Search This Blog

Disclaimar

This blog is totally for learning purposes. Non-commercial. In many of the posts, many snippets have been taken from various thirukkural blogs, books available online freely only for learning purpose without any intention of plagiarism or to make money. I have given due credit, link wherever possible. If you want your content to be removed, or you want more credit to be provided, please do let me know in the comment section of any of the posts. ஊருணி நீர்நிறைந் தற்றே உலகவாம் பேரறி வாளன் திரு (குறள் 215)

புணர்ச்சி பழகுதல் வேண்டா உணர்ச்சிதான்

குறள் 785
புணர்ச்சி பழகுதல் வேண்டா உணர்ச்சிதான்
நட்பாங் கிழமை தரும்
[பொருட்பால், நட்பியல், நட்பு]

பொருள்
புணர்ச்சி - சேர்க்கை; ஒரேநாட்டார்ஆதல்; கலவி; எழுத்துமுதலியவற்றின்சந்தி; முன்பின்தொடர்பு; அணிகலன்.

பழகுதல் - பயிலுதல்; உறவுகொள்ளுதல்; பதப்படுதல்; சாதுவாதல்; இணக்கமாதல்; ஊடாடுதல்; நாட்படுதல்.

வேண்டா - வேண்டாம் - vēṇṭām   veeNTaam வேண்டாம் do not want; should not 

உணர்ச்சிதான் -உணர்ச்சி - உணர்வு; அறிவு மனம்

நட்பு - சிநேகம்; உறவு; சுற்றம்; நண்பன்; யாழின்நாலாம்நரம்பு; காதல்; அரசாங்கம்ஆறனுள்ஒன்றாகியநட்பரசர்; கையூட்டு; மாற்றரசரோடுநட்புச்செய்கை

ஆம் -  நீர்; ஈரம் வீடு மாமரம் அழகு சம்மதங்காட்டும்சொல்; கேள்விப்பட்டதைக்குறிக்கும்சொல்; இகழ்ச்சிக்குறிப்பு; அனுமதி, தகுதி, ஊக்கம்குறிக்கும்சொல்; ஆவது ஆகிய சாரியை அசைநிலை தன்மைப்பன்மைவிகுதி; உளப்பாட்டுத்தன்மைப்பன்மைவிகுதி.

கிழமை  - உரிமை; உறவு; நட்பு; ஆறாம்வேற்றுமைப்பொருள்; குணம்; வாரநாள்; முதுமை.

தரும் -  கொடுக்கும் 

முழுப்பொருள்
நட்பென்பது ஒருவரோடு ஒருவர் சேர்ந்து இருப்பதோ அல்லது நேரில் கூடி குலாவுவதோ அல்லது தொலைபேசிகளில் பல மணிநேரங்கள் அரட்டை அடிப்பதோ இல்லை.  உள்ளத்தால் ஒத்து இருப்பதே மெய்யான அடித்தளமாய் அமைந்து சிறந்த/அழகான நட்பாய் விளங்கும். இங்கே வள்ளுவர் மனதையே அடித்தளமாக கூறுகிறார். அறிவை அல்ல. 

ஏனெனில் அறிவு தனக்கு வரும் பயன்களை எண்ணியே உறவுகளை பேணும். உதாரணமாக வீட்டில் ஒருவர் செடிகளை வளர்க்கிறார் என்றால் அவர் பெரும்பாலும் அலங்காரத்திற்காக பூ வகை செடிகளையும் கொடிகளையும், சமையலுக்காக காய்கறிகளையும், கனிகளுக்காக மரங்களையும், நடப்பதற்காக புல் தரையையும் என்று ஏதோ ஒருவித பயனுக்காகவே செடிகளை வளர்ப்பார். ஆதலால் பயன் எண்ணி உறவுகளிடம் பழக வேண்டா. 

