ஓர்ந்துகண் ணோடாது இறைபுரிந்து

குறள் 541

ஓர்ந்துகண் ணோடாது இறைபுரிந்து யார்மாட்டும் 

தேர்ந்துசெய் வஃதே முறை.

[பொருட்பால், அரசியல், செங்கோன்மை]

பொருள்

ஓர்ந்து - ஓர்-த்தல் - ōr-   11 v. tr. [M. ōr.] 1. To consider; ஆராய்தல் 2. To select, choose; தெரிந்தெடுத்தல். ஆயிரத் தோர்த்தவிப்பத்தே (திவ். திருவாய்.1, 2, 1). 3. To think, regard; நினைத்தல் வேள்வியோர்க்கும்மே யொருமுகம் (திருமுரு. 96). 4. Tolisten attentively; கூர்ந்து கேட்டல் புலிப்புகர்ப்போத்தோர்க்கும் (புறநா. 157, 12).
கண்ணோட்டம் -  கண்பார்வை (Glance, look, vision), தாட்சிணியம் (Regard, kindness, partiality,glow of kind feeling towards a friend or even acasual acquaintance, reluctance to deny arequest made by a friend or acquaintance,humanity, fellow-feeling;); இரக்கம், கடைக்கண்பார்வை, அருள்காட்டுதல்; பார்வையிடுதல்.

கண்ணோடாது - தாட்சிணியம் இல்லாமல்

இறை - உயரம்; தலை கடவுள் தலைவன் அரசன் உயர்ந்தோன்; மூத்தோன் பெருமையிற்சிறந்தோன்; கணவன் பறவையிறகு; கடன் வீட்டிறப்பு மறுமொழி மணிக்கட்டு குடியிறை சிறுமை அற்பம் காலவிரைவு; சிவன் பிரமன் மாமரம்

புரிந்து - புரிதல் - puri-   4 v. tr. 1. To desire;விரும்புதல். புகுமுகம் புரிதல் (தொல். பொ. 261).2. To meditate upon; தியானித்தல். இறைவன். . . புகழ் புரிந்தார் (குறள், 5). 3. To do, make;செய்தல். தினைத்துணையு நன்றி புரிகல்லா (நாலடி,323). 4. To create; படைத்தல். எவ்வுலகும் புரிவானை (சிவப். பிரபந். வெங்கைக்க. 65). 5. Tobring forth, produce; ஈனுதல். பொன்போறார்கொன்றைபுரிந்தன (திணைமாலை. 109). 6. To give;கொடுத்தல். பெருநிதி வேட்டன வேட்டனபுரிந்தாள்(உபதேசகா. சிவவிரத. 257). 7. To experience, suffer; அனுபவித்தல். புண்டரிகை போலுமிவ ளின்னல்புரிகின்றாள் (கம்பரா. சூளா. 1). 8. To gaze at,watch intently; உற்றுப்பார்த்தல். பயத்தாலே புரிந்துபார்க்கிறபோது (திவ். திருநெடுந். 21, வ்யா. பக். 174).9. To investigate, examine; விசாரணை செய்தல்.அறம் புரிந்தன்ன செங்கோ னாட்டத்து (புறநா. 35).10. To say, tell; சொல்லுதல். அந்தணாளர் புரியு மருமறை (தேவா. 865, 5). 11. To exercise, perform;நடத்துதல். அரசு புரிந்தான். 12. To accept; மேற்கொள்ளுதல். போக்குவரவு புரிய (சி. போ.

யார்மாட்டும் - யாரிடத்திலும் (பரிமேலழகர்: வலியார், ஒப்பார், எளியார்)

தேர்ந்து - தேர்ந்துசெயல் - - செயல்கை கூடும் வகையறிந்து செயல்புரிகை ஆற்றலும்

செய்வஃதே - செய்வதே

முறை - நீதி; அடைவு; நியமம்; ஆள்மாறிமாறிவேலைசெய்யும்நியமம்; தடவை; பிறப்பு; ஒழுக்கம்; உறவு; உறவுமுறைப்பெயர்; அரசநீதி; பழைமை; ஊழ்; கூட்டு; நூல்; தன்மை; காண்க:முறையீடு; கற்பு.

முழுப்பொருள்

அரச நீதி, செங்கோன்மை என்பது யாது எனில் தன் கீழ் வாழும் மக்களின் ஒரு வழக்கில் (அல்லது மக்களுக்காக ஆற்றப்படும் செயலிலோ) அவ்வழக்கை (அல்லது செயலை) நன்கு ஆராய்ந்து, அதனை பற்றி தகவல்களை கூர்ந்து கேட்டு சேகரித்து நீதி நூல்கள் கூறும் அறத்தை பின்பற்றி யாரிடத்திலும் எந்த வித தாட்சிணியமும் (அதாவது ஒரு தலை பட்சமாக, சார்பு) இல்லாமல் ஒரு அரசனாக ஒரு தலைவனாக அச்செயலை தேர்ந்து அற நூல்கள் சொன்னபடி செய்வதே ஆகும். ஒரு வழக்கிற்கு நடுநிலைமையான தீர்ப்பு நீதியாகும். ஒரு செயலுக்கு நடுநிலைமையான அறத்திற்கு புறம்பல்லாத திட்டமும் செயலும் நீதியாகும். அதுவே அரச நீதியாகும்.

இங்கே செங்கோன்மையில் முதலாவதாக அரசருக்கு சொல்லபடும் தலைமைபண்பு நடுவுநிலைமை என்பது முக்கியமாக காணவேண்டியது. ஆதலால் தான் என்னவோ சிலப்பதிகாரத்தில் நன்கு ஆராயாமல் பாண்டிய அரசன்  நெடுஞ்செழியன் கொடுத்த தவறான தீர்ப்பிற்கு கண்ணகி தலைநகர் மதுரையை எரித்தாள் என்பதை சிலப்பதிகாரத்தில் கண்டோம்.  “கோனுயரக் குடி உயரும்” என்பதும் சான்றோர் வாக்கே. செங்கோல் தாழ்ந்ததால், மானமுடைய அரசர் உயிர் துறப்பர் என்பதற்கு சிலப்பதிகாரப் பாண்டிய அரசன் நெடுஞ்செழியனே சான்று.

