றிலும் மாறுபட்டவை. அறிவு என்பதே கேட்டலின் வழியாகவே நிலைநிறுத்தப்பட்ட காலம் சென்ற நூற்றாண்டில்தான் மாறியது.அதுவரை கேட்டலின் வழியாக வந்தடைந்த அறிவினைக் கற்றலின் வழியாக பயில முயன்று இரண்டுக்கும் உரிய வேறுபாடுகளைக் கைக்கொள்ளாமல் சொற்பொருட்பேதத்தால் அதன் மாளாச் சுழலுக்குள் சிக்கிய நபர்கள் உண்டு.

பரிமேலழகர் உரை
செல்வத்துள் செல்வம் செவிச்செல்வம் - ஒருவருக்குச் சிறப்புடைய செல்வமானது செவியான் வரும் செல்வம், அச்செல்வம் செல்வத்துள் எல்லாம் தலை - அச்செல்வம் பிற செல்வங்கள் எல்லாவற்றினும் தலையாகலான்.
( செவியான் வரும் செல்வம் - கேள்வியால் எல்லாப் பொருளையும் அறிதல். பிற செல்வங்கள் - பொருளால் வருவன. அவை நிலையா ஆகலானும், துன்பவிளைவின ஆகலானும், இது தலையாயிற்று. அவற்றை ஒழித்து இதனையே செய்க என்பது குறிப்பெச்சம்.) .

மணக்குடவர் உரை

ஒருவற்குச் சிறப்புடைய செல்வமானது செவியான் வருஞ் செல்வம்: அச்செல்வம் பிறசெல்வங்க ளெல்லாவற்றினும் தலையாகலான்.

மு.வரதராசனார் உரை

செவியால் கேட்டறியும் செல்வம், செல்வங்களுள் ஒன்றாகப் போற்றப்படும் செல்வமாகும், அச் செல்வம் செல்வங்கள் எல்லாவற்றிலும் தலையானதாகும்.

சாலமன் பாப்பையா உரை

செவியால் கேட்டுப் பெறும் செல்வமே சிறந்த செல்வம்; இது பிற செல்வங்கள் எல்லாவற்றிலும் முதன்மையானது.


Thirukkural - Management - Listening
A universal complaint against every one of us is, 'They don't listen.’ Leaving out 'self,’ every other person is 'they.’ Putting the blame on others or passing the buck to others is an easy task. Even if we listen, most of the time we listen to respond rather than to listen to understand. 

Kindly check whether you are an attentive, active, and empathic listener. “Too many people take listening skill for granted. They confuse hearing with listening.  What is the difference? Hearing is merely picking up sound vibrations. Listening is making sense out of what we hear. That is., listening requires paying attention, interpreting,  and remembering sound stimuli,” (Robbins,2001).

Valluvar highlighted the importance of listening in Kural 411.

he wealth of wealth is the ear.
Tat wealth out tops all else.

Among all the wealth, the greatest wealth is listening. Listening is a supreme wealth. What has 
convinced Valluvar to confirm that listening is the best wealth among all the other wealth? There 
are many benefits of effective listening. 

English Meaning - As I taught a kid - Rajesh
Among all wealth's that we gain, the knowledge we gain by listening to good things is the best wealth.  Remember, we can gain wealth by listening (to good things). So choose what you want to listen to. Avoid listening to craps, gossips, polarized news, hatred, politics etc

Questions that I ask to the kid
Which is the best wealth among all the wealth?

041 கல்லாமை

பால் - பொருட்பால்
இயல் - அரசியல்
அதிகாரம் - கல்லாமை

சுட்டியை தட்டுக (குறளே இங்கு சுட்டி)

குறள் 401
அரங்கின்றி வட்டாடி யற்றே நிரம்பிய
நூலின்றிக் கோட்டி கொளல்

குறள் 402
கல்லாதான் சொற்கா முறுதல் முலையிரண்டும்
இல்லாதாள் பெண்காமுற் றற்று

குறள் 403
கல்லா தவரும் நனிநல்லர் கற்றார்முன்
சொல்லா திருக்கப் பெறின்

குறள் 404
கல்லாதான் ஒட்பம் கழியநன் றாயினும்
கொள்ளார் அறிவுடை யார்.