இக்குறள் நண்பர்களுக்கு மட்டும் அல்ல. நமது குருதிச்சுற்றத்திற்கும் (blood relation), அலுவல் நண்பர்களுக்கும், வணிக பங்குதாரர்களுக்கும் என்று உறவுகள் உள்ள எல்லாவற்றிற்கும் பொருந்தும். உதாரணமாக அலுவலிலும் வணிகத்திலும் லாப நஷ்டங்கள் சகஜம். ஆனால் ஒரு வர்த்தகத்தில் ஒருவருக்கு லாபம் இல்லையெனில் அல்லது நஷ்டம் ஏற்பட்டாலோ உறவை முறித்துக்கொள்வது தவறு. ஆங்கிலத்தில் ஒன்று கூறுவர் business (வணிகம்) என்ற ஒரு சொல்லுக்கு பிறகு ஒரு வார்த்தையை போடுவாய் என்றால் எதனை போடுவாய் ? அதற்கு பதில் relationship (உறவு)  profit (லாபம்) அல்ல. 

மேற்கு நாடுகளில் (இன்று இந்தியாவில் கூட) உள்ள dating நடைமுறையில் உள்ள சிக்கலே அடிப்படை வசதிகளை தாண்டி பயனை எதிர்பார்த்து அமையும் பல உறவுகளால் தான். ஆதலால் இக்குறள் காதலர்களுக்கும் கணவன் மனைவிக்கு கூட பொருந்தும் என்றே எனக்கு தோன்றுகிறது. 

புறநானூற்றுப் பாடலொன்றின் வரிகள் (216) அறிவாலும், பண்பாலும் உயர்ந்து ஒத்த கருத்துடையோரது நட்பை இவ்வாறு காட்டுகிறது. பிசிராந்தையார் தன்னைக் காண வருவாரோ அல்லது வரமாட்டாரோ என்று தன் அருகில் இருக்கும் சான்றோர்கள் சந்தேகப்படுவதை உணர்ந்த கோப்பெருஞ்சோழன், ”அவர் நிச்சயமாக வருவார்; அவருக்கு ஒரு இடம் ஒதுக்கி வையுங்கள்” என்று இப்பாடலில் குறிப்பிடுகிறான்.

“கேட்டல் மாத்திரை அல்லது யாவதும்
காண்டல் இல்லாது யாண்டுபல கழிய
வழுவின்று பழகிய கிழமையர் ஆயினும்
அரிதே தோன்றல்! அதற்பட ஒழுக”லென்று
ஐயம் கொள்ளன்மின்; ஆரறி வாளிர்!
இகழ்விலன்; இனியன்; யாத்த நண்பினன்;
புகழ்கெட வரூஉம் பொய்வேண் டலனே;
தன்பெயர் கிளக்கும் காலை ‘என் பெயர்
பேதைச் சோழன்’ என்னும் சிறந்த
காதற் கிழமையும் உடையவன்; அதன் தலை
இன்னதோர் காலை நில்லலன்;
இன்னே வருகுவன்; ஒழிக்கஅவற்கு இடமே!” (புறநா.216:1-3)

கம்பராமாயணத்தில், விபீடணன் அடைக்கடலப் படலத்தில், அழகாக இரவும் (எல்லியும்) பகலும் ஒன்றையொன்றை தழுவி நின்றதைப் போன்று இராமனும் விபீடணனும் தழுவி நின்றதைக் கூறும் பாடல்.

தொல் பெருங் காலம் எல்லாம் பழகினும், தூயர் அல்லார்
புல்லலர்; உள்ளம் தூயார் பொருந்துவர், எதிர்ந்த ஞான்றே;
ஒல்லை வந்து உணர்வும் ஒன்ற, இருவரும், ஒரு நாள் உற்ற
எல்லியும் பகலும் போல, தழுவினர், எழுவின் தோளார். (கம்ப.விபீடணன் .123)

“செல்வுழிக் கண்ணொருநாள் காணினும் சான்றவர்
தொல்கழிக் கேண்மையில் தோன்றப் புரிந்தியாப்பர்” (நாலடி154)

“காண்டகைமை இன்றியும்முன் கலந்தபெரும் கேண்மையினார்” (பெரிய.திருநா.203)