குற்றங்குணங்களை ஆராய்தல், நடுவு நிலைமை, நம்மவர் என்கிற சார்பின்மை என்பவற்றைப்பற்றி அறத்துப்பாலின் கண்ணும் வள்ளுவர் சொல்லியிருக்கிறார். “சமன்செய்து சீர்தூக்குங் கோல்போல் அமைந்தொருபால் கோடாமை சான்றோர்க் கணி” என்று “நடுவு நிலைமை” அதிகாரத்துக் குறளாலும், “எப்பொருள் எத்தன்மைத்தாயினும் அப்பொருள் மெய்ப்பொருள் காண்பதறிவு” என்று “மெய்யுணர்தல்” அதிகாரத்துக் குறளாலும், “எப்பொருள் யார்யார் வாய்கேட்பினும் அப்பொருள் மெய்ப்பொருள் காண்பதறிவு” என்று “அறிவுடைமை” அதிகாரத்துக் குறளாலும் ஏற்கனவே இக்குறளின் மொத்தக்கருத்தையும் கூறியிருப்பதை நினைவு கூறலாம். மற்ற யாவரையும் விட, ஆள்வோர்க்கு செங்கோன்மை இன்றியமையாததாகும்.

மேலும்: அஷோக் உரை

ஒப்புமை

”முறைஎனப் படுவது கண்ணோடாது உயிர்வௌவல்” (கலி.133:13)

“கறவைக்கன் றூர்ந்தானைத் தந்தையும் ஊர்ந்தான்

முறைமைக்கு மூப்பிளமை இல்” (பழமொழி.93)

”எங்கண் ணனையர் எனக்கருதின் ஏதமால்

தங்கண்ணே யானும் தகவில் கண்டக்கால்

வன்கண்ண னாகி ஒறுக்க, ஒறுக்கல்லா

மென்கண்ணன் ஆளான் அரசு” (பழமொழி 322)

”நீமெய் கண்ட தீமை காணின்

ஒப்ப நாடி அத்தக வொறுத்தி” (புறநா.10:3-4)

“ஏமம் வேண்டுவோன் முறைசெயல் தண்டான்” (முதுமொழிக் 10:9)

பரிமேலழகர் உரை

[அஃதாவது , அரசனால் செய்யப்படும் முறையினது தன்மை. அம்முறை ஒருபாற்கோடாது செவ்விய கோல் போறலின் ' செங்கோல் ' எனப்பட்டது. வடநூலாரும் , ' தண்டம் ' என்றார் . அது சோர்வில்லாத அரசனால் செயற்பாலது ஆகலின் , இது பொச்சாவாமையின் பின் வைக்கப்பட்டது .]

ஓர்ந்து - தன்கீழ் வாழ்வார் குற்றம் செய்தால் அக்குற்றத்தை நாடி: யார்மாட்டும் கண்ணோடாது, இறை புரிந்து - நடுவு நிலைமையைப் பொருந்தி, தேர்ந்து - அக்குற்றத்திற்குச் சொல்லிய தண்டத்தை நூலோரோடும் ஆராய்ந்து, செய்வஃதே முறை - அவ்வளவிற்றாகச் செய்வதே முறையாம். 

(நடுவு நிற்றல் இறைக்கு இயல்பு ஆகலின், அதனை இறை என்றும் உயிரினும் சிறந்தார் கண்ணும் என்பார் 'யார் மாட்டும்' என்றும் கூறினார். இறைமை 'இறை' எனவும் , செய்வது 'செய்வஃது' எனவும் நின்றன. இதனான் செங்கோன்மையது இலக்கணம் கூறப்பட்டது.).

மணக்குடவர் உரை

ஒருவன் செய்த குற்றத்தை ஆராய்ந்து நட்டோரென்று கண்ணோடாது தலைமையைப் பொருந்தி யாவர்மாட்டும் குற்றத்திற்குத் தக்க தண்டத்தை நூல்முகத்தாலாராய்ந்து அதன் வழியே செய்வது முறையென்று சொல்லப்படும். யார்மாட்டும் என்றது தன்சுற்றமாயினு மென்றது.

மு.வ உரை

யாரிடத்திலும் (குற்றம் இன்னதென்று) ஆராய்ந்து, கண்ணோட்டம் செய்யாமல் நடுவுநிலைமைப் பொருந்தி (செய்யத்தக்கதை) ஆராய்ந்து செய்வதே நீதிமுறையாகும்.

சாலமன் பாப்பையா உரை

குடிமக்கள் செய்யும் குற்றத்தை ஆய்ந்து எவரிடத்தும் விருப்பு, வெறுப்பு இல்லாமல், நடுநிலையோடு நூல்வழி ஆராய்ந்து, குற்றத்திற்கு ஏற்ற தண்டனையை வழங்குவதே நேர்மையான ஆட்சி.

Thirukkural - Management - Leadership

One of the responsibilities of a leader is to meet out proper justice to his followers. Delivering disinterested, means being impartial, justice is a challenge to a leader. A leader who is known for justice is fair and firm. A just leader has three actions to perform as presented in Kural 541.

Searching enquiry, an impartial eye, punishment as

prescribed are the ways of justice.

The three actions are: 1) He has to assess impartially the crime committed by someone, 2) He should not show any leniency after the assessment, and 3) He has to pronounce the decided punishment according to the seriousness of the crime committed.

இறந்த வெகுளியின் தீதே

குறள் 531

இறந்த வெகுளியின் தீதே சிறந்த 

உவகை மகிழ்ச்சியிற் சோர்வு.

[பொருட்பால், அரசியல், பொச்சாவாமை]

பொருள்
பொச்சாவாமை  - மறவாமை - மறதி இல்லாமை - மறதியின்மை

இறந்த - இற - iṟa   VII. v. i. die, expire, perish, சா; 2. become obsolete, பழமையாகு; 3. pass (as time) செல்லு; 4. exceed the measure or limit, கட; 5. excel, be preeminent, மிகு.
வெகுளி - சினம்; வெறுப்பு; கபடமற்றவர்.

வெகுளியின்  - சினத்தை விட
தீது - தீமை - கொடுமை; குற்றம்; பாவச்செயல்; குறும்பு; இறப்பு; முதலியன

தீதே - குற்றமே 

சிறந்த - சிறப்பு - பெருமை; திருவிழா; செல்வம்; அன்பளிப்பு; மதிப்பு; தலைமை; பகட்டு; காண்க:சிறப்பணி; இன்பம்; ஒன்றற்கேயுரியது; வரிசை; போற்றுகை; மிகுதி; வீடுபேறு.

