Search This Blog

Disclaimar

This blog is totally for learning purposes. Non-commercial. In many of the posts, many snippets have been taken from various thirukkural blogs, books available online freely only for learning purpose without any intention of plagiarism or to make money. I have given due credit, link wherever possible. If you want your content to be removed, or you want more credit to be provided, please do let me know in the comment section of any of the posts. ஊருணி நீர்நிறைந் தற்றே உலகவாம் பேரறி வாளன் திரு (குறள் 215)

தாளாண்மை என்னும் தகைமைக்கண்

குறள் 613
தாளாண்மை என்னும் தகைமைக்கண் தங்கிற்றே
வேளாண்மை என்னுஞ் செருக்கு
[பொருட்பால், அரசியல், ஆள்வினையுடைமை]

பொருள்
தாளாண்மை - ஊக்கம்; விடாமுயற்சி

என்னும்  - யாவும், எல்லாம்; என்றுசொல்லப்படும்; யாதும்; சிறிதும்

தகைமைக் - தன்மை, தகுதி; பெருமை; பொறுமை; குணம்; மதிப்பு; அழகு; ஒழுங்கு; நிகழ்ச்சி.

கண் - விழி; கண்ணோட்டம்; பீலிக்கண்; கணு; மரக்கணு; தொளை; மூங்கில்முரசடிக்குமிடம்; மூட்டுவாய்; பெருமை; இடம்; ஏழனுருபு; அறிவு; பற்றுக்கோடு; உடம்பு; அசை; உடலூக்கம்.

தங்கிற்றே - தங்குதல் - வைகுதல்; உளதாதல்; அடக்குதல்; நிலைபெறுதல்; தணிதல்; தாமதப்படுதல்; தடைப்படுதல்; இருப்பாயிருத்தல்; அடியிற்படுதல்; சார்ந்திருத்தல்

வேளாண்மைபயிர்த்தொழில்; உதவிபுரிதல்; கொடை; உண்மை

என்னும் - யாவும், எல்லாம்; என்றுசொல்லப்படும்; யாதும்; சிறிதும்

செருக்கு - அகந்தை; மகிழ்ச்சி; ஆண்மை; மயக்கம்; செல்வம்; செல்லம்.

முழுப்பொருள்
தாளாண்மை எனப்படுகின்ற விடாமுயற்சி மிகுந்த உயரிய குணம். அத்தகையவரிடம் செருக்கு எனப்படுகின்ற வளம், செல்வம் ஆகியவை வந்து சேரும். முக்கியமாக பிறருக்கு உதவிட வேண்டும் என்னும் வேளாண்மை எனப்படுகிற கொடைத்தன்மை அவரிடம் நிலைத்துநிற்கும். அது அவருக்கு மகிழ்ச்சியை தரும். ஆக்கம் கொண்டவர்க்கே அடுத்தார்க்கு உதவுவது சாத்தியமாகும் என்பதினால் வேளாண்மைக்குத் தாளாண்மை அவசியமாகிறது.

சம்பந்தரும் ஆக்கூர் தாந்தோன்றி மாடத்தேவாரத்தில் (3), “வேளாளர் என்றவர்கள் வள்ளன்மையான் மிக்கிருக்கும் தாளாளர்” என்பர்.

"தாளாண்மை யில்லாதான் வேளாண்மை” (குறள் 614)

மேலும்: அஷோக் உரை

பரிமேலழகர் உரை
தாளாண்மை என்னும் தகைமைக்கண் தங்கிற்று - முயற்சி என்று சொல்லப்படுகின்ற உயர்ந்த குணத்தின்கண்ணே நிலை பெற்றது; வேளாண்மை என்னும் செருக்கு - எல்லார்க்கும் உபகாரம் செய்தல் என்னும் மேம்பாடு. (பொருள் கைகூடுதலான், உபகரித்தற்கு உரியார் முயற்சி உடையார் என்பார், அவ்வக் குணங்கள்மேல் வைத்தும், அது பிறர்மாட்டு இல்லை என்பார் 'தங்கிற்றே' என்றும் கூறினார். இவை மூன்று பாட்டானும் முயற்சியது சிறப்புக் கூறப்பட்டது.).

மணக்குடவர் உரை
முயற்சியாகிய நன்மையின்கண்ணே கிடந்தது: பிறர்க்கு உபகரித்தலாகிய பெருமிதம். இஃது அறஞ் செய்தலும் இதனாலே யாகுமென்றது.