மேலும்: அஷோக் உரை

பரிமேலழகர் உரை
புணர்ச்சி பழகுதல் வேண்டா - ஒருவனோடு ஒருவன் நட்பாதற்குப் புணர்ச்சியும் பழகுதலுமாகிய காரணங்கள் வேண்டுவதில்லை; உணர்ச்சிதான் நட்பாம் கிழமை தரும் - இருவர்க்கும் ஒத்த உணர்ச்சி தானே நட்பாம் உரிமையைக் கொடுக்கும். (புணர்ச்சி: ஒரு தேயத்தராதல். 'இன்றே போல்க நும் புணர்ச்சி'(புறம்.58) என்றதும் அதனை. பழகுதல் - பலகால் கண்டும் சொல்லாடியும் மருவுதல். இவ்விரண்டும் இன்றிக் கோப்பெருஞ்சோழனுக்கும் பிசிராந்தையார்க்கும் போல உணர்ச்சி யொப்பின், அதுவே உடன் உயிர் நீங்கும் உரிமைத்தாய நட்பினைப் பயக்கும் என்பதாம்.(புற.நா.217) நட்பிற்குப் புணர்ச்சி, பழகுதல், உணர்ச்சியொத்தல் என்னும் காரணம் மூன்றனுள்ளும், பின்னது சிறப்புடைத்து என்பது இதனான் கூறப்பட்டது.).

மணக்குடவர் உரை
நட்பாதற்குப் பலநாள் பழகுதல் வேண்டா: ஒருநாள் கண்டாராயினும் உணர்வுடையார்க்கு அவ்வுணர்வுடைமைதானே நட்பாகும் உரிமையைத் தரும். இவ்வுணர்வுடைமைதானே நட்பாகு மென்றவாறு.

மு.வரதராசனார் உரை
நட்புச் செய்வதற்குத் தொடர்பும் பழக்கமும் வேண்டியதில்லை, ஒத்த உணர்ச்சியே நட்பு ஏற்படுத்துவதற்கு வேண்டிய உரிமையைக் கொடுக்கும்.

சாலமன் பாப்பையா உரை
ஒருவனோடு ஒருவன் நட்புக் கொள்வதற்கு அருகருகே இருப்பதோ, நெருங்கிப் பழகுவதோ வேண்டியதில்ல. இருவரது எண்ணமும் ஒத்திருந்தால் அதுவே நட்பு என்னும் தோழமையைக் கொடுக்கும்.

சுழலும் இசைவேண்டி வேண்டா உயிரார்

குறள் 777
சுழலும் இசைவேண்டி வேண்டா உயிரார்
கழல்யாப்புக் காரிகை நீர்த்து
[பொருட்பால், படையில், படைச்செருக்கு]

பொருள்
சுழலும் - சுழலுதல் - உருளுதல்; வட்டமாகச்சுற்றுதல்; சுற்றுத்திரிதல்; அலைவுபடுதல்; சஞ்சலப்படுதல்; சோர்தல்; பொறிமயங்குதல்

இசை  -இசைவு; பொன் ஊதியம் ஓசை சொல் புகழ் இசைப்பாட்டு நரம்பிற்பிறக்கும்ஓசை; இனிமை ஏந்திசை தூங்கிசை, ஒழுகிசை சீர் சுரம் வண்மை திசை

வேண்டி - vēṇṭi   prep. id. For thesake of; பொருட்டு. அதை எனக்கு வேண்டிச் செய்.
வேண்டிக்கேள்-தல் [வேண்டிக்கேட்டல்] vēṇṭi-k-kēḷ-, v. tr. id. +. To beseech;மன்றாடிக்கேட்டல். (யாழ். அக.)

வேண்டா - வேண்டாம் - vēṇṭām   veeNTaam வேண்டாம் do not want; should not  

உயிர் - காற்று; உயிர்வளி; சீவன் ஆதன் ஓரறிவுயிர்முதலியஉயிரினம்; உயிரெழுத்து ஓசை ஒருநாழிகையில்4320-ல்ஒருகூறு; சன்மலக்கினம்

உயிரார் - உயிர் உள்ளவர் 

கழல் - வீரக்கழல்; சிலம்பு; கால்மோதிரம்; செருப்பு; பாதம்; கழற்சி; காற்றாடி; பொன்வண்டு.