உவகை - மகிழ்ச்சி; களிப்பு; அன்பு; காமம்; இன்பச்சுவை

மகிழ்ச்சியின் - மகிழ்ச்சி, உவகை; மகிழ்ச்சியணி; சந்தோஷம் 

சோர்வு - தளர்ச்சி; மறதி; மெலிவு; இழுக்கு; சொரிகை; திருட்டு; விபசாரம்.

முழுப்பொருள்
ஒருவருக்கு சினம் மிகுந்த தீமையை தரும் என்று நாம் முன்னரே  [குறள் 431 செருக்குஞ் சினமும் சிறுமையும் இல்லார் பெருக்கம் பெருமித நீர்த்து] [குறள் 304 நகையும் உவகையும் கொல்லும் சினத்தின்பகையும் உளவோ பிற] பார்த்தோம். சில சமயங்களில் அளவுக்கு மிகுந்து வரும் கோபத்தினால் நமக்கு மிகுந்த தீமை உண்டாகும். நம் வாழ்விற்கு பங்கமாக அமையும். ஆனால் அதை விட தீது சோர்வாகும். இச்சோர்வினால் நமக்கு பல கேடு உருவாகும். உதாரணமாக மறதி, செயலற்ற தன்மை, தேக்கம் ஆகியவை. ஆதலால் அதீத மகிழ்ச்சியினில் முக்கியமாக நாம் ஒரு சாதனை படைத்த பின்பு வரும் (உதாரணமாக ஒரு மிக பெரிய இடத்தில் வேலை வாங்குவது, ஒரு தொழிலில் அதிகம் லாபம் ஈட்டுவது) சோர்வென்பது நம்மை அழிக்கும். நமக்கு மறதியை கொடுக்கும். நம் வாள்கள் துரு பிடிக்கும். அறிவு மங்கும். உடல் தளர்ச்சி பெரும். புகழ் குன்றும். மொத்தத்தில் தேக்கம் உண்டாகும். இது நல்லது கிடையாது. இது நம்மை அடுத்த கட்டத்திற்கு கொண்டு செல்லாமல் முழுமையை நோக்கி கொண்டு செல்லாமல் கீழ்மை நோக்கி கொண்டு செல்லும்.

மறதி/சோர்வு என்று மட்டும் சொல்லாமல்? ஏன் சிறந்த உவகை மகிழ்ச்சியிற் சோர்வு என்று கூறினார்? இரண்டு வகையாக மனிதர்களை பிரிக்கலாம். ஒருவர் அறிவுடையோர். மற்றொருவர் அறிவில்லாதவர்கள். அறிவில்லாதவர்கள் புற உலக கேளிக்கை அளிக்கும் சந்தோஷங்களில் திளைக்கிறார்கள். அப்படிப் திளைக்கும் பொழுது தங்களது கடமைகளையும் / பொறுப்புகளையும் / செயல்களையும் மறக்கிறார்கள். அறிவுடையவர்களோ தான் பெற்ற வெற்றிகளினால் அக உலகில் சந்தோஷமடைந்து திளைக்கிறார்கள். அப்படித் திளைக்கும் பொழுது தன்னை வளர்த்துக்கொள்ள தன்னைப் புதிப்பித்துக்கொள்ள மறந்துவிடுகிறார்கள். இவையாவும் தேக்கத்தின் துவக்கம். அழிவின் துவக்கம். தீதானது.

வாழ்வு ஒரு ஒட்டம் அல்ல எனினும், முன்னேற்றமும் மேம்படுதலும் ஒவ்வொருவர் வாழ்விலும் அவசியம். சாதனைகளில் திளைத்துக்கொண்டு சோர்வு வர வழிவிடாமல் மேன்மேல் வளர தொடர்ந்து செயலாற்ற வேண்டும். இவ்வுலகத்தில் மனிதர்கள் செய்யக்கூடியவை பல உண்டு. அதனால் தான் வள்ளுவர் சொன்னார்.  

குறள் 68

தம்மின்தம் மக்கள் அறிவுடைமை மாநிலத்து

மன்னுயிர்க் கெல்லாம் இனிது

குறள் 63

தம்பொருள் என்பதம் மக்கள் அவர்பொருள்

தம்தம் வினையான் வரும்

மகாத்மா காந்தியைப் பாருங்கள் அவர் அளவு உழைத்தவர்கள் மிக மிக அரிது. அவர் ஒருப்பக்கம் சுதந்திரப்போரட்டத்திற்கு பாடுபாட்டாலும், அவர் தொடர்ந்து இந்தியா முழுவதும் பயணங்களும், தினமும் பலர் கடிதங்களும் பதில்களும், கிராம முன்னேற்றம், இயற்கை மருத்துவம் போன்ற பலதளங்களில் செயலாற்றிக்கொண்டு இருந்தார். ஒரு மனிதனின் செயலாற்றும் திறன் ஒருவர் நினைத்துப்பார்க்கக்கூடியதைவிட மிக மிக அதிகம். அதற்கு ஒருவர் உணரவேண்டியது வாழ்வில் சோர்வினாலோ எக்காராணத்தினாலோ ஒரு நிமிடத்தையும் வீணடிக்கலாகாது என்பது தான். 

ஓடும் நதியில் நோய் இல்லை என்று நாம் அறிவோம். தேங்கிய நீர் ஆபத்தானது என்றும் அறிவோம். அதனால் தேங்காமல் நதி போன்று சோம்பல் இல்லாமல் ஓடிக்கொண்டே இருக்க வேண்டும்.

மேலும்: அஷோக் உரை

பரிமேலழகர் உரை

[அஃதாவது , உருவும் திருவும் ஆற்றலும் முதலாயவற்றான் மகிழ்ந்து தற்காத்தலின் பகையழித்தல் முதலிய காரியங்களினும் சோர்தலைச் செய்யாமை. மேற்சொல்லிய சுற்றத்தாரால் பயனுள்ளது இச்சோர்வுஇல்வழியாகலின் , இது சுற்றம் தழாலின் பின் வைக்கப்பட்டது.]

