எட்பக வன்ன சிறுமைத்தே ஆயினும்

  

குறள் 889

எட்பக வன்ன சிறுமைத்தே ஆயினும்

உட்பகை உள்ளதாங் கேடு

[பொருட்பால், நட்பியல், உட்பகை]

பொருள்

எட் - எள் - ஒருவகைச்செடி, ஒருதவசம்; ஒருசிறியஅளவு; நிந்தை

எள் - eḷ   எள்ளு, s. rape-seed, sesamum, திலம், Different kinds of it are காட் டெள், காரெள், சிற்றெள், பேரெள், மயிலெள் etc.  1.Sesame, a plant cultivated for the oil obtainedfrom its seed, Sesamum iṅdicum;

பகவு - துண்டு; பங்கு; வெடிப்பு.

பகுத்தல் - பங்கிடுதல்; வகைப்படுத்தல்; தெளிவாய்க்கூறுதல்; கொடுத்தல்; வெட்டுதல்; பிடுங்குதல்; கோதுநீக்குதல்.

அன்ன - அத்தன்மையானவை; ஓர்அஃறிணைப்பன்மைக்குறிப்புவினைமுற்று; ஓர்உவமஉருபு.

சிறுமைத்தே - சிறுமை -இழிவு; கயமைத்தனம், கீழ்மை; இளமை; நுண்மை; எளிமை; குறைபாடு; வறுமை; பஞ்சம்; பிறர்மனத்தைவருத்துகை; இளப்பம்; குற்றம்; நோய்; துன்பம்; மிக்ககாமம்; கயமை.

ஆயினும் - ஆனாலும்; ஆவது உம்மைப்பொருளில்வரும்எண்ணிடைச்சொல்.

உட்பகை - நட்புப் பாராட்டிக் கெடுக்கும் பகை; உள்ளாகிநிற்கும்பகை; அறுபகை குடிகளின்எதிர்ப்பு.

உள்ளது - உள்பொருள்; உண்மை; மெய்; உண்மைப்பொருள்; ஆன்மா; ஏற்பட்டது, விதிக்கப்பட்டது.

ஆம் - நீர்; ஈரம் வீடு மாமரம் அழகு சம்மதங்காட்டும்சொல்; கேள்விப்பட்டதைக்குறிக்கும்சொல்; இகழ்ச்சிக்குறிப்பு; அனுமதி, தகுதி, ஊக்கம்குறிக்கும்சொல்; ஆவது ஆகிய சாரியை அசைநிலை தன்மைப்பன்மைவிகுதி; உளப்பாட்டுத்தன்மைப்பன்மைவிகுதி.

கேடு - தீயவை, அழிவு; இழப்பு; வறுமை; தீமை; கெடுதல்; வேறுபாடு; அழகின்மை

முழுப்பொருள்

ஒரு எள் என்பது மிகவும் சிறிய ஒரு விதையாகும். ஒரு எள் விதை எடையற்றது என்றே கூறலாம். சில மில்லி க்ராம்களில் (mg) தான் இடை இருக்கும். ஒரு முழு எள் விதையே எடையற்றதுப்போல் இலகுவானது என்றாலும் அவ்விதையை பகுத்தால், அதன் பாதி மேலும் இலகுவாக இருக்கும். அதுப்போல உட்பகை பார்க்க மிக இலகுவாக மிக மிக சிறியதாகத் தோன்றினாலும் அது உள்ளத்தில் இருந்தால் அது உள்ளத்திற்கும் உறவுகளுக்கும் கேடே. உட்பகை உள்ளத்தில் தோன்றிவிட்டால் அழிவு ஏற்பட்டு துன்பமே எஞ்சும்.

இங்கே திருவள்ளுவர் உட்பகை உள்ளத்தில் இருக்கக்கூடாது என்பதை அழுத்தமாகவே பதிவு செய்கிறார். ஏனெனில் உள்ளமே அனைத்திற்கும் ஊற்றாகும். நல்லது விதைத்தால் நல்லது நடக்கும் பெருகும். தீயது (உட்பகை) விதைத்தால் அழிவே நடக்கும் துன்பம் பெருகும். 

மேலும்: அஷோக் உரை

பரிமேலழகர் உரை

உட்பகை எட்பகவு அன்ன சிறுமைத்தே ஆயினும் - அரசனது உட்பகை அவன் பெருமையை நோக்க எள்ளின் பிளவை ஒத்த சிறுமை உடைத்தேயாயினும்; கேடு உள்ளதாம் - பெருமையெல்லாம் அழிய வரும் கேடு அதன் அகத்ததாம். (எத்துணையும் பெரிதாய கேடு, தனக்கு எல்லை வருந்துணையும் எத்துணையும் சிறிதாய உட்பகையுள்ளே அடங்கியிருந்து, வந்தால் வெளிப்பட்டு நிற்கும் என்பதாம். இதனான் அது, சிறிது என்று இகழப்படாது என்பது கூறப்பட்டது.).

மணக்குடவர் உரை

எள்ளின் பிளவு போன்ற சிறுமைத்தேயாயினும் உடனே வாழும் பகையினான் ஒருவர்க்குக் கேடு உளதாம். இது பகை சிறிதென் றிகழற்க வென்றது.

மு.வரதராசனார் உரை

எள்ளின் பிளவைப் போன்ற சிறிய அளவு உடையதே ஆனாலும், ஒரு குடியை அழிக்கவல்ல கேடு உட்பகையில் உள்ளதாகும்.

சாலமன் பாப்பையா உரை

எள்ளின் பிளவு போல உட்பகை சிறியதாக இருக்கலாம்; என்றாலம் உட்பகை உள்ள கட்சிக்குள்ளேயே அதன் கேடும் இருக்கிறதாம்.

அரம்பொருத பொன்போலத் தேயும் உரம்பொருது

 

குறள் 888

அரம்பொருத பொன்போலத் தேயும் உரம்பொருது

உட்பகை உற்ற குடி

[பொருட்பால், நட்பியல், உட்பகை]

பொருள்

அரம் - இரும்பைத்தேய்க்கப்பயன்படும்கருவி; விரைவு வண்டி பாதலம் தோல்

பொருத - பொருதல் - போர்செய்தல்; சூதாடுதல்; மாறுபடுதல்; வீசுதல்; தடவுதல்; ஒப்பாதல்; தாக்குதல்; கடைதல்; முட்டுதல்; பொருந்துதல்; காண்க:தும்பை.

பொன் - சாதரூபம், கிளிச்சிறை, ஆடகம், சாம்பூநதம்என்னும்நான்குவகைப்பட்டதங்கம்; உலோகம்; இரும்பு; செல்வம்; அணிகலன்; திருமங்கலியம்; பொன்நாணயம்; மேருமலை; பொலிவு; பசலை; ஒளி; அழகு; ஏற்றம்; திருமகள்; வியாழன்; சூரியன்; பெண்குறி

போல - ஓர்உவமவுருபு

தேயும் -தேய்தல் - உரைசுதல்; குறைதல்; மெலிதல்; வலிகுன்றல்; கழிதல்; அழிதல்; சாதல்.

உரம் - வலிமை; திண்மை திடம் மரவயிரம்; எரு மார்பு அறிவு ஊக்கம் படைவகுப்பின்முன்னணி; குழந்தைகளுக்குவிழும்சுளுக்குவகை; மதில் உள்ளத்தின்மிகுதித்தன்மை; விரைவு

பொருது -  பொருதல் - போர்செய்தல்; சூதாடுதல்; மாறுபடுதல்; வீசுதல்; தடவுதல்; ஒப்பாதல்; தாக்குதல்; கடைதல்; முட்டுதல்; பொருந்துதல்; காண்க:தும்பை.