மு.வரதராசனார் உரை
பிறர்க்கு உதவிசெய்தல் என்னும் மேம்பட்ட நிலைமை முயற்சி என்று சொல்லப்படுகின்ற உயர்ந்த பண்பில் நிலைத்திருக்கின்றது.

சாலமன் பாப்பையா உரை
முயற்சி எனப்படும் உயர்ந்த குணத்தில்தான் பிறர்க்கு உதவுதல் என்னும் மேன்மை, நிலைபெற்றிருக்கிறது.

மடிமடிக் கொண்டொழுகும் பேதை

குறள் 603
மடிமடிக் கொண்டொழுகும் பேதை பிறந்த
குடிமடியும் தன்னினும் முந்து
[பொருட்பால், அரசியல், மடியின்மை]

பொருள்
மடி - மடங்குகை; வயிற்றுமடிப்பு; வயிறு; அரை; மடித்ததொடையின்மேற்பாகம்; ஆடை; தாள்முதலியவற்றின்மடிப்பு; பைபோன்றமுந்திச்சுருக்கு; வலைவகை; பசுமுதலியவற்றின்முலையிடம்; அடக்கம்; தனிமை; சோம்பல்; சோம்பலுடையவன்; நோய்; மீன்வலையோடுசேர்ந்தபெரும்பை; கேடு; பகை; பொய்; தீநாற்றம்; ஆடைவகை; தீட்டில்லாநிலை; இரட்டைக்கட்டுமரம்; சோறு; தாழை; தாழைவிழுது; மடங்கு.

மடிக் - மடங்குகை; வயிற்றுமடிப்பு; வயிறு; அரை; மடித்ததொடையின்மேற்பாகம்; ஆடை; தாள்முதலியவற்றின்மடிப்பு; பைபோன்றமுந்திச்சுருக்கு; வலைவகை; பசுமுதலியவற்றின்முலையிடம்; அடக்கம்; தனிமை; சோம்பல்; சோம்பலுடையவன்; நோய்; மீன்வலையோடுசேர்ந்தபெரும்பை; கேடு; பகை; பொய்; தீநாற்றம்; ஆடைவகை; தீட்டில்லாநிலை; இரட்டைக்கட்டுமரம்; சோறு; தாழை; தாழைவிழுது; மடங்கு.

கொண்டு - முதல்; குறித்து; மூன்றாம்வேற்றுமைச்சொல்லுருபு; ஓர்அசைநிலை.

ஒழுகும் - ஒழுகுதல் - நீர்பாய்தல்; நீர்ப்பொருள்சொட்டுதல்; ஓடுதல்; பரத்தல்; ஒழுங்குபடுதல்; நடத்தல்; நீளுதல்; வளர்தல்; போதல்; பெருகியோடுதல்.

பேதை - அறிவிலி; பெண்; பாலைநிலப்பெண்; ஐந்துவயதுமுதல்ஏழுவயதுவரையுள்ளபருவத்துப்பெண்; வறிஞன்; அலி; கள்.

பிறந்த - பிறவி; பிறப்பு; பாவம்; துன்பம்; பிறந்தகம்; இயல்பு.

குடி - பருகுகை; மதுபானம்; மதுவுண்டமயக்கம்; புருவம்; குடியானவன்; குடியிருப்போன்; ஆட்சிக்குட்பட்டகுடிகள்; குடும்பம்; குலம்; வீடு; ஊர்; வாழிடம்.

மடியும் - மடிதல் - மடங்குதல்; நுனிமழுங்குதல்; தலைசாய்தல்; வீழ்தல்; வாடுதல்; சுருளுதல்; முயற்சிஅறுதல்; தூங்குதல்; சுருங்குதல்; ஊக்கங்குறைதல்; அழிதல்; சாதல்; தானியங்கேடுறுதல்; திரண்டுசெல்லுதல்; கொப்புளம்உடைதல்; மறத்தல்.

தன் - தான்என்னும்சொல்வேற்றுமையுருபைஏற்குமிடத்துப்பெறும்திரிபு.
இனும் - இன்னும் - இவ்வளவுகாலம்சென்றும்; மறுபடியும் மேலும் அன்றியும்

முந்து - முற்காலம்; ஆதி; முன்பு; வெண்ணாரை.