சிறந்த உவகை மகிழ்ச்சியின் சோர்வு - மிக்க உவகைக் களிப்பான் வரும் மறவி, இறந்த வெகுளியின் தீது - அரசனுக்கு அளவிறந்த வெகுளியினும் தீது. 

(மிக்க உவகை பெருஞ்செல்வம், பேரின்பம், பெருமிதம் என்று இவற்றான் வருவது. அளவு, பகைவரை அடர்த்தற்கும் கொடியோரை ஒறுத்தற்கும் வேண்டுவது. இறந்த வெகுளி: ஒரோவழிப் பகைவரையும் கொல்லும், இஃது அன்னதன்றித் தன்னையே கோறலின், அதனினும் தீதாயிற்று).

மணக்குடவர் உரை

மிகுந்த வெகுளியினும் தனக்குத் தீமையைச் செய்யும்; மிக்க உவகைக்களிப்பினால் வரும் மறப்பு. தனக்குச் சிறந்த உவகை தன்மகிழ்ச்சியாற் சோருஞ் சோர்வு என்றும், உய்க்க வேண்டுமவரிடத்து உய்க்கும் உவகை என்றுமாம்.

மு.வரதராசனார் உரை

பெரிய உவகையால் மகிழ்ந்திருக்கும் போது மறதியால் வரும் சோர்வு, ஒருவனுக்கு வரம்பு கடந்த சினம் வருவதைவிடத் தீமையானதாகும்.

சாலமன் பாப்பையா உரை

மிகுந்த மகிழ்ச்சிப் பெருக்கால் வரும் மறதி, அளவு கடந்த கோபத்தைக் காட்டிலும் கொடுமையானது.

விருப்பறாச் சுற்றம் இயையின்

குறள் 522

விருப்பறாச் சுற்றம் இயையின் அருப்பறா

ஆக்கம் பலவும் தரும்.

[பொருட்பால், அரசியல், சுற்றந்தழால்]

பொருள்

விருப்பு - விருப்பம் - ஆசை; அன்பு; பற்று

அறாச் - அகலாத

சுற்றம் - உறவினரர்; பரிவாரம்; அரசர்க்குரிய துணையில் ஒன்று; கூட்டம்; ஆயத்தார்.
இயை - iyai   s. junction, union, இசைப்பு, iyai   II. v. i. (poet, for இசை) join, agree, பொருந்து; be proper for, agreeable to; அழகு; புகழ் இசைப்பு வாழை

இயையின்  -

அருப்பு- அரும்புதல் (துளிர்த்தல்) 

அறா - கருகி ஓயாது

ஆக்கம் - அமைத்துக்கொள்ளுகை; கைகூடுகை; உண்டுபண்ணுகை; படைப்பு செல்வம் பொன் பெருக்கம் இலாபம் ஈட்டம் கொடிப்படை திருமகள் மங்களகரம் வாழ்த்து

பலவும் - pala   pron. cf. bahula. [K. hala, M.pala.] Many, several, diverse; ஒன்றுக்கு மேற்பட்டவை.

தரும் - கொடுக்கும்

முழுப்பொருள்

இக்குறளை இரு இடங்களில் வைத்து பார்க்கிறேன். ஒன்று குடும்பம். மற்றொன்று அலுவலகம் மற்றும் அரசின் அமைச்சகம்.

1) முதலாவதாக குடும்பம். ஒரு குடும்பத்தில் ஓயாது ஆத்மார்தமாக அன்பு செலுத்தும் உறவினர்கள் சுற்றமாக இருந்தால் அவனுக்கு குன்றாத பல வகை செல்வமும் வளங்களும் வாழ்வில் வரும். உதாரணமாக ஒரு குடும்பத்தில் ஒவ்வொருவரும் ஒவ்வொரு துறையில் அறிவு உள்ளவராக இருப்பார்கள். குறைந்தது அதனை பற்றி தெரிந்தவரையாவது தெரிந்து வைத்திருக்க வாய்ப்பு உண்டு அல்லது அப்படி ஒருவரை தேடி கண்டுபிடிக்கும் வல்லமையும் எண்ணமும் உண்டு. இப்படி ஒருவர் இருப்பின் நமது உறவினரே நம்மீது அன்பு கொண்டு நமக்கு உதவுவர். இது நமக்கு வளர்ச்சியை கொடுக்கும். ஒரு விதத்தில் இது ஒரு உலகியல் லாபம். இன்னொரு விதத்தில் நம்மை நல்ல நிலையில் காண வேண்டும் என்று நினைப்போர் நம்மை அன்பால் நல்வழி படுத்துவார்கள். நாம் தீய பழக்கங்களில் சிக்கினால் கூடா நட்பில் இருந்தால் நம்மை நல் வார்த்தை பேசி திருத்துவர். நாம் சோர்வாக இருக்கும் நேரங்களில் நம்மை உத்வேக படுத்தவர். இவையெல்லாம் நம்மை நல்வழியில் செலுத்தி நமக்கு செல்வங்களை கொடுக்கும். சுறுக்கமாக சொன்னால் நிபந்தனையற்றை அன்புக்கொண்ட அன்பர்கள் நம்மை சுற்றி இருந்தால் நம் வாழ்வு சற்று இலகுவாக்கிவிடும். 

2) இரண்டாவதாக அலுவலகம்/அமைச்சகம். ஒரு வேலை செய்யும் இடத்தில் சுற்றம் மிக முக்கியம். கூட வேலை செய்வோர் விருப்பத்துடன் ஆசையாக வேலை செய்தால் தான் அந்த சக்தி (energy), புத்துணர்ச்சி நம்மையும் தொற்றிக்கொண்டு நம்மையும் உத்வேகத்துடன் வேலை செய்ய வழி வகுக்கும். அப்படி ஆசைக்கொண்டவர்கள் நாம் தவறு செய்தால் அதனை திருத்தி நம்முடைய ஆற்றலை கூட்டுவர். நம்மை மெருகேற்றுவர். அது ஒரு மிகப்பெரிய செல்வமாகும். எல்லா நல்ல புத்துணர்ச்சிகளும் (positive energy) நம்மை அடுத்த இடத்திற்கு கட்டத்திற்கு கொண்டு செல்லும்.

