Search This Blog

Disclaimar

This blog is totally for learning purposes. Non-commercial. In many of the posts, many snippets have been taken from various thirukkural blogs, books available online freely only for learning purpose without any intention of plagiarism or to make money. I have given due credit, link wherever possible. If you want your content to be removed, or you want more credit to be provided, please do let me know in the comment section of any of the posts. ஊருணி நீர்நிறைந் தற்றே உலகவாம் பேரறி வாளன் திரு (குறள் 215)

இறைகாக்கும் வையகம் எல்லாம்

குறள் 547
இறைகாக்கும் வையகம் எல்லாம் அவனை
முறைகாக்கும் முட்டாச் செயின்
[பொருட்பால், அரசியல், செங்கோன்மை]
(For meaning in English, scroll to the bottom of this post)

பொருள்
இறை - உயரம்; தலை; கடவுள்; தலைவன்; அரசன்; உயர்ந்தோன்; மூத்தோன்; பெருமையிற்சிறந்தோன்; கணவன்; பறவையிறகு; கடன்; வீட்டிறப்பு; மறுமொழி; மணிக்கட்டு; குடியிறை; சிறுமை; அற்பம்; காலவிரைவு; சிவன்; பிரமன்; மாமரம்.
காத்தல் - பாதுகாத்தல்; அரசாளுதல்; எதிர்பார்த்தல்; விலக்குதல்.
காக்கும் - பாதுகாக்கும், அரசாளும்
வையகம் - மண்ணுலகம்; விலங்கு இழுக்கும் வண்டி; கூடாரவண்டி; சிவிகை; ஊர்தி; உரோகிணிநாள்.
எல்லாம் - அனைத்தும், முழுதும்
அவனை - அந்த தலைவனை, அரசனை
முறை - நீதி; அடைவு; நியமம்; ஆள் மாறி மாறி வேலை செய்யும் நியமம்; தடவை; பிறப்பு; ஒழுக்கம்; உறவு; உறவு முறைப் பெயர்; அரசநீதி; பழைமை; ஊழ்; கூட்டு; நூல்; தன்மை; காண்க:முறையீடு; கற்பு.
முறை - ஊழ், நீதி
காக்கும் - பாதுகாக்கும்,
முட்டு - விலங்கு முதலியன கொம்பு முதலியவற்றால் தாக்குகை; தடை; தட்டுப்பாடு; சங்கடம்; குறைவு; உட்சென்று கடத்தலருமை; கண்டு முட்டுக்கேட்டு முட்டு முதலிய தீட்டுகள்; மாதவிடாய்; கருவி:சில்லறைப் பொருள்கள்; பற்றுக்கோடு; முழங்கால், முழங்கை, விரல்கள்இவற்றின்பொருத்து; மேடு; குவியல்.

முட்டு  - s. Want, difficulty, straits, ex tremity, இடுக்கண். 2. Battering; butting of a beast, முட்டுகை. 3. A prop, a sup port, தாங்கல். 4. Utensil, as தட்டுமுட்டு. 5. A blockade, an impediment, அடைப்பு. 6. [in combin.] A musical instrument, as நட்டுமுட்டு. 7. A bridle, கடிவாளம். 8. The knee, முழங்கால். 9. The menses of women, தொடக்கு. 1. (R.) Rising ground, மேடு. முட்டுற்றபோழ்தின். In the time of adver sity. (நாலடி.) எனக்குவெகுமுட்டாயிருக்கிறது. I am in great straits (for money).

முட்டாட்டம் - முட்டுகை; முட்டாள்தன்மை; செருக்கு.

முட்டாச்செயின் - தங்கு தடையில்லாமல், குறைவில்லாமல் செய்தால்

முழுப்பொருள்
ஒரு நாட்டின் அரசருக்கோ நிர்வாகத்தின் தலைவருக்கோ குடும்பத்தின் தலைவருக்கோ அரச/ நிர்வாக/ குடும்ப நியதியின்/ நெறியின் படி பல கடமைகள் உண்டு. அந்நெறிகளின் படி தடையில்லாமலும் எவ்வித குறையில்லாமலும் அனைத்து மக்களையும் காத்தலே தலைவனின் கடமை. அப்படி காத்தால் காத்தலின் ஊழாக (பயனாக, முறையாக) அந்த நல்ல விளைவுகளே அவனை காக்கும் என்கிறார் திருவள்ளுவர். 

இதனை நமது வேலைக்கு ஒப்பிடலாம், நாம் நமது வேலையை ஒழுங்காக செய்தால் நமது வேலை பறிப்போகாமல் இருக்க அதிக வாய்ப்பு உள்ளது. நம்மை வேலையில் இருந்து விரட்டமாட்டார்கள். இக்கட்டான நேரங்களிலும் நல்ல வேலையாட்களை காப்பாற்ற நிர்வாகம் முயற்சி செய்யும். ஆனால் வேலையில் அலாதியாக இருந்தால் அவர்களையே முதலில் விரட்டுவார்கள். 

நம் குடும்பத்தை எடுத்துக்கொண்டால் தலைவன் தன் பிள்ளைகளை முறையாக அன்புடன் வளர்த்தால் கல்வி கொடுத்து வளர்த்தால் பின்பு பிள்ளைகள் தங்கள் சொந்த கால்களில் நிற்பர். நல்ல பிள்ளைகள் பெற்றோரின் முதுமையில் அவர்களை பேணிக் காப்பர்.

இதனை "செய்வன திருந்தச் செய்" என்கிறார் ஒளவையார்

மேலும்: அஷோக் உரை

பரிமேலழகர் உரை
வையகம் எல்லாம் இறை காக்கும் - வையகத்தை எல்லாம் அரசன் காக்கும், அவனை முறை காக்கும் - அவன் தன்னை அவனது செங்கோலே காக்கும், முட்டாச் செயின் - அதனை முட்டு வந்துழியும் முட்டாமல் செலுத்துவனாயின். (முட்டாமல் செலுத்தியவாறு: மகனை முறைசெய்தான் கண்ணும்(சிலப் 20:53-55 )தன் கை குறைத்தான் கண்ணும் (சிலப்,23: 42-53)காண்க. 'முட்டாது' என்பதன் இறுதி நிலை விகாரத்தால் தொக்கது. இவை நான்கு பாட்டானும் அதனைச் செலுத்தினான் எய்தும் பயன் கூறப்பட்டது.)

மணக்குடவர் உரை
அரசனுக்கு வெற்றி தருவது அவன் கையிலுள்ள வேலன்று, முறை செய்தல்; அவன் அதனைக் கோடச் செய்யானாயின்.