குறள் 405
கல்லா ஒருவன் தகைமை தலைப்பெய்து
சொல்லாடச் சோர்வு படும்

குறள் 406
உளரென்னும் மாத்திரையர் அல்லால் பயவாக் 
களரனையர் கல்லா தவர்

குறள் 407
நுண்மாண் நுழைபுலம் இல்லான் எழில்நலம்
மண்மாண் புனைபாவை யற்று


கல்லாதான் சொற்கா முறுதல்

குறள் 402
கல்லாதான் சொற்கா முறுதல் முலையிரண்டும்
இல்லாதாள் பெண்காமுற் றற்று
[பொருட்பால், அரசியல், கல்லாமை]

பொருள்
கல்லாதான் - கல்வி கற்காதவன்; 
சொற் - பேச்சு, சொற்கள்
காமுறுதல் - விரும்புதல்; வேண்டிக்கொள்ளுதல்.
முலை - பெண்களின் மார்பகம்; கொங்கை, தனம்; பாலூட்டுஇனங்களின்உடலில்பாலுண்டாகும்இடம்; 
இரண்டும் - (கொங்கை) இரண்டும்
இல்லாதாள் - இல்லாத
பெண் - பெண்ணிடம்
காமுற் றற்று - காமம் கொள்ள முடியாததை போன்றாம்

முழுப்பொருள்
சில வருடங்கள் முன்பு (கேளடி கண்மணி, ஆசை, ரிதம் ஆகிய திரைப்படங்களை இயக்கிய) திரைப்பட இயக்குனர் வஸந்த் ஒரு பேட்டியில் கூறியிருப்பார் - பெங்காலி மொழியில் ஒரு flat chest (தட்டையான மார்பு) கொண்ட ஒரு பெண்னை ஒரு ஆண் நிராகரிக்கிறான். ஆனால் பின்னாலில் அவள் திருமணம் செய்துக்கொண்டு குழுந்தைப் பெற்று மகிழ்ச்சியாக இருக்கிறாள். ஆதலால் மார்பகங்கள் எவ்வளவு பெரிதாகவும் வடிவாகவும் இருக்கிறது என்பதில் ஒரு அர்த்தமும் இல்லை. அது ஒரு (/தன்) குழந்தைக்கு பால் ஊட்ட பயன் உள்ளவனவாக இருக்கிறதா என்பதே முக்கியம் என்ற கருத்தை திரைப்படம் பதிவு செய்கிறது.

இங்கே திருவள்ளுவர் பெண்ணின் (மார்பு) மீது கொள்ளும் ஈர்ப்பினை காட்டி கல்வியின் சிறப்பை (கல்லாதவரின் இழிவை) சொல்லவேண்டுமா என்ற கேள்வி எழாமால் இல்லை. ஏன் கூறுகிறார் என்றுதான் பார்க்க வேண்டும். உலகில் எல்லோரும் மார்பின் (அளவின் வடிவின்) மீது ஈர்ப்பு கொண்டவரல்ல. அவர்கள் மார்பின் சிறப்பை அறிந்தவர்கள். அவர்கள் பெண்ணின் மார்பு பால் ஊட்ட படைக்கபட்ட உறுப்பு என்பதை அறிவர். அத்தகையவர்கள் அப்பெண்ணின் எல்லா திறனையும் உள்ளத்தின் அழகையும் அறிவர். அதனைப் போற்றுவர். ஆனால் பெண்ணின் மார்பை மட்டும் விரும்புபவர்கள் அப்பெண்ணின் திறனை போற்றாதவர்கள். அப்படிப்பட்ட ஆண்களை பெண்களும் விரும்ப மாட்டார்கள். ஒரு பெண்ணை முழுமையாக விரும்பும் தலைவனையே பெண் விரும்புவாள்.