உதாரணமாக இசை அமைப்பாளர் ஏ.ஆர்.ரஹ்மான் தன்னை சுற்றி உள்ளவர்கள கொடுக்கும் உத்வேகம் தன்னை மெருகேற்றுகிறது என்று கூறி உள்ளார். 

https://youtu.be/a44vlfpnBvU?t=11m37s   (ஏ.ஆர். ரஹ்மான் உடன் நேர்காணல்)

சுறுக்கமாக சொன்னால் நிபந்தனையற்றை அன்புக்கொண்ட அன்பர்கள் நம்மை சுற்றி இருந்தால் நம் வாழ்வு சற்று இலகுவாக்கிவிடும். 

 

மேலும்: அஷோக் உரை

பரிமேலழகர் உரை

விருப்பு அறாச் சுற்றம் இயையின் - அன்பு அறாத சுற்றம் ஒருவற்கு எய்துமாயின், அருப்பு அறா ஆக்கம் பலவும் தரும் - அஃது அவற்குக் கிளைத்தல் அறாத செல்வங்கள் பலவற்றையும் கொடுக்கும்.

(உட்பகையின் நீக்குதற்கு 'விருப்புஅறாச் சுற்றம' என்றும், தானே வளர்க்கும் ஒரு தலையாய செல்வத்தின் நீக்குதற்கு அருப்பு அறா ஆக்கம் என்றும், விசேடித்தார். தொடை நோக்கி விகார மாயிற்று. 'இயையின' என்பது, அதனது அருமை விளக்கி நின்றது. ஆக்கம் என்பது ஆகுபெயர். பலவும் என்பது அங்கங்கள் ஆறினையும் நோக்கிப் பலர் கூடி வளர்த்தலின், அவை மேல்மேல் கிளைக்கும் என்பது கருத்து.).

மணக்குடவர் உரை

அன்பறாத சுற்றம் ஓரிடத்தே பொருந்தி யொழுகு மாயின், அது கிளைத்தலறாத ஆக்கமாகிய பலவற்றையுந் தரும்.

மு.வரதராசனார் உரை

அன்பு நீங்காத சுற்றம் ஒருவனுக்குக் கிடைத்தால், அது மேன்மேலும் வளர்ச்சி குறையாத ஆக்கம் பலவற்றையும் அவனுக்குக் கொடுக்கும்.

சாலமன் பாப்பையா உரை

ஒருவனுக்கு அன்பு நீங்காத சுற்றம் மட்டும் அமைந்து விடுமானால், அவனுக்கு அது வளர்ச்சி குறையாத செல்வங்கள் பலவற்றையும் கொடுக்கும்.

நன்மையும் தீமையும் நாடி

குறள் 511

நன்மையும் தீமையும் நாடி நலம்புரிந்த

தன்மையான் ஆளப் படும்

[பொருட்பால், அரசியல், தெரிந்துவினையாடல்]

பொருள்

நன்மையும் - நன்மை - நலம்; பயன்; உதவி; சிறப்பு; நன்னெறி; நற்குணம்; ஆக்கம்; நற்செயல்; நல்வினை; வாழ்த்துமொழி; மிகுதி; மேம்பாடு; புதுமை; அழகு; நல்லருள்; காண்க:நன்மையாதல்.

தீமையும் - தீமை - கொடுமை; குற்றம்; பாவச்செயல்; குறும்பு; இறப்பு; முதலியன

நாடி - நாட்டிலுள்ளவள்; நாட்டையுடையவள்; இரத்தக்குழாய்முதலியன; மூச்சுக்குழாய்யாழின்நரம்பு; உட்டொளை; பூவின்தாள்; நாழிகை; மூக்கு; மோவாய்; மாளிகையின்மேற்பாகத்தோர்உறுப்பு; சோதிடநூல்; தாதுநரம்பு; இலைநரம்பு.

நாடி - அவற்றை நோக்கி

நலம் - நன்மை; இன்பம்; உதவி; கண்ணோட்டம்; அழகு; அன்பு; ஆசை; குணம்; பயன்; புகழ்; உயர்வு; நல்வாழ்வு; நிறம்; செம்மைநிறம்; விருச்சிகராசி; எருதின்விதை; சுக்கு; அறம்.

புரிந்த - புரிதல் - puri-   4 v. tr. 1. To desire;விரும்புதல். புகுமுகம் புரிதல் (தொல். பொ. 261).2. To meditate upon; தியானித்தல். இறைவன். . . புகழ் புரிந்தார் (குறள், 5). 3. To do, make;செய்தல். தினைத்துணையு நன்றி புரிகல்லா (நாலடி,323). 4. To create; படைத்தல். எவ்வுலகும் புரிவானை (சிவப். பிரபந். வெங்கைக்க. 65). 5. Tobring forth, produce; ஈனுதல். பொன்போறார்கொன்றைபுரிந்தன (திணைமாலை. 109). 6. To give;கொடுத்தல். பெருநிதி வேட்டன வேட்டனபுரிந்தாள்(உபதேசகா. சிவவிரத. 257). 7. To experience, suffer; அனுபவித்தல். புண்டரிகை போலுமிவ ளின்னல்புரிகின்றாள் (கம்பரா. சூளா. 1). 8. To gaze at,watch intently; உற்றுப்பார்த்தல். பயத்தாலே புரிந்துபார்க்கிறபோது (திவ். திருநெடுந். 21, வ்யா. பக். 174).9. To investigate, examine; விசாரணை செய்தல்.அறம் புரிந்தன்ன செங்கோ னாட்டத்து (புறநா. 35).10. To say, tell; சொல்லுதல். அந்தணாளர் புரியு மருமறை (தேவா. 865, 5). 11. To exercise, perform;நடத்துதல். அரசு புரிந்தான். 12. To accept; மேற்கொள்ளுதல். போக்குவரவு புரிய (சி. போ.

தன்மை - குணம்; இயல்பு; நிலைமை; முறை; பெருமை; ஆற்றல்; நன்மை; மெய்ம்மை; தன்னைக்குறிக்குமிடம்; ஒரணி.