இது செங்கோன்மை செய்ய வெற்றியுண்டாமென்றது.

ஞா. தேவநேயப் பாவாணர்  உரை
வையகம் எல்லாம் இறை காக்கும் - உலகம் முழுவதையும் அரசன் காப்பான் ; முட்டாச் செயின் அவனை முறைகாக்கும் - முட்டுப்பாடு நேர்ந்த விடத்தும் முட்டில்லாது ஆட்சி செய்வானாயின், அவனை அவன் செங்கோலே காக்கும்.

முட்டில்லாமற் செய்தல் மனு முறைச் சோழன் தன்மகனை முறை செய்ததும், கொற்கைப் பாண்டியன் தன்கை குறைத்ததும் , போல்வதாம் . இனி, சிக்கலான வழக்குக்களைத் தீர்க்கும் வழியை இறைவனிடம் மன்றாடிக் கேட்டறிந்ததும் , முட்டாது செய்தலின் பாற்படும் . 'வையகம்' முதலாகுபெயர் . 'முட்டா' ஈறுகெட்ட எதிர்மறை வினையெச்சம்.

மு.வ உரை
உலகத்தை எல்லாம் அரசன் காப்பாற்றுவான், நீதிமுறை கெடாதவாறு ஆட்சி
செய்வானாயின் அரசனை அந்த முறையே காப்பாற்றும்.

சாலமன் பாப்பையா உரை
ஆட்சியாளர் பூமியைக் காப்பர்; அவரையோ அவரது குறையற்ற நேர்மையான ஆட்சி காக்கும்.

நன்றி: ரிஷ்வன்
அறம்போற்றி குடிகளை
நெறிமுறை வழுவாமல்
தினம்போற்றி காப்பானாயின்
குறைபடாத நீதி
அவனின் ஆட்சியை
முறையோடு காக்குமாம்.

English Meaning - As I taught a kid - Rajesh
A king / family head / organization's head / team's head protects all the world by doing his duties promptly and diligently without dissatisfaction/mistakes. Such a king / leader is protected by the justice that he dispenses resolutely i.e., the results of his dharma/duties will protect him. 

W.r.t our jobs/career, If we do our work diligently, most likely we won't loose our jobs (unless there is mass layoffs or recession). In difficult situations also our organizations, our managers will try to save us. In case we lose our job, we can get another job by show casing (or prove) our work in previous jobs.

Questions that I ask to the kid
What does a king/leader protect?
How a king is protected?

தொடங்கற்க எவ்வினையும் எள்ளற்க

குறள் 491
தொடங்கற்க எவ்வினையும் எள்ளற்க முற்றும்
இடங்கண்ட பின்அல் லது
[பொருட்பால், அரசியல், இடனறிதல்]
(For meaning in English, scroll to the bottom of this post)

பொருள்
தொடங்கு - தொடங்கல் - n. தொடங்கு-.[Tu. toḍagelu.] 1. Beginning; ஆரம்பிக்கை 2.First creation; ஆதிசிருட்டி 3. Attempt; செய்யமுயலுகை.
அற்க - எதிர்மறை ஏவலைக் குறிக்கும் ஒரு கடைநிலை.
தொடங்கற்க -  செயலை தொடங்காதே / துவங்காதே
வினை - தொழில்; நல்வினை தீவினை என இருவகைப்பட்ட முன்னை வினை; வினைச்சொல்; செய்தற்குரியது; பரிகாரச்செயல்; முயற்சி; போர்; வஞ்சகம்; தந்திரம்; கருத்து; தொந்தரவு; சீழ்; இரண்டைக் குறிக்கும் குழூ உக்குறி.
எவ் வினையும் -  எந்த ஒரு செயலையும் தொழிலையும்
எள்ளுதல் - இகழ்தல், இழிவாகப்பேசுதல்; தள்ளுதல்; ஒப்பாதல்.
எள்ளற்க - செயலின் தன்மையையும் தெரியாமல் இகழலும் செய்யாதீர்
முற்று - முழுமை; முழுமையானது; முதிர்ச்சி; முடிவு; வினைமுற்று; காண்க:முற்றுகை
முற்றும் - முழுவதும் அறிந்து; இச்செயலை இப்படி செய்தால் இறுதியில் என்ன விளைவு வரும் அறிந்து
இடம் - தானம்; வாய்ப்பு; வீடு; காரணம்; வானம்; விரிவு; இடப்பக்கம்; அளவு; ஆடையின்அகலமுழம்; பொழுது; ஏற்றசமயம்; செல்வம்; வலிமை; மூவகையிடம்; படுக்கை; தூரம்; ஏழனுருபு; இராசி.
காணுதல் - அறிதல்; காண்டல்; சந்தித்தல்; செய்தல்; வணங்குதல்.
கண்டபின் - அறிந்த பின், ஆராய்ந்த பின்
அல்லது - தீவினை; தவிர.

முழுப்பொருள்
எந்த ஒரு செயலையும் முழுமையாக ஆராயாமல், செயலின் விளைவு (மற்றும் பக்க விளைவு) அறியாமல், செயலுக்கு தேவையான ஆயுத்தப்பணிகளை செய்யாமல், செயல் செவ்வன செய்வதற்கான இடத்தை அறியாமல், இடத்தின் தன்மை அறியாமல், செயலிற்கு இடத்தின் தன்மையறியாமல் துவங்காதே என்கிறார் திருவள்ளுவர். இங்கே இடத்திற்கு புறவயமான இடம் மட்டும் அல்லாமல் நேரம், செயல் செய்வதற்கு தேவையான வலிமை, தன்னுடைய வலிமை, எதிரியின் வலிமை, செல்வம் ஆகியவற்றும் அடங்கும். 

அதுமட்டும் அல்லாமல் எந்த ஒரு செயலையும் சிறிதாயினும் இகழாதே. ஒரு சிறிய விஷயமும் பெரிதான ஆபத்துக்களை உருவாக்கக்கூடியது. உதாரணமாக ஒரு எறும்பு யானையின் காதில் நுழைந்தால் அது யானையினையே மாய்த்துவிடும்.  ஆதலால் எந்த ஒரு செயலையும் துச்சமாக எண்ணாதே என்கிறார் திருவள்ளுவர்.

