Search This Blog

திருக்குறள்

அறம் பொருள் காமம் - குறள் வரிசை பதிவு வரிசை

ஒவ்வொரு பாலின் அதிகாரங்களும் (அதன் சுட்டிகளும்) இந்த முதன்மை பதிவின் சுட்டியில் உள்ளன. தேவைக்கேற்ப கீழ்காணும் சுட்டியை தட்டவும் அறத்து...

உணர்வ துடையார்முன் சொல்லல்

குறள் 718
உணர்வ துடையார்முன் சொல்லல் வளர்வதன்
பாத்தியுள் நீர்சொரிந் தற்று
[பொருட்பால், அமைச்சியல், அவையறிதல்]

பொருள்
உணர்வ துடையார் - கேட்பதை (செல்வதை) தாமாக புரிந்துக்கொள்ளக்கூடிய ஆற்றல் உடையவர்கள்

முன் சொல்லல் - முன்பு சொல்வது

வளர்வதன் - தாமாய் வளரும்

பாத்தியுள் - வயலில்

நீர் - நீர்

சொரிந் தற்று - பொழிவது / விடுவது போல் ஆகும்.

முழுப்பொருள்
ஒரு அவையில் பல மாந்தர்கள் இருப்பர். ஒரு சில அவைகளில் எல்லோரும் (பெரும்பாலும்) அவையில் சொல்வதை தாமாக புரிந்துக்கொள்ளும் ஆற்றல் உடையவர்களாக கற்றவர்களாக இருப்பர். அவர்களுக்கு விளக்கி சொல்ல வேண்டிய அவசியம் இராது. 

அப்படிப் பட்டவர்கள் உழவு நிலத்தில் உழாமால் தாமே முளைந்தவர்கள் போன்றவர்கள். அத்தகைய பயிர்களுக்கு நீர் உற்றித் தான் வளரவேண்டிய அவசியம் இராது. அப்படிப் பட்டவர்களுக்கு விளக்கி சொல்வது தாமே முளைத்த பயிர்களுக்கு தண்ணீர் உற்றுவதுப் போல ஆகும்.

ஆக கற்றார் அவை அறிந்து நாம் சுருக்கமாக சொன்னாலே போதும், கற்றார் புரிந்துக்கொள்வர் என்கிறார் திருவள்ளுவர். அவர்களுக்கு விளக்கிச் சொல்லி நேரத்தை விரயம் செய்யவேண்டியதில்லை. 

மேலும்: அஷோக் உரை

உதாரணம்
ஒரு நாட்டின் முக்கிய பொருளாதார மாநாட்டில் பல பொருளாதார நிபுணர்கள், தொழில் அதிபர்கள் இருப்பார்கள். அவர்களுக்கு ஒரு புதிய பொருளாதார கொள்கையை விளக்கும் பொழுது அடிப்படை பொருளாதார புரிதல் கொடுக்க வேண்டிய அவசியம் இல்லை. பொருளாதார கொள்கையை பற்றி ஒரு குறிப்பு கொடுத்தாலே போதும், அவர்களே அதனை புரிந்து, அதன் விளைவுகளை கற்பனை செய்யக்கூடியவர்களாக இருப்பர்.

சொந்த உதாரணம் 2
என்னுடைய Internship-இல் / வேலையில் சில வேலைகளை பற்றி ஆய்வுகளின் முடிவுகளை மூத்த அதிகாரிகளுக்கும் சக ஊழியர்களுக்கும் காட்சி பதிவு (ppt) தொடர் கொண்டு விளக்க வேண்டும். சில சமயம் தனி தனி யாக. ஆனால் மூத்த அதிகாரிகளின் நேரம் மிகவும் முக்கியமானது. பெரும்பாலும் அவர்கள் அரை மணி (30min) நேரம் மட்டுமே தருவார்கள். அவர்களுக்கு 30-40 காட்சி பதிவுகளை (slides) காண்பித்தால் அவர்கள் பொறுமை இழந்து விடுவார்கள். அவர்களுக்கு 6-10 காட்சி பதிவுகளே போதும். உதாரணமாக ப்ரிச்சனை என்ன, தீர்வு என்ன, திட்டம் என்ன என்று சுறுக்கமாக சொன்னாலே அவர்கள் புரிந்துக்கொள்ளு ஆற்றலும் அனுபவமும் கொண்டவர்கள் ஆவார்கள்.