யாப்புக் - கட்டுகை; கட்டு; செய்யுள்; யாழ்ப்பத்தரிற்குறுக்கேவலிவுறச்செய்யுங்கட்டு; சிறப்புப்பாயிரஇலக்கணம்பதினொன்றனுள்இன்னநூல்கேட்டபின்இன்னதுகேட்கத்தக்கதென்னும்தொடர்பு; அன்பு; உறுதி; சூழ்ச்சி; பொருத்தம்; பாம்பு.

காரிகை - பெண்; அழகு; அலங்காரம்; கட்டளைக்கலித்துறை; ஓர்யாப்பிலக்கணநூல்; ஒருநிறை; வாதனை.

நீர் - தண்ணீர்; கடல்; இரசம்; பனிநீர்; உடல்இரத்தம்; பித்தநீர்முதலியநீர்மப்பொருள்; பூராடநாள்; பூரட்டாதிநாள்; ஈரம்; மணியின்ஒளி; குணம்; நிலை.

நீர்த்து - நீர்த்தல் -  நீராதல்; ஈரமாதல்.

முழுப்பொருள்
இவ்வுலகில் எட்டுத்திக்கும் சுழலும் ஆற்றல் பெற்ற புகழை வேண்டி தன் உயிரை வேண்டாத படை வீரர்கள் தங்கள் உடம்பில் (தங்கள் கால்களில்) அணியும் சிலம்பு(வீரக்கழல்) அவர்ளுக்கும் அவர்கள் வீரத்திற்கும் அழகு சேர்க்கும் குணம் வாய்ந்தது.

மேலும்: அஷோக் உரை

பரிமேலழகர் உரை
சுழலும் இசைவேண்டி வேண்டா உயிரார் - துறக்கத்துத் தம்மொடு செல்லாது வையத்தைச் சூழ்ந்து நிற்கும் புகழை வேண்டி உயிர் வாழ்தலை வேண்டாத வீரர்; கழல் யாப்புக்காரிகை நீர்த்து - கழல் கட்டுதல் அலங்கார நீர்மையை உடைத்து. (வையைத்தைச் சூழும் எனவே, அதன் பெருமை பெற்றாம். செயப்படு பொருள் வருவிக்கப்பட்டது. சூழல் - அகத்திடல். துறக்கமும் புகழும் எளிதின் எய்துவராகலின், ஆபரணமாவது அதுவே என்பதாம்.).

மணக்குடவர் உரை
பரவும் புகழை விரும்பி, உயிரை விரும்பாதார், கழல் கட்டுதல் அழகுடைத்து. இது புகழ் விரும்பும் படை வேண்டுமென்றது.

மு.வரதராசனார் உரை
பரந்து நிற்க்கும் புகழை விரும்பி, உயிர்வாழ்வையும் விரும்பாத வீரர், வீரக் கழலை காலில் கட்டிக்கொள்ளுதல் அழகு செய்யும் தன்மையுடையதாகும்.

சாலமன் பாப்பையா உரை
தம்முடன் சொர்க்கத்திற்கு வராது பூமியில் மட்டு் நிலைத்து நிற்கும் புகழை விரும்பி, உயிரையும் விரும்பாத வீரர், தம் கால்களில் வீரக்கழலைக் கட்டுவது அவர்க்கு அழகே.

கூற்றுடன்று மேல்வரினும் கூடி எதிர்நிற்கும்

குறள் 765
கூற்றுடன்று மேல்வரினும் கூடி எதிர்நிற்கும்
ஆற்ற லதுவே படை
[பொருட்பால், படையில், படைமாட்சி]

பொருள்
கூற்று - கூறுகை; மொழி; கூறத்தக்கது; யமன், காலன்

உடன்று -  வெகுண்டு, கோபித்து, சினந்து

மேல்வரினும் - எதிரே / மேலே வந்தாலும் 

கூடி - கூடுதல் - ஒன்றுசேர்தல்; திரளுதல்; பொருந்துதல்; இயலுதல்; கிடைத்தல்; நேரிடுதல்; இணங்குதல்; தகுதியாதல்; அதிகமாதல்; தொடங்குதல்; அனுகூலமாதல்; உடன்படுதல்; நட்புக்கொள்ளுதல்; புணர்தல்; அடைதல்; மொத்தம்; மேலெல்லை.

