நீர்இன்று அமையாது உலகெனின் யார்யார்க்கும்

குறள் 20

நீர்இன்று அமையாது உலகெனின் யார்யார்க்கும்

வான்இன்று அமையாது ஒழுக்கு

[அறத்துப்பால், பாயிரவியல், வான்சிறப்பு]

(For meaning in English, scroll to the bottom of this post)

பொருள்

நீர் - தண்ணீர்; கடல்; இரசம்; பனிநீர்; உடல்இரத்தம்; பித்தநீர்முதலியநீர்மப்பொருள்; பூராடநாள்; பூரட்டாதிநாள்; ஈரம்; மணியின்ஒளி; குணம்; நிலை

இன்று - இலை; இந்தநாள்; ஓரசைச்சொல்.

இன்றி - இல்லாமல்.

அமைதல்  -  உண்டாதல்; தகுதியாதல்; பொருந்தல் அடங்குதல் நிறைதல் உடன்படுதல் முடிதல்

அமையாது - உண்டாகாது 

உலகு - உலகம், பூமி நாடு உலகத்தார்(இடவாகுபெயர்), உயர்ந்தோர், சான்றோர் திசை மங்கலச்சொற்களுள்ஒன்று

எனின் - என்றால், என்றுசொல்லின்; என்கையால்.

யார் - யாவர், எவர்

யார்க்கும் - எவருக்கும்

வான் - வானம்; மூலப்பகுதி; மேகம்; மழை; அமிர்தம்; துறக்கம்; நன்மை; பெருமை; அழகு; வலிமை; நேர்மை; மரவகை; ஒருவினையெச்சவிகுதி.

இன்று - இலை; இந்தநாள்; ஓரசைச்சொல்.

இன்றி - இல்லாமல்.

அமைதல்  -  உண்டாதல்; தகுதியாதல்; பொருந்தல் அடங்குதல் நிறைதல் உடன்படுதல் முடிதல்

அமையாது - உண்டாகாது 

ஒழுக்கு - ஒழுகுகை; நீர்முதலியனஓடுகை, நீரோட்டம்; வரிசை; நடைமுறை; நன்னடை, ஆசாரம்.

முழுப்பொருள்

இறைவனின் கருணை வடிவே மழை. அதற்காகவே கடவுள் வாழ்த்திற்கு அடுத்து வான்சிறப்பு அதிகாரத்தை திருவள்ளுவர் இயற்றியிருக்கிறார் போலும்.

 

உலகில் தங்கம் வெள்ளி எரிவாயு எண்ணெய் கலை இலக்கியம் இல்லாவிட்டால் உயிர்வாழ்ந்துவிடலாம். ஆனால் நீர் இல்லையென்றால் உலகத்தில் மனிதன் உட்பட எந்த ஒரு உயிரினமும் வாழ முடியாது. அத்தகைய நீரை உலகத்திற்கு மழையாக தருவது வானத்தில் உள்ள மேகங்கள். இந்த மழை பொய்த்துபோனால் உலகத்தில் வறுமை ஏற்படும். வறுமை ஏற்பட்டால் குற்றங்கள் பெருகும். குற்றங்கள் பெருகினால் அறம் குறையும் ஒழுக்கம் கெடும். ஆதலால் மழை பொய்த்தால் உயிர்கள் வாழ்வது மட்டும் இல்லாமலாகிவிடாது அறமும் ஒழுக்கமும் கெட்டுப்போகும். அறமும் ஒழுக்கமும் கேட்டால் கேடு விளையும் உலகம் அழியும்.

ஆதலால் மழை பொழிய தேவையான காரணிகளை (மரங்கள், காடுகள், கடல், ஆறு,  குலம் , ஏரி) பேண வேண்டும். 

லௌகீகமாக பார்த்தால் நீர் வளமாக தாரளமாக இருக்கும் இடங்களான ஆறுகளை ஒட்டியே பல சாம்ராஜ்யங்கள் வளர்ந்து செழித்து அமைந்துள்ளன. காவிரி நதியை ஒட்டியே பல சிறு குறு மன்னர்கள், பெரிய மன்னர்களான சோழர்கள் ஆகியோரின் சாம்ராஜ்யங்கள் உருவாகின. அதேப்போல் வடக்கில் கங்கை கரையை ஒட்டியே பல சாம்ராஜ்யங்கள் உருவாகியது. ஆதலால் ஒரு நகரமும் அதற்கு தேவையான செல்வமும் அமையவேண்டும் என்றால் அதற்கு தேவை அடிப்படை தேவை நீராகும். 

