கருமம் சிதையாமல்

குறள் 578

கருமம் சிதையாமல் கண்ணோட வல்லார்க்கு

உரிமை உடைத்திவ் வுலகு.

[பொருட்பால், அரசியல், கண்ணோட்டம்]

பொருள்

கருமம் - செயல்; வினைப்பயன்; தொழில் வேத சம்பந்தமான சடங்கு; தொழில், இறுதிக்கடன்; செயப்படுபொருள்; வெம்மை; மும்மலங்களுள்ஒன்றாகியகன்மவிதி.

சிதை - சிதைவு, பிணஞ்சுடுவிறகு, கீழ்மை, கேடு, குற்றம்

சிதைதல் - தன்மைகெடுதல்; சிதறுதல்; அறுபடுதல்; கோபித்தல்; சொல்சிதைந்துவழங்குதல்; பொய்யாதல்; குலைதல்; வரம்பழிதல்; இசைமுதலியனகெடுதல்

சிதையாமல் - கெடாமல்

கண்ணோடுதல் - இரங்குதல்; விரும்பிய பொருள் மேல் பார்வை செல்லுதல்; மேற்பார்வை பார்த்தல்.

கண் - விழி; கண்ணோட்டம்; பீலிக்கண்; கணு; மரக்கணு; தொளை; மூங்கில்முரசடிக்குமிடம்; மூட்டுவாய்; பெருமை; இடம்; ஏழனுருபு; அறிவு; பற்றுக்கோடு; உடம்பு; அசை; உடலூக்கம்.

கண்ணோட்டம் - கண்பார்வை; இரக்கம், கடைக்கண்பார்வை, அருள்காட்டுதல்; பார்வையிடுதல், தாட்சிணியம்

வல்லார்க்கு - வலிமையுடையவர், திறமையுடையவர், அயலார்(neighbours), சமர்த்தர் (the strong or mighty men),  மாட்டாதவர் (incapable persons)

உரிமை - உரியதன்மை; ஒருவனுடைய பொருளை அவனுக்குப்பின் அடைதற்காகுந்தன்மை; மனைவி; நட்புப்பற்றியசுதந்தரம்; அடிமை; கடமை; பாத்தியதை; பிரியம்; சொத்து.

உடைத்து -  உடைதல் - இருக்கும்

இவ்வுலகு - இவ்வுலகம்

உலகு - உலகம், பூமி நாடு உலகத்தார்(இடவாகுபெயர்), உயர்ந்தோர், சான்றோர் திசை மங்கலச்சொற்களுள்ஒன்று

முழுப்பொருள்

கண்ணோட்டம் என்பது பிறர் (சக மனிதர்கள், அக்கம் பக்கத்து மனிதர்கள், நண்பர்கள், பக்கத்து தேச மக்கள்) மீது தாட்சிணியம் கொள்வது, அன்பு செலுத்துவது, பரிவு காண்பிப்பது ஆகும். 

ஆனால் அப்படி ஒருவர் மீது தாட்சிணியம் பார்க்கும் பொழுது பலர் அவர்கள் மேல் அதீத இரக்கம் கொண்டு அவர்களுக்கு சாதகமாக இருந்து நீதியில் இருந்து தவறுவர். அதற்காகத்தான் இக்குறள்.

ஆட்சிப் பொறுப்பில் இருக்கும் ஒருவன் தன் கடமைகளை முறையாக நெறியாக செய்யவேண்டும். இருப்பினும் தம்மக்கள் என்று மட்டும் பாராமல் பிறர் மீதும் அன்பு செல்லுத்த வேண்டும். அப்படி தன் மக்கள் மீதும் பிறர் மீதும் அன்பு செலுத்தும் பொழுது தன் கடமைகளையும் செயல்களிலும் நீதி தவறாமல் செய்ய கூடிய திறமையுடையவருக்கு இவ்வுலகத்தையும் ஆள உரிமையுண்டு என்கிறார் திருவள்ளுவர். 

உதாரணம் 1

நாட்டாமை திரைப்படத்தில் நாட்டாமை கதாபாத்திரத்தில் வரும் விஜயகுமார் தன் தங்கை கதாபாத்திரத்தில் வரும் ஆச்சி மனோரமா அவர்களது குடும்பத்தில் ஒரு ஊர் பஞ்சாயத்து வரும். மனோரமா மீது அன்பும் பாசமும் கொண்டவர் விஜயகுமார். ஆனால் மனோரமா’வின் மகன் ஒரு வழக்கில் தவறு செய்தவன். மனோரமா அண்ணன் விஜயகுமாரிடம் வந்து மன்றாடும் பொழுது மனோரமாவை ஒரு தங்கையாக உபசரிப்பார். ஆனால் மனோரமா வழக்கை பற்றிப் பேச்சு எடுத்தவுடன் விஜயகுமார் நாட்டாமையாக மாறி இதை பற்றி பேசக்கூடாது இங்கு. எல்லோருக்கும் நியாயம் ஒன்று தான் நீதி ஒன்று தான் என்று கடமையில் கருத்தாக இருப்பார். பின்பு வழக்கில் மனோரமாவின் மகன் மீது பழி உறுதியானதும் அவருக்கு எந்த கரிசனமும் இன்றி தக்க தண்டனையும் தீர்ப்பும் அளிப்பார். பின்பு மனோரமாவின் கணவன் அவரை சுட்டுக்கொள்ளும் பொழுதும் அவர் தங்கை குடும்பத்தை ஊரைவிட்டு ஒதுக்கி வைப்பார்.