தன்மையான் - அத்தன்மை உடையவன்

ஆளப்படும் - ஆளுகை - ஆட்சி; ஆளுதல்; உரிமை; ஆளுகை அதிகாரம் ஆன்றோர்வழக்கு; அனுபவம் தாயமுறையில்வந்தஉரிமை; மக்கள்அணையலாகாதெனக்கட்டளையிடப்பட்டஇடம்; கோள்நிலை; கிழமை

முழுப்பொருள்

ஒரு செயல் என்பது பல ஆற்றலை எடுத்துக்கொள்ளும். ஆதலால் அதனை செய்வதில் ஒரு ஒழுங்கு இருக்க வேண்டும். அச்செயலின் நன்மை தீமைகளை நன்கு ஆராய வேண்டும். நன்மை தீமைகளை ஆராய்ந்து பின்பு நலம் அதிகம் பயக்கும் எனில் அத்தகைய செயலை செய்ய வேண்டும். அதுவே சிறப்பாகும்.

பழமொழி நானூற்றுப் பாடலொன்று இக்கருத்தை ஒட்டியது, இவ்வாறு செல்கிறது.

நல்லவும் தீயவும் நாடிப் பிறருரைக்கும்

நல்ல பிறவும் உணர்வாரைக் கட்டுரையின்

வல்லிதின் நாடி வலிப்பதே புல்லத்தைப்

புல்லம் புறம்புல்லு மாறு. (பழமொழி 104)

நல்லனவற்றையும் தீயனவற்றையும் நூல்களால் ஆராய்ந்து இரண்டு காளைகள் ஒன்றுகொன்று முரண்படாமல், ஒன்றாக சேர்ந்து ஒரு வண்டியை இழுப்பதைபோல, அரசனும் அமைச்சர்களும் ஒன்றிணைந்து செயலாற்றினால் செய்யும் வினைகள் செம்மையாகும் என்ற கருத்தைக் கூறுகிறது இப்பாடல்

கம்பராமாயணம் மகேந்திரப்படலப் (11)  பாடல் ஒன்று, ஜாம்பவான் அனுமனைப் பார்த்து இவ்வாறு கூறுகிறார்.

நல்லவும் ஒன்றோ, தீயவும் நாடி நவை தீரச்

சொல்லவும் வல்லீர்; காரியம் நீரே துணிவுற்றீர்;

வெல்லவும் வல்லீர்;

நல்லனமட்டுமன்றித் தீயவற்றையும் நாடி, குற்றம் தீரும்வரையில் தீர்வுகூறும் திறம் அனுமனிடம் உண்டு; தவிர செயலை செய்யும் துணிவும், வெற்றியுடன் முடிக்கும் வல்லமையும் உடையவன் அனுமன் என்று ஜாம்பவான் வாய்மொழியாக அனுமனிடம் வீரமும் விவேகமும் ஒருங்கே இருந்ததைச் சொல்லுகிறார் கம்பர்.

மேலும்: அஷோக் உரை

பரிமேலழகர் உரை

[அஃதாவது , அத் தெளிப்பட்டாரை அவர் செய்யவல்ல வினைகளை அறிந்து , அவற்றின்கண்ணே ஆளும்திறம் , அதிகார முறைமையும் இதனானே விளங்கும் .]

நன்மையும் தீமையும் நாடி - அரசன் முதற்கண் ஒருவினையைத் தன்கண் வைத்தால், அதன்கண் ஆவனவும் ஆகாதனவும் ஆய செயல்களை ஆராய்ந்து அறிந்து, நலம் புரிந்த தன்மையான் - அவற்றுள் ஆவனவற்றையே விரும்பிய இயல்பினையுடையான், ஆளப்படும் - பின் அவனால் சிறந்த வினைகளிலே ஆளப்படும்.

(தன்னை உரிமை அறிதற் பொருட்டு அகம் புறங்கட்கு நடுவாயதோர் வினையை அரசன் தன்கண் வைத்தவழி, அதன்கண் ஆம் செயல்களையே செய்தவன் பின்னும் அவ்வியல்பினனாதல் பற்றி, அகமாய வினைக்கண்ணே ஆளப்படுவன் என்பதாயிற்று. 'புரிந்த' என்ற இறந்த காலத்தான், முன் உரிமை அறிதற்பொருட்டு வைத்த வினையாதல் பெற்றாம்.).

மணக்குடவர் உரை

நன்மையானவற்றையும் தீமையானவற்றையும் ஆராய்ந்து தீமையைப் பொருந்தாது நன்மையின்கண்ணே பொருந்தின தன்மையுடையவன் வினை செய்வானாகச் செய்யப்படும்.

மு.வரதராசனார் உரை

நன்மையும் தீமையுமாகிய இரண்டையும் ஆராய்ந்து நன்மை தருகின்றவற்றையே விரும்புகின்ற இயல்புடையவன் (செயலுக்கு உரியவனாக) ஆளப்படுவான்.

சாலமன் பாப்பையா உரை

ஒரு செயலை நம்மிடம் செய்யக் கொடுத்தால் அச்செயலின் நன்மை தீமை இரண்டையும் ஆராய்ந்து எது நன்மையோ அதையே செய்ய வேண்டும்.

அறம்பொருள் இன்பம் உயிரச்சம்

குறள் 501

அறம்பொருள் இன்பம் உயிரச்சம் நான்கின் 

திறந்தெரிந்து தேறப் படும்

[பொருட்பால், அரசியல், தெரிந்துதெளிதல்]

பொருள்

அறம் - நேர்மை
- நல்ல பண்பை உணர்த்துவது, நீதி வழுவாத் தன்மையை குறிப்பிடும் சொல்.
- சுகர்ம யோகத்தின் தனித்தமிழ் சொல்.
- ஒழுக்கம், தருமம்; புண்ணியம்; அறச்சாலை; தருமதேவதை; யமன்; தகுதியானது;  தவம், ஆசாரம், சமயம்; ஞானம்; நோன்பு; இதம்; இன்பம்;

பொருள் - பொருள் / செல்வம் - சொற்பொருள்; செய்தி; உண்மைக்கருத்து; செய்கை; தத்துவம்; மெய்ம்மை; நன்குமதிக்கப்படுவது; அறிவு; கொள்கை; அறம்; பயன்; வீடுபேறு; கடவுள்; பலபண்டம்; பொன்; மகன்; தந்திரம்; முலை; உவமேயம்; அருத்தாபத்தி; அகமும்புறமுமாகியதிணைப்பொருள்கள்; அர்த்தசாத்திரம்; தலைமை.