உட்பகை - நட்புப்பாராட்டிக்கெடுக்கும்பகை; உள்ளாகிநிற்கும்பகை; அறுபகை குடிகளின்எதிர்ப்பு.

உற்ற - adj. part. devoted, trusty true. உற்ற சிநேகிதன், a trustworthy friend. உற்றமனிதன், a trustworthy person. உற்ற விசேஷம், உற்றசெய்தி, true report; உற்ற, rel. part. Uncommonly de voted, trusty.

குடி - பருகுகை; மதுபானம்; மதுவுண்டமயக்கம்; புருவம்; குடியானவன்; குடியிருப்போன்; ஆட்சிக்குட்பட்டகுடிகள்; குடும்பம்; குலம்; வீடு; ஊர்; வாழிடம்.

முழுப்பொருள்

பொற்கொல்லான் கையில் இருக்கும் பொன்னை தேய்க்கின்ற அரம் கருவி பொன்னை தேய்த்தால் தேயும். வலிமையான இரும்பாவது துருப்பிடிக்க வாய்ப்புள்ளது. ஆனால் பொன் அப்படிப்பட்டது அல்ல. அவ்வளவு எளிதில் வலிமை இழக்காது. ஆனால் அவ்வளவு வலிமையான பொன்னும் அரம் தேய்த்தால் தேய்ந்துவிடும். மேலும் பொன்னினால் இதனை நிறுத்த முடியாது. அரத்தினால் மட்டும் தான் நிறுத்த முடியும். 

அரம் தேய்த்தால் பொன்னும் தேயும். அதுப்போல வலிமையான மூர்க்கமான சண்டைகள் உட்பகையாக பல உறவுகளை உற்ற குடிகளை அறுத்து எறியும். அதனால் பெரிய துன்பமே ஏற்படும். உட்பகை முடிந்தால் தான் குடிகள் தப்பிக்கும். இல்லையேல் அரம்போல் சிறுக சிறுக அறுத்துக்கொண்டே இருக்கும்.

மேலும்: அஷோக் உரை

பரிமேலழகர் உரை

உட்பகை உற்ற குடி - முன் வளர்ந்து வந்ததாயினும் உட்பகையுண்டாய குடி, அரம் பொருத பொன்போலப் பொருது உரம் தேயும் - அரத்தாற் பொரப்பட்ட இரும்பு போல அதனால் பொரப்பட்டு வலி தேயும். ('பொருது' என்னும் செயப்பாட்டு வினையெச்சம் 'தேயும்' என்னும் வினை கொண்டது. அஃது, உரத்தின் தொழிலாயினும் குடிமேல் ஏற்றுதலின், வினை முதல்வினை ஆயிற்று. காரியஞ் செய்வதுபோன்று பொருந்தி மெல்லமெல்லப் பிரிவித்தலான், வலிதேய்ந்து விடும் என்பதாம். இவை இரண்டு பாட்டானும் அவன் குடிக்கு வரும் தீங்கு கூறப்பட்டது.).

மணக்குடவர் உரை

உட்பகையானது உற்ற குடி, அரத்தினால் தேய்க்கப்பட்ட பொன்னைப் போல, அதனால் பொரப்படவே வலி தேயும். இஃது உட்பகை அழகு செய்வது போலப் பலத்தைக் கெடுக்குமென்றது.

மு.வரதராசனார் உரை

உட்பகை உண்டான குடி அரத்தினால் தேய்க்கப் பட்ட இரும்பு போல் வலிமை குறைக்கப் பட்டு தேய்ந்து போகும்.

சாலமன் பாப்பையா உரை

அரத்தால் தேய்க்கப்படும் இரும்பு தேய்வது போல, உட்பகை கொண்ட குடு்ம்‌பமும் கட்சியும் அரசும் தமக்கும் பொருது தம் பலம் இழக்கும்.

செப்பின் புணர்ச்சிபோல் கூடினும் கூடாதே

  

குறள் 887

செப்பின் புணர்ச்சிபோல் கூடினும் கூடாதே

உட்பகை உற்ற குடி

[பொருட்பால், நட்பியல், உட்பகை]

பொருள்

செப்பின் - செப்புதல் - செப்புதல் - சொல்லுதல்; விடைசொல்லுதல்.

செப்பு - சொல்; விடை; செம்பு; சிமிழ்; நீர்வைக்கும்குடுவை; சிறுமியர்விளையாட்டுப்பாத்திரம்; இடுப்பு.

செப்பு - ceppu   n. செம்பு. 1. See செம்பு, 1.2. [M. ceppu.] Casket, little box of metal,ivory or wood; சிமிழ். செப்பின் புணர்ச்சிபோற்கூடினும் (குறள், 887). 3. A kind of water-vessel;நீர்வைக்குங் கரகம். சேமச் செப்பிற் பெறீஇயரோ(குறுந். 277). 4. Toy utensils; விளையாட்டுப் பாத்திரம். Colloq.

சிமிழ் - cimiḻ   n. perh. சிமிழ்¹-. 1. Smallround jewel box, small casket; செப்பு தட்டானடித்த சிமிழ்போல் (தனிப்பா. ii, 160, 399).

புணர்ச்சி - சேர்க்கை; ஒரேநாட்டார்ஆதல்; கலவி; எழுத்துமுதலியவற்றின்சந்தி; முன்பின்தொடர்பு; அணிகலன்.

போல் - ஓர்உவமவுருபு; பொய்; ஓர்அசைச்சொல்; உள்ளீடில்லாதது; பதர்; மூங்கில்; வெற்றி; படை; வாள்.

கூடினும் - கூடுதல் - ஒன்றுசேர்தல்; திரளுதல்; பொருந்துதல்; இயலுதல்; கிடைத்தல்; நேரிடுதல்; இணங்குதல்; தகுதியாதல்; அதிகமாதல்; தொடங்குதல்; அனுகூலமாதல்; உடன்படுதல்; நட்புக்கொள்ளுதல்; புணர்தல்; அடைதல்; மொத்தம்; மேலெல்லை.

கூடாதே - ஒன்று கூடாது ; சேராது

உட்பகை - நட்புப்பாராட்டிக்கெடுக்கும்பகை; உள்ளாகிநிற்கும்பகை; அறுபகை குடிகளின்எதிர்ப்பு.

உற்ற - adj. part. devoted, trusty true. உற்ற சிநேகிதன், a trustworthy friend. உற்றமனிதன், a trustworthy person. உற்ற விசேஷம், உற்றசெய்தி, true report; உற்ற, rel. part. Uncommonly de voted, trusty.

குடி - பருகுகை; மதுபானம்; மதுவுண்டமயக்கம்; புருவம்; குடியானவன்; குடியிருப்போன்; ஆட்சிக்குட்பட்டகுடிகள்; குடும்பம்; குலம்; வீடு; ஊர்; வாழிடம்.

முழுப்பொருள்

”செப்பின் புணர்ச்சிபோல்” என்றால் செப்பு தட்டானாடித்த சிமிழ் என்று அர்த்தம். அதாவது ஒரு சிறிய ஜாடியை செப்பு சிமிழால் மூடி வைத்திருப்பதுப் போல் ஆகும். 

ஒரு ஜாடியின் மேல் ஒரு செப்பு மூடிப் போட்டு மூடி இருத்தாலும், பார்க்க அது ஒன்றாக தோன்றும்.  ஆனால் அவை எந்நேரமும் கீழே விழக்கூடும். ஜாடிக்குள்ளே இருப்பவை சிந்தி நஷ்டம் ஏற்படும். மேலும் ஒரு குறிபிட்ட எடைக்குப் பிறகு மூடி தாங்காமல் கீழே விழும். அதுப்போல ஒரு குழுமத்தில் அல்லது குடும்பத்தில் அல்லது ஒரு நிர்வாகத்தில் அல்லது நண்பர்கள் இடத்தில் உட்பகை இருந்தால் வெளியே இருந்து பார்க்க ஒன்றாக இருப்பதுப்போல் தோன்றும் ஆனால் அவ்வுறவுகள் எந்நேரமும் பகை தாளாமல் முறிந்து பெரும் துன்பத்தை தரக்கூடும். 