இப்போது குறளுக்கு வருவோம். கல்வி கற்காதவர்கள், கல்வியின் சிறப்பை அறியாதவர்கள், கல்வியின் பயனை அறியாதவர்கள் பிறரிடமோ அல்லது ஒரு அவையில் பலர் முன்பு பேச வேண்டும் என்று நினைப்பது என்பது நகைக்கதக்கது. ஏன் எனில் பிறருக்கு தெரியும் கல்லாதவர்கள் பேசும் பேச்சு பயனற்றது என்று. கல்லாதவர்கள் அவையில் பேச வேண்டும் என்று நினைப்பது மார்பு இல்லாத பெண்ணிடம் உறவு வைத்து குழந்தைப்பெற்று பால் கொடுத்து வளர்க்க விரும்பவது போல் ஆகும்.

சிறு குழந்தைக்கு பல் கிடையாது. அதற்கு உணவை கடித்து உண்ண முடியாது. அதன் செரிமான குழாய்கள் நன்றாக வளர்ந்து இருக்காது. திட உணவு எளிதாக அதில் செல்ல முடியாது. அதன் ஜீரண உறுப்புகள் முழுதும் வளர்ச்சி பெற்றிருக்காது. அதனால் கடின உணவை ஜீரணம் செய்ய முடியாது.

தாய் என்ன செய்கிறாள், உணவை தான் உண்டு, செரித்து, அதை இரத்தமாக்கி, அதை பாலாக்கி , அதில் குழந்தைக்கு வேண்டிய சத்து மட்டும் நோய்  எதிர்ப்பு பொருள்களை கலந்து குழந்தை எளிமையாக ஜீரணம் பண்ணும் வகையில் பாலாக, திரவ வடிவில் தருகிறாள். குழந்தைக்கு உடம்பு சரி இல்லை என்றால், தான் பத்தியம் இருக்கிறாள். குழந்தைக்கு எப்போது தர வேண்டும் (நினைந்து ஊட்டும்), எவ்வளவு தர வேண்டும் என்று அறிந்து தருகிறாள்.

அது போல, ஒரு படித்தவன் , பல நூல்களை படித்து, உள்வாங்கி, ஒன்றோடு ஒன்று  இணைத்து, கடின பதங்களை எளிமையாக்கி, கேட்பவர் எளிதில் அறிந்து கொள்ளும் வண்ணம்  பேச வேண்டும். அவர்களுக்கு எவ்வளவு தர வேண்டும், எப்போது தரவேண்டும் என்று அறிந்து தரவேண்டும்.

அதனால் தான் கல்வி அறிவு உள்ளவனை தாய்க்கு உதாரணமாக கூறினார். ஒரு தடவை பால் தந்து விட்டாள் போதாது. குழந்தை பெரிதாக வளரும் வரை தாய் தன் பாலை தந்து கொண்டே இருப்பாள். அதற்காக அவள் மேலும் மேலும் நல்ல ஆரோக்கியமான உணவை உட்கொள்ள வேண்டும். மற்றவர்களுக்கு சொல்லுபவனும் அது போல படித்துக் கொண்டே இருக்க வேண்டும். நாளும் புதிய செய்திகளை கொண்டு தர வேண்டும்.

தாய் எப்படி உணவை தான் ஜீரணம் செய்து பிள்ளைக்கு அதை பால் வடிவில் தருகிறாளோ அது போல பேச நினைப்பவன் புத்தகங்களை மேற் கோள் காட்டிக் கொண்டிருக்கக் கூடாது. படித்து, உள்வாங்கி, அவனுடைய அறிவினால் படித்ததை எளிமையாக்கி , செறிவூட்டி தரவேண்டும்.

பால் புகட்டும் தாய் கண்டதையும் சாப்பிடக் கூடாது. மது, புகை பிடித்தல் போன்றவற்றை தவிர்த்து விடுவது குழந்தைக்கு நலம் பயக்கும். அது போல கற்று அறிந்தவன்  நல்ல விஷயங்களை மட்டும் படிக்க வேண்டும்.  கண்டதையும் படித்து  தன் அறிவையும், மனதையும் குழைப்பிக் கொள்ளக் கூடாது.