உலகின் மிகப்பெரிய வலிமைமிக்க அரசர்கள் நிகழ்த்திய போர்களெல்லாம் எதிரிகளின் வலிமையையும், போர் நிகழும் களம், மற்றும் முடிவுறும் இலக்கும் இவை அறியாமல் மேற்கொண்டதால் படுதோல்வியைச் சந்தித்திருக்கின்றன. புறப்பொருள் வெண்பாமாலைப் பாடலொன்று:

வெள்ளம்போல் தானை வியந்து விரவாரை 
எள்ளி உணர்தல் இயல்பன்று – தெள்ளியார் 
ஆறுமேல் ஆறியபின் அன்றித்தம் கைக்கொள்ளார் 
நீறுமேல் பூத்த நெருப்பு. (பு.வெ.166)

கடல் போல் பெரிய படையை உடையேம் என்று எண்ணிப் பகைவரை இகழ்தல் நல்ல இயல்பன்று. அறிவு மிக்கோர் நீறுபூத்த நெருப்பை அது ஆறிவிட்டது என உறுதிசெய்த பின்பே கையில் எடுப்பர். தம் வலிமையொன்றையே பெரிதெனக் கருதாது பிறர் வலிமையையும் ஆராய்ந்து செயல்பட வேண்டும்; அப்போதுதான் வெற்றி கிட்டும் என்பது இதன் கருத்து. இடம்பற்றிய கருத்து இதுவல்லவென்றாலும், எள்ளுதலை தவறென்று உணர்த்தும் பாடலிது.

பொது வழக்கில் "ஆழம் தெரியாமல் காலை விடலாமா?", "இடம் பொருள் ஏவல் தெரிந்து செய்க"  என்று கூறுவது உண்டு. 

மேலும்: அஷோக் உரை
மேலும்: குறள் இனிது: இடம்... ரொம்ப முக்கியம் குமாரு! (தமிழ் இந்து)

ஒப்புமை
வெள்ளம்போல் தானை வியந்து விரவாரை
எள்ளி யுணர்தல் இயல்பன்று (பு.வெ.166)

பரிமேலழகர் உரை
[அஃதாவது ,வலியும் காலமும் அறிந்து பகைமேற்செல்வான் , தான் வெல்லுதற்கு ஏற்ற நிலத்தினை அறிதல். அதிகார முறைமையும் இதனானே விளங்கும் . ]

முற்றும் இடம் கண்ட பின்அல்லது - பகைவரை முற்றுதற்கு ஆவதோர் இடம் பெற்றபின் அல்லது, எவ்வினையும் தொடங்கற்க - அவர்மாட்டு யாதொரு வினையையும் தொடங்காதொழிக, எள்ளற்க - அவரைச் சிறியர் என்று இகழாதொழிக. (முற்றுதல்: வளைத்தல். அதற்கு ஆம் இடமாவது: வாயில்களானும் நூழைகளானும் அவர் புகலொடு போக்கு ஒழியும் வகை அரணினைச் சூழ்ந்து. ஒன்றற்கு ஒன்று துணையாய்த் தம்முள் நலிவில்லாத பலபடை இருப்பிற்கும், மதிலும் அகழும் முதலிய அரண் செய்யப்பட்ட அரசிருப்பிற்கும் ஏற்ற, நிலக்கிடக்கையும் நீரும் உடையது. அது பெற்றால் இரண்டும் செய்க என்பதாம்.)

மணக்குடவர் உரை
முடியுமிடங் கண்டாலல்லது யாதொரு வினையுந் தொடங்கா தொழிக; எளிதென்றிகழாதொழிக.

இஃது இடமறிதல் வேண்டுமென்பது கூறிற்று

ஞா. தேவநேயப் பாவாணர் உரை
முற்றும் இடம் கண்டபின் அல்லது - பகைவரை முற்றுகை செய்வதற்கேற்ற இடம் பெற்ற பின்னல்லது ; எவ்வினையும் தொடங்கற்க - அவருக்கு மாறாக எவ்வினையையுந் தொடங்காதிருக்க ; எள்ளற்க - அவரைச் சிறியரென்று இகழாதிருக்க .

முற்றுதல் வளைதல் . அதற்கேற்ற இடமாவது , பெருவாயில் களாலும் திட்டிவாசல்களாலும் சுருங்கைகளாலும் பகைவர்க்குப் புகலும் போக்குமில்லாவாறு அவர் நகரரணைச் சூழ்ந்து , நால் வகைப்படைகளும் அவற்றின் நடுவே பாதுகாப்பாக அரசனும் தங்கியிருத்தற்குப் போதியதும் , உண்ணீர் அண்மையிலுள்ளதும் , சதுப்பல்லாததும் , படமாடங்களும் பரசறைகளும் ஒரேபகலில் அமைக்கக் கூடியதுமான நிலப்பரப்பாம் .

மு.வ உரை
முற்றுகை செய்வதற்கு ஏற்ற இடத்தைக் கண்டபின் அல்லாமல் எச் செயலையும் தொடங்கக்கூடாது, பகைவரை இகழவும் கூடாது

சாலமன் பாப்பையா உரை
பகைவரை வளைத்து வெல்லும் இடத்தைக் காணும் முன் எந்தச் செயலையும் தொடங்க வேண்டா; பகைவரை அற்பர் என்று இகழவும் வேண்டா.

நன்றி: Indian Finance Bazaar
தேர்வு செய்து சரியான கட்டுபாட்டுக்குள் இருக்கும் முதலீட்டு சேவை புரிவோர்களை ஆராய்ந்து தேர்ந்து எடுத்து முதலீட்டு முறைகளை தெரிந்து கொண்டு செயல்படுத்தும் முதலீடு பாதுகாப்பானதாக அமையும். அவ்வாறு இல்லாமல் பேராசை பட்டு எந்தவோரு அரசாங்க கட்டுபாட்டுக்குள் வராத அமைப்பு அல்லது தனியார் நபரிடம் பெரும் வருவாய் கருதி செய்யும் முதலீடு பெரும் ஆபத்தில் முடியக் கூடிய சூழ்நிலை நிறைய உள்ளது. அரசாங்க அமைப்பு கொண்ட நிறுவனங்களுடன் பண பரிவர்த்தனை செய்யும் பொழுது அதனால் ஏற்படக்கூடிய பாதுகாப்பற்ற சூழ்நிலையில் கட்டுபாட்டு அமைப்பு முதலீட்டாளருக்கு உறுதுணையாக இருந்து நிவாரணம் பெற்று தரும். ஆதலால் முதலீட்டாளர் எந்த முதலீட்டையும் தொடங்குவதற்கு முன்பு இதை கருத்தில் வைத்து கொண்டு செயல்படுவது பல நன்மைகளை தரும்.