எதிர் உதாரணம்

நட்பு நாடு நட்பு நாடு என்று இலங்கைக்கு இந்தியா பல உபசரணங்களை செய்துக் கொண்டு இருக்கிறது. கேட்டால் ராஜதந்திரம் என்று ஊரை ஏமாற்றிக்கொண்டு இருக்கிறது. இலங்கையில் நடந்த இனப்படுகொலைகளை தட்டி கேட்ட வேண்டிய நிலையில் இந்தியா உள்ளது. ஒரு பொருப்பான அண்ணனாக தம்பி செய்யும் தவறுகளை தட்டிக்கேட்டகாமல், நீதி தவறி தம்பியை தற்காத்துக்கொண்டு இருக்கிறது. 

மேலும்: அஷோக்

பரிமேலழகர் உரை

கருமம் சிதையாமல் கண்ணோட வல்லார்க்கு-முறை செய்தல் ஆகிய தன் தொழில் அழியாமல் கண்ணோட வல்ல வேந்தர்க்கு; உரிமை உடைத்து இவ்வுலகு- உரித்தாம் தன்மை உடைத்து இவ்வுலகம்.

விளக்கம் 

(தம்மொடு பயின்றார் பிறரை இடுக்கண் செய்துழி அவரைக் கண்ணோடி ஒறாதார்க்கு முறை சிதைதல், மேல் "ஓர்ந்து கண்ணோடாது" (குறள் 541) என்ற முறை இலக்கணத்தாலும் பெற்றாம். முறை சிதைய வரும் வழிக் கண்ணோடாமையும், வாராவழிக் கண்ணோடலும் ஒருவற்கு இயல்பாதல் அருமையின், கண்ணோட வல்லார்க்கு' என்றும், அவ் வியல்பு உடையார்க்கு உலகம் நெடுங்காலம் சேறலின், 'உரிமை உடைத்து' என்றும் கூறினார். இதனான் கண்ணோடுமாறு கூறப்பட்டது.)

ஞா. தேவநேயப் பாவாணர் உரை

கருமம் சிதையாமல் கண்ணோட வல்லார்க்கு - நடுநிலையாக முறை செய்யவேண்டிய தம் கடமை தவறாமல் கண்ணோட வல்ல அரசர்க்கு ; இவ்வுலகு உரிமை உடைத்து - இவ்வுலகம் நிலையான உரிமையாகுந் தன்மை யுடையதாம்.

'கருமஞ் சிதையாமல் ' என்பதால் இவ்வதிகாரத்திற் கூறப்பட்டது நெறிதவறாத நற்கண்ணோட்டமே என்பது அறியப்படும். முறை தவறுமிடத்துக் கண்ணோடாமையும், தவறாவிடத்துக் கண்ணோடுதலும் அமைவது அருமையாதலின், 'கண்ணோட வல்லார்க்கு' என்றார். தவறுமிடமாவது கண்ணன்ன கேளிர் குற்றஞ் செய்யின் தண்டிக்க விரும்பாமை. தவறாமிடமாவது தன்னால் வெறுக்கப் படுபவன் குற்றஞ் செய்யாவிடினுந் தண்டிக்கவும் சிறு குற்றஞ் செய்யினும் பெருந்தண்டனை யிடவும் விரும்புதல். இவ்விரண்டு மின்றி நடுநிலை முறையும் நற்கண்ணோட்டமும் செய்வார்க்குக் குடிகளெல்லாரும் என்றும் அன்புடன் அடங்கி நடப்பாராகலின், 'உரிமையுடைத்திவ் வுலகு ' என்றார்.'உலகு ' அதன் பகுதியாகிய நாட்டைக் குறித்தலின் முதலாகு பெயர்.

மணக்குடவர் உரை

தங்கருமத்திற்கு அழிவு வாராமற் கண்ணோட வல்லவர்க்கு இவ்வுலகம் உரிமையாதலை உடையது. இது நற்குணமாவது கண்ணோட்டமாயினும் அரசர்க்குப் பொருட்கேடு வாராமல் கண்ணோடவேண்டுமென்று கூறிற்று.

மு.வ உரை

தம் தம் கடமையாகிய தொழில் கெடாமல் கண்ணோட்டம் உடையவராக இருக்க வல்லவர்க்கு இவ்வுலகம் உரிமை உடையது.

சாலமன் பாப்பையா உரை

தம் செயலுக்குச் சேதம் வராமல் கண்ணோட்டம் கொள்ளும் ஆற்றல் உடையவர்க்கு இந்த உலகம் சொந்தமாகும்.