முழுப்பொருள்
சோம்பல் எனப்படுவது ஒரு நோய். அது அழிவையே தரும். அத்தகைய சோம்பலை தன்னுள்ளே வைத்துக்கொண்டு வாழ்க்கையை கடக்கும் ஒருவன் பேதை. அறிவில்லாதவன். பொறுப்பற்றவன். இந்த சோம்பலினால் அனைத்தையும் (தன்நம்பிக்கை, செல்வம், உறவுகள், உடல் ஆரோக்கியம்,  உற்சாகம், சான்றோர் உறவுகள், நண்பர்கள்) இழப்பான். இவனுடைய சோம்பலினால்/இவனால் இவன் பிறந்த குடும்பமானது இவனுக்கு முன்பே அழிந்துவிடும். அதவாது இவனால் தன் குடும்பம் அழிந்துக்கொண்டு இருக்கிறது என்று கூட உணர்ந்துக்கொள்ள முடியாத அளவுக்கு அவன் சோம்பித்திரிகிறான். சோம்பல் அவ்வளவு கொடியது. ஆதலால் சோம்பலை விட்டுவிடுங்கள் என்று சொல்லாமல் சொல்கிறார் திருவள்ளுவர்.

மேலும்: அஷோக் உரை

செயல்கள் உடலால் மட்டும் ஆற்றப்படுவதில்லை. மூடிய பேழைக்குள் வைரம் ஒளிவிளையாடிக்கொண்டிருக்கிறது. உடற்குடத்திற்குள் இதயம் புரவியெனப் பாய்ந்து செல்கிறது. செயலை அஞ்சி செயலின்மையை விரும்பி ஐம்புலன்களை அடக்கி உள்ளத்தால் அனைத்தையும் இயற்றுபவனை பொய்யொழுக்கம் கொண்டவன் என்றே சொல்லவேண்டும். நிழல்கண்டு காமம் கொள்ளினும் உவகையும் துயரும் நிகரே.

கவிஞர் விக்ரமாதித்யன் - இன் ஒரு கவிதை
##வியாழக்கிழமையைத் தொலைத்தவன் 
இந்த வாரத்தில் 
வியாழக்கிழமையை தொலைத்துவிட்டான் அமர் போன வாரத்தில் 
இப்படித்தான் 
செவ்வாய்க்கிழமையைக் கெட்டுப்போக்கிவிட்டான் 
அதற்கு(ம்) முந்தைய வாரம் 
ஏதோ ஒரு நாள் (ஞாபகமில்லை)
எத்தனையோ நாள்களை 
இதுபோலத் தொலைத்திருக்கிறான்தான்

வியாழக்கிழமையைத் தொலைத்துவிட்டு
வெள்ளிக்கிழமையில் ஈடுகட்டமுடியாது
வேறு எந்த நாளிலும்கூட 
சரிசெய்ய இயலாது 
அன்று எவ்வளவு வேலைகள் 
நின்றுவிட்டன 
நித்ய பூஜை 
தவறிப்போயிற்று 
தென்முகக் கடவுளுக்கு மந்திரம் சொல்வது விடுபட்டுப்போயிற்று 
ஸ்ரீசோட்டாணிக்கரை பகவதித்தாயை பட்டினிபோடும்படி ஆயிற்று 
பல் தேய்க்கவில்லை 
குளிக்கவில்லை 
சாப்பிடவில்லை
தபால் பார்க்கவில்லை 
நல்லதண்ணீர் பிடித்துக் கொடுக்கவில்லை 
அடித்துப்போட்ட மாதிரி தூங்கியிருக்கிறான் 
அந்திப் பொழுதை 
அதிகாலையென மயங்கியிருக்கிறான் 

வியாழக்கிழமை நிச்சயம்
வருத்தப்பட்டிருக்கும் 
இன்றைக்காவது தெளிந்துவந்துவிட்டானே
என்று வெள்ளிக்கிழமை சந்தோஷப்பட்டிருக்கும் 
வரும் வாரம் 
என்ன கிழமையைத் தொலைக்கப்போகிறானோ 
தொலைத்தநாள்களிடம் மன்னிப்புக்கேட்டும் 
தீரவில்லை அமர்க்கு
நாள்களைத் தொலைப்பவனை 
யார்தான் காப்பாற்றுவது
--விக்ரமாதித்யன் 


பரிமேலழகர் உரை
மடி மடிக்கொண்டு ஒழுகும் பேதை பிறந்த குடி - விடத்தகுவதாய மடியைத் தன்னுள்ளே கொண்டு ஒழுகும் அறிவில்லாதான் பிறந்த குடி; தன்னினும் முந்து மடியும் - அவன் தன்னினும் முந்துற அழியும்.
(அழிவு தருவதனை அகத்தே கொண்டு ஒழுகுதலின் 'பேதை' என்றும்; அவனால் புறம் தரப்படுவதாகலின் 'குடி தன்னினும் முந்துற அழியும'¢ என்றும் கூறினார். ஆக்கத்திற் பிற்படினும் அழிவில் முற்படும் என்பதாம்.).