தாய் தன் பிள்ளைக்கு வேளா வேளைக்கு பால் தருவாள். ஆனால் குழந்தைக்கு ஜீரணக் கோளாறு இருந்தால், சரியாக மலம் கழிக்கவில்லை என்றால் மேலும் மேலும் பால் புகட்ட மாட்டாள். முதலில் தந்தது உள்ளே சென்று ஜீரணமானதை அறிந்த பின் தான் அடுத்த முறை பால் தருவாள் தாய்.

அது போல , ஒரு மாணவனோ அல்லது கேட்பவனோ ஒரு விஷயத்தை உள்வாங்கிக் கொண்டான் என்று அறிந்த பின்பே அடுத்த விஷயத்தை சொல்ல வேண்டும். நான் பாட்டுக்கு சொல்லிக் கொண்டே போகிறேன், நீ புரிந்து கொண்டால் சரி, இல்லை என்றால் அது என் பாடு இல்லை என்று இருக்கக் கூடாது.

முலை இரண்டும் இல்லாதாள் காமுறுதல் என்பதற்கு பின்னால் எவ்வளவு இருக்கிறது பாருங்கள். இன்னும் சிந்தித்தால் மேலும் பல பொருள் விரியும்.

இக்குறள் கூறவரும் மைய கருத்து என்பது கல்லாதவர்கள் நகைப்புக்கூறியவர்கள். அவர்களின் பேச்சும் பயனற்றது.

மேலும்: அஷோக் உரை

ஒப்புமை
”இன்னா முலையில்லாள் பெண்மை விழைவு” (இன்னா.13)

பரிமேலழகர் உரை
கல்லாதான் சொல் காமுறுதல் - கல்வியில்லாதான் ஒருவன் அவையின்கண் ஒன்று சொல்லுதலை அவாவுதல், முலை இரண்டும் இல்லாதாள் பெண் காமுற்றற்று - இயல்பாகவே முலை இரண்டும் இல்லாதாள் ஒருத்தி பெண்மையை அவாவினாற் போலும்.
('இனைத்தென அறிந்த சினை' (தொல்.சொல்.33) ஆகலின், தொகையோடு முற்று உம்மை கொடுத்தார். சிறிதும் இல்லாதாள் என்பதாம். அவாவியவழிக் கடைப் போகாது, போகினும் நகை விளைக்கும் என்பதாயிற்று.).

மணக்குடவர் உரை
கல்வியில்லாதான் சொல்லுதற்கு ஆசைப்படுதல், இரண்டு முலையுமில்லாதாள் பெண்மைக்குக் காமுற்றாற்போலும். 
இது தன்னாசையல்லது சொன்னாலும் விரும்புவாரில்லை யென்றது.

மு.வரதராசனார் உரை
எண் (கற்றவரின் அவையில்) கல்லாதவன் ஒன்றைச் சொல்ல விரும்புதல், முலை இரண்டும் இல்லாதவள் பெண் தன்மையை விரும்பினாற் போன்றது.

சாலமன் பாப்பையா உரை
படிக்காதவன் கற்றவர் அவையில் பேச ஆசைப்டுபடுவது, இரு முலையும் வளர்ச்சி பெறாத பெண் ஒருத்தி உடலுறவு கொள்ள ஆசைப்பட்டது போலாம்.

எண்ணென்ப ஏனை எழுத்தென்ப

குறள் 392
எண்ணென்ப ஏனை எழுத்தென்ப இவ்விரண்டும் 
கண்ணென்ப வாழும் உயிர்க்கு
[பொருட்பால், அரசியல், கல்வி]

பொருள்
'எண்'  -  எண்ணிக்கை; கணக்கிடுதல்; எண்ணம்; ஆலோசனை; அறிவு; மனம்; கவலை; மதிப்பு; இலக்கம்; கணக்கு; சோதிடநூல்; இலக்கியம்; வரையறை; தருக்கம்; மாற்று; மந்திரம்; அம்போதரங்கம்; எளிமை; வலி; எள்; (வி)எண்என்னும்ஏவல்; நினை, கருது.