நன்றி: ரிஷ்வன்
எதிரியை வெல்லும் இடமறிந்தபின்
அறிவுடன் செயலைத் தொடங்குக
அதுவரை... அவரை அற்பமாய்
இகழ்வதை மனதில் அகற்றுக.

Thirukkural - Management - Decision Making
A person's possibility to exercise his strength is influenced by the location. Kural 491 is an addition to Kural 495. Never think that a task is easy to execute before you start and never start a task before you find the right place to execute the task.

Don't despise your foe, nor start action
Till you find a place to hem in and finish him.

English Meaning - As I taught a kid - Rajesh
Do not venture into a task without doing the following 1) analyzing the work and 2) identifying the appropriate place to execute the task. Do not take for granted even a small task. 
Hence, Never think that a task is easy to execute before you start and never start a task before you find the right place to execute the task.

Analyzing a tasks means  1) research the task well, 2) understand the value of the task, 3) estimate the skills , strengths, tools, equipment's required 4) estimate the resources required, 5) plan the communication mechanism between the members and team etc.  , 6) analyze the best time to optimally execute the task and to reap the rewards

Identifying the appropriate place to execute the task means 1) a place where a task can be executed without any hurdles 2) a place where the required resources, equipment, human resources would be available 3) a place where executing the task is viable 4) nature of the place - such as demographic, climate, geo-politics, culture etc 

Questions that I ask to the kid
Why should you decide on the place of execution of task before starting the task?

ஆகாறு அளவிட்டி தாயினுங்

குறள் 478
ஆகாறு அளவிட்டி தாயினுங் கேடில்லை 
போகாறு அகலாக் கடை
[பொருட்பால், அரசியல், வலியறிதல்]

பொருள்
ஆகு - III. v. i. become, happen, take place, see ஆ, irr. verb.
ஆறு - பெரிய அளவில் உயர்ந்த நிலப்பகுதில் இருந்து தாழ்வானா பகுதி நோக்கி ஓடும் நீர்வழி, வழி, பாதை
அளவு - வரையறை - s. Measure, degree, pro portion, quantity, magnitude, size, ca pacity, bound, limit, compass, number, standard, வரையறை
இட்டிது - சிறிது; அண்மை.
ஆயினும் - ஆனாலும்
கேடு - அழிவு; இழப்பு; வறுமை; தீமை; கெடுதல்; வேறுபாடு; அழகின்மை.
இல்லை - உண்டு என்பதன் எதிர்மறை
போகு - நெடுமை; உயரம்; நீளம்
போகுதல் - காண்க:போதல்.
ஆறு - பெரிய அளவில் உயர்ந்த நிலப்பகுதில் இருந்து தாழ்வானா பகுதி நோக்கி ஓடும் நீர்வழி, வழி, பாதை
அகலம் - விரிவு; பரப்பு; இடம்; பூமி; மார்பு; விருத்தியுரை; வித்தாரகவி; பெருமை.
கடை - s. a shop, market bazaar, அங் காடி; 2. place, இடம்; 3. way, வழி; 4. gate, வாயில்; 5. termination of a verbal participle as in "ஈதலியை யாக்கடை" (குறள்); 6. a verbal prefix as in கடை கெட்ட; 7. a sign of the 7th case, எழனுருபு.
n. 1. Fatigue; சோர்வு.(அக. நி.) 2. Way; வழி. (யாழ். அக.) 3. Pudendum muliebre; பெண்குறி. (யாழ். அக.)
அகலாக்கடை - அகலாக்மாக பெரிதாக வாயில் இல்லாத வரை

முழுப்பொருள்
நாட்டிலோ நிர்வாகத்திலோ குடும்பத்திலோ தலைவனுக்கு வரவு இருக்கும். ஆனால் அது எல்லாருக்கும் தேவைக்கு ஏற்றவாரோ தேவைக்கு மேலாகவோ இருக்காது. பலருக்கு வரவு மிக சிறிதாகவே இருக்கும். அப்படி சிறிதாக இருப்பின் ஒரு கேடும் இல்லை. சிறிதான வரவு வறுமையும் இல்லை [கேடு என்ற சொல்லுக்கு அகராதியில் வறுமை என்ற பொருளும் உண்டு]. ஆதலால் வருத்த படுத்தவற்கு ஒன்றுமில்லை. 

ஆனால் வரவுக்கு அதிகமாக செலவு செய்தல் தவறு. வரவு ஈன்ற உழைத்த நாட்களை / நேரத்தை விட குறுகியகாலத்தில் மிக வேகமாக மின்னல் வேகத்தில் செலவு செய்தல் தவறு. அப்படி செய்தால் வறுமையை நோக்கியே சொல்வோம். அது அழகு இல்லை. அது கெடுதலே விளைவிக்கும். 

வள்ளுவர் சிறு வருமானம் ஈட்டுபவர்களுக்கு மட்டும் சொல்லவில்லை. எல்லோருக்கும் பொதுவாகவே வரவை விட செலவு அதிகமாக இருந்தால் கேடு என்றே சொல்லியிருக்கிறார்.

"விரலுக்கு ஏத்த வீக்கம்" என்று பொதுவழக்கில் கூறுவர். "குடிகிறது கூழ் கொப்பளிக்கற்து பன்னீரா?" என்றும் கூறுவர்.

இக்குறள் கீழ் காணும் ஔவையாரின் நல்வழிப் பாடலை ஒட்டிய கருத்தைக்கூறுகிறது:

ஆன முதலில் அதிகம் செலவானால் 
மானமழிந்து மதிகெட்டு போன திசை
எல்லார்க்கும் கள்ளனாய் எழுபிறப்பும் தீயனாய்
நல்லார்க்கும் பொல்லானாம் நாடு

அதாவது, ஈட்டும் பொருளினைவிட அதிகமாக செலவு செய்பவர்கள் பிற்காலத்தில் தங்கள் மானத்தையும், அறிவினையும், உணர்வையும் இழப்பார்கள். அவர்கள் எவ்வழி நடந்தாலும் திருடர்கள் போல நடத்தப்படுவர். எத்துனை பிறப்பு பிறந்தாலும் எவ்வித மரியாதையும் கொடுக்கப்படாமல் தீயவர் போல நடத்தப்படுவர். இதை “முதலின் அதிகம் செலவானால்” என்று, அதாவது “முதலீட்டுக்கும் அதிகமாக செலவு செய்தால்” என்றும் பொருள் சொல்லலாம்.