மணக்குடவர் உரை
நெஞ்சத்து மடியினாலே வினையின்கண் மடித்தலைச் செய்து ஒழுகாநின்ற அறிவிலி பிறந்தகுடி தனக்கு முன்பே கெடும்.

சோம்புடையார்க்கு உளதாகுங் குற்றம் என்னையென்றார்க்கு இது கூறப்பட்டது.

மு.வரதராசனார் உரை
அழிக்கும் இயல்புடைய சோம்பலைத் தன்னிடம் கொண்டு நடக்கும் அறிவவில்லாதவன் பிறந்த குடி அவனுக்கு முன் அழிந்துவிடும்.

சாலமன் பாப்பையா உரை
விட்டுவிட வேண்டிய சோம்பலைத் தனக்குள்ளே கொண்டு வாழும் அறிவற்றவன் பிறந்த குடும்பம் அவனுக்கும் முன்பே அழிந்துவிடும்.

வினைசெய்வார் தம்சுற்றம் வேண்டாதார்

குறள் 584
வினைசெய்வார் தம்சுற்றம் வேண்டாதார் என்றாங்கு
அனைவரையும் ஆராய்வது ஒற்று
[பொருட்பால், அரசியல், ஒற்றாடல்]
(For meaning in English, scroll to the bottom of this post)

பொருள்
வினை - தொழில்; நல்வினைதீவினைஎனஇருவகைப்பட்டமுன்னைவினை; வினைச்சொல்; செய்தற்குரியது; பரிகாரச்செயல்; முயற்சி; போர்; வஞ்சகம்; தந்திரம்; கருத்து; தொந்தரவு; சீழ்; இரண்டைக்குறிக்கும்குழூஉக்குறி.

செய்வார் - செயலை செய்பவர் / நடத்துபவர்

தம் - தன்னுடைய

சுற்றம் - உறவினரர்; பரிவாரம்; அரசர்க்குரியதுணையில்ஒன்று; கூட்டம்; ஆயத்தார்.

வேண்டாதார் - விரும்பாதவராய்

என்று - எந்தநாள், எப்போது, என்றைக்கு; என்றுசொல்லி; ஓர்இடைச்சொல்; சூரியன்.

ஆங்கு - அவ்விடம்; அக்காலத்தில்; அப்படி ஓர்உவமஉருபு; ஏழன்உருபு; ஓர்அசைநிலை.

அனைவரையும் - எல்லாரும்

ஆராய்வது - சோதித்தல்; சூழ்தல் தேடுதல் சுருதிசேர்த்தல்

ஒற்று - மெய்யெழுத்து; தூது; தூதன்; வேவு; வேவுகாரன்; ஒற்றடம்.

முழுப்பொருள்
ஒரு அரசன் எவற்றையெல்லாம் ஒற்றரைக்கொண்டு ஒற்றாட வேண்டும் ?

1. வினைசெய்வார் - செயல்களை செய்கின்ற அமைச்சர் (மற்றும் அமைச்சரின் கீழ் உள்ளவர்கள். அவர்களின் நடவடிக்கைகள்). இது அமைச்சர்கள் அரசருக்கு எதிராக செய்கிறாரா இல்லையா என்று தெரிந்துக்கொள்ள உதவும். அதுபோல அமைச்சர்கள் அவர்களுடைய வேலைகளை செவ்வென செய்கிறார்களா என்பதை தெரிந்துக்கொள்ளவும் உதவும்.

2. தம்சுற்றம்  - அரசரின் சுற்றத்தில் உள்ளவர்கள்.

3. தம்சுற்றம் - நாட்டின் சுற்றத்தில் உள்ள நாடுகள் (அந்நாட்டின் அரசர், அமைச்சர்கள், நடவடிக்கைகள்)

4. வேண்டாதார் - அரசரையும் நாட்டையும் விரும்பாத பகைவர்கள்

மேற்சொன்ன நால்வர் என்று அவ்விடம் அனைவரையும் ஆராய்வதே ஒற்றர்கள் வேலை. ஆராய்வது என்றால் ஒரு குழுவாக மற்றவர்களைத் தேடி  சூழ்ந்து அவர்களையும் அவர்களுடைய நடவடிக்கைகளையும் சோதிப்பது என்றுப்பொருள்.