என்ப  - எனறுசொல்லப்படுவன; என்றுசொல்லுவர்; ஓர்அசைச்சொல்;

ஏனை - ஒழிபு, மற்றையெனும்இடைச்சொல்; ஒழிந்த; மற்று; எத்தன்மைத்து; மலங்குமீன்.

எழுத்து’ - அக்கரம்; கல்வி; எழுதப்பட்டதாள், கடிதம்; கையெழுத்து; ஆதாரச்சீட்டு; கைரேகை; உடன்படிக்கைச்சீட்டு; இலக்கணம்; அட்டவணை; சித்திரம்.

என்ப  - எனறுசொல்லப்படுவன; என்றுசொல்லுவர்; ஓர்அசைச்சொல்;

இவ் இரண்டும் - இவை இரண்டும்

‘கண்’ - விழி; கண்ணோட்டம்; பீலிக்கண்; கணு; மரக்கணு; தொளை; மூங்கில்முரசடிக்குமிடம்; மூட்டுவாய்; பெருமை; இடம்; ஏழனுருபு; அறிவு; பற்றுக்கோடு; உடம்பு; அசை; உடலூக்கம்.

என்ப  - எனறுசொல்லப்படுவன; என்றுசொல்லுவர்; ஓர்அசைச்சொல்;

வாழும் - வாழ் - vāẕ   வாழு, II. live, sustain life, சீவி; 2. flourish, prosper, live happily, செழி; 3. live together (as husband and wife.) வாழாவெட்டி, a married woman not living with her husband.

உயிர்க்கு - உயிர் - காற்று; உயிர்வளி; சீவன் ஆதன் ஓரறிவுயிர்முதலியஉயிரினம்; உயிரெழுத்து ஓசை ஒருநாழிகையில்4320-ல்ஒருகூறு; சன்மலக்கினம்

முழுப்பொருள்
இக்குறள் எனக்கு இரண்டு அர்த்தங்களை தருகிறது. ஏன் எனில் ”எண்’ என்ற சொல்லுக்கு பல அர்த்தங்களை அகராதி கூறுகிறது.
1) எண்ணம், மனம் ஆகிய பொருள்கள் மனதின் எண்ணத்தை ஒட்டி இருப்பதால் இவை (கல்வி அதிகாரத்தில் வரும்) இக்குறள் சொல்லும் பொருளாக இல்லாமல் இருக்கவே வாய்ப்புகள் அதிகம்.
2) கணிதம் என்ற பொருள் இருக்க வாய்ப்புகள் உண்டு ஏனெனில் ஒருவர் சிற்பம், விவசாயம், கட்டுமானம், சமையல், இசை என்று எந்த துறை கற்றாலும் ஏதோ ஒருவித கணக்கு அத்தியாவசியம் ஆகிறது. உலகில் எழுத்து தெரியாதவர்கள் கூட உண்டு எண்ணத்தெரியாதவர்கள் இல்லை.
3) அதேப்போல் தருக்கம் என்ற பொருளுக்கும் வாய்ப்புகள் அதிகமே. ஏனெனில் முறையான தருக்கமே நமக்கு தெளிவினை கொடுக்கும். தெளிவுப் பெருதலே கல்வியின் குறிக்கோள். ”குறள் 355: எப்பொருள் எத்தன்மைத் தாயினும் அப்பொருள் மெய்ப்பொருள் காண்பது அறிவு” என்று வள்ளுவர் முன்பே கூறியுள்ளார்.

எழுத்தினால் பெரும் கல்வியும் மிக முக்கியம். ஏனெனில் ஒருவருக்கு எழுத்தினை படிக்கத் தெரிந்தால் அவரால் ஒரு கட்டத்திற்குப் பிறகு தன்னுள்ளோ அல்லது பிறருடனோ தருக்கம் செய்தே கற்றுக்கொள்ளலாம். எழுத்து இல்லையென்றால் கல்விக்காக நாம் பிறரை நம்பியே இருக்க வேண்டியது இருக்கும்.