இன்பம் - மனமகிழ்ச்சி; இனிமை ஒன்பான்சுவைகளுள்ஒன்று; சிற்றின்பம், காமம் திருமணம் நூற்பயன்களுள்ஒன்று.

உயிர் - காற்று; உயிர்வளி; சீவன்; ஆதன்; ஓரறிவுயிர்முதலியஉயிரினம்; உயிரெழுத்து; ஓசை; ஒருநாழிகையில்4320-ல்ஒருகூறு; சன்மலக்கினம்.

அச்சம் - பயம்; மகளிர் நாற் குணத்துள் ஒன்று; தகடு இலேசு அகத்திமரம்; சரிசமானம் பளிங்கு

நான்கின் - நான்கிளும்

திறம் - கூறுபாடு; வகை; சார்பு; மிகுதி; கூட்டம்; நிலைபெறுதல்; வலிமை; திறமை; மேன்மை; கற்பு; நேர்மைமருத்துவத்தொழில்; வழி; வரலாறு; குலம்; ஒழுக்கம்; கூட்டம்; ஆடு80, பசு80, எருமை80கூடினகூற்றம்; கோட்பாடு; விரகு; உபாயம்; ஐந்துசுரமுள்ளஇசை; பாதி; உடம்பு; வேடம்; இயல்பு; செய்தி; காரணம்; பேறு.
தெரிந்துவினையாடல் - அமைச்சர் முதலாயினார் செய்யவல்ல செயல்களை ஆராய்ந்து அவற்றின் கண்ணே அவரை ஆளும் திறம்.

தெரிந்து - தெரிதல் - தோன்றுதல்; விளக்கமாதல்; அறிதல்; ஆராய்தல்; தெரிந்தெடுத்தல்; அரித்தெடுத்தல்; காணும்ஆற்றலைப்பெற்றிருத்தல்; மனமறிதல்; கேட்டல்.

தேற - tēṟa   adv. தேறு-. Thoroughly;கடைபோக. தேற விசாரிக்கவேணும்.  

தேற்று - tēṟṟu   III. v. t. console, comfort, ஆற்று; 2. strengthen, invigorate, nourish, பலப்படுத்து; 3. clarify, refine, சுத்தி கரி; 4. clear up, decide, தீர் VI; 5. (for. தேறு) know, know certainly, அறி.

தேற்றுதல் - தெளிவித்தல்; தெளிந்தறிதல்; சூளுறுதல்; ஆற்றுதல்; தேறுதல்கூறுதல்; தூய்மைசெய்தல்; குணமாக்குதல்; பலமுண்டாக்குதல்; ஊக்கப்படுத்துதல்.

படும் - படுதல் - உண்டாதல்; தோன்றுதல்; உதித்தல்; நிகழ்தல்; மனத்தில்தோற்றுதல்; பூத்தல்; ஒன்றன்மீதுஒன்றுஉறுதல்; மொய்த்தல்; அகப்படுதல்; புகுதல்; பெய்தல்; பெரிதாதல்; மேன்மையடைதல்; அழிதல்; சாதல்; மறைதல்; புண்காய்தல்; சாய்தல்; வாடுதல்; துன்பமடைதல்; தொங்குதல்; ஒலித்தல்; பாய்தல்; புதைக்கப்படுதல்; உடன்படுதல்; ஒத்தல்; பொறுத்தல்; முட்டுதல்.

முழுப்பொருள்
ஒருவரை நாம் ஒரு பதவியில் அமர வைக்கிறோம். அப்பதவி ஒரு முக்கியமான பொறுப்பாகும். ஆகையால் அப்பதவியில் ஒருவரை அமர வைப்பதற்கு முன்னர் நமக்கு அவர் அப்பதவிக்கு தகுதியானவரா என்ற தெளிவு மிக அவசியம். ஆகையால அவரையும் அவரை பற்றியும் நன்கு ஆராய வேண்டும் என்கிறார் திருவள்ளுவர். எவற்றை ஆராயவேண்டும்? நான்கு திறன்களை.

1) அறம் - ஒருவர் நேர்மையாக இருக்க வேண்டும். அது இன்றியமையாதது. ஒருவர் வாழ வகுக்கபட்ட நெறிகளை பின்பற்றுபவரா என்று பார்க்க வேண்டும். ஒருவர் தருமம் புண்ணியங்களை செய்கின்றவரா என்று பார்க்க வேண்டும்

2) பொருள் - அறிவு ஒரு பொருள் என்று அகராதி கூறுகிறது. ஆதலால் ஒருவர் இவ்வேலைக்கு தேவையான அறிவுச்செல்வம் உள்ளவரா என்று ஆராய வேண்டும்.  அது மட்டும் இன்றி அவரிடம் பொருள் மீது அதீத பற்று இல்லாமலும் பார்க்க வேண்டும். ஏன் எனில் பொருளின் மீது உள்ள பற்றினால் அறம் மீது களவு செய்ய தூண்டக்கூடும்

3) இன்பம் - ஒருவர் மனமகிழ்ச்சியுடன் இருக்கின்றாரா என்று பார்க்க வேண்டும். அப்படி ஒருவர் மனமகிழ்ச்சியுடன் ஒரு வேலையை செய்ய வில்லை என்றால் அவருக்கு அவ்வேலை பிடிக்கவில்லை அல்லது நாட்டம் இல்லை என்றே அர்த்தம். அத்தகைய போக்கு உடன் வேலை செய்வோரிடமும் தொற்றிக்கொள்ளும். அது தீமையை விளைவிக்கும். அது மட்டும் இன்றி ஒருவருக்கு சிற்றின்பங்களில் திளைப்பவராக இருக்க கூடாது. உதாரணமாக பெண்கள் மீது கொள்ளும் மோகம். சிறிய செயல்களில் கிடைக்கும் இன்பத்தில் திளைப்பவர் பெரிய காரியங்களில் ஈடுபட முடியாது

4) உயிர் அச்சம் - ஒருவருக்கு உயிரச்சம் முக்கியம் என்றே (நானும்) கருதிகிறேன். ஒருவர் இவ்வேலை சரியாக முடிக்க வில்லை என்றால் அது அவர் உயிருக்கு ஆபத்தாக முடியும் என்ற அச்சம் இருக்க வேண்டும். இக்காரியம் பலருடைய உயிரை பாதிக்கும் என்ற அச்சம் இருக்க வேண்டும்.

