ஊனைக் குறித்த உயிரெல்லாம் நாண்என்னும்

குறள் 1013
ஊனைக் குறித்த உயிரெல்லாம் நாண்என்னும்
நன்மை குறித்தது சால்பு

[பொருட்பால், குடியியல், நாணுடைமை]

பொருள்
ஊனைக் -ஊன் - தசை, இறைச்சி; கொழுப்பு; உடம்பு

குறித்த - நோக்கி

குறித்தல் - கருதுதல்; தியானித்தல்; வரையறுத்தல்; கோடுவரைதல்; குறித்துக்கொள்ளுதல்; சுட்டுதல்; பற்றுதல்; இலக்குவைத்தல்; அடைதல்:பாவித்தல்; சொல்லுதல்; முன்னறிவித்தல்; ஊதியொலித்தல்.

உயிர் - காற்று; உயிர்வளி; சீவன் ஆதன் ஓரறிவுயிர்முதலியஉயிரினம்; உயிரெழுத்து ஓசை ஒருநாழிகையில்4320-ல்ஒருகூறு; சன்மலக்கினம்

எல்லாம் - முழுதும்

நாண் - வெட்கம்; மகளிர்க்குரியகூச்சம்; வில்நாண்; கயிறு; மாங்கலியங்கோத்தசரடு; காண்க:அரைஞா(நா)ண்

என்னும் - யாவும், எல்லாம்; என்றுசொல்லப்படும்; யாதும்; சிறிதும்.

நன்மை - நலம்; பயன்; உதவி; சிறப்பு; நன்னெறி; நற்குணம்; ஆக்கம்; நற்செயல்; நல்வினை; வாழ்த்துமொழி; மிகுதி; மேம்பாடு; புதுமை; அழகு; நல்லருள்; காண்க:நன்மையாதல்.

குறித்தது - குறித்தல் - கருதுதல்; தியானித்தல்; வரையறுத்தல்; கோடுவரைதல்; குறித்துக்கொள்ளுதல்; சுட்டுதல்; பற்றுதல்; இலக்குவைத்தல்; அடைதல்:பாவித்தல்; சொல்லுதல்; முன்னறிவித்தல்; ஊதியொலித்தல்.

சால்பு - மேன்மை; நற்குணம்; சான்றாண்மை; தன்மை; மனவமைதி; கல்வி.

முழுப்பொருள்
உயிரானது உடலை பற்றிக்கொண்டு இருக்கும். ஆதலால் அவ்வுடலை பேண வேண்டியது நம் கடமை. உடல் இல்லையென்றால் உயிரும் இல்லை. அதுப்போல உயிர் இல்லையென்றால் உடலுக்கு பிணம்/சவம் என்றே அழைக்கப்படும்.

உயிரும் உடலும் எப்படி ஒன்றுக்குடன் தொடர்புடையதோ அதுப்போலவே சான்றாண்மையும் (மேன்மையும்) நாணமும் ஒன்றுக்குடன் தொடர்புடையது. மேன்மையெனப்படுவது நல்லவற்றை செய்து தீயவற்றை செய்யாது இருப்பது. தீயவற்றை செய்யாது இருக்க நாணம் அவசியம். அந்த நாணம்/வெட்கம் இல்லையெனில் ஒருவர் தீமை செய்ய கலங்கவே மாட்டார். ஆதலால் ஒருவர் சான்றாண்மை பெற நாணம் அவசியம். அதேப்போல் இந்த நாணம் மட்டும் இருந்து நல்ல காரியங்களை செய்யாது இருந்தால் அதுவும் மேன்மை தராது. ஒருவகையில் நல்லவனவற்றை செய்யாது இருந்தாலும் நாணம் நம்மை நாணச்செய்யும். நாணம் என்னும் நன்மை என்று கூறுகிறார் திருவள்ளுவர் ஏனெனில் நாணம் நமக்கு நற்பயன் தருகிறது, மேம்படச்செய்கிறது, நன்னெறிப்படுத்துகிறது.

உயிர் நீங்கினால் சவம் ஆவதுபோல ஆவோம் நாணம் நீங்கினால் மேன்மை நீங்கும்.

மேலும்: அஷோக் உரை

பரிமேலழகர் உரை
உயிர் எல்லாம் ஊனைக் குறித்த - எல்லா உயிர்களும் உடம்பினைத் தமக்கு நிலைக்களனாகக் கொண்டு அதனை விடா: சால்பு நாண் என்னும் நன்மை குறித்தது - அது போலச் சால்பு என்னும் நன்மைக் குணத்தைத் தனக்கு நிலைகளனாகக் கொண்டு, அதனை விடாது. ('உடம்பு' என்பது சாதியொருமை. நன்மை - ஆகுபெயர். உயிர் உடம்போடு கூடியல்லது பயனெய்தாதவாறு போலச் சால்பு நாணோடு கூடியல்லது பயன் எய்தாது என்பதாம். 'ஊணைக் குறித்த' என்று பாடம் ஓதுவாரும் உளர்.

மணக்குடவர் உரை
பலவகை உயிரும் மேற்கூறிய எல்லாவற்றினும் உண்டியைக் கருதிற்று: அதுபோலச் சால்பு, நாணமாகிய நன்மையைக் கருதிற்று. இது சான்றோர்க்கு நற்குணங்கள் பலவும் வேண்டுமாயினும், இஃது இன்றியமையாதென்றது.

மு.வரதராசனார் உரை
எல்லா உயிர்களும் ஊனாலாகிய உடம்பை இருப்பிடமாகக் கொண்டவை, சால்பு என்பது நாணம் என்று சொல்லப்படும் நல்லப் பண்பை இருப்பிடமாகக் கொண்டது.

சாலமன் பாப்பையா உரை
எல்லா உயிர்களும் உடம்பை இடமாகக் கொண்டுள்ளன; அதுபோல், சான்றாண்மையும், நாணம் என்னும் நல்ல குணத்தை இடமாகக் கொண்டுள்ளது.