Search This Blog

திருக்குறள்

அறத்துப்பால் - குறள் வரிசை | பதிவு வரிசை

குறள் பால்: அறத்துப்பால் குறள் வரிசை - Index - Pointers to Kurals (Ordered) - Each Kural in Different pages பதிவு வரிசை - All Posts/Kura...

Wednesday, April 2, 2014

தன்குற்றம் நீக்கிப்

குறள் 436
தன்குற்றம் நீக்கிப் பிறர்குற்றங் காண்கிற்பின் 
என்குற்ற மாகும் இறைக்கு.

தன்குற்றம் - தன்னுடைய குற்றங்களை, (தனது நாட்டின் / குடும்பத்தின் குற்றங்கள்)

நீக்கிப் - கண்டு உணர்ந்து பின்பு களைந்து சரி செய்து

பிறர்குற்றங் - பிறர் குற்றங்களை

காண்கிற்பின் - பின்பு காண்கின்றவன் நீதி சொல்கின்றவன்

என்குற்ற மாகும் - என்ன தவறு/குற்றம் வரும்/நிகழும் 

இறை - உயரம்; தலை; கடவுள்; தலைவன்; அரசன்; உயர்ந்தோன்; மூத்தோன்; பெருமையிற்சிறந்தோன்; கணவன்; பறவையிறகு; கடன்; வீட்டிறப்பு; மறுமொழி; மணிக்கட்டு; குடியிறை; சிறுமை; அற்பம்; காலவிரைவு; சிவன்; பிரமன்; மாமரம்.

இறைக்கு - அந்த தலைவனுக்கு ?

முழுப்பொருள்
ஒருவர் முதலில் தன்னுடைய குற்றங்களை கண்டுப் பிடித்து, உணர்ந்து திருத்திக்கொள்ள வேண்டும். தன்னுடைய குற்றங்கள் என்றால் தன் குற்றங்கள் மற்றும் தன் குடும்பத்தில் உள்ள இடையுறுகள். 

அப்படித் தன்னுடைய குற்றங்களை நீக்கிவிட்டு பிறரின் மேல் உள்ள குற்றங்களை கண்டு நீதி சொல்கின்ற அளவிற்கு உள்ள ஒருவனுக்கு எந்த தவறு நிகழும் ? நிகழாது என்று சொல்லாமல் சொல்கிறார் திருவள்ளுவர்.

ஒருவர் தன்மேல் குற்றங்களை வைத்துக்கொண்டு அடுத்தவருக்கு வியாக்யானம் அளித்தால் பின்பு எதிராலி என்ன சொல்வார் ? முதலில் உன்ன திருத்திக்கோ, அப்புறம் எங்கள திருத்தலாம்னு தான் சொல்லுவார். (7ஜி ரெயின்போ காலனி திரைப்படத்தில் ஒரு வசனம் வரும் ‘இனி எவனாது கேப்பான் ? யேன் உன் பையன் தண்டமா இருக்கானு?’)

மேலும்: அஷோக் (இதில் அவர் சொன்ன நிகழ்வு காந்தி வாழ்வில் நடந்த நிகழ்வு)

பரிமேலழகர் உரை
தன் குற்றம் நீக்கிப் பிறர் குற்றம் காண்கிற்பின் - முன்னர்த் தன் குற்றத்தைக் கண்டு கடிந்து, பின்னர்ப் பிறர் குற்றங்காண வல்லனாயின்; இறைக்கு ஆகும் குற்றம் என் - அரசனுக்கு ஆகக்கடவ குற்றம் யாது? 

விளக்கம் 
('அரசனுக்குத் தன் குற்றம் கடியா வழியே பிறர் குற்றம் கடிதல் குற்றமாம்; அது கடிந்தவழி முறை செய்தலாம்' என்பார், 'என் குற்றம் ஆகும்' என்றார்; எனவே, தன் குற்றம் கடிந்தவனே முறை செய்தற்கு உரியவன் என்பதாயிற்று. இவை நான்கு பாட்டானும் அவற்றது கடிதற்பாடு பொதுவகையால் கூறப்பட்டது. இனிச் சிறப்பு வகையால் கூறுப.)