ஆதலால் ஒரு தலைவன் அறம், பொருள், இன்பம், உயிர் அச்சம் என்ற நான்கு திறன்களையும் ஒருவரிடத்தில் நன்கு ஆராய்ந்து தெளிவுப் பெற்ற பின் அவரை பணியில் அமர்த்த வேண்டும்.

மேலும்: அஷோக் உரை

எழுத்தாளர் ஜெயமோகனின் வெண்முரசு இல் மாமலர்  நாவலில் (பகுதி 14) கீழ்க்காணும் வரி வருகிறது. 

 “நால்வகை மெய்ப்பொருள்களில் அறம் காலம்பொறுத்தது. பொருள் இடம்பொறுத்தது. வீடு அறியவொண்ணாதது. கண்முன் என இருப்பது இன்பம் ஒன்றே. இன்பமளிப்பதே அறம். அதற்கு உதவுவதே பொருள். அதன் விளைவே வீடு” என குரு சொன்னதையே தானும் உரைத்தாள்

பரிமேலழகர் உரை

[அஃதாவது , அமைச்சர் முதலாயினாரைப் பிறப்புக் குணம் அறிவு என்பனவற்றையும் , செயலையும் ,காட்சி கருத்து ஆகமம் என்னும் அளவைகளான் ஆராய்ந்து தெளிதல். வலி முதல் மூன்றும் அறிந்து பகைமேற்செல்வானுக்குத் தானை வினையுற்றுச் செய்தற் பொருட்டும் அறைபோகாமைப் பொருட்டும் இது வேண்டுதலின் , அவற்றின் பின் வைக்கப்பட்டது. ]

அறம் பொருள் இன்பம் உயிர் அச்சம் - அரசனால் தெளியப்படுவான் ஒருவன், அறமும் பொருளும் இன்பமும் உயிர்ப் பொருட்டான் வரும் அச்சமும் என்னும், நான்கின் திறம் தெரிந்து தேறப்படும் - உபதை நான்கின் திறத்தான் மனவியல்பு ஆராய்ந்தால் பின்பு தெளியப்படும். 

(அவற்றுள், அற உபதையாவது, புரோகிதரையும் அறவோரையும் விட்டு அவரால் இவ்வரசன் அறவோன் அன்மையின் இவனைப் போக்கி அறனும் உரிமையும் உடையான் ஒருவனை வைத்தற்கு எண்ணினம், இது தான் யாவர்க்கும் இயைந்தது, நின் கருத்து என்னை? எனச் சூளுறவோடு சொல்லுவித்தல், பொருள் உபதையாவது: சேனைத் தலைவனையும் அவனோடு இயைந்தாரையும் விட்டு, அவரான் இவ்வரசன் இவறன் மாலையன் ஆகலின், இவனைப் போக்கிக் கொடையும் உரிமையும் உடையான் ஒருவனை வைத்தற்கு எண்ணினம், இது தான் யாவருக்கும் இயைந்தது, நின் கருத்துஎன்னை? எனச் சூளுறவோடு சொல்லுவித்தல். இன்பஉபதையாவது, தொன்று தொட்டு உரிமையோடு பயின்றாளொரு தவமுதுமகளை விட்டு, அவளால், உரிமையுள் இன்னாள் நின்னைக் கண்டு வருத்தமுற்றுக் கூட்டுவிக்க வேண்டும்என்று என்னை விடுத்தாள், அவனைக் கூடுவையாயின் நினக்குப்பேரின்பமே அன்றிப் பெரும்பொருளும் கைகூடும் எனச்சூளுறவோடு சொல்லுவித்தல். அச்ச உபதையாவது, ஒருநிமித்தத்தின் மேலிட்டு ஓர் அமைச்சனால் ஏனையோரை அவன் இல்லின்கண் அழைப்பித்து, இவர் அறைபோவான்எண்ணற்குக் குழீயினார் என்று தான் காவல் செய்து, ஒருவனால் இவ்வரசன் நம்மைக் கொல்வான் சூழ்கின்றமையின் அதனை நாம்முற்படச் செய்து, நமக்கு இனிய அரசன் ஒருவனை வைத்தல்ஈண்டை யாவர்க்கும் இயைந்தது, நின் கருத்து என்னை?எனச் சூளுறவோடு சொல்லுவித்தல். இந்நான்கினும்திரிபிலன் ஆயவழி, எதிர்காலத்தும் திரிபிலன் எனக்கருத்தளவையால் தெளியப்படும் என்பதாம். இவ்வடநூற் பொருண்மையைஉட்கொண்டு இவர் ஓதியது அறியாது,பிறரெல்லாம் இதனைஉயிரெச்சம் எனப் பாடம் திரித்துத் தத்தமக்குத்தோன்றியவாறே உரைத்தார்.).

மணக்குடவர் உரை

அறமும் பொருளும் இன்பமும் உயிரச்சமுமென்னும் நான்கின் கூறுபாட்டினையும் ஆராய்ந்து, ஆராய்ந்தபின்பு ஒருவன் அரசனால் தெளியப்படுவான். முன்பு நான்கு பொருளையும் ஆராயவேண்டுமென்றார் பின்பு தேறப்படுமென்றார்.

மு.வரதராசனார் உரை

அறம், பொருள், இன்பம், உயிர்காக அஞ்சும் அச்சம் ஆகிய நான்கு வகையாலும் ஆராயப்பட்ட பிறகே ஒருவன் (ஒரு தொழிலுக்கு உரியவனாகத்) தெளியப்படுவான்.

சாலமன் பாப்பையா உரை

அறத்தைக் காக்க அரசைக் கவிழ்ப்போம், சம்பள உயர்வு தராத அரசைக் கவிழ்ப்போம், உனக்காகவே வாழும் பெண் இவள் என்பது போல் கூறி அறம், பணம், பெண் என்னும் மூன்று பொய்க் காரணங்களால் சோதிப்பது, அவனது உயிருக்கு ஆபத்தை விளைவிப்பது போல் நடிப்பது என இந்நான்கு சோதனைகளால் ஒருவனின் மன இயல்பை ஆராய்ந்து அவனைப் பதவிக்குத் தேர்வு செய்ய வேண்டும்.