கண்ணோட்டத் துள்ளது உலகியல்

குறள் 572
கண்ணோட்டத் துள்ளது உலகியல் அஃதிலார்
உண்மை நிலக்குப் பொறை
[பொருட்பால், அரசியல், கண்ணோட்டம்]

பொருள்
கண்ணோட்டம் - கண்பார்வை (Glance, look, vision), தாட்சிணியம் (Regard, kindness, partiality,glow of kind feeling towards a friend or even acasual acquaintance, reluctance to deny arequest made by a friend or acquaintance,humanity, fellow-feeling;)

உள்ளது - இருப்பது, உள்பொருள்; உண்மை; மெய்; உண்மைப்பொருள்; ஆன்மா; ஏற்பட்டது, விதிக்கப்பட்டது.

உலகியல்  - உலகு + இயல் ; உலகநடை; உலகவழக்கம் உலகியற்கை

அஃது - அஃறிணைஒருமைச்சுட்டு; அது அப்படி

அஃதிலார் -  அப்படி இல்லாதவர்கள்

உண்மை - உள்ளது; இயல்பு உள்ளதன்மை; மெய்ம்மை நேர்மை ஊழ்

நிலக்கு - நிலம் - தரை; மண்; பூமி; இடம்; வயல்; பதவி; நிலத்திலுள்ளார்; எழுத்துஅசைசீர்களாகியஇசைப்பாட்டின்தானம்; விடயம்; மேன்மாடம்; கள்ளிவகை.

பொறை - பாரம், சுமை; கனம்; மலை; சிறுகுன்று; கல்; பூமி; பொறுமை; அடக்கம்; கருப்பம்; வலிமை.

முழுப்பொருள்
இவ்வுலகின் இயல்பென்பது கண்ணோட்டம் என்னும் தாட்சிணியம் அன்பு பரிவு அறம் என்பனவற்றை உண்மையாய் கொண்டது. அதுவே உலகின் ஆத்மா. அந்த கண்ணோட்டம் இல்லாத மனிதர்கள் உயிரினங்கள் இவ்வுலகத்திற்கு பாரம் என்கிறார் திருவள்ளுவர். இங்கே உலகின் இயல் என்று கூறி கண்ணோட்டம் இயற்கையான ஒன்று. அதனை இழப்பவன் இல்லாதவன் செயற்கையானவன் ஒவ்வாதவன் என்பதை விளங்கலாம். இத்தகைய ஒவ்வாதவர்களை பயனற்றது என்று கூறி இருக்கலாம். ஆனால் பொறை என்கிறார் ஏனெனில் இவ்வுலகின் வளங்களை அனுபவித்து இம்மக்களின் உழைப்பை அனுபவித்து அவர்களிடம் கண்ணோட்டம் இல்லாத இவர்கள் மற்றவர்களுக்கு பாரமே.

நாலடியார் கடுஞ்சொல் கொண்டு, அருள் நோக்கு இல்லாது, பிறர் துன்பத்தில் உவப்பவர்களை “கீழ்மக்கள்” என்றே கூறும்.

“கடுக்கெனச் சொல்வற்றாம், கண்ணோட்டம் இன்றாம்
இடுக்கண் பிறர்மாட்டு உவக்கும், அடுத்தடுத்து
வேகம் உடைத்தாம், விறன்மலை நன்னாட!
ஏகுமாம் எள்ளுமாம் கீழ்”

நான்மணிக்கடிகை, “கண்ணோடார் செற்றன்னர்” என்று அவர்களை இரக்கமற்றவர்கள் என்கிறது. மற்றொரு பாடலில், “யார் கண்ணும் கண்ணோட்டம் இன்மை முறைமை” என்றும் சொல்கிறது. ஆனால், இங்கு கண்ணோட்டம் இன்மையென்பது, ஒருதலையாக, நடுவு நிலையோடு இல்லாமல் இருப்பதைக் குறிக்கிறது. இவ்வதிகாரம், கண்ணோட்டத்தைக் கருணயுள்ள பார்வை என்னும் உயர்பொருளிலேயே சொல்கிறது.

மேலும்: அஷோக் உரை

பரிமேலழகர் உரை

உலகியல் கண்ணோட்டத்து உள்ளது - உலகநடை கண்ணோட்டத்தின் கண்ணே நிகழ்வது; அஃது இலார் உண்மை நிலக்குப் பொறை - ஆகலான், அக்கண்ணோட்டம் இல்லாதார் உளராதல் இந்நிலத்திற்குப் பாரமாதற்கே, பிறிதொன்றற்கு அன்று.
(உலகநடையாவது: ஒப்புரவு செய்தல், புறந்தருதல், பிழைத்தன பொறுத்தல் என்ற இவை முதலாயின. அவை நிகழாமையால் தமக்கும் பிறர்க்கும் பயன்படார் என்பதுபற்றி, 'நிலக்குப்பொறை' என்றார். 'அதற்கு' என்பது சொல்லெச்சம். இவை இரண்டு பாட்டானும் கண்ணோட்டத்தது சிறப்புக் கூறப்பட்டது.).

மணக்குடவர் உரை

உலகநடை கண்ணோட்டத்தின்கண்ணது: ஆதலால், அஃதில்லாதார் உளராயிருத்தல் நிலத்துக்குப் பாரமாம். இது கண்ணோட்டமில்லாதாரை நிலம் பொறாதென்றது.

மு.வரதராசனார் உரை

கண்ணோட்டத்தினால் உலகியல் நடைபெறுகின்றது, கண்ணோட்டம் இல்லாதவர் உயிரோடு இருத்தல் நிலத்திற்குச் சுமையே தவிர வேறு பயனில்லை.

சாலமன் பாப்பையா உரை

மக்கள் வாழ்க்கை கண்ணோட்டத்தால்தான் இயங்குகின்றது அக்கண்ணோட்டம் இல்லாதவர் வாழ்வது இப்பூமிக்கு பாரமே.