மேலும்: இதழ்

குறட் கருத்து  (நன்றி: திரு. தமிழ்க்கடல் நெல்லை கண்ணன்)
கற்றுத் துறை போகிக் காமுற்றுக் கல்வியினைப்
பெற்றுத் துறை போகும் பேரறிவார் தம்மிடத்தில்
பெற்ற கல்வியினைப்பேசிப் பெருமையுறல்
நற்றவமாய்த் தானாய் வளரும் பயிரதற்கு
நலமாகத் தண்ணீரைத் தான் பாய்ச்சல் போலுயரும்
மற்றவரின் முன்னாலே வாய் திறத்தல் அய்யய்யோ
மலிவாக்கி அமுதமதை பாத்திரங்கள் கழுவுகின்ற
முற்றமதின் அங்கணத்தில் கொட்டுவதாய் வீணாகும்

குறள்
பொருட்பால் அவை அறிதல் குறள் 8ம் 10 ம்

உணர்வதுடையார் முன் சொல்லல்வளர்வதன்
பாத்தியுள் நீர் சொரிந்தற்று

அங்கணத்துள் உக்க அமிழ்தற்றால் தங்கணத்தார்
அல்லார் முன் கோட்டி கொளல் 

பரிமேலழகர் உரை
உணர்வது உடையார்முன் சொல்லல் - பிறர் உணர்த்தலின்றிப் பொருள்களைத் தாமே உணரவல்ல அறிவினையுடையவர் அவைக்கண் கற்றார் ஒன்றனைச் சொல்லுதல்; வளர்வதன் பாத்தியுள் நீர் சொரிந்தற்று - தானே வளர்வதொரு பயிர் நின்ற பாத்திக்கண் நீரினைச் சொரிந்தாற்போலும். 

விளக்கம் 
(தானேயும் வளர்தற்குரிய கல்வி மிக வளரும் என்பதாம். இவை இரண்டு பாட்டானும், ஒத்தார் அவைக்கண் எவ்வழியும் சொல்லுக என்பது கூறப்பட்டது.)

ஞா. தேவநேயப் பாவாணர் உரை
உணர்வது உடையார்முன் சொல்லல் -பிறர் உணர்த்த வேண்டாது தாமே பொருள்களை யுணரவல்ல அறிவுடையாரவைக்கண் கற்றார் ஒன்றைச் சொல்லுதல்; வளர்வதன் பாத்தியுள் நீர் சொரிந்த அற்று -தானாக வளரும் பயிர் நின்ற பாத்திக்குள் நீரை வார்த்தாற் போலும்.

தானே வளரும் அறிவு மிக விரைந்து வளரும் என்பதாம். இவ்விரு குறளாலும், ஒத்தாரவைக்கண் கற்றோர் தமக்குரிய இலக்கியநடையிற் பேசுக என்பது கூறப்பட்டது.

மணக்குடவர் உரை
யாதாயினும் ஒன்றைச் சொல்லுங்கால் அதனைத் தெரிந்தறியும் அறிவுடையார்முன்பு சொல்லுவது, வளர்வதொன்று நின்ற பாத்தியின்கண்ணே நீர் சொரிந்தாற்போலும்.

மு.வ உரை
தாமே உணர்கின்ற தன்மை உடையவரின் முன் கற்றவர் பேசுதல், தானே வளரும் பயிருள்ள பாத்தியில் நீரைச் சொரிந்தாற் போன்றது

சாலமன் பாப்பையா உரை
பிறர் சொல்லாமலேயே தாமே பலவற்றையும் அறிந்து கொள்ளும் அறிவுத் திறம் உடையவர் கூடியுள்ள அவையில் பேசுவது வளரும் பயிர் நிற்கும் பாத்தியில் நீரினைப் பாய்ச்சியது போலாம்.

No comments:

Post a Comment