உட்பகை இருந்தால் மிகவும் ஜாக்கிரதையாக இருக்க வேண்டும். எந்நேரமும் அழிவு ஏற்பட்டுத் துன்பம் வரும்.

மேலும்: அஷோக் உரை

பரிமேலழகர் உரை

செப்பின் புணர்ச்சி போல் கூடினும் - செப்பினது புணர்ச்சி போலப் புறத்து வேற்றுமை தெரியாமற் கூடினாராயினும்; உட்பகை உற்ற குடி கூடாது - உட்பகை உண்டாகிய குடியிலுள்ளோர் அகத்துத் தம்முள் கூடார். (செப்பின் புணர்ச்சி - செப்பு மூடியோடு புணர்ந்த புணர்ச்சி. உட்பகையான் மனம் வேறுபட்டமையின், புறப்பகை பெற்றுழி வீற்றுவீற்றாவர் என்பதாம். குடி கூடாது என்பதனை, நாடு வந்தது என்பதுபோலக் கொள்க. உட்பகை தான் உற்ற குடியோடு கூடாது என்றும், உட்பகை உண்டாய குடி அப்பகையோடு கூடாது என்றும் உரைப்பாரும் உளர்.).

மணக்குடவர் உரை

உட்பகையும் அஃது உற்ற குடியும், செப்பும் மூடியும் பொருந்தினாற் போலப் பொருந்தினவாயினும், பொருத்தமில்லவாம். உட்பகையுற்றார் செப்பும் மூடியும் ஒன்றுபட்டாற்போல இருந்து செப்பகத்துப் பொருள் வாங்குவார்க்கு மூடி துணையாய் அகன்று நிற்குமதுபோல அகன்று நிற்பரென்றவாறு.

மு.வரதராசனார் உரை

செப்பின் இணைப்பைப் போல புறத்தே பொருந்தி இருந்தாலும், உட்பகை உண்டான குடியில் உள்ளவர் அகத்தே பொருந்தி இருக்கமாட்டார்.

சாலமன் பாப்பையா உரை

செப்பு, மூடியோடு சேர்ந்து இருப்பதுபோல் உட்பகை கொண்ட குடும்பமும், கட்சியும், அரசும் வெளியே சேர்ந்து இருந்தாலும் உள்ளத்துள் சேரவே மாட்டா.

ஒன்றாமை ஒன்றியார் கட்படின் எஞ்ஞான்றும்

குறள் 886

ஒன்றாமை ஒன்றியார் கட்படின் எஞ்ஞான்றும்

பொன்றாமை ஒன்றல் அரிது

[பொருட்பால், நட்பியல், உட்பகை]

பொருள்

ஒன்றாதல் - ஒற்றுமைப்படுதல், ஐக்கியப்படுதல்; முதலாதல்; இணையின்றாதல்.

ஒன்று-தல் - oṉṟu-   5 v. intr. ஒன்று [T.onaru, K. ondu.] 1. To unite; to coalesce; togrow together, as two trees; to become one;ஒன்றாதல். 2. To agree; சம்மதித்தல் 3. To beon intimate terms with; மனங்கலத்தல். நிரயங்கொள்பவரோ டொன்றாது (புறநா. 5, 6). 4. To setone's mind solely on an object; ஒருமுகப்படுதல்.நன்புல னொன்றி நாதவென் றரற்றி (திருவாச. 4, 82).5. To resemble; to be similar; உவமையாதல்.வேயொன்று தோளொருபால் (தொல். பொ 286,உரை.)  

ஒன்றாமை - மனம் கலங்காது இருத்தல்  ; பகையில்லாது இருந்தால் 

ஒன்றியார் -இணைந்து இருப்பவர் 

கண் - விழி; கண்ணோட்டம்; பீலிக்கண்; கணு; மரக்கணு; தொளை; மூங்கில்முரசடிக்குமிடம்; மூட்டுவாய்; பெருமை; இடம்; ஏழனுருபு; அறிவு; பற்றுக்கோடு; உடம்பு; அசை; உடலூக்கம்.

படின் - பட்டால் 

எஞ்ஞான்றும் - எகக்காலமும், எப்பொழுதும், எப்போதும்

பொன்றுதல் - அழிதல்; இறத்தல்; தவறுதல்; பார்வைமுதலியனகுறைதல்

பொன்றாமை - அழியாது ; இறக்காது 

ஒன்றல் - ஒன்றுதல்; பொருந்துதல்

அரிது - அருமை; பசுமை

முழுப்பொருள்

தன்னுடன் இருப்பவர்களிடம் மனவேறுபாடு உட்பகை ஆகியவை தோன்றாமல் வளராமல் இருக்குமாயின் ஒருவரோடு ஒருவர் ஒற்றுமையாக இருப்பார் ஆயின் பின்பு எக்காலமும் அவர்களால் அழிவென்பது தோன்றுவது மிக மிக அரிதாகும். 

ஒரு நாட்டில் அல்லது உறவுகளில் அல்லது குடும்பங்களில் உட்பகை இருக்குமாயின் வேறேதும் தேவையில்லை அந்த உட்பகை ஒன்றே எல்லா அழிவையும் தந்துவிடும். அந்த அழிவு நேராமல் தப்பிப்பது மிக மிக அரிது.

ஆதலால் உட்பகை தோன்ற அனுமதிக்காமல் இருப்பது நமக்கு எல்லாவிதத்திலும் நன்மையே. 

மேலும்: அஷோக் உரை

பரிமேலழகர் உரை

ஒன்றாமை ஒன்றியார்கண் படின் - பகைமை, தனக்கு உள்ளாயினார் மாட்டே பிறக்குமாயின்; பொன்றாமை ஒன்றல் எஞ்ஞான்றும் அரிது - அரசனுக்கு இறவாமை கூடுதல் எஞ்ஞான்றும் அரிது. (பொருள் படை முதலிய உறுப்புக்களாற் பெரியனாய காலத்தும் என்பார், 'எஞ்ஞான்றும்' என்றார். இவை நான்கு பாட்டானும், அதனால் தனக்கு வரும் தீங்கு கூறப்பட்டது.).

மணக்குடவர் உரை

தன் ஒன்றினார்மாட்டு ஒன்றாமை உளதாயின், எந்நாளினும் சாவாமையைக் கூடுதல் அரிது. இது நட்டோராகிய உட்பகையினால் வரும் தீமை கூறிற்று.

மு.வரதராசனார் உரை

ஒருவனுடைய உற்றாரிடத்தில் பகைமை ஏற்படுமானால், அந்த உட்பகையால் அவன் அழியாமலிருத்தல் எப்போதும் அரிது.

சாலமன் பாப்பையா உரை

தன்னுடன் இருப்பவரின் பகை தோன்றுமானால், ஆட்சியின் அழிவைத் தடுக்க ஒருபோதும் முடியாது.

உறல்முறையான் உட்பகை தோன்றின் இறல்முறையான்

குறள் 885
உறல்முறையான் உட்பகை தோன்றின் இறல்முறையான்
ஏதம் பலவும் தரும்
[பொருட்பால், நட்பியல், உட்பகை]

பொருள்
உறல் - அடைகை; உறவு; பரிசம்உறுதல்; பொருந்தல்; கிட்டல்; வருதல்; அடைதல்; அணைதல்

முறை - நீதி; அடைவு; நியமம்; ஆள்மாறிமாறிவேலைசெய்யும்நியமம்; தடவை; பிறப்பு; ஒழுக்கம்; உறவு; உறவுமுறைப்பெயர்; அரசநீதி; பழைமை; ஊழ்; கூட்டு; நூல்; தன்மை; காண்க:முறையீடு; கற்பு.