ஞா. தேவநேயப் பாவாணர் உரை
தன் குற்றம் நீக்கிப் பிறர்குற்றம் காண்கிற்பின் - முன்பு தன் குற்றத்தைக் கண்டு அதை நீக்கிவிட்டுப் பின்பு பிறர் குற்றத்தைக்காண வல்லனாயின்; இறைக்கு ஆகும் குற்றம் என் - அரசனுக்கு வரக்கூடிய குற்றம் யாது ? ஒன்று மில்லை.

இது குடிகளின் வழக்குத் தீர்த்துத் தண்டித்தல் பற்றியது. பிறர் குற்றங்கண்டு தண்டிப்பவன் முன்பு தான் அக்குற்றமில்லாதவனா யிருத்தல் வேண்டும். அரசன் தன் குற்றத்தை நீக்காது பிறர் குற்றத்திற்குத் தண்டிப்பதே கு ற் ற மா ம். அங்ஙன மன்றித்தன் குற்றத்தை நீக்கியபின் தண்டிப்பின் அது முறைசெய்தலாம். அது அவன் கடமையாதலால் 'என்குற்ற மாகும்' என்றார். 'கில்' ஆற்றலுணர்த்தும் இடைநிலை.

மணக்குடவர் உரை 
தனக்குள்ள குற்றத்தை நீக்கிப் பிறர்மாட்டுள்ள குற்றத்தை ஆராயவல்லனாயின் அரசனுக்கு என்ன குற்ற முளதாம். இது தன்மாட்டுள்ள குற்றத்தை நீக்குதலே யன்றிப் பிறர் மாட்டுள்ள குற்றத்தையும் கடிய வேண்டுமென்றது. 

சாலமன் பாப்பையா உரை
படிக்காதவர் முதலில் தன் குற்றத்தைக் கண்டு விலக்கிப் பிறகு அடுத்தவர் குற்றத்தைக் காணும் ஆற்றல் மிக்க அரசிற்குக் குற்றம் ஏதும் வராது!.

தன்னிடம் குற்றம் உள்ளபோது, அடுத்தவர்களின் குற்றத்தைக் கண்டிக்கவோ, தண்டிக்கவோ முடியாது போவது இன்னும் ஓர் அவலம்.

அதையும் வள்ளுவர் சொல்லுகிறார்.

தன்குற்றம் நீக்கிப் பிறர்குற்றங் காண்கிற்பின் 
என்குற்ற மாகும் இறைக்கு

தன்னுடைய குற்றங்களை முதலில் நீக்கிவிட்டு, பிறகு அடுத்தவர்களுடைய குற்றத்தை நீக்கினால் மன்னவனுக்கு ஒரு குற்றமும் வராது.

தன்னுடைய குற்றத்தை நீக்கிக் கொள்ளாத போது, பிறருக்கு நீதி சொல்லுவது நகைச் சுவையைத்தான் உண்டாக்கும்.

டாக்டர் ஒருவர் கையில் சிகரெட்டைப் புகைய விட்டுக் கொண்டே, நோயாளியைப் பார்த்து சிகரெட் பிடிக்காதே என்றால் நோயாளி சிரிப்பானா இல்லையா?

வருமானத்திற்காக அரசே தவறான செயல்களில் இறங்குமானால் குடிமகனும் வருமானத்திற்காக தன்மானத்தை விற்கும் செயலைச் செய்யத் துணிவார்கள் இல்லையா? கோன் எவ்வழி குடிகள் அவ்வழிதானே?

பிறர்குற்றம் நீக்கும் முன்னே தன் குற்றம் நீக்கு. முதலில் உன் முதுகைப் பார் என்பது கிராமத்துப் பழமொழி.

அடுத்தவனைக் குற்றம் சொல்ல சுட்டு விரலை நீ நீட்டும் போது, மற்ற விரல்கள் உன்னைச் சுட்டுகின்றன என்கிறது ஒரு பாட்டு.

No comments:

Post a Comment