எதிர் - வருங்காலம்; எதிரிடை; முன்; முன்னுள்ளது; முரண்; கைம்மாறு; இலக்கு; போர்.

நிற்கும் - நிலைக்கும்
நிற்பது - niṟpatu   n. நில்-. The immoveables, as the vegetable kingdom; தாவரம் நிற்பதுஞ் செல்வது மானோன் காண்க (திருவாச. 3, 53).  

ஆற்றல் - சக்தி; முயற்சி மிகுதி கடைப்பிடி பொறை ஆண்மை வெற்றி வாய்மை அறிவு இன்னசொல்இன்னபொருள்உணர்த்தும்என்னும்நியதி; சாகசம்

அதுவே - அதுவே ; அத்தன்மை வாய்ந்ததே 

படை - சேனை; அறுவகைப்படைகள்; திரள்; சுற்றம்; ஆயுதம்; கருவி; சாதனம்; காண்க:இரத்தினத்திரயம்; முசுண்டி; கலப்பை; குதிரைக்கலணை; யானைச்சூல்; போர்; கல்முதலியவற்றின்அடுக்கு; செதிள்; சமமாய்ப்பரப்புகை; படுக்கை; உறக்கம்; மேகப்படை

முழுப்பொருள் 
ஒரு சிறந்த படைக்கு ஆற்றல் எவ்வாறு இருக்கும் தெரியுமா? எப்படையானாலும் அதையழிக்க வல்ல ஆற்றல் மட்டும் அல்லாது உயிர்களை கொல்வதை தன்னுடைய கருமமாக கொண்டவன் யமன். அத்தகைய யமன் சினந்து எழுந்து வந்தால் உயிர் இழப்பு நிச்சயம். ஆனால் யமன் சினந்து வந்தாலும் அதற்கு சற்றும் வருந்தாமல் சலனம்கொள்ளாமல் யமனை எதிர் நோக்கும் வல்லமையும் திறனும் மனவலிமையும் அர்ப்பணிப்பும் கொண்ட படையே சிறந்த படை. 

மேலும்: அஷோக் உரை 

ஒப்புமை
“கூற்றுவெகுண்டு வரினும் மாற்றுமாற் றலையே” (பதிற்.11:10)
“கூற்றம் வரினும் தொலையான்” (கலி.43.10)
“அருநவை நமனு மாற்றான்” (சீவக.1114)
“மறலியஞ் சுறுவிறலர்” (கம்ப.மராமரப்.10)
“கூற்றுவன் தன்னொடிவ் வுலகம் கூடிவந்
தேற்றன வென்னினும் வெல்ல வேற்றுள
மாற்றவன் தம்பி” (கம்ப.விபீடணன்.68)
“கூற்றையும் கட்பொறி குறுகக் காண்பரேல்
ஊற்றுறு குருதியோ டுயிரும் உண்பரால்” (கம்ப.இலங்கை கேள்வி.22)
“கூற்றம் உன்னெதிர் வந்துயிர் கொள்வதோர்
ஊற்றம் தானுடைத் தன்று” (கம்ப.இராவணன் சோகப்.22)
“கூற்றின்வாய் உற்றால் வீரங் குறைவரே இறைமை கொண்டார்” (கம்ப.மூலபல.46)
“கூற்றும் இவருடன் பகைக்க வற்றோ” (கம்ப.மூலபல.51)

பரிமேலழகர் உரை
கூற்று உடன்று மேல் வரினும் - கூற்றுவன் தானே வெகுண்டு மேல் வந்தாலும்; கூடி எதிர்நிற்கும ஆற்றலதுவே படை- நெஞ்சு ஒத்து எதிர்நின்று தாங்கும் ஆற்றலையுடையதே படையாவது. ('மருந்தில் கூற்று' ஆகலின், (புற.நா.3) உம்மை சிறப்பும்மை. மிகப்பலர் நெஞ்சொத்தற்குக் காரணம் அரசன்மேல் அன்பு. ஆற்றல் - மனவலி.).