முறையான் - முறைகாரர், s. [pl.] Those who are employed to attend to a duty by turns.

உட்பகை - நட்புப் பாராட்டிக் கெடுக்கும் பகை; உள்ளாகி நிற்கும் பகை; அறுபகை குடிகளின் எதிர்ப்பு.

தோன்றின் - தோன்றுதல் - கண்காணவெளிப்படல்; அறியப்படுதல்; பிறத்தல்; முளைத்தல்; விளங்குதல்; நிலைகொள்ளுதல்; வருதல்; சாரியைமுதலியனசொற்களிடையேவருதல்; உண்டாதல்.

இறல் - ஒடிதல்; கெடுதல் இறுதி சிறுதூறு கிளிஞ்சில்

முறை - நீதி; அடைவு; நியமம்; ஆள்மாறிமாறிவேலைசெய்யும்நியமம்; தடவை; பிறப்பு; ஒழுக்கம்; உறவு; உறவுமுறைப்பெயர்; அரசநீதி; பழைமை; ஊழ்; கூட்டு; நூல்; தன்மை; காண்க:முறையீடு; கற்பு.

முறையான் - முறைகாரர், s. [pl.] Those who are employed to attend to a duty by turns.

ஏதம் - துன்பம், குற்றம், கேடு

பலவும் - pala   pron. cf. bahula. [K. hala, M.pala.] Many, several, diverse; ஒன்றுக்கு மேற்பட்டவை.

தரும் - கொடுக்கும்

முழுப்பொருள்
நட்புறவாய் பழைமை பாராட்டியவர்கள் மத்தியில் உட்பகை என்னும் உறவை அறுக்கும் பகை தோன்றினால் அது அழிவை தரும். உட்பகை பல குற்றங்களையும் துன்பங்களையும் விளைவித்து அழிவை உண்டாக்கும்.

ஆதலால் உட்பகை ஆபத்தானது என்றுணர்க. பகை இருந்தால் மனதில் மகிழ்ச்சியும் முகத்தில் சிரிப்பும் இழந்துவிடுவோம். அது உட்பகைக்கும் பொருந்தும். 

நண்பர்கள், சகோதர சகோதரிகள், உறவுகள், உள்ளாட்சி அமைப்புகள், நிறுவனங்கள், குழுக்கள் மத்தியில் உட்பகை தோன்ற வழிவகுக்காமல் பார்த்துக் கொள்ளவேண்டும்.

-“இந்தியத் தவளைகள்” என்று சொல்லக்கூடிய கதை நினைவுக்கு வருகிறது. ஒருவருக்கு ஒருவர் உதவிசெய்துகொள்ளாமல், உள்ளத்தில் பகையோடு ஒருவரை ஒருவர் கெடுப்பதிலேயே உறவினர்கள் இருப்பின், அவர்கள் ஒட்டுமொத்தமாக அழிந்துபடுவார்கள், என்பதைச் சொல்லும் குறள்.

மேலும்: அஷோக் உரை

ஒப்புமை

”வேறும் என்னொடு தரும்பகைபிறிதினி வேண்டலென்வினையத்தால்

ஊறி என்னுளே உதித்தது குறிப்பினி உணர்குவ துளதன்றால்

ஈறல் என்பெரும் பகைஞனுக் கன்புசால் அடியென்யான்

என்கின்றான்” (கம்ப.இரணியன்.80)

பரிமேலழகர் உரை

உறல் முறையான் உட்பகை தோன்றின் - புறத்து உறவுமுறைத் தன்மையோடு கூடிய உட்பகை அரசனுக்கு உண்டாவதாயின்; இறல் முறையான் ஏதம் பலவும் தரும் - அஃது அவனுக்கு இறத்தல் முறையோடு கூடிய குற்றம் பலவற்றையும் கொடுக்கும். (அவை, புறப்பகைத் துணையாய் நின்றே அது தோன்றாமல் கோறல் முதலிய வஞ்சனை செய்தலும், அமைச்சர் முதலிய உறுப்புக்களைத் தேய்த்தலும் முதலாயின.).

மணக்குடவர் உரை

உறவு முறையோடே வுட்பகை தோன்றுமாயின், அது கெடுதல் முறைமையோடே கூடப் பல துன்பத்தினையும் தரும். இது சுற்றத்தாராகிய உட்பகையினால் வரும் தீமை கூறிற்று.

மு.வரதராசனார் உரை

உறவுமுறையோடு உட்பகை உண்டாகுமானால், அது ஒருவனுக்கு இறக்கும் வகையான துன்பம் பலவற்றையும் கொடுக்கும்.

சாலமன் பாப்பையா உரை

உறவு முறையை உடையவனே ( சொந்தக் கட்சிக்காரனே) உட்பகையானால், அது சாவோடு கூடிய குற்றம் பலவற்றையும் உண்டாக்கும்.

மனம்மாணா உட்பகை தோன்றின்

குறள் 884
மனம்மாணா உட்பகை தோன்றின் இனமாணா
ஏதம் பலவும் தரும்

[பொருட்பால், நட்பியல், உட்பகை]

பொருள்
மனம் - நெஞ்சம்; எண்ணம்; விருப்பம்; இந்துப்பு.

மாணா - மாட்சியற்று, பகை

உட்பகை - நட்புப்பாராட்டிக்கெடுக்கும்பகை; உள்ளாகிநிற்கும்பகை; அறுபகை குடிகளின்எதிர்ப்பு.

தோன்றின் - தோன்றுதல் - கண்காணவெளிப்படல்; அறியப்படுதல்; பிறத்தல்; முளைத்தல்; விளங்குதல்; நிலைகொள்ளுதல்; வருதல்; சாரியைமுதலியனசொற்களிடையேவருதல்; உண்டாதல்.

இனம் - வகை; குலம் சுற்றம் சாதி கூட்டம் திரள் அரசர்க்குஉறுதிச்சுற்றம்; அமைச்சர்; உவமானம்

மாணா - மாட்சியற்று, பகை

ஏதம் - துன்பம், குற்றம், கேடு

பலவும் - பல -  pala   pron. cf. bahula. [K. hala, M.pala.] Many, several, diverse; ஒன்றுக்கு மேற்பட்டவை.-

தரும் - கொடுக்கும்

முழுப்பொருள்
உட்பகை என்பது புறத்தால் நண்பர்போல காட்டிக்கொண்டு அகத்தால் பகைகொள்வது. அது மாட்சியற்றதாகும். அத்தகைய உட்பகை ஒருவருக்குள்  (அரசருக்குள்) தோன்றுமாயின் அது தனக்கு மட்டும் துன்பம் தராது, தன்னுடைய சுற்றத்தாருக்கும் (அமைச்சர்களுக்கும்) மாட்சியற்ற துன்பங்கள் பலவற்றை தரும் கேடுகளை விளைவிக்கும்.

பகை என்பது துன்பம் தரும் ஒன்று தான். அது எல்லோரும் அறிந்ததே. ஆனால் உட்பகை என்பது மாட்சியற்றது. அது மிகவும் கேவலம் என்பதை நாம் இங்கு உணரலாம்.