இவை இரண்டும் கண் என்கிறார் திருவள்ளுவர். ஏன் கண் என்கிறார்? கை அல்லாது கால் என்று சொல்லலாமே? ஏன் கண் என்கிறார் என்றால் நம் அறிவென்பது வெளியுலகத்தை அறிவது கண்களினாலே. கையும், காலும் நமது அன்றாட வேலைகளை செய்வதற்காக. கண் என்பது மிக சிறந்த வழிகாட்டியாக இருக்கிறது. நாம் மகிழ்ச்சியாக இருந்தால் கண்ணில் ஒரு ஒளி குடிக்கொள்ளும்

எண்ணும்  (கணிதம், தருக்கம் (தருக்கத்தினால் வரும் தெளிவும்)) மற்றும் எழுத்தும் (எழுத்தினால் வரும் கல்வி, அறிவு) ஒரு மனிதனுக்கு இரு கண் போன்றது. இவை வாழும் உயிர்க்கு மிக அவசியம். வாழ்தல் என்றால் மகிழ்ச்சியாக செழிப்பாக வாழ்வது. ஆதலால் வாழ்வதற்கு எண்ணும் எழுத்தும் கண்ணை போன்று அவசியம். உண்டுறங்கிப் புணர்ந்து பெற்று முதிர்ந்து மாயும் எளியோர் வாழ்வதில்லை என்பதையும் அறியவேண்டும்.

மேலும் 
எழுத்தறிய தீரும் இழிதகைமை தீர்ந்தான்
மொழித்திறத்தின்  முட்டறுப்பா னாகும் – மொழித்திறத்தின்
முட்டறுத்த நல்லோன் முதனூற் பொருளணர்ந்து
கட்டறுத்து வீடு பெறும்

என்ற பாடல் மொழியறிதலின் சிறப்பைக் .கூறுகிறது. சிறுபஞ்சமூலப் பாடல்வரியும் “கண்ணுங்காற் கண்ணும் கணிதம் எழுத்து” என்று ஒருவரியில் இக்கருத்தையே சொல்கிறது. அப்பரும் கண்ணுதற் கடவுளை, “எண்ணும் எழுத்தும் குறியுமறிபவர்” (அப்பர்.வேதிகுடி.6) என்கிறார்.

ஒப்புமை
”அண்ணலும் நாலும் பொருளும் நிகழ்வும் இவைஎனலும்
எண்ணினும் ஏனை எழுத்தினும் மிக்காங் கிருந்தவர்” (நீலகேசி 679)

“கண்ணுங்காற் கண்ணும் கணிதம் எழுத்து”  (சிறுபஞ்ச் 93)

“கண்ணெனப்படுவ மூன்று காவலன் கல்வி காமர்
விண்ணினைச் சுழல ஓடும் வெய்யவன் என்னும் பேர்” (சூளா.மந்திர.30)

ஜெயமோகன் தளத்தில் இருந்து
தமிழில் திருக்குறள் சார்ந்து அப்படி பல திறப்புகள் இருப்பதைக் காணலாம்.  திருக்குறள் இங்கே பலரால் பேசப்படுகிறது, மேடையில் மேற்கோள்காட்டப்படுகிறது. ஆகவே அது சார்ந்து ஒரு திறப்பு சட்டென்று உருவாகிறது. உதாரணமாகச் சிலநாட்கள் முன்னால் ஒரு பேருந்தில் ஒரு கிழவர் சொன்னார், ‘எண்ணென்ப ஏனை எழுத்தென்ப- ன்னு குறள் சொல்லுது. எழுத்து இல்லாட்டிக்கூட வாழ்ந்திடலாம். எண் இல்லாம இருக்க முடியுமா?. எழுத்து தெரியாத லட்சம்பேரு இருப்பாங்க. எண்ணத்தெரியாதவன் மெண்டல் ஆஸ்பத்திரியிலே இல்லா இருப்பான்?’