மணக்குடவர் உரை
கூற்றமானது வெகுண்டு தன்மேல்வரினும், சிதறுதல் இன்றியே எதிர் நிற்கவல்ல வலியுடையதே படையாவது. இது மாற்றான் மேல்வந்தால் பொறுக்கவேண்டு மென்றது.

மு.வரதராசனார் உரை
எமனே சினங்கொண்டு தன் மேல் எதிர்த்து வந்தாலும் ஒன்றாகத் திரண்டு எதிர்த்து நிற்க்கும் ஆற்றல் உடையதே படையாகும்.

சாலமன் பாப்பையா உரை
எமனே எதிர்த்து வந்தாலும், கூடி நின்று எதிர்த்துச் சண்டை இடும் ஆற்றலை உடையதே படை.

அருளொடும் அன்பொடும் வாராப் பொருளாக்கம்

குறள் 755
அருளொடும் அன்பொடும் வாராப் பொருளாக்கம்
புல்லார் புரள விடல்
[பொருட்பால், கூழியல், பொருள்செயல்வகை]

பொருள்
அருளொடும் - அருள் - சிவசக்தி; கருணை பொலிவு முதிர்ந்தமாதுளைமரம்; நல்வினை ஏவல்

அன்பொடும் - அன்பு - தொடர்புடையோர்மாட்டுஉண்டாகும்பற்று; நேயம் அருள் பக்தி

வாராப் - இல்லாத 

பொருள் - சொற்பொருள்; செய்தி; உண்மைக்கருத்து; செய்கை; தத்துவம்; மெய்ம்மை; நன்குமதிக்கப்படுவது; அறிவு; கொள்கை; அறம்; பயன்; வீடுபேறு; கடவுள்; பலபண்டம்; பொன்; மகன்; தந்திரம்; முலை; உவமேயம்; அருத்தாபத்தி; அகமும்புறமுமாகியதிணைப்பொருள்கள்; அர்த்தசாத்திரம்; தலைமை.

ஆக்கம் - ஆக்கக்கிளவி; அமைத்துக்கொள்ளுகை; கைகூடுகை; உண்டுபண்ணுகை; படைப்பு செல்வம் பொன் பெருக்கம் இலாபம் ஈட்டம் கொடிப்படை திருமகள் மங்களகரம் வாழ்த்து

புல்லுதல் - தழுவுதல்; புணர்தல்; பொருந்துதல்; வரவேற்றல்; ஒத்திருத்தல்; 
ஒட்டுதல்; நட்புச்செய்தல்

புல்லார்  - தழுவாது , பகைவர் 

புரள - புரளுதல் - உருளுதல்; கழிதல்; அலைமறிதல்; நிரம்பிவழிதல்; அழுக்காதல்; நீரிற்கலத்தல்; சொற்பிறழுதல்; மிகுதல்; மாறிமாறிவருதல்; சாதல்.

விடல் - விடுதல் - நீங்குதல்; நீக்குதல்; விலக்குதல்; பிரித்தல்; கைவிடுதல்; போகவிடுதல்; அனுப்புதல்; பந்தம்விடுதல்; நிறுத்துதல்; ஒழித்துவிடுதல்; முடித்தல்; வெளிவிடுதல்; செலுத்துதல்; எறிதல்; சொரிதல்; கொடுத்தல்; சொல்லுதல்; வெளிப்படக்கூறுதல்; விவரமாகக்கூறுதல்; இசைவளித்தல்; காட்டித்தருதல்; வெளிப்படுத்துதல்; பிரிதல்; புதிர்விள்ளுதல்; கட்டுஅவிழ்தல்; மலர்தல்; உண்டாக்குதல்; மிகுதல்; தங்குதல்; தவிர்தல்; பிளந்திருத்தல்; பலம்குறைதல்; அறுபடுதல்; விலகுதல்; துணைவினை; விடுதலை.