மேலும் ஒற்றுத் தொழிலில் ஈடுபடுபவர்கள், சிலரைத் தமக்கு உற்ற சுற்றம் போன்றும், மற்றவர்களை நமக்கு வேண்டாதவர்கள் என்றுமில்லாமல் அனைவரையும் ஒன்றுபோல ஆராய்ந்து தகவல்களைப் பெறுவதே அவர்கள் செய்யும் ஒற்றுத் தொழிலுக்கு அழகாகும். அத்தகையவர்களே ஒற்றர்களாவார்கள் என்பதையும் நாம் இங்கு அறியலாம்.

மேலும்: அஷோக் உரை

பரிமேலழகர் உரை
தம் வினை செய்வார் சுற்றம் வேண்டாதார் என்ற அனைவரையும் ஆராய்வது - தம் காரியம் செய்வார் சுற்றத்தார், பகைவர் என்று சொல்லப்பட்ட அனைவரையும் சொல் செயல்களான் ஆராய்வானே; ஒற்று - ஒற்றனாவான்.
('தம்' என்றது, அரசனோடு உளப்படுத்தி. அவனுக்குக்காரியம் செய்வார் செய்வனவும், சுற்றத்தார் தன்னிடத்தும் நாட்டிடத்தும் செய்வனவும், பகைவர் தன் அற்றம் ஆராய்தலும் மேல் தேறப்படுதலும் முன்னிட்டுத் தன்னிடத்துச் செய்வனவும்அறிந்து, அவற்றிற்கு ஏற்றன செய்ய வேண்டுதலின், இம்மூவகையாரையும்எஞ்சாமல் ஆராய வேண்டும் என்பார், 'அனைவரையும்ஆராய்வது ஒற்று' என்றார்.).

மணக்குடவர் உரை
தமக்குக் காரியமானவற்றைப் பார்த்துச் செய்வாரும் தமக்குச் சுற்றமாயிருப்பாரும் தம்மை வேண்டாதிருப்பாருமாகிய அனைவரையும் ஆராய்ந்தறிவான் ஒற்றனாவன். இவையிரண்டும் ஒற்றவேண்டுமிடங் கூறின.

மு.வரதராசனார் உரை
தம்முடைய தொழிலைச் செய்கின்றவர், தம் சுற்றத்தார், தம் பகைவர் என்றுக்கூறப்படும் எல்லாரையும் ஆராய்வதே ஒற்றரின் தொழிலாகும்.

சாலமன் பாப்பையா உரை
அரசுப் பணியாளர், ஆளும் கட்சி, அதன் எதிர்கட்சியினர், அயலவர் என்று அனைவரின் சொல், செயல் கொண்டு அவர்தம் மனக்கருத்தை அறிபவரே ஒற்றர்.

English Meaning - As I taught a kid - Rajesh
A king should spy on the following people without any confirmation bias and gather information 1) வினைசெய்வார்  - People who do the work especially ministers, other key in charges etc. 2) தம்சுற்றம்  - People close to him, friends, relatives, confidants etc. 3) தம்சுற்றம் - neighboring countries 4) வேண்டாதார்  - enemies, opponent countries . This spying is essential for efficiency of the systems and to prevent any major disaster, war, bribe, corruption, betrayal etc. 

Questions that I ask to the kid
On whom or How should espionage be implemented? Why is espionage important to a country/kingdom?

பண்என்னாம் பாடற்கு இயைபின்றேல்

குறள் 573
பண்என்னாம் பாடற்கு இயைபின்றேல் கண்என்னாம்
கண்ணோட்டம் இல்லாத கண்
[பொருட்பால், அரசியல், கண்ணோட்டம்]

பொருள்
பண் - இசை; இசைப்பாட்டு; ஏழுசுரமுள்ளஇசை; யாழ்முதலியநரம்புக்கருவிகள்; பருவம்; குதிரைக்கலணை; அலங்காரம்; கூத்துவகை; ஓசை; யானைகுதிரைகளுக்குச்செய்யும்அலங்காரம்; தேருக்குச்செய்யும்அலங்காரம்; தகுதி; அமைவு; மரக்கலத்தின்இடப்புறம்; வயல்; தொண்டு; நீர்நிலை; தோணியின்இடப்பக்கப்பாய்மரக்கயிறு.

