தவமும் தவமுடையார்க்கு ஆகும்

குறள் 262
தவமும் தவமுடையார்க்கு ஆகும் அவம்அதனை
அஃதிலார் மேற்கொள் வது

[அறத்துப்பால், துறவறவியல், தவம்]

(For meaning in English, scroll to the bottom of this post)

பொருள்

தவமும் - தவம் - பற்றுநீங்கியவழிபாடு; புண்ணியம்; இல்லறம்; கற்பு; தோத்திரம்; தவத்தைப்பற்றிக்கூறும்கலம்பகஉறுப்பு; வெப்பம்; காட்டுத்தீ.

தவம் - பற்றுநீங்கியவழிபாடு; புண்ணியம்; இல்லறம்; கற்பு; தோத்திரம்; தவத்தைப்பற்றிக்கூறும்கலம்பகஉறுப்பு; வெப்பம்; காட்டுத்தீ.

உடைமை - உடையனாகும்தன்மை; உடைமைப்பொருள்; செல்வம் அணிகலன் உரிமை உரியவை.

உடையார்க்கு - உடையார் - செல்வர்; சுவாமி சிலவகுப்பார்களின்பட்டப்பெயர்இலங்கையில்ஒருகிராமஅலுவலர்.

ஆகும் - நடக்கும்

அவம் – வீண்; பயனின்மை; கேடு ஆணை அழைப்பு வேள்வி ஆகாயத்தாமரை

அதனை - அந்த செயலை

அஃதிலார் - அப்படி இல்லாதவர்கள்

மேற்கொள் வது - மேற்கொள்ளுதல் -மேலேறுதல்; மேம்படுதல்பொறுப்பேற்றல்; உறுதிமொழிகூறல்; ஏற்றுக்கொள்ளுதல்; முயலுதல்; வஞ்சினம்உரைத்தல்.

முழுப்பொருள்
இக்குறளை பற்றி பல உரைகள் உள்ளன. அவை கூறும் பொருள் முற்பிறவியில் ஈன்ற பலனாக தவம் செய்ய அமைந்திருந்தால் மட்டுமே இப்பிறவியில் தவம் செய்ய முடியம். இல்லையென்றால் இப்பிறவியில் தவம் இருக்க முடியாது. ஆனால் எனக்கு அக்கருத்து ஏற்புடையதாக இல்லை.

"தவமும்" என்றால் தவத்தினால் வரும் பயன், வீடுபேறு என்பதையே நாம் இங்கு எடுத்துக்கொள்ளவேண்டும். தவம் உடையார்க்கு என்றால் காட்டுத்தீப் போன்ற உக்கிரத்துடன் கூடிய பற்று நீங்கிய தவத்தை மேற்கொள்வோர் என்றுப் பொருள். அவ்வாறு தவத்தை மேற்கொள்வோர்க்கு தவத்தின் பலனாக புண்ணியம் / வீடுபேறு  கிட்டும்.

ஆனால் பற்றுடனோ அல்லது உக்கிரம் இல்லாமல் தவம் இருந்தால் அந்த தவம் பயனின்மையே ஆகும். அத்தகைய தவத்தை மேற்கொள்வோர்க்கு நேரம் வீண் ஆகும்.

இத்தகைய தவத்தை நாம் செய்யும் எந்த ஒரு செயலுக்கும் பொருத்தலாம். எந்த ஒரு காரியத்தையும் காட்டுத்தீ போன்ற உக்கிரத்துடன் கவனம் சிதறாது வேறு செயல்களில் பற்றுஅற்று செய்தால் அந்த செயலின் (தவத்தின்) பயனாக நற்பயன் கிட்டும். இல்லையென்றால் கிட்டாது.

மேலும் 
பெரியபுராணத்தில் சேக்கிழார் கண்ணப்ப நாயனாரின் தந்தை நாகனைப் பற்றிக் கூறும்போது, அவன் முற்பிறப்பில் தவம் செய்ததனால் கண்ணப்பனை மகனாகப் பெற்றானாயினும் அவன் பிறந்த பிறப்பால் மிருகங்களைக் கொலைசெய்யும் குற்றத்தையே தன்னுடைய குல ஆசாரமாகக் கொண்டு வாழ்ந்து, கொலையாகிய கொடுமையை தன்னுடைய குணமாகக் கொண்டு வாழ்கிறான் என்கிறார்.

“பெற்றியாற் றவமுன் செய்தா னாயினும் பிறப்பின் சார்பாற்
குற்றமே குணமா வாழ்வான்; கொடுமையே தலைநின்றுள்ளான்;”


முற்பிறப்பில் செய்த தவம் நல்ல மகவை மட்டுமே ஈந்தது என்றும், இப்பிறப்பில் குலம் சார்ந்தே தொழிலும் வாழ்வும் அமைந்தது என்கிறார்.