ஔவையார் கடுமையாகச் சொன்னதையே நயமாகச் கூறியிருக்கிறார் வள்ளுவர்.

மேலும்: அஷோக் உரை

பரிமேலழகர் உரை
ஆகு ஆறு அளவு இட்டிது ஆயினும் கேடு இல்லை - அரசர்க்குப் பொருள் வருகின்ற நெறியளவு சிறிதாயிற்றாயினும் அதனால் கேடு இல்லையாம்: போகு ஆறு அகலாக் கடை - போகின்ற நெறிஅளவு அதனின் பெருகாதாயின். ('இட்டிது' எனவும் 'அகலாது' எனவும் வந்த பண்பின் தொழில்கள் பொருள் மேல் நின்றன. 'பொருள்' என்பது அதிகாரத்தான் வருவித்து, 'அளவு' என்பது பின்னும் கூட்டி உரைக்கப்பட்டன. முதலும் செலவும் தம்முள் ஒப்பினும் கேடு இல்லை என்பதாம்.)

மணக்குடவர் உரை
பொருள் வரும்வழியளவு சிறிதாயினும் கேடில்லையாம்; அது போம்வழி போகாதாயின்.

இது முதலுக்குத் தக்க செலவு செய்ய வேண்டுமென்றது.

ஞா. தேவநேயப் பாவாணர் உரை
ஆகு ஆறு அளவு இட்டிது ஆயினும் - அரசர்க்குப் பொருள் வருவாயின் அளவு சிறிதாயினும்; போகு ஆறு அகலாக்கடை - செல்வாயின் அளவு அதினும் மிகாதவிடத்து; கேடு இல்லை - கெடுதல் இல்லை.

இது சிக்கனத்தின் நன்மையை எளிய கணக்கு முறையால் விளக்குவது . அளவு என்பது பின்னுங் கூட்டியுரைக்கப் பட்டது. 'அகலாக்கடை 'என்றதனால், வரவுஞ்செலவும் ஒத்திருப்பினுங் கேடில்லை யென்பதாம் .

ஒரு குளத்திற்குள் நீர்வந்து விழும் வாய்க்காலினும் அதினின்று நீர்வெளியேறும் வாய்க்கால் அகன்றிராவிடின் அக்குளநீர் குன்றாது என்பதே, பிறிதுமொழிதற் குறிப்புக்கொண்ட இக்குறட்பொருள்.

மு.வ உரை
பொருள் வரும் வழி (வருவாய்) சிறிதாக இருந்தாலும், போகும் வழி (செலவு) 
விரிவுபடாவிட்டால் அதனால் தீங்கு இல்லை

சாலமன் பாப்பையா உரை
வருமானம் அளவில் சிறிது என்றாலும் செலவினம் பெரிதாகாதபோது கேடு இல்லை

நன்றி ரிஷ்வன்
வரும் அளவு சிறிதாயினும் – பொருள்
செல்லும் அளவு பெரிதாகாத வரை
இல்வாழ்வில் தீங்கு என்றும் இல்லை

நன்றிக்கு வித்தாகும் நல்லொழுக்கம்

குறள் 138
நன்றிக்கு வித்தாகும் நல்லொழுக்கம் தீயொழுக்கம் 
என்றும் இடும்பை தரும்
[அறத்துப்பால், இல்லறவியல், ஒழுக்கமுடைமை]
(For meaning in English, scroll to the bottom of this post)

பொருள்
நன்றி - நன்மை; உதவி; செய்ந்நன்றி; அறம்.
நன்றிக்கு - நற்பயனுக்கு, அறத்திற்கு
வித்து - மரஞ் செடி கொடிகள் முளைக்கக் காரணமாயிருக்கும் விதை; விந்து; மரபுவழி; வழித்தோன்றல்; சாதனம்; காரணம்.
வித்து ஆகும் - விதை யாகும் (நன்மை மரஞ் செடி கொடி போன்றதாகும். சில விதைகள் (உதாரணமாக மூங்கில்) முளைக்க பல நாட்கள்/வருடங்கள் ஆகும்
ஒழுக்கம் - நடை, முறைமை; நன்னடத்தை, ஆசாரம்; சீலம்; உலகம் ஓம்பிய நெறி; உயர்ச்சி; தன்மை; குலம்.
நல் ஒழுக்கம் - நல்ல நன்னடத்தை
தீ ஒழுக்கம் - தீய நடத்தை, தீய பண்புகள்
என்றும் - என்றுமே, எக்காலத்திலும்
இடும்பை - துன்பம்; தீமை; நோய்; வறுமை; அச்சம்.
இடும்பை தரும் - துன்பத்தை/ தீமை/ நோய்/ வறுமை/ அச்சம் தனையே தரும்

முழுப்பொருள்
ஒருவனுக்கு நல்லொழுக்கம் என்பது விதைக்கு பாய்ச்சும் நல்ல பசுமையான நீரைப் போன்றது ஆகும். நீரின் தன்மை விதைக்குள் சென்று வளர்ந்து நல்ல மரமாக வளரும். அதுப்போல் நல்ல குணங்கள் பழக்கவழக்கங்கள் நன்னடத்தைகள் ஒருவருள் வளர்ந்து உயர்ச்சி தரும். அறம் தனை நிலைநாட்ட உதவும். துன்பமான நேரங்களிலும் தவறான பாதையில் செல்வது தவறு என்று நம்மை அதில் இருந்து விலக்கி நல்வழியில் செலுத்தும் நல் ஒழுக்கம்.  இறுதியில் பல தடைகள் வந்தாலும் இன்பமே பயக்கும். 

ஆக இறுதியில் நன்மை பயத்தமைக்காகவும் வழியில் தவறான பாதையில் இருந்து தடுத்தமைக்காகவும் ஒழுக்கத்திற்கு நாம் நன்றியே சொல்லுவோம். [நன்றிக்கு நன்மை என்ற பொருளும் உண்டு]

ஆனால் தீய பண்புகள் தீய குணங்கள் தீய நடத்தைகள் தீய நட்புகள் நமக்கு நல்லது செய்யாது. கேடான நீரை விளைச்சலுக்கு பாய்ச்சினால் செழுமையாக செடிகள் வளராது. சிறிது நாட்களில் துவண்டுவிடும். மடிந்துவிடும். அதுப்போல தீய பழக்கங்கள் நமக்கு தீமையே தரும். சிலர் சில தீய பழக்கங்களை ரகசியமாக கொள்வர். அவர்களுக்கு மட்டுமே தெரியும். அது தனக்கு உடனே தீமை பயக்காவிட்டாலும் நெடுங்காலத்தில் தீமை பயக்கும். அதற்கும் திருவள்ளுவர் கூறியுள்ளார் தன்நெஞ்சே தன்னைச் சுடும் [குறள் 293: தன்நெஞ் சறிவது பொய்யற்க பொய்த்தபின் தன்நெஞ்சே தன்னைச் சுடும்].  

