பண்டறியேன் கூற்றென் பதனை

குறள் 1083
பண்டறியேன் கூற்றென் பதனை இனியறிந்தேன்
பெண்டகையால் பேரமர்க் கட்டு
[காமத்துப்பால், களவியல், தகையணங்குறுத்தல்]

பொருள்

தகையணங்குறுத்தல் - தலைவியின் அழகுதலைவனை வருத்தமுறுத்தலைக் கூறும் அகத்துறை

தகையணங்குறுத்தல், v. n. comparing a lady present with another, to annoy a lover (in love poetry).

தகை - அன்பு

அணங்கு - தீண்டிவருத்தும்தெய்வப்பெண்; தெய்வப்பெண் பத்திரகாளி தேவர்க்காடும்கூத்து; அழகு விருப்பம் மயக்கநோய்; அச்சம் வருத்தம் கொலை கொல்லிப்பாவை பெண் வடிவு

உறுத்தல் - uṟuttal   n. உறுத்து-. 1. Increasing; மிகுக்கை. (பிங்.) 2. Bringing intocontact, clapping; ஒற்றுகை. (திவா.)

பண்டு - பழைமை; முற்காலம்; நிதி.

அறிதல் - உணர்தல்; நினைத்தல் மதித்தல் பயிலுதல் அனுபவித்தல் உறுதிசெய்தல்; புதிதாய்க்கண்டுபிடித்தல்.

அறியேன் - அறியாதவன் ; நினைக்ககாதவன்

கூற்று - கூறுகை; மொழி; கூறத்தக்கது; யமன், காலன்

என்பதனை - என்பது அதனை

இனி - இனிமேல் , இப்பொழுது; இனிமேல் பின்பு இப்பால் இதுமுதல்.

அறிந்தேன் - உணர்ந்தேன்

பெண் - மகள்; சிறுமி; மணமகள்; மனைவி; பதுமினி, சித்தினி, சங்கினி, அத்தினிஎனநால்வகைப்படும்பெண்; விலங்குதாவரங்களின்பெடை; காண்க:கற்றாழை.

தகை - அழகு; அன்பு; அருள்; கவசம்; குணம்; தடை; தகுதி; பொருத்தம்; ஒப்பு; மேம்பாடு; பெருமை; நன்மை; இயல்பு; நிகழ்ச்சி; கட்டுகை; மாலை; தளர்ச்சி; தாகம்; மூச்சிழைப்பு

பெண்தகை - பெணின் குணங்கள் ஆகிய அச்சம், மடம், நாணம், பயிர்ப்பு

யான் - தன்மையொருமைப்பெயர்

பேர்  - பெயர்; ஆள்; உயிரி; புகழ்; பெருமை; பொலிவு.

அமர்க் - விருப்பம்; கோட்டை போர் போர்க்களம் மூர்க்கம்

கட்டு - உறுதி; காவல்; அரண்; ஆணை; உறவின்கட்டு; தடைக்கட்டு; யாக்கை; மூட்டை; குறி; வரம்பு, கட்டுப்பாடு; மிகுதி; மலைப்பக்கம்; பொய்யுரை; வளைப்பு; திருமணப்பற்று; வீட்டின்பகுதி.
(வி)பந்தி, தளை, பிணி; வீடுமுதலியனகட்டு; தழுவு; மணஞ்செய்; தடைகட்டு; கதைகட்டு; சரக்குக்கட்டு; அடக்கு; இறுகு; மூடு.

முழுப்பொருள்
கூற்று என்றால் காலன் (உயிரை வாங்கும் எமன்) என்று பொருள். முன்பு நான் காலனை பற்றி அறியவில்லை உணரவுமில்லை (உதாரணமாக போர் செய்யும் உயிர்பயம் அற்ற ஒரு வீரன் உயிரை எடுக்கும் காலனை பற்றி அறியவில்லை உணர்ந்ததும் இல்லை). ஆனால் காலனை பற்றி அறிந்தேன் உணர்ந்தேன் இப்பொழுது. ஏனெனில் அச்சம், மடம், நாணம், பயிர்ப்பு ஆகிய பெண்ணின் குணங்களைக்கொண்ட இந்த அழகிய பெண்ணிடம் நான் செய்யும் போராட்டத்தில் என்னை இழந்துவிடுவேன் என்று நினைக்கிறேன். இவள் என் உயிரை வாங்குகிறாள். ஆதலால் எமனை இப்பொழுது உணர்ந்தேன்.