முழுப்பொருள்
அறம் அற்ற வழிகளில் அருளும் அன்பும் அல்லாத வழிகளில் ஈன்ற பொருளையும் செல்வத்தையும் பொருள் என கருத வேண்டாம். ஏனெனில் அத்தகைய பொருள் செல்வம் குற்றத்தினால் வந்தவை. அவை பகையை விளைவிக்கும். ஆதலால் அச்செல்வத்தை பகையென கருதி தழுவாது கழித்துவிட/நீக்கிவிட  வேண்டும். பொருள் செய்தாலும் அற வழியில் செய்தல் வேண்டும். பொருளை பெற்றுக்கொண்டாலும் அவை அறவழியில் ஈன்ற செல்வமாகவே இருக்க வேண்டும்.

மேலும்: அஷோக் உரை

ஒப்புமை
“அருளும் அன்பும் நீக்கித் துணைதுறந்து
பொருள்வயிற் பிரிவோர் உரவோ ராயின்” (குறுந்.20:1-2)

பரிமேலழகர் உரை
அருளொடும் அன்பொடும் வாராப் பொருள் ஆக்கம் - தாம் குடிகள் மாட்டுச் செய்யும் அருளொடும், அவர் தம்மாட்டுச் செய்யும் அன்பொடும் கூடி வாராத பொருளீட்டத்தை; புல்லார் புரள விடல் - அரசர் பொருந்தாது கழியவிடுக. (அவற்றோடு கூடி வருதலாவது, ஆறிலொன்றாய் வருதல், அவ்வாறு வாராத பொருளீட்டம் பசுமட்கலத்துள் நீர்போலத் செய்தானையும் கொண்டு இறத்தலின், அதனைப் 'புல்லார்' என்று ஒழியாது, 'புரளவிடல்' என்றும் கூறினார்.).

மணக்குடவர் உரை
அருளுடைமையோடும் அன்புடைமையோடும் வாராத பொருளால் வரும் ஆக்கத்தைப் பொருந்தாது போக விடுக. இது பொருள் தேடுங்கால் பிறர் வருத்தத்திற்கு உபகரியாதும் பயின்றார் மாட்டுக் காதலில்லாமலும் பொருள்தேடுதலைத் தவிர்கவென்றது.

மு.வரதராசனார் உரை
அருளோடும், அன்போடும் பொருந்தாத வழிகளில் வந்த செல்வத்தின் ஆக்கத்தைப் பெற்று மகிழாமல் அதைத் தீமையானது என்று நீக்கிவிட வேண்டும்.

சாலமன் பாப்பையா உரை
பிறர்மீது இரக்கமும் அன்பும் இல்லாமல் சேர்க்கும் பணச் சேமிப்பை ஏற்காது விட்டு விடுக.

முற்றியும் முற்றா தெறிந்தும் அறைப்படுத்தும்

குறள் 747
முற்றியும் முற்றா தெறிந்தும் அறைப்படுத்தும்
பற்றற் கரியது அரண்
[பொருட்பால், அரணியல், அரண்]

பொருள்
முற்றியும் - முற்றுதல் - முதிர்தல்; முழுவளர்ச்சிபெறுதல்; முதுமையாதல்; பெருகுதல்; வைரங்கொள்ளுதல்; தங்குதல்; நிறைவேறுதல்; முடிதல்; இறத்தல்; போலுதல்; செய்துமுடித்தல்; அழித்தல்; சூழ்தல்; வளைத்தல்; அடைதல்; மேற்கொள்ளுதல்; தேர்தல்.

முற்றாது - முதிராத, பெருகாது, அழியாது, முடியாது

எறிந்தும் - எறிதல்  - உதைத்தல்; வீசுதல்; வெட்டுதல்; முறித்தல்; அறுத்தல்; பறித்தல்; அழித்தல்; ஓட்டுதல்; குத்தல்; அடித்தல்.

எறித்தல் - ஒளிவீசுதல்; வெயிற்காலம்; தைத்தல்; உறைத்தல்; பரத்தல்.