மேலும்: அஷோக் உரை

ஒப்புமை

”தமரல் லவரைத் தலையளித்தக் கண்ணும்

அமராக் குறிப்பலர்க் காகாதே தோன்றும்

சுவர்நிலம் செய்தமைத்துக் கூட்டியக் கண்ணும்

உவர்நிலம் உட்கொதிக்கு மாறு” (பழமொழி 144)

பரிமேலழகர் உரை
மனம் மாணா உட்பகை தோன்றின் - புறம் திருந்தியது போன்று அகந்திருந்தாத உட்பகை அரசனுக்கு உண்டாவதாயின்; இனம் மாணா ஏதம் பலவும் தரும் - அஃது அவனுக்குச் சுற்றம் வயமாகாமைக்கு ஏதுவாகிய குற்றம் பலவற்றையும் கொடுக்கும். (அவை, சுற்றத்தாரை உள்ளாய் நின்று வேறுபடுத்தலும், அதனால் அவர் வேறுபட்டவழித் தான் தேறாமையும், பின் அவற்றான் விளைவனவும் ஆம்.).

மணக்குடவர் உரை
மனம் நன்றாகாத உட்பகை தோன்றுமாயின் தனக்கு இனமாயினார் நல்லராகார்; அஃதன்றிப் பல குற்றங்களும் உண்டாம். இஃது இனம் பொருந்தாமல் கூடநின்று பகைப்பிக்கு மென்றது.

மு.வரதராசனார் உரை
மனம் திறந்தாத உட்பகை ஒருவனுக்கு உண்டாகுமானால், அது அவனுக்குச் சுற்றம் சிர்படாமைக்கு காரணமான குற்றம் பலவற்றைத் தரும்.

சாலமன் பாப்பையா உரை
புறத்தே நட்பானவர் போல் தோன்றி அகத்தே திருந்ததாத உட்பகை உண்டானால், அது நம் சுற்றமும் நம் கட்சிக்காரரும் நம் வசப்படாதிருக்கும்படி பல சிக்கல்களையும் உண்டாக்கும்.

உட்பகை அஞ்சித்தற் காக்க

குறள் 883
உட்பகை அஞ்சித்தற் காக்க உலைவிடத்து
மட்பகையின் மாணத் தெறும்

[பொருட்பால், நட்பியல், உட்பகை]

பொருள்
உட்பகை - நட்புப் பாராட்டிக் கெடுக்கும்பகை; உள்ளாகிநிற்கும்பகை; அறுபகை குடிகளின்எதிர்ப்பு

அஞ்சித் - அஞ்சுதல் - பயப்படுதல்.

தற் - தன், தன்னை

காக்க - காத்தல் - பாதுகாத்தல்; அரசாளுதல்; எதிர்பார்த்தல்; விலக்குதல்.

உலைவு - அழிவு; நடுக்கம்; வறுமை; கலக்கம்; தோல்வி; அலைவு; ஊக்கக்குறைவு

இடத்து - இடம் - தானம்; வாய்ப்பு வீடு காரணம் வானம் விரிவு இடப்பக்கம்; அளவு ஆடையின்அகலமுழம்; பொழுது ஏற்றசமயம்; செல்வம் வலிமை மூவகையிடம்; படுக்கை தூரம் ஏழனுருபு; இராசி

மட்பகையின் - மட்கல மறுக்குங்கருவி; குயவன்; மண் +. 1.Potter's instrument for paring clay

மாணத் - மாண்-. Greatness;glory; splendour; excellence; dignity; மாட்சிமை., மடங்கு; மாணவன்; பிரமசாரி; குள்ளமானவர்.

தெறும் - தெறுதல் - சுடுதல்; காய்ச்சுதல்; கோபித்தல்; வருத்துதல்; தண்டஞ்செய்தல்; அழித்தல்; கொட்டுதல்; பகைத்தல்; கொல்லுதல்; தங்கல்; நெரித்தல்.

முழுப்பொருள்
மணலில் இருந்து பானை செய்யும் பொழுது அதனை செய்கின்றவர் சற்று தளர்வானாலும்  பானை செய்யப்படும் கருவி  முழு பானையை அழித்துவிடும். ஆதலால் பானை செய்கின்றவர் சற்றும் தளராமல் பானையை செய்யவேண்டும்.  அதுபோல ஒரு நட்பு வட்டாரத்திலோ அல்லது தொழிலிலோ உட்பகை அஞ்சி தன்னை பாதுகாத்துக்கொள்ளல் வேண்டும். ஏனெனில் நட்பினில் அல்லது தொழிலில் தளர்வு ஏற்படும் பொழுதோ அல்லது தோல்வி ஏற்படும் பொழுதோ உட்பகையானது தலைதூக்கும். அப்படி உட்பகை தலைதூக்கும் பொழுது இருவருக்கும் நட்பினுள்ளோ அல்லது தொழிலிலோ பூசல் உருவாகி நட்பினை  அல்லது தொழிலினை அழித்துவிடும்.

உட்பகையில் வரும் கோபம் இயற்கையான மானுட இயல்பும் கூட. அந்த கோபத்தில் நியாயமும் இருக்கலாம். அதனை வெளிப்படுத்திய விதம் தவறாக அல்லது சற்று அதிகமாக இருக்கலாம். இங்கே தவறு செய்தவர் கோபப்பட்டவர் மீது தவறு கண்டுபிடிப்பாரே ஒழியே தன்மீது உள்ள தவறை மறைத்துவிடுவார் அல்லது பெரிய தவறு இல்லை என்று கூறிக்கொள்வார் சப்பைக்கட்டுக்காட்டுவார். இந்த சண்டை எல்லை மீறி நட்பு முறியும் சூழலை உருவாக்கிவிடும். ஆதலால் கோபப்படுபவர்  இது எதிர்பக்கத்தில் உள்ள தன் நண்பரோ அல்லது அலுவலக ஊழியரோ நம் கோபத்தினால் ஆத்திரம் அடைந்து விடக்கூடும் என்பதை அறிய வேண்டும். அதனால் நமக்கு இழப்பே ஆகும். அல்லது தவறு செய்தவர் எதிர்வாதம் செய்துகொண்டு பகையை வளர்க்க கூடாது.  ஆதலால் சம்மந்தபட்ட அனைவரும் உட்பகையை தவிர்க்கவேண்டும். உட்பகை எல்லாவற்றையும் அழித்துவிடும் என்பதை உணர்ந்து நடந்துக்கொள்ள வேண்டும்.

அதுமட்டும் இன்றி இதற்கு வெளியே இருந்துகூட வரவேண்டாம் உள்ளேயே இருந்து உட்பகை என்னும் நோய் நம்மை அழித்துவிடும்.

இக்குறளை நமது உடம்புக்குக்கூட பொருத்திப்பார்களாம். நமது உடம்பின் உள்பாகங்களை சரிவர கவனிக்கயில்லை என்றால் அவை சீர்கேட்டு நம்மையே அழித்துவிடும். அதாவது சரியான தூக்கம் உணவு அமைதி உடற்பயிற்சியில்லையென்றால் நமது இதயம், சிறுநீரகம், குடல், கலீரல், நுரையீரல், கண், மூளை போன்ற உறுப்புகள் பழுதடைந்து இரத்தக்கொதிப்பு, சர்க்கரை நோய் போன்ற எண்ணற்ற உடல்நலங்கள் நமக்கு வந்து நம்மை அழித்துவிடும். ஆதலால் உடம்பை காப்போம் உயிர் வளர்ப்போம்.

மேலும்: அஷோக் உரை

ஒப்புமை

”.................இன்னாதே

ஒற்றுமை கொள்ளாதார் நட்பு” (நாலடி.237)

பரிமேலழகர் உரை
உட்பகை அஞ்சித் தற்காக்க - உட்பகையாயினாரை அஞ்சித் தன்னைக் காத்துக்கொண் டொழுகுக; உலைவிடத்து மட்பகையின் மாணத்தெறும் - அங்ஙனம் ஒழுகாதவழித் தனக்கோர் தளர்ச்சி வந்தவிடத்துக் குயவன் மட்கலத்தை அறுக்கும் கருவி போல, அவர் தப்பாமற் கெடுப்பர். ('காத்தல்' அவர் அணையாமலும் அவர்க்கு உடம்படாமலும் பரிகரித்தல். மண்ணைப் பகுக்கும் கருவி 'மட்பகை' எனப்பட்டது. பகைமை தோன்றாமல் உள்ளாயிருந்தே கீழறுத்தலின்,கெடுதல் தப்பாது என்பதாம்.).