இங்கே திருவள்ளுவர் வித்து என்று சொல்லி இருக்கிறார். ஏன் என்றால் குழந்தை பருவத்தில் இருந்தே நல் எண்ணங்களை வித்திடுதல் வேண்டும். அதனுடைய பலன் நல்ல மரமாக வளரும். ஆனால் மரமாக வளர்ந்தப்பின் மரத்தின் தன்மையை மாற்றவே முடியாது. முடிந்தாலும் மிக மிக கடினம். செடிகளை பிடுங்கிநடலாம். மரங்களை எளிதில் பிடுங்கிநட்டுவிடமுடியாது. மண் அத்தனை வல்லமை மிக்கது.  உதாரணமாக நாம் இளமையில் உடற்பயிற்சி செய்யாவிட்டாலோ, நல்ல உணவு பழக்கத்தை கடைப்பிடிக்கா விட்டாலோ அதனை மாற்றுவது எவ்வளவு சிரமமாக உள்ளது. 

இவ்வொழுக்கம் என்பது எல்லாவற்றிற்கும் பொருந்தும். பேசும் சொல், வாழும் முறை, உண்ணும் உணவு, செல்வம் ஈட்டுவது, அறம் செய்வது, நிர்வாகம் செய்வது, நட்பு வைத்துக்கொள்வது என்று எல்லாவற்றிலும் ஒழுக்கம் வேண்டும்.

”விதைகறதெல்லாம் தப்பாம மொளக்கும்” என்பதை நினைவில் கொள்க. ஆதலால், நல்லொழுக்கத்தை வித்திடல் அவசியம் ஏனெனில் தீயொழுக்கத்தை விதைத்து துன்பத்தை அறுவடை செய்வவேண்டாதிருக்க

பொதுவழக்கில் வழங்கும் தொல்மொழி “விரையொன்று போட்டால் சுரையொன்றா முளைக்கும்?” என்பதாம். “பண்ணிய பயிரில் புண்ணியம் தெரியும்” என்றது அதனால்தான். ஆத்திச்சூடியில் ஒளவையாரும் கூறியுள்ளார் நன்மை கடைப்பிடி, நேர்பட ஒழுகு, தீவினை அகற்று, சீர்மை மறவேல், கீழ்மை அகற்று, உத்தமனாய் இரு, மோகத்தை முனி என்று.

மேலும்: அஷோக் உரை

பரிமேலழகர் உரை
நல் ஒழுக்கம் நன்றிக்கு வித்து ஆகும். - ஒருவனுக்கு நல் ஒழுக்கம் அறத்திற்குக் காரணமாய் இருமையினும் இன்பம் பயக்கும்; தீயொழுக்கம் என்றும் இடும்பை தரும் - தீய ஒழுக்கம் பாவத்திற்குக் காரணமாய் இருமையினும் துன்பம் பயக்கும். ('நன்றிக்கு வித்தாகும்' என்றதனால் தீயொழுக்கம் பாவத்திற்குக் காரணமாதலும் 'இடும்பை தரும்' என்றதனால் நல் ஒழுக்கம் இன்பம் தருதலும் பெற்றாம், ஒன்று நின்றே ஏனையதை முடிக்கும் ஆகலின். இதனான் பின்விளைவு கூறப்பட்டது.)

மணக்குடவர் உரை
முத்திக்கு விதையாகும் நல்லொழுக்கம்: தீயவொழுக்கம் என்றும் இடும்பையைத் தரும்.

தீயவொழுக்கம் நாடோறுந் துன்பத்தையே தருமென்றவாறு. என்றும்- இருமையின்கண்ணுமென்றவாறு.

ஞா. தேவநேயப் பாவாணர் உரை
நல் ஒழுக்கம் நன்றிக்கு வித்து ஆகும் - ஒருவனுக்கு நல்லொழுக்கம் நன்மைக்குக் கரணியமாய் இருமையிலும் இன்பந்தரும் ; தீயொழுக்கம் என்றும் இடும்பை தரும் - தீயவொழுக்கம் எக்காலும் துன்பமே தரும் .

மறுமையில் விளையும் இன்பத்திற்கு இம்மையில் ஒழுகும் நல்லொழுக்கம் வித்துப்போன்றிருத்தலால் , 'வித்தாகும்' என்றார் . தீயொழுக்கம் என்றும் இடும்பை தரும் என்பதால் , நல்லொழுக்கம் இம்மையிலும் இன்பந்தருதல் பெற்றாம் .

மு.வ உரை
நல்லொழுக்கம் இன்பமான நல்வாழ்க்கைக்குக் காரணமாக இருக்கும்; தீயொழுக்கம் எப்போதும் துன்பத்தைக் கொடுக்கும்

சாலமன் பாப்பையா உரை
நல்லொழுக்கம், அறமாகிய நன்மைக்கு வித்தாக அமைந்து இம்மை மறுமையிலும் இன்பம் தரும்; தீயொழுக்கமோ துன்பமே தரும்.

வ.உ.சிதம்பரனார் உரை
பொருள்: நல் ஒழுக்கம் நன்றுக்கு வித்து ஆகும் - நல்ல நடக்கை இன்பத்திற்குக் காரண மாகும்; தீ ஒழுக்கம் என்றும் இடும்பை தரும் - தீய நடக்கை எஞ்ஞான்றும் துன்பம் தரும்.

அகலம்: நன்று என்பது இன்பம் எனப் பொருள் தருதலானும், எதுகை நயம் பயத்தலானும், முன் உரையாசிரியர்கள் பாடம், ‘நன்றிக்கு’.

கருத்து: நல்லொழுக்கம் இன்பத்தையும் தீ யயாழுக்கம் துன்பத் தையும் தரும்.