என் - என்ன; வினாவினைக்குறிப்பு; ஐயக்கிளவி; இகழ்ச்சிக்குறிப்பு; 'எது'அல்லது'எதை'எனப்பொருள்படும்இடைச்சொல்; தன்மைஒருமைச்சொல்; யான்என்பதுவேற்றுமைப்பொருளில்அடையும்திரிபு; ஓர்அசைச்சொல்.

ஆம் - நீர்; ஈரம் வீடு மாமரம் அழகு சம்மதங்காட்டும்சொல்; கேள்விப்பட்டதைக்குறிக்கும்சொல்; இகழ்ச்சிக்குறிப்பு; அனுமதி, தகுதி, ஊக்கம்குறிக்கும்சொல்; ஆவது ஆகிய சாரியை அசைநிலை தன்மைப்பன்மைவிகுதி; உளப்பாட்டுத்தன்மைப்பன்மைவிகுதி.

பாடற்கு - பாடுவதற்கு

இயைபு - சேர்க்கை; பொருத்தம் தொடர்ச்சி 'இதுகேட்டபின்இதுகேட்கத்தக்கது'என்னும்யாப்பு; இயைபுத்தொடை நூல்வனப்புள்ஒன்று.

இன்றேல்? - இல்லை என்றால்

கண் - விழி; கண்ணோட்டம்; பீலிக்கண்; கணு; மரக்கணு; தொளை; மூங்கில்முரசடிக்குமிடம்; மூட்டுவாய்; பெருமை; இடம்; ஏழனுருபு; அறிவு; பற்றுக்கோடு; உடம்பு; அசை; உடலூக்கம்.

என் - என்ன; வினாவினைக்குறிப்பு; ஐயக்கிளவி; இகழ்ச்சிக்குறிப்பு; 'எது'அல்லது'எதை'எனப்பொருள்படும்இடைச்சொல்; தன்மைஒருமைச்சொல்; யான்என்பதுவேற்றுமைப்பொருளில்அடையும்திரிபு; ஓர்அசைச்சொல்.

ஆம் - நீர்; ஈரம் வீடு மாமரம் அழகு சம்மதங்காட்டும்சொல்; கேள்விப்பட்டதைக்குறிக்கும்சொல்; இகழ்ச்சிக்குறிப்பு; அனுமதி, தகுதி, ஊக்கம்குறிக்கும்சொல்; ஆவது ஆகிய சாரியை அசைநிலை தன்மைப்பன்மைவிகுதி; உளப்பாட்டுத்தன்மைப்பன்மைவிகுதி.

கண்ணோட்டம் - கண்பார்வை; இரக்கம், கடைக்கண்பார்வை, அருள்காட்டுதல்; பார்வையிடுதல்.

இல்லாத - இல்லாத்தனம் - illā-t-taṉam   * n. இல்² +.Poverty, destitution; தரித்திரம் Colloq.
இல்லாததும்பொல்லாததும் illāta-tum-pollātatum, n. id. +. Falsehood andslander; பொய்யும் தீங்குவிளைப்பதும். Colloq.  ; வறுமை

கண்? - விழி; கண்ணோட்டம்; பீலிக்கண்; கணு; மரக்கணு; தொளை; மூங்கில்முரசடிக்குமிடம்; மூட்டுவாய்; பெருமை; இடம்; ஏழனுருபு; அறிவு; பற்றுக்கோடு; உடம்பு; அசை; உடலூக்கம்.

முழுப்பொருள்
ஒரு பாடலுக்கு பண்/ஸ்ருதி/ராகம் சேரவில்லையென்றால் அந்த பாடலால்/பாட்டினால் பிறருக்கு என்ன பயன்?  அந்த பாட்டை தான் மட்டுமே தன்னுடைய வீட்டிற்குள்ளே தனக்குமட்டுமே பாடிக்கொள்ள வேண்டும். பிறருக்கு பயன் பெறாது ஏனெனில் அது வெறும் ஓசை இசை அல்ல. பண் சேராத பாடல் பிறருக்கு நாராசமாகவே ஒலிக்கும் அவ்விடத்தைவிட்டு விலகுவர்.  

அதுப்போல பிறர்மேல் கண்ணோட்டம் (எனப்படும் அன்பு, பரிவு, அருள், கருணை, இரக்கம் ஆகியவை) இல்லை என்றால் அந்த கண் இருந்து என்ன பயன்? அது கண்ணே அல்ல என்று கூறுகிறார் திருவள்ளுவர். அவர்களைவிட்டும் மக்கள் விலகுவர்.  