மணக்குடவர் உரை
உடனே வாழும் பகைவரை அஞ்சித் தன்னைக் காக்க: அவர் தனக்குத் தளர்ச்சி வந்தவிடத்துக் குயவன் கலத்தை அறுங்குங் கருவிபோலத் தப்பாமல் கொல்லுவர். மட்பகை தான் அறுக்குங்கால் பிரறியாமல் நின்று அறுக்கும்.

மு.வரதராசனார் உரை
உட்பகைக்கு அஞ்சி ஒருவன் தன்னைக் காத்துக்கொள்ள வேண்டும், தளர்ச்சி வந்த போது மட்கலத்தை அறுக்கும் கருவி போல் அந்த உட்பகை தவறாமல் அழிவு செய்யும்.

சாலமன் பாப்பையா உரை
உட்பகைக்கு அஞ்சித் தன்னைக் காத்துக் கொள்க; காக்காது போனால் நமக்குத் தளர்வு வந்தபோது, மண்கலத்தை அறுக்கும் கைக்கருவிபோல உட்பகையானவர் நம்மை உறுதியாக அழித்து விடுவர்.

வாள்போல பகைவரை அஞ்சற்க

குறள் 882

வாள்போல பகைவரை அஞ்சற்க அஞ்சுக

கேள்போல் பகைவர் தொடர்பு

[பொருட்பால், நட்பியல், உட்பகை]

பொருள்

வாள் - ஒளி; கத்தி; கத்தரிகை; கூர்மை; ஈர்வாள்; விளக்கம்; புகழ்; கொல்லுகை; கலப்பை; உழுபடையின்கொழு; கயிறு; நீர்; கச்சு.

வாள்போல் - கத்தியைப் போன்று கூர்மையுடைய

பகை - எதிர்ப்பு; பகைவன்; மாறுபாடு; வெறுப்பு; தீங்கு; காண்க:பகைநரம்பு; வேற்றரசருடன்பகைகொள்ளுகை; கோளின்பகைவீடு; காமகுரோதம்முதலியஉட்பகை.

பகைவரை - பகைவர் - எதிரியை

அஞ்சற்க -  கண்டு அஞ்ச (பயப்பட) வேண்டாம்

அஞ்சுக - கண்டு அஞ்சுக (பயப்படுக)

கேள் - உறவு; நட்பு; நண்பன்; கணவன்.

கேள்போல் - நண்பர் போன்று வேடம் போட்கொண்டு உள்ள

பகைவர் - பகைவர் - எதிரியை

தொடர்பு - உடன் கொண்ட உறவினை, நட்பினை

முழுப்பொருள்

சர்வ வல்லமை பெற்ற பகைவரை கண்டும் உயிர்குடிக்கும் கூர்மையான அவருடைய வாளை கண்டும் அஞ்ச தேவையில்லை. ஏனெனில் நம் மனதிற்கு தெளிவாக தெரியும் அவர் எதிரி என்று. அவரை வெல்ல நம்மை நாம் எவ்வாறு தகுதிப் படுத்திக்கொண்டு நமது போர் பயிற்சிகளை செய்யவேண்டும் என்று தெரியும். நமது மன தைரியத்தாலும் உழைப்பாலும் பகைவரை வெல்லலாம். மாறாக பகைவரிடம் போராடி தோற்றாலும் ஒரு முறை தான் மரணம்.

ஆனால் நம்மீது அன்பும் அக்கறையும் கொண்டோர் போன்று நம்முடன் போலி உறவு வைத்துள்ள உறவினர்கள், நண்பர்கள், சுற்றத்தார்களை கண்டு அஞ்ச வேண்டும். ஏனெனில் இவர்கள் முகமூடி அணிந்த பகைவர்கள். இவர்கள் தேன் ஒழக பேசுவர் ஆனால் பின்நின்று நம்மை கொல்லுவர். நமக்கு இவர்களை பற்றி ஒருவேளை தெரிந்தாலும் சாட்சியில்லாததால் அவரை தண்டிக்கவும் முடியாது. அப்படியே சாட்சி இருந்தாலும் மன்னித்துவிடு என்று நம் உறவினர்களும் நண்பர்களும் உபதேசம் செய்வர். இத்தகைய போலி உறவுகளிடம் போராடவும் முடியாது. இவர்களுடன் தோற்றும் போவோம். இது ஒரே பிறவியில் பலமுறை மரணம் கொள்வதுப்போல் ஆகும். ஆதலால் இவர்களை போன்ற போலி நண்பர்களையும் உறவினர்களையும் கண்டு அஞ்ச வேண்டும்.

கி.வா.ஜ-வின் ஆராய்ச்சிப் பதிப்பிலே மேற்கோளாக இடப்பட்டுள்ள பழமொழிப் 188 பாடல், இக்குறளின் முற்றுக் கருத்தையும் எவ்வாறு கூறுகின்றது என்று பார்ப்போம்.

இம்மைப் பழியும் மறுமைக்குப் பாவமும்

தம்மைப் பரியார் தமரா – யடைந்தாரின்

செம்மைப் பகைகொண்டு சேராதார் தீயரோ?

மைம்மைப்பின் நன்று குருடு.

இப்பிறப்பில் பழியையும் பின்வரும் பிறவிகளில் பாவத்தையும், தம்மினின்றும் நீக்காராய் உட்பகையோடு தம்மவர்போல் ஒட்டிவாழும் உறவையும் சுற்றத்தையும்விட, நேர்முகமாகப் பகைக்கொண்டு தன்னை ஒட்டி ஒழுகாதவர்கள் தீயோரோ எனில் அன்று!  ஒளி குன்றிய பார்வையுடைய கண்ணினும் பார்வையின்றி நிற்கும் கண்ணே போதும் என்பது பழமொழி.

கண்ணின் மணியேபோல் காதலராய் நட்டாரும்

உண்ணும் துணையும் உளராய்ப் பிறராவர்

எண்ணி உயிர்கொள்வான் ஏன்று திரியினும்

உண்ணும் துணைக்காகும் கூற்று (பழமொழி 89)

நண்ணின மனிசரை நண்பு புண்டனை

எண்ணினை செய்வினை என்னை வெல்லுமா

றுன்னினை அரசின்மேல் ஆசை யூன்றினை

திண்ணிதுன் செயல்பிறர் செறுநர் வேண்டுமா (கம்ப.விபிடணன் 6)

மேலும்: அஷோக் உரை

பரிமேலழகர் உரை

வாள் போல் பகைவரை அஞ்சற்க - வாள்போல எறிதும் என்று வெளிப்பட்டு நிற்கும் பகைவர் பகையினை அஞ்சாதொழிக; கேள் போல் பகைவர் தொடர்பு அஞ்சுக - அங்ஙனம் நில்லாது கேள்போல மறைந்து நிற்கும் பகைவர் நட்பினை அஞ்சுக. (பகைவர் : ஆகுபெயர். முன்னே அறிந்து காக்கப்படுதலான், 'அஞ்சற்க' என்றும், அங்ஙனம் அறியவும் காக்கவும் படாமையின் கெடுதல் ஒருதலை என்பது பறறி 'அஞ்சுக' என்றும் கூறினார். பின் செய்யும் பகையினும் கொடிதாகலானும் காக்கலாகாது ஆகலானும், அஞ்சப்படுவது முன் செய்த அவர் தொடர்பாயிற்று. இவை இரண்டு பாட்டானும் உட்பகை ஆகாது என்பது கூறப்பட்டது.

