ஏரின் உழாஅர் உழவர் புயல்என்னும்

குறள் 14

ஏரின் உழாஅர் உழவர் புயல்என்னும்

வாரி வளங்குன்றிக் கால்

[அறத்துப்பால், பாயிரவியல், வான்சிறப்பு]

பொருள்

ஏரின்  - ஏர் - உழுபடை, கலப்பை; உழவுமாடு; உழவுத்தொழில்; எழுச்சி; தோற்றப்பொலிவு; அழகு; நன்மை; ஒப்பு; ஓர்உவமவுருபு.

உழவு - நிலத்தைஉழும்தொழில், வேளாண்மை; உடம்பினால்உழைக்கை

uḻavu   n. உழு-. [M. uḻavu.] 1.Ploughing; உழுகை. உழந்து முழவே தலை (குறள்,1031). 2. Agriculture, husbandry; வேளாண்மை உழவின் மிக்க வூதியமில்லை.

உழாஅர்  - உழவுத் தொழிலைச் செய்யாமல் போவர்

உழவர்  - உழவுத் தொழிலைச் செய்பவர்கள்

புயல் - மேகம்; மழைபெய்கை; நீர்; கொடுங்காற்று; சுக்கிரன்.

என்னும் - யாவும், எல்லாம்; என்றுசொல்லப்படும்; யாதும்; சிறிதும்.

வாரி  - vāri   n. வா-. 1. Income, resources;வருவாய். (பிங்.) புயலென்னும் வாரி (குறள், 14).2. Produce; விளைவு. மாரிபொய்ப்பினும் வாரிகுன்றினும் (புறநா. 35). 3. Grain; தானியம். (யாழ்.அக.) 4. cf. vārya. Wealth; செல்வம். (பிங்.)

vāri   n. vāri. 1. Water; நீர்.(பிங்.) (தக்கயாகப். 67, உரை.) 2. Flood; வெள்ளம்.(பிங்.) வணிக மாக்களை யொத்ததவ் வாரியே (கம்பரா.ஆற்றுப். 7). 3. Sea; கடல். (பிங்.) (தக்கயாகப்.67, உரை.) 4. Reservoir of water; நீர்நிலை.

வளம் - செல்வம்; செழுமை; மிகுதி; பயன்; வருவாய்; நன்மை; மாட்சிமை; தகுதி; அழகு; பதவி; புனல்; உணவு; வாணிகப்பண்டம்; வெற்றி; வழி; பக்கம்

குன்றிக்கால் - குறைந்து இருந்தால்

முழுப்பொருள்

புயல் என்ற சொல்லுக்கு மேகம், மழைப்பெய்கை, நீர் என்ற பொருள்கள் உள்ளன. புயலிற்கு கொடுக்காற்று என்னும் அழிவை குறிக்கும் அர்த்தம் மட்டுமே பொருள் என்று இல்லை.

ஆதலால் புயல் என்னும் மேகம், மழைப்பெய்கை இவ்வுலகத்திற்கு குறைந்தால் அதனுடைய தாக்கம் அதிகம் இருக்கும். ஏனெனில் மேகம் என்பதே மழையாக பொழிந்து நீராக மண்ணில் விழுகின்றன. இந்த மழைநீரானது மண்ணிருக்கு ஒரு வரவு. அந்த வரவு குறைந்தால் மண்ணில் ஈரம் இருக்காது, ஆதலால் ஏர்க்கூட உழ முடியாது.  

விவசாயத்தில் நாத்து நடுவதற்கு முன் மண்னை ஆயுத்தம் செய்யவேண்டும். அதற்கு ஏர் உழுவர். ஏர் ஓட்டுதலின் ஒரு கட்டத்தில் எருது (என்னும் உரம்) வயலில் சமமாக பரவ நீர் கட்டாயமாக தேவைப்படும். ஆக விவசாயத்தின் முதல் கட்டத்திலேயெ நீரின் அத்தியாவசியம் இன்றியமையாதது. 