கல்வி கற்கவில்லை என்றால் கண்ணிரண்டும் புண் என்று முன்பு கல்லாமை அதிகாரத்தில் கூறியிருந்தார் திருவள்ளுவர். இப்பொழுது கண்ணோட்டம் இல்லை என்றால் அது கண்ணே அல்ல என்கிறார். ஆதலால் ஒருவருக்கு கண் இருந்தால் அவர் கற்றுணர்ந்து அறிவும் மட்டும் பெற்றால் போதாது பிறர் மேல் கண்ணோட்டத்துடனும் இருக்க வேண்டும் என்பதை நாம் விளங்கிக்கொள்ளலாம். 

மேலும்
இக்குறளில் “இராகம்” என்று இன்னாளில் வழங்கிவருகிற “பண்” என்பதற்கு முறையான சுரச்சேர்க்கை வேண்டுமென்கிற நுட்பமான செய்தியைச் சொல்லி, இசையிலே தன் நுண்ணறிவையும் வெளிப்படுத்துகிறார். சுரங்கள் அளவையில் பன்னிரண்டு, இருபத்திரண்டு என்று பல வேறு ஆய்வாளர்களின் கருத்துபடி இருந்தாலும், ஏழு சுரங்களான ஷட்ஜம், ரிஷபம், காந்தாரம், மத்யமம், பஞ்சமம், தைவதம், நிஷாதம் என்ற சுரங்கள் (இவை தமிழிசையில், முறையே குரல், துத்தம், கைக்கிளை, உழை, இளி, விளரி, தாரம் எனப்படும்) முறையாக சேரவில்லையானால், இசையென்ற நிலை மாறி ஓசையென்றாகி விடும்.

இதையே எடுத்துக்காட்டாகச் சொல்லி அருட்பார்வையில்லாத கண்ணினைக் கொண்ட ஆள்வோனின் ஆட்சியென்பது ஓசையைப் போன்று ஒழுங்குமுறையற்றது என்பதை நுணுக்கமாகக் கூறுகிறார். 

மேலும்: அஷோக் உரை


பரிமேலழகர் உரை
பண் என்னாம் பாடற்கு இயைபு இன்றேல் - பண் என்ன பயத்ததாம் பாடல் தொழிலோடு பொருத்தமின்றாயின்; கண் என்னாம் கண்ணோட்டம் இல்லாத கண் - அதுபோலக் கண் என்ன பயத்ததாம் கண்ணோட்டமில்லாத இடத்து.
('பண்', 'கண்' என்பன சாதிப்பெயர், பண்களாவன: பாலையாழ் முதலிய நூற்றுமூன்று. பாடல் தொழில்களாவன: யாழின்கண் வார்தல் முதலிய எட்டும், பண்ணல் முதலிய எட்டும், மிடற்றின்கண் எடுத்தல், படுத்தல், நலிதல், கம்பிதம், குடிலம் என்னும் ஐந்தும், பெருவண்ணம், இடை வண்ணம், வனப்பு வண்ணம் முதலிய வண்ணங்கள் எழுபத்தாறுமாம். இவற்றோடு இயையாதவழிப் பண்ணால் பயன் இல்லாதவாறுபோலக் கண்ணோட்டத்து இயையாத வழிக் கண்ணால் பயனில்லை என்பதாம். கண் சென்ற வழி நிகழ்தல் பற்றி அதனை இடமாக்கினார். இறுதிக்கண் 'கண்' என்பதனைக் 'கண்ணகல் ஞாலம்' (திரிகடுகம் 1) என்புழிப் போலக் கொள்க.).

மணக்குடவர் உரை
பண் என்ன பயனுடைத்தாம், பாடலொடு பொருந்தாதாயின். அதுபோலக் கண் என்ன பயனுடைத்தாம், கண்ணோட்ட மில்லாத காலத்து. இது பிறர்க்கும் இன்பம் பயவாதென்றது.

மு.வரதராசனார் உரை
பாடலோடு பொருந்துதல் இல்லையானால் இசை என்ன பயனுடையதாகும், அதுபோல் கண்ணோட்டம் இல்லாவிட்டால் கண் என்ன பயனுடையதாகும்.

சாலமன் பாப்பையா உரை
பாடப்படும் பாடலுக்குப் பொருந்தவில்லை என்றால் ராகத்தால் என்ன பயன்? அதுபோல கண்ணோட்டம் இல்லை என்றால் கண்ணால்தான் என்ன பயன்?.