மணக்குடவர் உரை

வாள்போலக் கொல்லுந் திறனுடைய பகைவரை அஞ்சாதொழிக; புறம்பு நட்டாரைப் போல மனத்தினாற் பகைத்திருப்பார் தொடர்பை அஞ்சுக. இது பகை அஞ்சுவதினும் மிக அஞ்சவேண்டுமென்றது.

மு.வரதராசனார் உரை

வாளைப்போல் வெளிப்படையான பகைவர்க்கு அஞ்ச வேண்டியதில்லை, ஆனால் உறவினரைப் போல் இருந்து உட்பகை கொண்டவரின் தொடர்புக்கு அஞ்ச வேண்டும்.

சாலமன் பாப்பையா உரை

வாளைப்போல் வெளிப்படையாகத் தெரியும் பகைவர்க்கு அஞ்ச வேண்டா; நண்பரைப்போல் வெளியில் காட்டி மனத்துள் பகைவராக‌வே இருப்போரின் தொடர்புக்கு அஞ்சுக.

நிழல்நீரும் இன்னாத இன்னா

குறள் 881
நிழல்நீரும் இன்னாத இன்னா தமர்நீரும்
இன்னாவாம் இன்னா செயின்

[பொருட்பால், நட்பியல், உட்பகை]

பொருள்
நிழல் - சாயை; எதிரொளி; அச்சு; குளிர்ச்சி; அருள்; ஒளி; நீதி; புகலிடம்; கொடை; செல்வம்; மரக்கொம்பு; நோய்; பேய்.

நீர் - தண்ணீர்; கடல்; இரசம்; பனிநீர்; உடல்இரத்தம்; பித்தநீர்முதலியநீர்மப்பொருள்; பூராடநாள்; பூரட்டாதிநாள்; ஈரம்; மணியின்ஒளி; குணம்; நிலை

இன்னாது - தீது; துன்பு
இன்னாத - இன்னாதா-தல் - துன்புறுதல்

இன்னா - துன்பம்; தீங்குதருபவை; கீழ்மையான; இகழ்ச்சி வெறுப்பு

தமர் - உற்றார்; தமக்குவேண்டியவர்; சிறந்தோர்; வேலையாள்கள்; கருவியால்அமைத்ததுளை; துளையிடும்கருவி

நீரும் - 

இன்னா - துன்பம்; தீங்குதருபவை; கீழ்மையான; இகழ்ச்சி வெறுப்பு

ஆம் - நீர்; ஈரம் வீடு மாமரம் அழகு சம்மதங்காட்டும்சொல்; கேள்விப்பட்டதைக்குறிக்கும்சொல்; இகழ்ச்சிக்குறிப்பு; அனுமதி, தகுதி, ஊக்கம்குறிக்கும்சொல்; ஆவது ஆகிய சாரியை அசைநிலை தன்மைப்பன்மைவிகுதி; உளப்பாட்டுத்தன்மைப்பன்மைவிகுதி.

இன்னா  - துன்பம்; தீங்குதருபவை; கீழ்மையான; இகழ்ச்சி வெறுப்பு
செயின் - செய்யாதே

முழுப்பொருள்

குளிர்ச்சியான தண்ணீர் நமக்கு நோய் தருமேயானால் (அல்லது தீங்கு விளைவிக்குமே ஆனால்) அது தீங்கானதே அகும். குளிர்ச்சி என்பதனால் அது நல்லவை ஆகாது. அதுபோலவே நமக்கு உற்ற உறவினரோ  அல்லது நண்பரோ / வேண்டியவரோ பழக்கத்தில் இனிமையாக மகிழ்விக்கும்படி பேசினாலும் அவருடைய பழக்கங்கள் குணநலங்கள் எண்ணங்கள் கீழ்மையானதாக இருப்பின் பின்பு அவருடைய நட்பும் தீதே விளைவிக்கும். ஏனெனில் அவர்களுடைய எண்ணங்கள் நம்மை தாக்கும். அது நம்மில் தீய விதைகளை விதைக்கும்.

மேலும் அஷோக் உரை

பரிமேலழகர் உரை

நிழல் நீரும் இன்னாத இன்னா - ஒருவனுக்கு அனுபவிக்க வேண்டுவனவாய நிழலும் நீரும் முன் இனியவேனும் பின் நோய் செய்வன இன்னாவாம்; தமர் நீரும் இன்னா செயின் இன்னாவாம் - அதுபோலத் தழுவவேண்டுவனவாய தமரியல்புகளும் முன் இனியவேனும் பின் இன்னா செய்வன இன்னாவாம். (நோய் - பெருங்கால், பெருவயிறு முதலாயின. 'தமர்' என்றதனால் உட்பகை யாதற்குரியராய ஞாதியர் என்பது அறிக. இன்னா செயல் - முன் வெளிப்படாமை நின்று துணை பெற்றவழிக் கெடுதல்.)

ஞா. தேவநேயப் பாவாணர் உரை

நிழல் நீரும் இன்னாத இன்னா- மக்கள் இன்பமாக நுகரும் நிழலும் நீரும் பின்பு நோய் செய்வனவாயின் தீயனவேயாம்; தமர் நீரும் இன்னா செயின் இன்னா ஆம்- அதுபோலத் தமக்குத்துணையாயிருக்க வேண்டிய தம்மைச் சேர்ந்தவர் இயல்புகளும் நன்மை செய்வனபோல் தோன்றித் தீமை செய்யின் தீயனவே யாம்.

தீய நிழலால் வரும் நோய் தலைவலி, காய்ச்சல் முதலாயின. தீய நீரால் வரும்நோய். யானைக்கால், பெருவயிறு (மகோதரம்) முதலாயின. தமர் என்பார் தம் குடும்பத்தாரும், தம் உறவினரும் தம் வகுப்பாரும், தம் கூட்டத்தாரும், தம் ஊராரும், தம் நாட்டாரும் தம் மொழியாரும் எனப் பல திறத்தார். முன் தோற்றத்தாலன்றிப் பின்விளைவாலேயே, பொருள்களும் மக்களும் முறையே நல்லனவுந் தீயனவும் நல்லவருந் தீயவருமாதல் அறியப்படும் என்பதாம். இக்குறளால் உட்பகையின் இயல்பு கூறப்பட்டது.

மணக்குடவர் உரை

நிழலகத்து நீர் இனிதேயாயினும் அவற்றுள் இன்னாத செய்யும் நீர் இன்னாதாகும். அதுபோலச் சுற்றத்தார் நன்மை இனிதாயினும் அவர் இன்னாதவற்றைச் செய்வாராயின் அஃது இன்னாதாயே விடும். இது சுற்றமென் றிகழற்க என்றது.

மு.வரதராசனார் உரை
இன்பம் தரும் நிழலும் நீரும் நோய் செய்வனவாக இருந்தால் தீயனவே ஆகும், அதுபோலவே சுற்றத்தாறின் தன்மைகளும் துன்பம் தருவானால் தீயனவே ஆகும்.

சாலமன் பாப்பையா உரை

நிழலும் நீரும் முதலில் இனியவாக இருந்தாலும், பிறகு துன்பம் தருவனவே. அதபோல, நெருக்கமான உறவும் சொந்தக் கட்சிக்காரரும் கூடப் பழக்கத்தில் இனியவராக இருந்து, செயலில் துன்பம் தந்தால் அது பெருந் துன்பமே.

உடம்பாடு இலாதவர் வாழ்க்கை

குறள் 890

உடம்பாடு இலாதவர் வாழ்க்கை குடங்கருள் 

பாம்போடு உடனுறைந் தற்று.