பின்பு நாத்து நட, பயிர் விளைய நீர் இன்றியமையாதது என்பதை சொல்லதேவையில்லை. இந்த நீர் எல்லாம் மழையில் இருந்து வருபவை. ஆற்றில் இருந்து வரும் நீர்க்கூட மழையில் இருந்து காடுகளுக்குச் சென்று, காடுகளில் உள்ள மரங்களின் வேர்களில் தேங்கி, சொட்டு சொட்டாக வடிந்து, பின்பு ஆறாக உருக்கொண்டு ஓடுகின்றன.

ஆதலால் மழை இன்றியமையாதது. மழை பொழியவில்லையென்றால் உழவர்களுக்கு நீர் என்னும் வருவாய் இல்லை. நீர் இல்லை என்றால் உழவு செய்ய முடியாது. ஆக மழை மிக மிக முக்கியமான ஒன்று. 

ஆனால் மழை என்பது மேகத்தில் இருந்து வருவது. இந்த மேகமே இல்லை என்றால் மழை இல்லை. இந்த மேகம் உருவாகுவதற்கு மரங்கள் ஒரு முக்கிய காரணம். மழையாக பெய்யும் நீர் மண்ணில் விழுகின்றது. மரத்தின் இலைகளும் மழைநீரை எடுத்துக்கொண்டு மரத்திற்கு கொடுக்கும். காற்றில் இருக்கும் நீரையும் கூட எடுத்துக்கொண்டு மரத்திற்கு கொடுக்கும். மரத்தின் வேர் மண்ணில் இருந்து நீரை எடுத்து மரத்திற்கு கொடுக்கும். பின்பு மரம் இந்த நீரை காற்றில் ஈரப்பதமாக வெளியேற்றும். இது ஒரு கட்டத்தில் மேகமாக மறுபடியும் உருவெடுக்கும். இதுவே பின்பு மழை பொய்யும். இது ஒரு சுழற்சி.

[Growing trees take water from the soil and release it into the atmosphere. Tree leaves also act as interceptors, catching falling rain, which then evaporates causing rain precipitation elsewhere — a process known as evapo-transpiration]

ஆதலால் மழை குறைந்தால் உழவு செய்ய முடியாது. அதுப்போல மரங்கள் குறைந்தால் மழை குறையும் உழவும் செய்ய முடியாது. ஆக இயற்கை வளங்களை பேணிக்காபது அவசியம்.

பி.கு: வள்ளுவரே கூட “வாரி பெருக்கி” (குறள் 512) என்று வருவாய் என்னும் பொருளிலும் கூறியிருப்பது தெரிகிறது. (நன்றி: கி.வா.ஜ வின் ஆய்வுரை)

மேலும்: அஷோக் உரை

ஒப்புமை

”மழைதொழில் உதவ” (மதுரைக் 10)

“இருங்கண்ஞாலத் தீண்டுதொழில் உதவிப்” 

“பெரும்பெயல் பொழிந்த வழிநாள்” (நற் 157:1-2)

“வானமும் வேண்டா வில்லே ருழவர்” (அகநா 193:2)

பரிமேலழகர் உரை

உழவர் ஏரின் உழார்- உழவர் ஏரான் உழுதலைச் செய்யார்; புயல் என்னும் வாரி வளம் குன்றிக்கால் - மழை என்னும் வருவாய் தன் பயன் குன்றின். ('குன்றியக்கால்' என்பது குறைந்து நின்றது. உணவு இன்மைக்குக் காரணம் கூறியவாறு.) .

மணக்குடவர் உரை

ஏரினுழுதலைத் தவிர்வாருழவர், புயலாகிய வாரியினுடைய வளங்குறைந்தகாலத்து. இஃது உழவாரில்லை யென்றது.

மு.வரதராசனார் உரை

மழை என்னும் வருவாய் வளம் குன்றி விட்டால், ( உணவுப் பொருள்களை உண்டாக்கும்) உழவரும் ஏர் கொண்டு உழமாட்டார்.

சாலமன் பாப்பையா உரை

மழை என்னும் வருவாய் தன் வளத்தில் குறைந்தால், உழவர் ஏரால் உழவு செய்யமாட்டார்.

குறளும் பொருளும் - பா.ராகவன் உரை

மழை குறைந்தால் விவசாயம் கெடும்.