வெருவந்த செய்தொழுகும் வெங்கோல

குறள் 563
வெருவந்த செய்தொழுகும் வெங்கோல னாயின்
ஒருவந்தம் ஒல்லைக் கெடும்
[பொருட்பால், அரசியல், வெருவந்தசெய்யாமை ]

பொருள்
வெருவந்தம் - அச்சம்.
வெருவந்தசெய்யாமை - வெருவந்த செய்யாமை அதிகாரம், ஆள்வோர் தாமும், தம்முடைய அமைச்சர்களும், குடிமக்களும் அஞ்சும்படியான எண்ணங்கள் கொள்ளாமையும், செயல்கள் செய்யாமையும்பற்றி கூறுகிறது

செய்து - செய்தல் - இயற்றுதல்; உண்டாக்கல்; சம்பாதித்தல்; ஒத்தல்.

ஒழுகும் - ஒழுகுதல் - நீர்பாய்தல்; நீர்ப்பொருள்சொட்டுதல்; ஓடுதல்; பரத்தல்; ஒழுங்குபடுதல்; நடத்தல்; நீளுதல்; வளர்தல்; போதல்; பெருகியோடுதல்.

வெ - ve   adj. Hot, warm, harsh, hard, severe, cruel, used in combination. It is the ra dical of many words, as வெங்களம், a battle field; வெந்நீர், hot water; வெயில், the heat of the sun, &c.

வெங்கோலன் - கொடுமையான அரசன் 

ஆயின் - ஆனால்; ஆராயின்.

ஒருவந்தம் - உறுதி; ஒருதலை; நிலைபேறு; சம்பந்தம்; ஒற்றுமை; தனியிடம்.

ஒல்லைக் - விரைவு; வேகம்; காலவிரைவு; சீக்கிரம்; பழைமை; தொந்தரவு.

கெடும் - கெடுதல் - அழிதல்; பழுதாதல்; வறுமையடைதல்; ஒழுக்கங்கெடுதல்; உருவழித்தல்; தோற்றோடுதல்; விபத்து; தீங்கு; விகாரத்தால்எழுத்துக்கெடுதல்; வழிதவறிப்போதல்.

முழுப்பொருள்
எல்லோரும் அச்சப்படும் அளவிற்கு ஒரு ஆட்சியை ஒரு அரசன் நடத்துவான் என்றால் அவனுடைய நாட்டின் நிலைத்தன்மை உறுதித்தன்மை ஒற்றுமை ஆகியவை மிக விரைவாக அழியும். அந்த ஆட்சியும் அழியும்/மாறும்.  அத்தகைய அரசன் ஒரு கொடுமையான அரசனாகவே கருதப்படுவான்.

சொந்தநாட்டு மக்களை சீரும் சிறப்புமாக வாழவைத்து பிற நாட்டுமக்களுக்கு அச்சத்தை தருவான் என்றால் அந்த அரசன் கொடிய அரசனாகவே கருதப்படுவான்.

அதேப்போல் சொந்த நாட்டுமக்களே அந்த அரசனின் நடவடிக்கைகளை கண்டு அச்சப்படுவார்கள் என்றால் அந்த அரசனும் கொடிய அசனாகவே கருதப்படுவான். 

மேலும்: அஷோக் உரை


பரிமேலழகர் உரை
வெருவந்த செய்து ஒழுகும் வெங்கோலன் ஆயின் - குடிகள் வெருவிய செயல்களைச் செய்து நடக்கும் வெங்கோலனாம் ஆயின்; ஒருவந்தம் ஒல்லைக் கெடும் - அரசன் ஒருதலையாகக் கடிதில் கெடும்.
(வெங்கோலன் என்பது ஈண்டு வாளா பெயராய் நின்றது. 'ஒருவந்தம், ஒருதலை, ஏகாந்தம்' என்பன ஒருபொருட்கிளவி. அச்செயல்களும் கேடுகளும் முன்னர்க் கூறப்படும்.).

மணக்குடவர் உரை
அரசன் அஞ்சத்தகுவனவற்றைச் செய்தொழுகும் வெங்கோலையுடையனாயின் அவன் ஒருதலையாகக் கடிதிற் கெடும்.

மு.வரதராசனார் உரை
குடிகள் அஞ்சும் படியான கொடுமைகளைச் செய்து ஆளும் கொடுங்கோல் அரசனானால், அவன் திண்ணமாக விரைவில் கெடுவான்.

சாலமன் பாப்பையா உரை
குடிமக்கள் அஞ்சும்படியாகச் செயல் செய்யும் கொடிய ஆட்சி விரைந்து அழிவது உறுதி.