தி.பொ.ச. உரை
நன்மை என்னும் பயிர் விளைய நல்லொழுக்கம் என்னும் நல்லநீரைப் பாய்ச்ச வேண்டும். மாறாக, தீயொழுக்கம் என்ற கெட்டநீரைப் பாய்ச்சினால் கேடு எனும் பயிரே என்றும் விளையும். ( இங்கு வித்து = நீர். ' வித்தும் இடல் வேண்டும் கொல்லோ? ' ஆய்வுக் கட்டுரை காண்க. பயிர்களுக்கு நாம் பாய்ச்சும் நீரின் தன்மையைப் பொறுத்தே பயிரின் விளைச்சல் அமைகிறது என்பதை அறிவோம். நல்லநீரைப் பாய்ச்சாமல் கெட்ட நீரைப் பாய்ச்சினால் பயிர்கள் கெட்டு மடிந்து விளைச்சலற்றுப் போகும் என்பதையே கேடு விளையும் என்கிறார். இங்கு ஒழுக்கத்தினை நீருடன் ஒப்பிட்டிருப்பது சாலப் பொருத்தமாகவே படுகிறது. ஏனென்றால் இந்த இரண்டுமே ஒழுகும் தன்மை உடையவை என்பதுடன் இடத்திற்கேற்ப தன்னை மாற்றிக்கொள்ளவும் வல்லவை. ) 

Thirukkural - Management - Personality Development - Self Discipline
Self-discipline leads to all beneficial outcomes in one's life. Beneficial outcomes include health, happiness, harmony, and professional success. Kural 138 affirms that a self-disciplined person will be grateful because of his positive habits.

Good conduct sows good, and from bad springs
Eternal trouble

Positive habit is possible as a person becomes grateful when he achieves significant success. Achieving significant success is possible with positive habits. Whereas, lack of self-discipline leads to a long lasting misery. Happiness and misery are the products of positive and negative habits respectively. Let us remember Aristotle's thought, “Excellence is not an act. It is a habit.”

சற்றுநேரம் எங்களிடையே சொல் ஏதும் எழவில்லை. பின்னர் நான் அவனிடம் “உண்மையில் நான் யார்? அதை கண்டுசொல்ல உன் நிமித்த நூலில் இடமுண்டா?” என்றேன். “நிமித்த நூலின்படி மானுடர் அறுபடா தொடர்ச்சிகள். இங்கிருப்போர் வேறெங்கோ இருப்பவர்களின் மறுவடிவங்கள். அதை அறிய சில கணக்குகள் உள்ளன. ஆனால் அதை அறிந்து பயனில்லை” என்றான்.

நான் “ஏன்?” என்றேன். “அதை அறிவதனால் நாம் எதையும் மாற்றிக்கொள்ளப் போவதில்லை.” நான் சீற்றத்துடன் “நான் மாற்றிக்கொள்கிறேன்” என்றேன். அவன் மறுமொழி சொல்லவில்லை. “ஏன்?” என்று சற்று தணிந்து கேட்டேன். “நாம் பழக்கத்தாலேயே வாழ்கிறோம். உளப்பழக்கம் உடற்பழக்கம். அறிவால் அல்ல.” நான் “இல்லை, என்னால் என் அறிதலை அன்றாடமென்றாக்கிக்கொள்ள முடியும்” என்றேன். “அவ்வண்ணமென்றால் ஆகுக!” என்றான். நான் “சொல்க!” என்றேன்.

English Meaning - As I taught a kid - Rajesh
Good discipline will be the seed to good results. Whereas bad habits and indiscipline will always lead to difficulties in life. 

Questions that I ask to the kid
What is the seed for good results? What does indiscipline lead to ?
What gives you difficulties all the time?
Why indiscipline leads to difficulties? (indiscipline->distractions->unfocus->unproductivity->no wealth->difficulties)

எவ்வ துறைவது உலகம்

குறள் 426
எவ்வ துறைவது உலகம் உலகத்தோடு 
அவ்வ துறைவ தறிவு
[பொருட்பால், அரசியல், அறிவுடைமை]

பொருள்
எவ்வது - எவ்விதம், எவ்வாறு, adv. id. How? inwhat manner? 
உறை - II. v. i. abide, live; தங்கு; 2. dwell or be in the natural element as fishes in water etc, இரு; 3. haunt, சஞ்சரி;
உறைவது - இயங்குகிறதோ
உலகம் -  இவ்வுலகம், இவ்வுலக மக்கள், நாம் சென்று வாழும் உலகம்
உலகம் - உலகிலுள்ள உயர்ந்தோர் ஒழுக்கம்; உயர்ந்தோர்; உயர்குணம்; வானம், உலகு, உலகப்பொது, பூமி; நிலப்பகுதி; உலகுயிர்கள்; திக்கு; மக்கள்தொகுதி; 
உலகத்தொடு - அந்த உலகத்தோடு ஒன்று பட்டு
அவ்வது - adv. id. In that way;அவ்வாறு 
உறைவது - இயங்குவதே
அறிவு - சிறந்த அறிவு

முழுப்பொருள்
இவ்வுலகத்தில் உயர்குணம் கொண்ட உயர்ந்தோர் ஒழுக்கத்துடன் எவ்வாறு இயங்குகிறார்களோ வாழ்கிறார்களோ அவ்வாறு அவ்வழியில் நம்மை ஒன்று பட்டு இயங்குவதே வாழ்வதே கற்ற அறிவுக்கு சிறப்பாகும். இதில் நான் அரசன் நான் தலைவன் எனக்கு எல்லாம் தெரியும் என்ற கர்வம் இல்லாமல் உயர்ந்தோர் வழி வாழ வேண்டும். 

அது மட்டும் இன்றி இவ்வுலகம் மாறிக்கொண்டே இருக்கும். புதிய புதிய வளர்ச்சிகள் புதிய புதிய தொழில்நுட்பங்கள் புதிய புதிய வியூக முறைகள் புதிய புதிய வாழ்வியல்கள் வந்துக்கொண்டே இருக்கும். அத்தகைய நல்ல மாற்றங்களை உதாசினப்படுத்தக்கூடாது. பாரதி கூறியது போல "பழங்கதைகள் சொல்வதிலோர் மகிமையில்லை" ஆதலால் "திறமான புலமை எனில் வெளிநாட்டோர் அதை வணக்கஞ் செய்தல் வேண்டும்". ஆதலால் நற்புதிய மாற்றங்களை ஏற்று வாழ்வில் ஒழுகி வாழ வேண்டும். அதுவே அறிவுக்கு சிறந்ததாகும்.