[பொருட்பால், நட்பியல், உட்பகை]

(For meaning in English, scroll to the bottom of this post)

சொற்ப்பொருள்

உடம்பாடு - உடன்படு-தல் - uṭaṉ-paṭu-   v. intr. உடன்+ படு-. [T. oḍambaḍu, K. oḍambaḍu.] To agree, assent, consent, acquiesce, yield; இசைதல் (பிங்.)  

இலாதவர் - இல்லாதவர்

வாழ்க்கை - வாழ்தல்; வாழ்நாள்; இல்வாழ்க்கை; மனைவி; நல்வாழ்வுநிலை; செல்வநிலை; ஊர்; மருதநிலத்தூர்.

குடங்கர் - குடம்; கும்பராசி; குடிசை

குடம் - நீர்க்குடம்; கும்பராசி; குடக்கூத்து; குடதாடி; வண்டிக்குடம்; திரட்சி; பசு; நகரம்; பூசம்; குடநாடு; வெல்லக்கட்டி; சதுரக்கள்ளி.

உள் - உள்ளே

பாம்பு - ஊரும்உயிர்வகை; இராகுஅல்லதுகேது; நாணலையும்வைக்கோலையும்பரப்பிமண்ணைக்கொட்டிச்சுருட்டப்பட்டதிரணை; ஆயிலியநாள்; நீர்க்கரை; தாளக்கருவிவகை.

பாம்போடு  - பாம்புடன் 

உடன் - ஒக்க, ஒருசேர, அப்பொழுதே; மூன்றாம்வேற்றுமையின்சொல்லுருபு.

உறைந்தற்று - உறைதல் - தோய்தல்; தங்குதல்; வாழ்தல்; ஒழுகுதல்; இறுகுதல்; செறிதல்; உறுதியாதல்.

அற்று - அத்தன்மையது; அதுபோன்றது; ஓர்உவமஉருபு; ஒருசாரியை.

பொருள்

உடம்பாடு -> உடன் பாடு -> மனப் பொருத்தம்.

இலாதவர் -> இல்லாதவர்.

வாழ்க்கை -> வாழும் வாழ்க்கையை குறிக்கிறது.

குடங்கருள் -> ஒரு குடிலினுள்; இது இடத்தின் சிறுமையை காண்பிக்கிறது.

பாம்போடு -> பாம்புடன்.

உடனுறைந் தற்று -> ஒவ்வொரு நொடியும் அச்சத்துடன் நடுங்கிக்கொண்டு உறைந்துபோய் செயலற்று வாழ நேரிடும்.

முழுப்பொருள்

மனப் பொருத்தம் இல்லாதவருடன் (இல்லாதவர்களுடன்) ஒற்று (ஒத்து) வாழக்கூடிய ஒருவரது வாழ்க்கை என்றென்பது ஒரு சிறிய குடிசைக்குள் பாம்புடன் ஒவ்வொரு நொடியும் மனதில் அச்சத்துடன் நடுங்கிக்கொண்டு உறைந்துபோய் செயலற்று வாழ நேரக்கூடிய வாழ்க்கையாகும். பாம்பு சற்று நகர்ந்தாலும் கடிக்கும். அதுபோல உட்பகைவர் நாம் சற்று சோர்ந்தாலும் நம்மை கொல்லுவர்.

ஏன் இங்கு செயலற்று இருக்கிறோம் என்றால் நாம் அவரை கடிவதை (திட்டிவதை) விட அமைதியாக இருப்பதே மேல் என்று எண்ணி மௌனமாக இருந்துவிடுவோம் என்றென்பதனால் கூறியிருக்கலாம். இதனை நாம் ஒரு பயிற்சியாகவே இறுதி வரை மேற்கொள்வோம். ஆதலால் இது மிகுந்த ஒரு வேதனையை அளிக்கும். ஆதலால் ”குறள் 301 செல்லிடத்துக் காப்பான் சினங்காப்பான் அல்லிடத்துக் காக்கின்என் காவாக்கால் என்” என்பதை நினைவில் கொள்க

ஒப்பு

இதற்கு ஒப்புவாக “இழிவுடை மூப்பு உரகதத்தின் துவ்வாது (39).” என்று முதுமொழிக்காஞ்சியில் கூறப்பட்டுள்ளது. 

ஒப்புமை

1) ”நாணார் பரியார் நயனில செய்தொழுகும் 

பேணா அறிவிலா மாக்களைப் பேணி

ஒழுக்கி அவரோ டுடனுறை செய்தல்

புழுப்பெய்து புண்பொதியு மாறு” (பழமொழி, 142)

2) “பாம்போடு ஒருகூரையிலே பயின்றாற்போல்” (பெரிய திருமொழி 11.8:3)

3) “பாம்புறையும் புற்றன்னார் புல்லறிவினார்” (நான்மணி. 56)

4) “தலைமை கருதும் தகையாரை வேந்தன்

நிலைமையான் நேர்செய் திருத்தல் - மலைமிசைக்

காம்பனுக்கு மென்தோளாய் அஃதாலவ் வோரறையுட்

பாம்போ டுடனுறையு மாறு” (பழமொழி 349)

5) “கவ்வர வதுவென இருத்திர் கற்பெனும்

அவ்வரம் பழித்துமை அகத்து ளேவைத்த

வெவ்வரம் பொருதவேல் அரசை வேரறுத்

திவ்வரங் கொண்டநீர் இனியென் கோடிரோ

வாழ்மனை புகுந்த தாண்டோர் மாசுணம் வரக்கண் டன்ன

கோளுறக் கொதித்து விம்மி யுழையரைக் கூவிச் சொன்னான்” (கம்ப - பள்ளியடை 75, மாரீசன் 164)

நன்றி: இலக்கிய ஒப்பாய்வு (சுட்டியைத் தட்டவும்)

பரிமேலழகர் உரை: 

உடம்பாடு இலாதவர் வாழ்க்கை-மனப் பொருத்தம் இல்லாதாரோடு கூட ஒருவன் வாழும் வாழ்க்கை; குடங்கருள் பாம்பொடு உடன் உறைந்தற்று - ஒரு குடிலுள்ளே பாம்போடு கூட உறைந்தாற் போலும். 

விளக்கம் : (’குடங்கம்’என்னும் வடசொல் திரிந்து நின்றது. இடச்சிறுமையானும் பயிற்சியானும் பாம்பாற் கோட்படல் ஒருதலையாம்; ஆகவே, அவ்வுவமையால் அவ்வுயிர்க்கு இறுதி வருதல் ஒருதலை என்பது பெற்றாம். [இதனான், கண்ணோடாதவரைக் கடிக என்பது கூறப்பட்டது].).

மணக்குடவர் உரை: 

மனத்தினால் பொருத்த மில்லாதாரோடு ஒத்து வாழும் வாழ்க்கை, ஒரு குடிலகத்தே பாம்போடு கூடி வாழ்ந்தாற் போலும். இது பாம்பு இடம் வந்தால் கடிக்கும்; அதுபோல உட்பகைவர் இடம் வந்தால் கொல்லுவரென்றது. 

சாலமன் பாப்பையா உரை

மனப்பொருத்தம் இல்லா‌தவரோடு சேர்ந்து வாழும் வாழ்க்கை, ஒரு குடிசைக்குள்ளே பாம்புடன் சேர்ந்து வாழ்வது போலாகும்.

English Meaning - As I taught a kid - Rajesh

Living with a person and regularly fighting with them (i.e., infighting, being in a toxic relationship) within a home or family or organization or business (irrespective of whether living under same house or not) is like living in a frozen/unmovable state in front of a snake inside a cave/pot. We cannot do much work in that. There won't be peace and productivity as we have to live with caution and fear. Infighting and toxic relationships are unhealthy

Questions that I ask to the kid

How to describe living in a toxic relationship?