அளித்தஞ்சல் என்றவர் நீப்பின் தெளித்தசொல்

குறள் 1154
அளித்தஞ்சல் என்றவர் நீப்பின் தெளித்தசொல்
தேறியார்க்கு உண்டோ தவறு

[காமத்துப்பால், கற்பியல், பிரிவாற்றாமை]

பொருள்

அளித்து - அளித்தல் - காத்தல்; கொடுத்தல் படைத்தல் ஈனுதல் அருள்செய்தல்; விருப்பம்உண்டாக்குதல்; சோர்வைநீக்குதல்; செறித்தல் 

அஞ்சு - அஞ்சுதல், கலங்கல், மருளல் தோல்வி தபால்
அல் - Base of the appellative verb that negatives the attributes of a thing; எதிர்மறைக் குறிப்பு வினைப்பகுதி  

அல் - al   part. id. 1. Neg. verb-ending:(a) imp. sing.; எதிர்மறையேவல் ஒருமை விகுதி  

என்றவர் - என்று கூறியவர் 

நீப்பின் - நீப்பு - துறவு; பிரிவு

தெளித்த  - தெளித்தல் - தெளிவித்தல்; வெளிப்படுத்துதல்; துப்புரவாக்கல்; ஊடலுணர்த்துதல்; விதைத்தல்; கொழித்தல்; புடைத்தல்; சாறுவடித்தல்; நிச்சயித்தல்; சூளுறுதல்; தூவுதல்; நீக்குதல்; உருக்கிஓடவைத்தல்.

சொல் - மொழி; பேச்சு; பழமொழி; உறுதிமொழி; புகழ்; மந்திரம்; சாபம்; கட்டளை; புத்திமதி; பெயர்ச்சொல்; வினைச்சொல்; இடைச்சொல், உரிச்சொல்என்னும்நால்வகைமொழிகள்; தமிழ்மொழியில்உள்ளஇயற்சொல், திரிசொல், திசைச்சொல், வடசொல்எனநால்வகைப்பட்டமொழிகள்; நாடகவரங்கில்பேசப்படும்உட்சொல், புறச்சொல்; ஆகாசச்சொல்என்பன; சத்தம்; நாமகள்; பேசச்செய்வதானகள்; நெல்.

தேறினர் - tēṟiṉar   n. id. Tested or triedfriends; ஆராய்ந்துகொண்ட நண்பர். தேறினர்த்தேறலாமையும் (பாரத. சூது 72).  

தேற்றுதல் - தெளிவித்தல்; தெளிந்தறிதல்; சூளுறுதல்; ஆற்றுதல்; தேறுதல்கூறுதல்; தூய்மைசெய்தல்; குணமாக்குதல்; பலமுண்டாக்குதல்; ஊக்கப்படுத்துதல்.


தேறியார்க்கு - தேறினவன் - கலைமுதலியவற்றில்தேர்ச்சிபெற்றவன்; பட்டறிவுமிக்கவன்.

உண்டோ - இருக்கிறதா ? இருக்குமோ?

தவறு - பிழை; செயல்கைகூடாமை; நெறிதவறுகை; அழுக்கு; பஞ்சம்; குறைவு

முழுப்பொருள்

தலைவி தலைவனை பிரிந்துள்ளப் பொழுது அதற்கு தான் எவ்வாறுப் பொறுப்பில்லை என்று கூறுகிறார் இக்குறளில்.

நாங்கள் பழகிய காலங்களில் எனக்கு(தலைவிக்கு) அன்பையும் காதலையும் அள்ளி அள்ளி வழங்கிய தலைவன் என்னிடம் (தலைவியிடம்) உள்ள அச்சத்தை கண்டான். என்ன அச்சம் உனக்கு என்று கேட்டான் ? ஒன்றுமில்லை இப்பொழுது என்னிடம் ஆசையாக இருக்கும் நீங்கள் பிற்காலத்தில் என்னை விட்டு பிரிந்துவிடுவீர்களா என்று எனக்கு அச்சமாக இருக்கிறது என்று தலைவி தன் கவலையைக் கூறுகிறாள்.  பேதையே கவலைப்படாதே நான் உன்னை விட்டுப் பிரியமாட்டேன் என்று என்னிடம் தலைவியிடம் உரைத்தான் தலைவன். அச்சொற்களை (சூளுறுதல்) நம்பியே நான் அவரிடம் என்னை முழுவதுமாய் கொடுத்தேன்.

ஆனால் தலைவனோ இப்பொழுது தலைவியை விட்டு பிரிந்துள்ளான். ஆதலால் தலைவி கேட்கிறாள்: எனக்கு அன்பையும் அளித்து நான் கொண்ட நியாமான அச்சத்தையும் நீக்கி என்னைத் தேற்றியத் தலைவனின் சொல்லை நம்பினேன். அச்சொற்களை நம்பியதில் என்ன தவறு?

பிரியமாட்டேன் என்று சொன்ன தலைவனை நம்பினாயே பேதையே என்று எல்லோரும் என்னை பார்த்து மௌனமாய் நகைக்கிறார்கள்.

மேலும் அஷோக் உரை

பரிமேலழகர் உரை
(இதுவும் அது.) அளித்து அஞ்சல் என்றவர் நீப்பின் - எதிர்ப்பட்ட ஞான்றே தலையளி செய்து, நின்னிற் பிரியேன் அஞ்சல் என்றவர் தாமே பின் பிரிவாராயின்; தெளிந்த சொல் தேறியார்க்குத் தவறு உண்டோ - அவர்க்கன்றி அவர் தெளிவித்த சொல்லை மெய்யெனத் தெளிந்தார்க்குக் குற்றம் உண்டோ? ('தேறியார்' என்பது தன்னைப் பிறர்போல் கூறல். 'சொல்லும் செயலும் ஒவ்வாமைக் குற்றம் அவர்க்கு எய்தும், அஃது எய்தாவகை அழுங் குவி' என்பது கருத்து.)

மணக்குடவர் உரை
நம்மைத் தலையளிசெய்து நின்னிற் பிரியேன். நீ அஞ்சல் என்றவர் தாமே நீங்கிப் போவாராயின் அவர் தௌ¤வித்த சொல்லைத் தௌ¤ந்தவர்க்கு வருவதொரு குற்றம் உண்டோ? தன்மையைப் படர்க்கைபோற் கூறினார்.

மு.வரதராசனார் உரை
அருள் மிகுந்தவராய் அஞ்ச வேண்டா என்று முன் தேற்றியவர் பிரிந்து செல்வாரானால் அவர் கூறிய உறுதிமொழியை நம்பித் தெளிந்தவர்க்கு குற்றம் உண்டோ.

சாலமன் பாப்பையா உரை
என்னை மணந்தபோதே என்மீது அன்பு காட்டிப் பயப்படாதே, உன்னைப் பிரியமாட்டேன் என்று சொல்லி என்னைத் தேற்றிய அவர் சொல்லை, நான் நம்பியது தவறோ?.