எழுத்தாளர் பிரபஞ்சன் ஒரு கட்டுரையில் இப்படி கூறுகிறார்

மூன்றாம் உலக யுத்தம், தண்ணீர் காரணமாகவே வரப்போகிறது’ என்கிறார்கள் உலக விஞ்ஞானிகள். காவேரி விவசாயிகள் பல்லாண்டுகள் முன்னமேயே இதைச் சொல்லிக்கொண்டிருக்கிறார்கள். 

புறநானூற்றுப் புலவர் ஒருவர் ‘உணவெனப்படுவது நிலத்தொடு நீரே’ என்று சொன்ன வரியை எடுத்துச் சொல்லும் இறையன்பு, விளைச்சலுக்கு உதவுபவர்கள் மக்களுக்கு உயிரும் உடலும் தருகிறவர்கள் என்ற தமிழரின் ‘நீர் மேலாண்மை’யை எடுத்துச் சொல்கிறார்.

அரசனைச் சுற்றி (இப்போது அமைச்சர்கள்) பொதுவாக ஜால்ராக் கூட்டமே பேரொலி செய்யும். ஓர் அசல் புலவன், மன்னனுக்கு, ‘அரசே, நீயும் உன் நாடும் நிலைத்திருக்க வேண்டும் என்றால், நீர் ஆதாரத்தை உருவாக்கு’ என்கிறான். பேராசிரியர் தொ.பரமசிவம் சொல்வது நினைவுக்கு வருகிறது. ‘நெல் பயிருக்கு ஊடு பயிராக அவரை, துவரை, கீரை, காய் என்று எத்தனை பயிர் செய்து நீரைச் சேமித்தார்கள் நம் மூதாதையர்கள்’ என்பார் அவர். நெல்லுக்கு இறைத்த நீர் புல்லுக்கும்பொசியும் வகையே, தமிழ் நீர் மேலாண்மை.

மேலும்: அஷோக் உரை

ஒப்புமை

”நீரின் றமையா உலகம் போல” (நற் 1:6)

“நீரின் றமையா யாக்கைக் கெல்லாம்” (புறநா 18:18)

“மழையின்றி மாநிலத்தார்க் கில்லை” (நான்மணி 47)

பரிமேலழகர் உரை

யார்யார்க்கும் நீர் இன்று உலகு அமையாது எனின் - எவ்வகை மேம்பாட்டார்க்கும் நீரை இன்றி உலகியல் அமையாது ஆயின்; ஒழுக்கு வான் இன்று அமையாது - அந்நீர் இடையறாது ஒழுகும் ஒழுக்கும் வானை இன்றி அமையாது. ( பொருள் இன்பங்களை 'உலகியல்' என்றார், அவை இம்மைக்கண்ண ஆகலின், இடையறாது ஒழுகுதல் எக்காலத்தும் எவ்விடத்தும் உளதாகல், நீர் இன்று அமையாது உலகு என்பது எல்லாரானும் தெளியப்படுதலின்,அது போல ஒழுக்கும் வான் இன்று அமையாமை தெளியப்படும் என்பார், 'நீர் இன்று அமையாது உலகம் எனின்' என்றார். இதனை,'நீரை இன்றி அமையாது உலகு ஆயின் எத்திறத்தார்க்கும் மழையை இன்றி ஒழுக்கம் நிரம்பாது' என உரைப்பாரும் உளர். இவை மூன்று பாட்டானும் அறம் பொருள் இன்பங்கள் நடத்தற்கு ஏதுவாதல் கூறப்பட்டது.).

மணக்குடவர் உரை

நீரையின்றி யுலகம் அமையாதாயின் யாவர்க்கும் மழையையின்றி ஒழுக்கம் உண்டாகாது. ஒழுக்கம்- விரதம். இஃது ஆசாரங்கெடுமென்றது. இவை மூன்றினானும் நான்கறமுங் கெடுமென்று கூறினார்.

மு.வரதராசனார் உரை

எப்படிப்பட்டவர்க்கும் நீர் இல்லாமல் உலக வாழ்க்கை நடைபெறாது என்றால், மழை இல்லையானால் ஒழுக்கமும் நிலைபெறாமல் போகும்.

சாலமன் பாப்பையா உரை

எத்தனை பெரியவரானாலும் நீர் இல்லாமல் வாழமுடியாது; அந்த நீரோ மழை இல்லாமல் கிடைக்காது.

குறளும் பொருளும் - பா.ராகவன் உரை

தண்ணீரின்றி எதுவுமில்லை. மழையின்றி அதுவுமில்லை.

English Meaning - As I taught a kid - Rajesh

This world and all the organisms in the world cannot exist without water. Hence, this world cannot exist without rain from the clouds in the sky

Questions that I ask to the kid

What do the world and world organisms need to exist ?