மேலும்: அஷோக் உரை

பரிமேலழகர் உரை
எண் என்ப ஏனை எழுத்து என்ப இவ்விரண்டும் - அறியாதார் எண் என்று சொல்லுவனவும் மற்றை எழுத்து என்று சொல்லுவனவும் ஆகிய கலைகள் இரண்டினையும், வாழும் உயிர்க்குக் கண் என்ப - அறிந்தார் சிறப்புடை உயிர்கட்குக் கண் என்று சொல்லுவர். 
(எண் என்பது கணிதம். அது கருவியும் செய்கையும் என இருவகைப்படும். அவை ஏரம்பம் முதலிய நூல்களுள் காண்க. எழுத்து எனவே, அதனோடு ஒற்றுமையுடைய சொல்லும் அடங்கிற்று. இவ்விருதிறமும்,அறமுதற்பொருள்களைக் காண்டற்குக் கருவியாகலின், கண் எனப்பட்டன.அவை கருவியாதல் 'ஆதி முதலொழிய அல்லாதன எண்ணி. நீதி வழுவா நிலைமையவால் - மாதே, அறமார் பொருள் இன்பம் வீடுஎன்று இவற்றின் , திறமாமோ எண்ணிறந்தால் செப்பு'. 'எழுத்தறியத் தீரும் இழிதகைமை தீர்ந்தான், மொழித்திறத்தின் முட்டறுப்பான் ஆகும், மொழித்திறத்தின், முட்டறுத்த நல்லோன் முதல் நூல் பொருள் உணர்ந்து , கட்டறுத்து வீடு பெறும்'. இவற்றான் அறிக. 'என்ப' என்பவற்றுள் முன்னைய இரண்டும் அஃறிணைப் பன்மைப் பெயர். பின்னது உயர்திணைப் பன்மை வினை. அறியாதார், அறிந்தார் என்பன வருவிக்கப்பட்டன. சிறப்புடைய உயிர் என்றது மக்கள் உயிருள்ளும் உணர்வு மிகுதி உடையதனை. இதனால் கற்கப்படும் நூல்கட்குக் கருவியாவனவும் அவற்றது இன்றியமையாமையும் கூறப்பட்டன.) .

மணக்குடவர் உரை
எண்ணென்று சொல்லப்படுவனவும் மற்றை எழுத்தென்று சொல்லப்படுவனவுமாகிய இவ்விரண்டு பொருளையும் உலகின்கண் வாழுமுயிர்களுக்குக் கண்ணென்று சொல்லுவர் அறிவோர்.

மு.வரதராசனார் உரை
எண் என்று சொல்லப்படுவன எழுத்து என்று சொல்லப்படுவன ஆகிய இரு வகைக் கலைகளையும் வாழும் மக்களுக்குக் கண்கள் என்று கூறுவர்.

சாலமன் பாப்பையா உரை
வாழும் நல்லவர்க்கு அறிவியலும் கலைஇயலும் சிறந்த கண் என்று அறிந்தவர் கூறுவர்.

040 கல்வி

பால் - பொருட்பால்
இயல் - அரசியல்
அதிகாரம் - கல்வி

சுட்டியை தட்டுக (குறளே இங்கு சுட்டி)

குறள் 391
கற்க கசடறக் கற்பவை கற்றபின் 
நிற்க அதற்குத் தக

குறள் 392
எண்ணென்ப ஏனை எழுத்தென்ப இவ்விரண்டும்
கண்ணென்ப வாழும் உயிர்க்கு

குறள் 393
கண்ணுடையர் என்பவர் கற்றோர் முகத்திரண்டு
புண்ணுடையர் கல்லா தவர்

குறள் 394
உவப்பத் தலைக்கூடி உள்ளப் பிரிதல்
அனைத்தே புலவர் தொழில்

குறள் 395
உடையார்முன் இல்லார்போல் ஏக்கற்றுங் கற்றார்
கடையரே கல்லா தவர்

குறள் 396



குறள் 399
தாமின் புறுவது உலகின் புறக்கண்டு 
காமுறுவர் கற்றறிந் தார்

குறள் 400
கேடில் விழுச்செல்வம் கல்வி யொருவற்கு 
மாடல்ல மற்றை யவை

பதிவு வரிசை