(கீழ்காணும் பாடலின் பகுதி மகாகவி பாரதியின் "யாமறிந்த மொழிகளிலே தமிழ்மொழிபோல்" பாடலில் இடம்பெறும்)

பிறநாட்டு நல்லறிஞர் சாத்திரங்கள்
      தமிழ்மொழியிற் பெயர்த்தல் வேண்டும்;
இறவாத புகழுடைய புதுநூல்கள்
      தமிழ்மொழியில் இயற்றல் வேண்டும்;
மறைவாக நமக்குள்ளே பழங்கதைகள்
      சொல்வதிலோர் மகிமை இல்லை;
திறமான புலமையெனில் வெளிநாட்டோர்;
      அதைவணக்கஞ் செய்தல் வேண்டும். 

அது மட்டும் எல்லாது ஒரு வெளிநாட்டிற்கு சென்றாலோ வெளி மாநிலத்திற்கு சென்றாலோ அங்கு இருந்து கற்க வேண்டும். அங்கு சென்று எங்க ஊர் எப்படி இருக்கும் தெரியுமா என்று நம்மூர் புராணம் பாடக் கூடாது. அந்த ஊர் மக்களை இழிவு செய்ய கூடாது. அங்கு உள்ளோர்க்கு படி வாழ்வை அமைத்துக்கொள்ள வேண்டும். இது போர் புரிந்து நாட்டை ஆளும் அரசனுக்கும், வெளிநாட்டில் வந்து தொழில்/ வணிகம் செய்யும் மக்களுக்கும் பொருந்தும்.

மேலும்: அஷோக் உரை

பரிமேலழகர் உரை
உலகம் எவ்வது உறைவது - உலகம் யாதொருவாற்றான் ஒழுகுவதாயிற்று, உலகத்தோடு அவ்வது உறைவது அறிவு - அவ்வுலகத்தோடு மேவித் தானும் அவ்வாற்றான் ஒழுகுவது அரசனுக்கு அறிவு. ('உலகத்தையெல்லாம் யான் நியமித்தலான் என்னை நியமிப்பாரில்லை,' எனக் கருதித் தான் நினைத்தவாறே ஒழுகின், பாவமும் பழியும் ஆம் ஆகலான். அவ்வாறு ஒழுகுதல் அறிவு அன்று என விலக்கியவாறு ஆயிற்று. இவை ஐந்து பாட்டானும் அதனது இலக்கணம் கூறப்பட்டது.)

மணக்குடவர் உரை
யாதொருவாற்றா லொழுகுவது உலகம். அதனோடு கூடத்தானும் அவ்வாற்றா னொழுகுதல் அறிவாவது.

அறிவாவாது எத்தன்மைத்து என்றார்க்கு முற்பட உயர்ந்தாரோடு பொருந்த ஒழுகுதல் அறிவு என்றார்.

ஞா. தேவநேயப் பாவாணர் உரை
உலகம் எவ்வது உறைவது - உயர்ந்தோர் எவ்வாறு ஒழுகுகின்றாரோ; அவ்வது உலகத்தோடு உறைவது அறிவு - அவ்வாறே அவரொடு பொருந்தியொழுகுதல் அறிவுடைமையாம்.

உயர்ந்தோரைப் பின்பற்றுவது பொதுமக்கட்கு ஒழுக்கவுயர்வாம்; அரசர்க்கு அதனொடு புகழும் பதவிப்பாதுகாப்புமாம்.

மு.வ உரை
உலகம் எவ்வாறு நடைபெறுகின்றதோ, உலகத்தோடு பொருந்திய வகையில் தானும் அவ்வாறு நடப்பதே அறிவாகும்

சாலமன் பாப்பையா உரை
உலகத்துப் பெரியோர் எவ்வாறு வாழ்கின்றார்களோ, அவரோடு சேர்ந்து, தானும் அப்படியே வாழ்வது அறிவு.

நன்றி: ரிஷ்வன்
எவ்வாறு உலகம் நடைபெறுகிறதோ
அவ்வாறே அதனுடன் ஒன்றி
தப்பாது தொடர்வதே அறிவாம்

நன்றி: கீற்று
மனிதனின் பரிணாம வளர்ச்சியில் மொழியின் உருவாக்கம் பெரும் முதன்மைத்துவம் வாய்ந்தது. மரபனுக்களில் (டி.என்.ஏ) மட்டுமே சேமித்து வைக்கப்பட்டிருந்த வாழ்வதற்கான அறிவு, மொழியின் மூலமும் எழுத்தின் மூலமும் புதியதொரு வடிவம் பெற்றது. மனித சமூகத்தின் வளர்ச்சியில் எழுத்தின் பங்கும், மொழியின் பங்கும் மகத்தானது. கால மாற்றத்தில் 'எழுதுகோலின் முனை வாள்முனையை விட கூர்மையானது' என்ற நிலை ஏற்பட்டது. மனித சமூகத்தின் அறிவு வளர்ச்சியைப் பெரும் பாய்ச்சல்களில் கொண்டு சென்றன இலக்கிய மற்றும் விஞ்ஞான நூற்கள். ஆனால் காலப்போக்கில் பல்வேறு மொழிகள் தோன்றியும் அழிந்தும் போயின. 'பழையன கழிதலும் புதியன புகுதலும்  வழுவள கால வகையின நானே' என்ற நன்னூல் கூற்றுக்கேற்ப,   எவ்வளவு பழமை மிக்க செறிவு கொண்ட மொழியாயினும், காலத்துக்கேற்றவாறு தம்மை தகவமைத்துக் கொள்ளாமல் இருப்பவை அழிந்து போயின, போகின்றன. மொழியுடன் சேர்ந்து அதனூடாக வளர்க்கப்பட்ட மரபார்ந்த அறிவும், கலாச்சாரமும், வரலாறும் அழிந்து போகின்றன. 

'எவ்வ துறைவது உலகம் உலகத்தோடு
அவ்வ துறைவது அறிவு'.

என்ற வள்ளுவர் வாக்கிற்கிணங்க பல்வேறு மாற்றங்களை செரித்து ஆயிரமாண்டுகளாக மக்களின் மொழியாக மக்களுடன் பீடு நடை போட்டு வரும் தமிழ் மொழி, கணினி எனும் உலகை ஆளும் அசுர இயந்திரத்திற்குள்ளும் தன்னைப் பொருத்தி கொள்வதன் மூலமே இனி வரும் தலைமுறைகளுக்கும் நிலைத்திருக்க முடியும்.

'மறைவாக பழங்கதைகள் நமக்குள்ளே சொல்வதிலோர் மகிமையில்லை
திறமான புலமை எனில் வெளிநாட்டோர் அதை வணக்கஞ் செய்தல் வேண்டும்' என்று பாரதி கூறியது போல,