இக்கருத்தைப் பழந்தமிழ் இலக்கியப் பாடல்கள் சிலம்பும், கலித்தொகையும், சீவக சிந்தாமணியும், கம்ப இராமாயணமும் அழகாகக் கூறுகின்றன.

”வலைவாழ்நர் சேரி.... வேண்டுருவம் கொண்டுவேறோர்

கொலைவேல் நெடுங்கண் கொடுங்கூற்றம் வாழ்வது”, 

“கடுங்கூற்றம் காணீர் கடல்வாழ்நர் சீறூர்க்கே மடங்கெழுமென் சாயல் மகளா யதுவே” என்று சிலப்பதிகாரமும் (7:10.12), 

“கோமகள் உருவமாய்க் கூற்றம் போந்தது” (சீவக 2451), 

“கண்ணினால் இன்று கண்டாம் கூற்றினை.... 

பெண்ணுடையப் பேதை நீர்மைப் பெருந்தடங்கண்ணிற் றம்மா” என்று சீவக சிந்தாமணியும் (2458) என்று கூறினாலும், கம்பனின் மிதிலைப் படலப் பாடலொன்று அழகானது.

“வண்ணமேகலைத் தேரொன்று வாணெடும்
கண்ணி ரண்டு கதிர்முலை தாமிரண்
டுண்ணி வந்த நகையுமுண் டாமெனில்
எண்ணும் கூற்றினுக் கித்தனை வேண்டுமோ?”  (கம்ப.மிதிலைக்காட்சி 144)

”வேண்டுருவம் கொண்டதோர் கூற்றங்கொல்” (கலி.56:9)

“பல்லுயிர் பருகும் பகுவாய்க் கூற்றம்

ஆண்மையில் திரிந்துதன் அருந்தொழில் திரியாது

நாணுடைக் கோலத்து நகைமுகம் கோட்டிப்

பண்மொழி நரம்பில் திவவியாழ் மிழற்றிப்

பெண்மையில் திரியும் பெற்றியும் உண்டென” (சிலப்.5:219-23)

மேலும்: அஷோக் உரை

பரிமேலழகர் உரை
(இதுவும் அது) கூற்று என்பதனைப் பண்டு அறியேன் - கூற்றென்று நூலோர் சொல்வதனைப் பண்டு கேட்டு அறிவதல்லது கண்டறியேன்; இனி அறிந்தேன் - இப்பொழுது கண்டறிந்தேன்; பெண் தகையாள் பேர் அமர்க்கட்டு - அது பெண்தகையுடனே பெரியவாய் அமர்த்த கண்களை உடைத்து. (பெண்தகை: நாணம்,மடம், அச்சம், பயிர்ப்பு என்னும் குணங்கள். அவை அவ்வக்குறிகளான் அறியப்பட்டன. அமர்த்தல்: அமர் செய்தல், பெயரடியாய வினை. பெண்தகையால் இன்பம் பயத்தலும் உண்டேனும் துன்பம் பயத்தல் மிகுதிபற்றிக் கூற்றாக்கிக் கூறினான்.).

மணக்குடவர் உரை
பண்டு கூற்றின்வடிவு இன்னபெற்றித்தென்பதை அறியேன்: இப்பொழுது அறிந்தேன். அது பெண்டகைமையோடே பெருத்து அமர்த்த கண்களையுடைத்து. இது நம்மை வருத்தற்குத் தக்காளென்னுங் குறிப்பு.

மு.வரதராசனார் உரை
எமன் என்று சொல்லப்படுவதை முன்பு அறியேன், இப்பொழுது கண்டறிந்தேன், அது பெண் தனமையுடன் போர் செய்யும் பெரிய கண்களை உடையது.

சாலமன் பாப்பையா உரை
எமன் என்று நூலோர் சொல்ல முன்பு கேட்டிருக்கிறேன்; பார்த்தது இல்லை; இப்போது தெரிந்து கொண்டேன். பெண்ணிற்கே உரிய நல்ல குணங்களுடன் பெரிதாய்ப் போரிடும் கண்களையும் உடையது தான் எமன்.