அறைப்  - அடி; மோதுகை; வெட்டுகை; ஓசை சொல் விடை அலை உள்வீடு வீடு பெட்டியின்உட்பகுதி; வகுத்தஇடம்; பிள்ளைபெறும்அறை; சதுரங்கம்முதலியவற்றின்கட்டம்; மலைக்குகை சுரங்கம் பாத்தி வஞ்சனை பாறை அம்மி சல்லி துண்டம் பாசறை அறுகை

படுத்தும் - படுதல் - உண்டாதல்; தோன்றுதல்; உதித்தல்; நிகழ்தல்; மனத்தில்தோற்றுதல்; பூத்தல்; ஒன்றன்மீதுஒன்றுஉறுதல்; மொய்த்தல்; அகப்படுதல்; புகுதல்; பெய்தல்; பெரிதாதல்; மேன்மையடைதல்; அழிதல்; சாதல்; மறைதல்; புண்காய்தல்; சாய்தல்; வாடுதல்; துன்பமடைதல்; தொங்குதல்; ஒலித்தல்; பாய்தல்; புதைக்கப்படுதல்; உடன்படுதல்; ஒத்தல்; பொறுத்தல்; முட்டுதல்.

பற்றற்கு - பற்றுதல் - பிடித்தல்; பயனறுதல்; ஊன்றிப்பிடித்தல்; ஏற்றுக்கொள்ளுதல்; மனத்துக்கொள்ளுதல்; தொடுதல்; உணர்தல்; தொடர்தல்; நிறம்பிடித்தல்; தீமுதலியனமூளுதல்; தகுதியாதல்; ஒட்டுதல்; பொருந்துதல்; போதியதாதல்; உறைத்தல்; உண்டாதல்; பொறுத்தல்.

அரியது - அருமை; பசுமை; அரியதன்மை; பெருமை கடினம் எளிதிற்கிட்டாமை; சிறுமை இன்மை; அரிது 

அரண் - பாதுகாப்பு, காவல் கோட்டை சுற்றுமதில் காவற்காடு கவசம் வேலாயுதம் செருப்பு அழகு அச்சம்

முழுப்பொருள் 
பகைவர்கள் எல்லைகளில் முற்றுகையிட்டும் (சூழ்ந்தும்), போர் புரிந்தும், போர் கருவிகளால் உடைத்தெரிய முயன்றும், வஞ்சனை என்னும் சூழ்ச்சியை கொண்டும் (அதாவது உள்ளிருப்போரைக் கொண்டே வஞ்சத்தாலும் வீழ்த்த பகைவர்கள் முயல்வர்) ஒரு நாட்டை கைப்பற்ற முடியவில்லையென்றால் அத்தகைய கடுமையான அரணே/பாதுகாப்பே அரணாகும்.

மேலும்: அஷோக் உரை

பரிமேலழகர் உரை:
முற்றியும் - புகலொடு போக்கு ஒழியும் வகை நெருங்கிச் சூழ்ந்தும்; முற்றாது எறிந்தும் - அங்ஙனம் சூழாது நெகிழ்ந்த இடன் நோக்கி ஒருமுகமாகப் பொருதும்; அறைப்படுத்தும் - அகத்தோரை அவர் தெளிந்தோரை விட்டுக் கீழறுத்துத் திறப்பித்தும்; பற்றற்கு அரியது அரண் - புறத்தோரால் கொள்ளுதற்கு அரியதே அரணாவது. (இம் மூன்று உபாயத்துள்ளும் முதலாவது எல்லாப் பொருளும்உடைமையானும், ஏனைய நலலாளுடைமையானும் வாயாவாயின.).

மணக்குடவர் உரை
சூழவிட்டும், சூழவிடாதே ஒருபக்கமாகப் போர் செய்தும், அரணிலுள்ளாரைக் கீழறுத்தும் இம்மூன்றினாலும் கொள்ளுதற்கு அரியது அரணாவது.

மு.வரதராசனார் உரை
முற்றுகையிட்டும் முற்றுகையிடாமல் போர் செய்தும், வஞ்சனை செய்தும் எப்படியும் பகைவரால் கைப்பற்ற முடியாத அருமை உடையது அரண் ஆகும்.

சாலமன் பாப்பையா உரை:
முழுவதுமாகச் சூழ்ந்து கொண்டாலும் சூழாமல் வலு இழந்த இடத்தில் நெருங்கிப் போரிட்டாலும் உள்ளிருப்போரில் சிலரை ஐந்தாம் படை ஆக்கினாலும், பகைவரால் கைப்பற்றுவதற்கு அரியதே அரண்.