பரிபாடல் 11:138 வரியும் இக்குறளின் கருத்தையொட்டி இவ்வாறு கூறுகின்றது. “முன்முறை செய்தவத்தின் இம்முறை இயைந்தேம்”.

”மேலைத் தவத்தால் தவம் செய்யா தார்” (நாலடி 31)

மேலும்: அஷோக் உரை

எழுத்தாளர் ஜெயமோகனின் வெண்முரசு-இமைக்கணம்-22 இல் ஒரு வரி இப்படி வருகிறது

“நதியின் விசையை கிளைகளாக, கால்களாக பிரித்து நிறுத்துகிறோம். பசுமையெனப் பொலிகிறது. பொன் என விளைகிறது” என்று இளைய யாதவர் சொன்னார். அவரை வெற்றுவிழிகளால் நோக்கினார் விதுரர். “அனைத்து தொல்விசைகளும் அழகென்றும் அறமென்றும் மெய்மையென்றும் உருமாற்றத் தக்கவையே” என்றார் இளைய யாதவர். விதுரர் தலையசைத்தார்.

சற்று நேரம் கழித்து “ஆனால் அதனினும் மறைவானது என் ஆணவம்” என்றார் விதுரர். “ஆம், நான் அஸ்தினபுரியின்மேல் விழைவுகொண்டிருந்தேன். நானே தகுதியானவன் என்று எண்ணினேன். அந்நகருக்கு நிகராக நான் கொண்டிருந்தது அந்த அருமணி. அதை விழியருகே வைத்து உள்ளே நோக்குகையில் நான் கண்டது அடுக்கடுக்கென ஒளிகொண்டு விரியும் எனக்கான நுண்நகரத்தை. என் கோல்நிற்கும் கோட்டை, என் சொல் ஆளும் நிலம்.” சொற்களுக்காகக் கொந்தளித்து பின் மெல்ல அடங்கி “நீங்கள் சொன்னதுதான் யாதவரே, அளிக்கப்படும் உரிமை உரிமையே அல்ல. கொள்ளப்படுவதும் வெல்லப்படுவதுமே மெய்யான உரிமைகள். நான் அன்பாலும் அளியாலும் பேணப்பட்டவன். இன்சொல்லின் நஞ்சுண்டு வளர்ந்தவன். அன்பெனும் சிறுமையில் திளைத்துக்கொண்டிருப்பவன்” என்றார்.

எழுத்தாளர் ஜெயமோகனின் வெண்முரசு-மாமலர் -49 இல் ஒரு வரி இப்படி வருகிறது
 “தவம் செய்க… தவத்தால் அடைவதே அரிதென்றாகும்.”

பரிமேலழகர் உரை
தவமும் தவம் உடையார்க்கு ஆகும் - பயனே அன்றித் தவந்தானும் உண்டாவது முன்தவம் உடையார்க்கே, அதனை அஃது இலார் மேற்கொள்வது அவம் - ஆகலான், அத்தவத்தை அம்முன்தவம் இல்லாதார் முயல்வது பயன் இல் முயற்சியாம். (பரிசயத்தால் அறிவும் ஆற்றலும் உடையராய் முடிவு போக்கலின், 'தவம் உடையார்க்கு ஆகும்' என்றும், அஃது இல்லாதார்க்கு அவை இன்மையான் முடிவு போகாமையின், 'அவம் ஆம்' என்றும் கூறினார்.).

மணக்குடவர் உரை
தவஞ்செய்தலும் முன்பு நல்வினை செய்தார்க்கு வரும்; அந்நல்வினையில்லாதார் அத்தவத்தை மேற்கொள்வது பயனில்லை. இது தவமிலார்க்குத் தவம் வாராது வரினுந் தப்புமென்றது.

மு.வரதராசனார் உரை
தவக்கோலமும் தவஒழுக்கமும் உடையவர்க்கே பொருந்துவதாகும்; அக் கோலத்தை தவஒழுக்கம் இல்லாதவர் மேற்கொள்வது வீண்முயற்சியாகும்.

சாலமன் பாப்பையா உரை
முற்பிறப்பில் தவ நோக்கம் பெற்றிருந்தவர்க்கே இப்பிறப்பில் தவம் செய்ய நேரும். அத்தகைய நோக்கம் இல்லாதவர், இப்போது தவத்தை மேற்கொள்வதும் வீண்தான்.

English Meaning - As I taught a kid - Rajesh

People who do the penance, without any attachment to the result, without any distraction and with single minded focus would attain the moksha/result. Whereas people who do not do penance or who are distracted during the penance would only end up wasting the time and effort during the penance

Questions that I ask to the kid

When does Tapas yield result?

Why some Tapas done doesn't yield desired result?